இந்திய கடற்படையின் கிழக்குக் கரையோரத் தலைமையக நகரத்தில் பயணம் - 12 - அனந்தகிரி மலை (G)கலிகொண்டா வியூ பாய்ன்ட் - காஃபி தோட்டம் - தடிகுடா நீர்வீழ்ச்சி

அனைவருக்கும் எங்கள் இருவரின் (துளசிதரன், கீதா) இனிய ஆங்கிலப் புத்தாண்டு வாழ்த்துகள்! எல்லோரும் ஆரோக்கியத்துடன் மகிழ்ச்சியாக இருக்க இந்த ஆண்டும் இனி வரும் ஆண்டுகளும் நல்கிட வாழ்த்துகள்!

இன்று புத்தாண்டில் என்னோடு அழகான இயற்கை இடங்களைக் கண்டு களிக்கப் பயணியுங்கள்! மன நலத்திற்கும் உடல் நலத்திற்கும் உற்ச்சாகம் தரும் இயற்கை! ஆகவே பயணம் செய்வீர், வாய்ப்பு கிடைத்தால் இப்புத்தாண்டில் பயணம் செய்து உங்களைப் புத்துணர்வோடு வைத்துக் கொள்ளுங்கள்!

துளசியின் வீட்டில் கட்டுமான வேலைகள், வீட்டை விரிவாக்கும் பணிகள் நடப்பதால் அவரால் பதிவுகள் வாசித்துக் கருத்து அனுப்ப இயலவில்லை. நேர நெருக்கடி. ஏப்ரல் வரை பணிகள் தொடரும்.  

********

அங்கிருந்து வெளியில் வந்து ஒரு கார் ஏற்பாடு செய்து கொண்டு (பேருந்து நிலையத்தின் அருகிலேயே நிறைய கிடைக்கின்றன) போரா குகைகள் பார்க்கப் பயணித்தோம். தோராயமாக 36.5 கிமீ. வழியில் சில இடங்கள் பார்த்தோம்//

என்று சொல்லி முடித்திருந்தேன். கூடவே விரைவில் பதிவிடுகிறேன் என்றும் சொல்லியிருந்தேன். அப்படிப் பார்த்த இடங்கள் பற்றித்தான் இந்தப் பதிவு. கொஞ்சம் பெரிதாக இருக்கலாம். பொறுத்துக் கொள்ளுங்கள். 

கலிகொண்டா வியூ பாய்ன்ட்

அரக்கு பள்ளத்தாக்கிலிருந்து போரா குகைகள் (தோராயமாக 36.5-37கிமீ) நோக்கிய பயணத்தில் 17.5-18 கிமீ தூரம் சென்றதும் இந்த கலிகொண்டா வியூ பாயின்ட் என்ற இடம் உள்ளது. வழி முழுவதும் வலப்பக்கம் நிறைய காஃபி தோட்டங்கள். 

கலிகொண்டா வியுபாயின்ட் எனும் இந்த இடம் பல மலைப்பகுதிகளில் உள்ள வியூ பாயின்ட் போன்றுதான். சாலையின் ஓரத்திலேயே கொஞ்சம் ஒதுங்கி ஒரு முற்றம் போன்ற இடம் கம்பித் தடுப்புடன் உள்ளது. அனந்தகிரி மலைகளின் அழகான காட்சிகளை இங்கிருந்து பார்க்கலாம். 

இந்த கலிகொண்டா இங்குள்ள கிழக்குமலைத் தொடரின் இரண்டாவது பெரிய சிகரமாகும். ஏகதேசம் 4300 அடி உயரத்தில் அமைந்துள்ளது. 

இங்கிருந்து காணும் அரக்கு பள்ளத்தாக்கு மற்றும் மலைகளின் அழகைச் சொல்லிட வார்த்தைகள் இல்லை. மனதிற்கும் உடலிற்கும் உற்சாகமும் தெம்பும் கொடுக்கும் இடம். Tranquilizing Place புத்துணர்ச்சி கொடுக்கும் அனுபவம். நான் மெய் மறந்து பார்த்துக் கொண்டிருந்தேன். 

ரயில் பாதை தெரிகிறதா...

தூரத்தில் தெரியும் அழகான ரயில் பாதை (நாங்கள் அப்படித்தானே வந்தோம்) எதிரில் தெரியும் அழகான சாலை என்று இன்னும் பல காட்சிகளை உங்களுடன் பகிரலாமே என்று வளைத்து வளைத்து படம் எடுக்க முனைந்த போதெல்லாம் யாரேனும் ஒருவர் ஃப்ரேமிற்குள் வந்துவிடுவாங்க. என் கேமராவோ எப்போது சுணங்கும்னு தெரியாது. என்னடா இவ 4 அடியார் படம் எடுக்கறப்ப நாம குறுக்கே போகாம இருக்கலாமேன்னு ஹூம்...சரி அவர்கள் மலைக்காட்சிகளை எடுக்கறாங்களான்னா இல்லை....எல்லாம் செல்ஃபி மேனியாஸ். அதிலும் ஒரு பையன் அந்தக் கம்பியில் அபாயகரமாக உட்கார்ந்துகொண்டு அதுவும் தன் தோழி/காதலியுடன் செல்ஃபி.  கொஞ்சம் கை ஸ்லிப் ஆனா டிக்கெட் வாங்கிடுவாங்க ரெண்டு பேரும். 

எதிரில் சாலை

நம்ம குழுவோ எக்ஸ்ப்ரஸ் குழு. எப்படியோ நுழைந்து கம்பி அருகில் சென்று கிடைத்த கேப்பில் கொஞ்சம் சுட்டேன். நிறைய எடுக்க முடியவில்லை. கோணம் பார்த்து க்ளிக் செய்யும் போது செல்ஃபி எடுக்கும் ஆர்வத்தில் என்னைத் தட்டி விடுதலும் நடந்தது.  எடுத்தவை போதும் என்று தப்பித்து புகுந்து வெளியில் வந்தேன். 

அங்கும் தீனிக் கடைகள், சோளம், வறு கடலை, குளிர்பானங்கள் காஃபி, தேநீர் என்றிருந்தன. சாப்பாடு, டிஃபன் கூட ஒரு சிறிய கடைக்குள் போட்டுக் கொடுத்துக் கொண்டிருந்தார்கள். கூடவே குப்பைகளும். நம்ம மக்கள் திருந்தவே போவதில்லை!

காஃபி Trail - காஃபி தோட்டத்தின் நடுவில் ஒத்தையடிப் பாதையில்

அனந்தகிரி மலைக் காட்சிகளைப் படம் பிடித்ததுக் கொண்டு அங்கிருந்து கிளம்பியதும் நாங்கள் சென்ற காரின் ஓட்டுநர் அடுத்து 3 கிமீ தூரத்தில் இருக்கும் காஃபி தோட்டம் பார்க்கலாம் என்றதும், நான் ஏற்கனவே குறித்து வைத்திருந்த அருவிகளில் - கடிக்கி, சப்பாறை, ரானா ஜில்லேடா, தரகட்டா, தடிகுடா/அனந்தபுரி அருவி - தடிகுடா/அனந்தபுரி அருவி இந்த அனந்தபுரி மலைகளில் இதே சாலையில் சற்று தூரத்தில் உண்டே அங்கு போக முடியுமா என்று கேட்க, அவர் போகலாம் என்று சொன்னதும் எனக்கு ஒரே மகிழ்ச்சி. 

மற்ற அருவிகளுக்கு அன்று செல்ல நேரமில்லை. வேறு வேறு திக்கில் செல்ல வேண்டும். சில கொஞ்சம் காட்டில் நடக்கவும் வேண்டும். இரண்டு நாட்கள் தங்கினால்தான் செல்ல முடியும். இந்த தடிகுடா/அனந்தகிரி நீர்வீழ்ச்சிதான் போகும் வழியில் என்பதால் இதைக் குறித்து வைத்திருந்தேன்.

முதலில் காஃபி தோட்டம் அதன் பின் தடிகுடா அருவி.

காஃபி தோட்டம் என்றால் காலையில் எழுந்தவுடன் காஃபி ராகம் பாடும் கீதா விடுவாளா!!! காஃபி தோட்டத்தைக் காண கொஞ்சம் மலையின் மேலேறி அங்கிருக்கும் ஒற்றையடிப் பாதையில் நடந்து உள்ளே சென்று ஆஹா...மிகவும் ரசித்துப் பார்த்து படங்களும் எடுத்துத் தள்ளினேன். கேரளத்திலும் பார்த்ததுண்டு என்றாலும் இங்கும்.....அவற்றுள் சில இங்கு...

ஒத்தையடிப்பாதை

காபித் தோட்டத்தின் கீழே சாலையில் காபி பொடி, மலையில் விளைந்த மிளகு, ஏலக்காய் மசாலாக்கள் என்று வைத்திருந்தார்கள். காஃபி என்றதும் கீதாவாவது சுவைக்காமல் வருவதாவது! அதுவும் இந்த விஷயத்தில் குழுவினரும் ஒரே அலைவரிசை எனும் போது, சூடாகக் காபியும் குடித்தோம். காபி நன்றாக இருந்தது என்று என்னுடன் வந்தவர்கள் சொன்னார்கள். நிஜமாகவே சுத்தமான காபிதான். எனக்கு ஃப்ளேவர் தெரியாததால் சொல்லமுடியவில்லை. தேநீரும் நன்றாக இருந்ததாகச் சொன்னார்கள். நாங்கள் காஃபி பொடியும், மிளகும் கொஞ்சம் மசாலா சாமான்களும் வாங்கிக் கொண்டோம். 

தடிகுடா அருவி

காஃபி தோட்டத்திலிருந்து சிறிது தூரம் - 5 கிமீ இருக்கும் - பயணித்ததும் சாலையில் ஓரத்தில் வண்டியை நிறுத்திவிட்டும் செல்லலாம் அல்லது அனந்தபுரி கிராமத்திற்குள் கொஞ்சம் தூரம் சென்று (அதன் பின் வண்டி செல்லாது) நிறுத்திவிட்டு அங்கிருந்து அரை கிமீ தூரம் நடந்து இந்த நீர்வீழ்ச்சியைக் காணலாம். 

நாங்கள் சென்றிருந்த போது இவ்வளவுதான் நீர் இருந்தது. சீசன் என்றால் தண்ணீர் கொட்டும். கடிக்கி, சப்பாறை, ரானா ஜில்லேடா அருவிகளைப் போல் அத்தனை பிராபல்யமில்லை அதுவும் கட்டிக்கி ரொம்ப பிராபல்யம். 

காரணம் இந்த தடிகுடா/அனந்தகிரி அருவி அனந்தகிரி கிராமத்தில் இருக்கிறது மட்டுமல்ல தங்கும் வசதிகளோ சுற்றுலாவிற்கான வசதிகளோ இல்லாததால் கண்டுகொள்ளப்படவில்லை. ஆனால் தற்போது இதைஹ்யும் ஆந்திரா சுற்றுலா துறை கணக்கில் எடுத்துக் கொண்டு பல வசதிகள் செய்து வருகிறதாகத் தெரிகிறது.

எனக்கு பிராபல்யம் அல்லாத இடங்களுக்குச் செல்வதில் அலாதிப் பிரியம்.

கடல் மட்டத்தில் இருந்து சுமார் 3100 அடி உயரத்தில், அனந்தகிரி மலையில் இருக்கும் இந்த அருவி, அரக்கு பள்ளத்தாகில் ஓடும் கோஸ்தானி நதியின் கிளை எனலாம். 

சுமார் 100 அடி உயரத்தில் பல அடுக்குகள்/படிகளாகப் (Cascade) பாயும் இந்த அருவியில் தண்ணீர் அதிகம் இருக்கும் காலத்தில் எப்படி இருக்கும் என்று கற்பனை செய்து பார்த்துக் கொண்டேன். 

ஒரு புறம் பாறைகள், மறு புறம் பசுமையான வயல்கள், மரங்கள், மலைகள் என்று அற்புதமா காட்சி. அனந்தபுரி கிராமத்தார்கள் கொடுத்து வைத்தவர்கள்! இந்த அருவியில் குளிக்கலாம். குளிக்கவும் முடியும்.

 

ஆனால் பிராபல்யமான கட்டிக்கி அருவியில் குளிக்க அனுமதி கிடையாது. அந்த அருவியில் இருந்துதான் அரக்கு பள்ளத்தாக்கு கிராமங்களுக்கு தண்ணி சப்ளை என்பதால் என்று ஓட்டுநர் சொன்னார்.  மிக மிக நல்ல விஷயம்.

பல படிகளில் தண்ணீர் கீழே வந்து வீழ்வது அழகோ அழகு! (என்னடா படத்துல தண்ணியே அவ்வளவா இல்லை இதைப் போய் கீதா அழகோ அழகுன்னு சொல்றாளேன்னு நினைக்கறீங்கதானே!!!! இதையும் ரசிப்பேனே!!!)  பாருங்க அருவி விழும் இடத்தில் மக்கள் என்னமாய் சுகித்து அனுபவிக்கிறார்கள். நாங்கள் கொஞ்சம் மெதுவாகப் பாறையில் கால் வைத்துக் கீழே இறங்கிச் சென்றிருக்கலாம் ஆனால் நேரம் இல்லை என்பதோடு உடன் வந்தவர்கள் வந்திருக்க மாட்டார்கள். என் மகன் உடன் வந்திருந்தால் நாங்கள் இருவரும் கீழ் வரை சென்றிருப்போம்.

அருவி கீழே வீழ்ந்து செல்லும் பாதை. 

அருவியைக் கண்டு ரசித்த பின் அங்கிருந்து சுமார் 11.5 கிமீ தூரத்தில் இருக்கும் போரா குகைகளைக் காணச் சென்றோம். அது அடுத்த பதிவில்!

-----கீதா

பகுதி 11, பகுதி 10, பகுதி 9, பகுதி 8, பகுதி 7, பகுதி 6,  பகுதி 5,  பகுதி 4, பகுதி 3, பகுதி 2, பகுதி 1