இந்திய கடற்படையின் கிழக்கு கரையோர தலைமையக நகரத்தில் பயணம் - 2

அடுத்த பதிவிலிருந்து இடங்கள் பற்றியும் அனுபவங்களையும்  ஒவ்வொன்றாகச் சொல்கிறேன் என்று முடித்திருந்தேன். 

முதல் பகுதி 

இதோ அடுத்த பகுதி. 

நிகழ்வு நடக்கும் இடம் ரயில் நிலையத்திலிருந்து அருகில் என்பதால், ரயில் நிலையத்திலிருந்து 1 கிலோமீட்டர் தூரத்தில் உள்ள சாய் நேஷனல் எனும் தங்கும் விடுதியில் அறைகள் பதிவு செய்திருந்தோம்.

குளிரூட்டப்படாத அறைக்கான ஒரு நாள் வாடகை ரூ 1000 அப்போது. கூடியவரை குளிரூட்டப்பட்ட அறையைத் தவிர்ப்பது வழக்கம். நாங்கள் பயணித்த மாதம் மே மாதம் என்றாலும், காலநிலை பரவாயில்லை. காலையில் இதமாகவே இருந்தது.  பகலில் வெயில் இருந்தாலும் கடினமாக இல்லை.  இரவு இதமாக இருந்தது. மிக அருகில் கடற்கரை என்பதாலோ என்னவோ நல்ல காற்று இருந்தது.

பறந்து வந்தவர்களும், ஆர அமர தூங்கிக் கொண்டு பயணித்தவர்களும் ரயில்நிலையத்தின் முகப்பில் சந்தித்துக் கொள்ளலாம் என்று திட்டம். இதில் 6 பேர்தான் நிகழ்வு முடிந்த மறுநாள் ஊர் சுற்றல் குழுவில்.  கீதா உட்பட என்பதைச் சொல்ல வேண்டுமா என்ன!

விமானநிலையத்திலிருந்து ரயில் நிலையம் 13 கிமீ தான். மற்றவர்கள் வந்து சேர்வதற்குக் காத்திருந்த நேரத்தில் ரயில் நிலையத்தின் சுவற்றில் இருந்த சித்திரங்களைக் கிளிக்கிக் கொண்டேன். கீதாவின் கையில் மூன்றாவது விழி இருந்தால் இமைத்துக் கொண்டேதானே இருக்கும்!!!

தங்கும் விடுதி, ரயில் நிலையத்திலிருந்து வளைந்து நேராகச் செல்லும் சாலையில்தான் என்பதையும் பார்த்து தெரிந்து வைத்துக் கொண்டுவிட்டேன். 

பறந்து வந்தவர்கள் 7 மணிக்கு வந்து சேர்ந்தார்கள். என் சுமை ஒரு முதுகுப் பை மட்டுமே என்பதாலும் விடுதி மிக அருகில்தான் என்பதாலும் நானும் மற்றொருவரும் நடந்து வந்துவிடுகிறோம் என்று சொல்லி, விடுதிக்கு நடந்து சென்றோம். மற்றவர்கள் ஆட்டோ பிடித்து வருவதற்குள் நாங்கள் விடுதியை நெருங்கிவிட்டோம்!!!!

எந்த ஊருக்குச் சென்றாலும் அந்த ஊரில் கொஞ்சம் காலாற நடந்து சென்று இடங்களைப் பார்ப்பது எனக்கு மிகவும் பிடித்த விஷயம். குறிப்பாக நடக்கும் தூரத்தில் இருக்கும் இடங்களுக்கு நடந்து செல்வதும் வழக்கம். அது போல ஊருக்குள் உள்ள இடங்களுக்குப் பேருந்தில் சென்று ஊரைப் பற்றி அறிந்து கொள்ளவும் பிடிக்கும்.

விடுதியில் அறைகள் சுத்தமாக, நன்றாகவே இருந்தன. டிவி, மேசை, நாற்காலி, டீபாய் என்று வசதியாகவும் இருந்தது. குறிப்பாக கழிவறை, குளியலறை சுத்தமாக இருந்தன.

என் கடமைகளை முடித்துக் கொண்டு மற்றவர்கள் கிளம்புவதற்குள் அருகில் உள்ள சாலைகளில் நடந்து வரலாம் என்று கிளம்பிவிட்டேன். விடுதியின் எதிரே மேம்பாலம். மேம்பாலத்தின் தூண்களில் அழகான வரலி சித்திரங்கள்.

அருகில் எங்கு பேருந்து நிறுத்தங்கள், வித்தியாசமான கடைகள் என்னென்ன என்று கண்கள் ஸ்கான் செய்து கொண்டே வந்தன.  டிப்பிக்கல் நம்மூர் நகரங்களின் சாலைகள் மேடு, பள்ளம், ஓட்டைகளுடன்தான். நடை பாதைக் கோயில்கள், கொஞ்சம் பெரிய அம்மன் கோயில், கைவினைப் பொருட்கள் விற்கும் கடைகளிலிருந்து பலசரக்குக் கடைகளும், துணிக்கடைகள், நகைக் கடைகள் (இது இல்லாமலா!!!) சுற்றிலும் எல்லா வசதிகளுடனும், வீடுகள் காலனிகள் என்று இருந்தன. 

அருகில் மிகவும் புகழ்பெற்ற கராச்சி பேக்கரி இருந்தது என் கண்ணில் படாமல் போகுமா!! ஒரு கிளிக் பண்ணலாம் என்றால் திடீரென்று மூன்றாவது விழி இமைக்காமல் படுத்தியது. கவலை தொற்றிக் கொண்டது. மறுநாள் ஊர் சுற்ற மூன்றாவது விழி வேண்டுமே! சரி வருவது வரட்டும்.

அன்றைய தினம் உணவு நிகழ்வு நடக்கும் இடத்தில் என்பதால் பிரச்சனை இல்லை. அடுத்த நாள் உணவு வெளியில்தானே, சைவ உணவகங்களைப் பார்த்து வைத்துக் கொள்ளலாம் என்றால், அருகில் ஒரே ஒரு மெஸ். மிகவும் சிறிய உணவகம் தவிர வேறு எதுவும் கண்ணில் படவில்லை. ஆனால் சற்றுத் தள்ளி சைவ உணவகம் இருந்தது.

அரை மணி நேரம் சுற்றிவிட்டு அறைக்குச் சென்று எல்லோரும் நிகழ்வுக்குச் சென்றாயிற்று. அருமையான ஆந்திரா வகை உணவுகள் ருசிக்கலாம்னு போனா ஹூம். தமிழ்நாட்டு வகைகள்தான்.  பெயர்தான் வேறு. மின்னப்ப கரேலு – என்னடா இது புச்சா இருக்கேன்னு தோணுதா! ஒன்னுமில்லை உளுந்து வடை மெதுவடைதான்!! பாதாம் ஹல்வா, பஜ்ஜி வகைகள், கட்டே பொங்கலி – பொங்கல் (சிறிய வித்தியாசம், பச்சை மிளகாய் சேர்த்திருந்தார்கள், கொஞ்சம் நெகிழ்வாக இருக்கும். தாரளமயமாக்கலில் நெய்) இட்லி, பூரி, என்று காலை,

பொப்பட்லு – ஹிஹிஹி இது இனிப்பு போளி, என்று பெயர்களில் வித்தியாசத்தைத் தவிர மதியம், வழக்கமான சாப்பாடு. ஆந்திரா லோகோ ஆவாக்காயா, கோங்குரா, பப்புலு பொடி இருந்தன. இரவு, வேற்றுமையிலும் ஒற்றுமையைப் பறைச்சாற்றும் உணவுகள் மற்றும் உலகமயமாக்கல் உணவுகள்! பெரிதாகச் சொல்வதற்கு இல்லை. எனவே மறுநாள் சென்ற இடங்களைப் பற்றித் தொடங்கிவிடுகிறேன்.

மறு நாள், தங்கிய இடத்திலிருந்து அருகில் பார்த்து வைத்திருந்த சிறிய மெஸ் போன்ற உணவகத்தில் எங்கள் காலை உணவை முடித்துக் கொண்டு – ரொம்ப நல்ல மெஸ் என்று எல்லாம் சொல்ல மாட்டேன் - (ஒன்றும் ஸ்பெஷல் இல்லை. தோசை, காரசாரமான தக்காளிச் சட்னி, தேங்காய்ச் சட்னி, ஆந்திரா சாம்பார்) -  3 கிமீ தூரத்தில் இருக்கும், (ரயில் நிலையத்திலிருந்து 4 கிமீ) ராமகிருஷ்ணா கடற்கரை – செல்லமாக ஆர் கே கடற்கரை நோக்கி இரு ஆட்டோக்களில் சென்றோம். அப்போது ஆட்டோ சார்ஜ் ரூ50-60. 

ராமகிருஷ்ணா கடற்கரை - ஆர் கே கடற்கரை பெயர்க் காரணம் - கடற்கரையில் ராமகிருஷ்ணா மடம் இருப்பதால். பட்டியலில் முதல் இடத்தில் ராமகிருஷ்ணா மடமும், ராமகிருஷ்ணர் வழிபட்ட காளிமாதாவுக்கான கோயிலும், அதே வளாகத்துக்குள் அதை அடுத்து சிவன் கோயிலும் என்பதால் முதல் விசிட். தொடங்கும் போது கோயில் போய்ட்டு சுபமா தொடங்க வேண்டாமா!

(முதல் நாள் இமைக்க மறுத்த மூன்றாவது விழி மறுநாள் அவ்வப்போது அடம் பிடித்தாலும், பாவம் கீதா என்று கொஞ்சம் இமைத்ததால் கொஞ்சம் படங்கள் எடுக்க முடிந்தது.)

காளிமாதா கோயில் - கோயிலும் பின் புறம் அடுக்கு மாடிக் குடியிருப்பு

கடற்கரையை நோக்கி இருக்கும் அழகான காளி கோவில். இக்கோயிலின் வடிவமைப்பு, மிக அழகு என்பதால் கடற்கரைக்கு வருபவர்கள் பலரையும் கவர்கிறது என்று தோன்றுகிறது. முதலில் சிறிய அளவில் மூங்கிலால் வேயப்பட்டு இருந்த கோயில் அதன் பின் 1984 ஆம் வருடம்  காங்கிரீட்டால் அழகு வடிவத்தில் கட்டப்பட்ட கோயில். மட்டுமல்ல வளாகத்தில் அழகான தோட்டமும் என்பது கூடுதல் ஈர்ப்பு. ஏறக்குறைய கொல்கத்தாவில் இருக்கும் காளிகோயிலைப் போன்ற வடிவம். 

உயரமான தூண்கள், வளைவுகள் என்று மிக அழகாகப் பளிச்சென்று இருக்கிறது. சுத்தம் என்றால் சுத்தம். அமைதியோ அமைதி.  எதிரே கடலின் அலைகளின் நாதம்.

கோயில் வளாகத்தினுள்ளேயே கோயில் நிர்வாக அலுவலகம், பூசை செய்பவர்கள் தங்கும் சிறிய வீடு,  சமையலறை என்று இருக்கிறது. அடுத்தாற்போல் சிவபெருமான் கோயில். சிவன் கோயிலின் தனிச்சிறப்பு 10 கிலோ எடையுள்ள ஒற்றைக்கல்லிலால் ஆன ‘ரசலிங்கம்’. 

இந்தக் கோயில் விசாகப்பட்டினத்தின் ஆர்கே  கடற்கரைக்கு அடையாளமாக இருக்கிறது. மட்டுமல்ல கோயிலின் எதிரில் கடற்கரைச் சாலையில் உள்ள பேருந்து நிறுத்தம் எல்லாப் பகுதிகளையும் இணைக்கிறது.

 ஆசிரமம் செல்லும் சாலை. தூரத்தில் ஆசிரமம் தெரிகிறது பாருங்க

காளிமாதா கோயிலின் பின் புறம் உள்ள சாலையில் ஸ்ரீராமகிருஷ்ணா மிஷன் ஆசிரமம் உள்ளது. 1938 ஆம் ஆண்டு தொடங்கப்பட்டு, 1939 ஆம் ஆண்டு ராமகிருஷ்ணா மிஷன் பராமரிப்பில் ஏற்றெடுக்கப்பட்டது. 

ஸ்ரீ ராமகிருஷ்ணர் ஆசிரமம்

காளிமாதா கோயில் அருகில் உட்பக்கம் செல்லும் சாலையில் 3 நிமிடம் நடந்தால் ஆசிரமம்.  மிக மிக அழகான அமைதியான ஆசிரமம். உள்ளே புகைப்படம் எடுக்க அனுமதி இல்லை. எனவே வெளியே இருந்து மட்டும் எடுத்துக் கொண்டேன். அந்தச் சாலையே மிக மிகச் சுத்தமாக அமைதியாக அழகாக, தனி வீடுகள் கொண்ட  பகுதியாக இருக்கிறது. கடற்கரைச் சாலையில் அடுக்கு மாடிக் குடியிருப்புகள்!

ஆசிரமத்தின் உள்ளே பெரிய ஹால். நடுவே ஸ்ரீராமகிருஷ்ண பரமஹம்சரின் திரு உருவச்சிலை. பெரிய அளவில்.  ஹாலில் நாம் அமர்ந்து தியானம் செய்யலாம்.  நாங்களும் அமைதியாகச் சற்று நேரம் அமர்ந்து தியானம் செய்ய அமர்ந்தோம். எனக்கு எங்க தியானம்?  – கடற்கரைக்குச் செல்ல வேண்டும்.

சிந்துபைரவியில் சிவக்குமார் ஒரு பாறையின் மீது அமர்ந்து பாடுவாரே, அலை வந்து அடிக்குமே அந்த சீன்  விசாகப்பட்டினத்தில் எடுத்ததாகச் சொல்லப்படும் அந்தப் பாறை இந்தக் கடற்கரையில் இருக்குமா? நானும் அந்தப் பாறையின் மீது அமர்ந்து பாடுவது போன்றும், அலைகள் வந்து மோதுவது போன்றும் மனதில் ஒரு சீன் ஓடிட…..என் முதுகில் ஒரு கை…ஆ பாருங்க நான் மட்டும் ஆழ்ந்த தியானத்தில் இருந்திருக்கிறேன்!!!!!!

அடுத்து ஆசிரமத்தைச் சுற்றிப் பார்க்கலாம் என்று வெளியே வந்து அப்படியே லயித்துவிட்டேன். சுற்றியுள்ள வளாகம் முழுவதும் அழகான பூந்தோட்டம், பாக்குமரம், பல வகை மரங்கள் என்று அழகுப் பச்சை. படங்களைத் தனியாக ஒரு பதிவில் போடுகிறேன். ஒரு சில படங்கள்தான் சரியாக வந்தன.

மடம் முன்னெடுத்துச் செய்யும் சமூகச் சேவைகள் - பிசியோதெரபி, ஹைட்ரோதெரபி, சிறப்புக் கல்வி, பேச்சு சிகிச்சை, பெற்றோருக்கு ஆலோசனை வழங்குதல் போன்ற வசதிகளுடன் கூடிய ஸ்பெஷல் குழந்தைகளுக்குச் சிகிச்சை அளிக்கும் மையம்; மருத்துவ முகாம்கள் நடத்தப்படும் நடமாடும் மருத்துவப் பிரிவு; 19,200 புத்தகங்கள் மற்றும் 60 செய்தித்தாள்கள் மற்றும் பருவ இதழ்கள் கொண்ட ஒரு நூலகம் மற்றும் ஒரு வாசிப்பு அறை; ஆசிரமத்திலிருந்து சற்று தொலைவில் அமைந்துள்ள ஒரு ஆங்கில வழி மேல்நிலைப் பள்ளி; ஒரு கணினி பயிற்சி மையம்; ஸ்ரீ ராமகிருஷ்ணர், அன்னை ஸ்ரீ சாரதா தேவி மற்றும் சுவாமி விவேகானந்தர் ஆகியோரின் வாழ்க்கை பற்றிய கண்காட்சி.

பள்ளிகள் மற்றும் கல்லூரிகளில் கல்வித் திட்டங்கள்; தினசரி வழிபாடு; ஆசிரமம் மற்றும் பிற இடங்களில் சமய சொற்பொழிவுகள்; ஸ்ரீ ராமகிருஷ்ணர், அன்னை ஸ்ரீ சாரதா தேவி, சுவாமி விவேகானந்தர் மற்றும் பிற ஆன்மீகக் குருக்களின் பிறந்தநாள் கொண்டாட்டம்; ஏழை மாணவர்களுக்குக் கல்வி உதவித்தொகை மற்றும் ஏழைகளுக்கு மருத்துவ உதவி; என்று பல்வேறு தரப்பட்ட சேவைகளைச் செய்து வருகிறது.

வெளியில் வந்து கடற்கரைச் சாலைக்கு வந்தால், எதிரே வா வா என்று அழைக்கும் அழகான கடற்கரை. அலைகளின் சங்கீதத்தைக் கேட்போம்!  கடற்கரை பற்றியும் அனுபவங்களும் அடுத்த பகுதியில். 

காக்கையின் மேடைக்கச்சேரி!

--------கீதா