இந்திய கடற்படையின் கிழக்கு கரையோர தலைமையக நகரத்தில் பயணம் - 1

 

பல நாட்களாக (நாட்களாகவா வருடங்களாகவா? கீதா தெளிவா சொல்லிடு) இப்பயணம் குறித்து எழுத நினைத்து ஒரு வழியாக இப்ப பிள்ளையார் சுழி போட்டு எழுதத் தொடங்கிவிட்டேன். தடங்கல் இல்லாம இத்தொடரை எழுதி முடிக்கணுமே!

இந்தப் பயணம் மேற்கொண்டு, 5 வருடங்கள் ஆகிவிட்டதுன்னு அப்படி எல்லாம் உண்மைய சொல்ல மாட்டேன். அதனாலென்ன. இடங்கள் பற்றியும் என் அனுபவங்கள் பற்றியும் தானே எழுதப் போகிறேன். வருடமா முக்கியம்? வெங்கட்ஜியும் விசாகப்பட்டினம் பயணத் தொடர் எழுதியிருந்தார் உங்களுக்கு நினைவு இருக்கலாம்.

சென்னையிலிருந்து சென்று, திரும்பி வந்த ரயில்/விமான விவரங்கள்  குறித்து வைத்திருந்தவை எல்லாம் கேடான ட்ரைவில் மாட்டிக் கொண்டுவிட்டது. இப்போது நினைவில்லை. சொல்லியும் இப்போது பயனில்லை. காரணம் விவரங்கள் இப்போது மாறியிருக்கின்றன. 

நாங்கள் சென்றது ஒரு குடும்ப நிகழ்விற்காக என்பதால் அதைச் சுற்றுலா என்றிட முடியாது. ஆனால், என் விருப்பம், அப்படியே சுற்றுலாவாகவும் மாற்றிக் கொள்ளலாமே, ஊருக்குள்ளும், கொஞ்சம் வெளியேயும் இடங்கள் பார்த்துவிட்டு வரலாமே என்று.  என் விருப்பம் அப்ரூவ் ஆனதால், இருந்த 4 நாட்களில் ஒரு நாள் தவிர மற்ற 3 நாட்களில் எதை எல்லாம் பார்க்கலாம் என்று கூகுள் உதவியுடன் குறித்து வைத்துக் கொண்டுவிட்டேன்.

என் பட்டியல், ஆர்கே கடற்கரை, கடற்கரையில் அமைந்திருக்கும் ஐஎன்எஸ் குர்சுரா (எஸ்20) நீர்மூழ்கிக் கப்பல் அருங்காட்சியகம் மற்றும் ராமகிருஷ்ணா கோயில், கைலாசகிரி, ருஷிகொண்டா கடற்கரை, அரக்குபள்ளத்தாக்கு மற்றும் மிகவும் புகழ் பெற்ற போரா குகைகள், செல்வதற்கான ரயில் விவரங்கள், தென்னிந்தியாவின் காஷ்மீர் என்று சொல்லப்படும் லம்பாசிங்கி - நாங்கள் சென்றது மேமாதம் என்பதால் லம்பாசிங்கியில் வரும் பனியை பார்க்க முடியாதுதான் என்றாலும் மலையைப் பார்க்கலாமே என்ற ஆர்வத்தில் மற்றும் ஸ்ரீகாகுளம் ஸ்ரீமுகலிங்கம் (115கிமீ) – மூன்று சிவன் கோயில்கள் – கோயிலின் அமைப்பு என்னை மிகவும் கவர்ந்ததால் அதையும் பட்டியலில் போட்டு இடங்களைத் தேர்வு செய்திருந்தேன்.

என் அலைவரிசையை ஒத்தவர்கள் இல்லை. அன்னாவரம், மற்றும் சிம்மாச்சலம் சேர்க்கப்பட்டதால் ஸ்ரீகாகுளம், லம்பாசிங்கி நீக்கப்பட்டன. 

அந்த வருடங்களில் நான் புகைப்படம் எடுக்கப் பயன்படுத்தியது சாதாரண நிக்கான் கூல் பிக்ஸ் கேமரா. (இப்போது நான் பயன்படுத்தும் சோனி சைபர் ஷாட் போல. இரண்டுமே பயன்படுத்தப்பட்ட பிறகு என்னிடம் வந்தவைதான்). 

என் பழைய பதிவுகளில் புகைப்படங்கள் நிக்கான் கேமாராவில் எடுக்கப்பட்டவை. நிக்கான் பிரச்சனை பண்ணினாலும் - அவ்வப்போது எரர் எரர் என்று வந்து கொண்டிருந்தாலும் - விடுவேனா? அதற்கு ஏற்றார் போல் பக்குவமாகக் கையாண்டு நிறைய படங்கள் எடுத்தேன். ஒரு சில படங்கள் சரியாக வரவில்லை. வந்தவற்றைப் பகிர்கிறேன்.

அடுத்த பதிவிலிருந்து இடங்கள் பற்றியும் அனுபவங்களையும்  ஒவ்வொன்றாகச் சொல்கிறேன். இப்போது சென்ற இடங்களின் டீஸர்! 

ருஷிகொண்டா கடற்கரை 

(B)போரா குகைகள் - குஹாலு. 

கைலாசகிரி மலைக்கு தொங்கூர்தியில் செல்லும் போது எடுத்த படம் - ஆர் கே கடற்கரையின் காட்சி

ஆர் கே கடற்கரை

ஆர் கே கடற்கரையில் உள்ள நீர்மூழ்கிக் கப்பல் அருங்காட்சியகத்தின் வெளிப்புறம்

அன்னாவரம், சிம்மாச்சலம் படங்கள் வெகு குறைவு என்பதால் அவற்றைப் பற்றிச் சொல்லும் பகுதியில் அப்படங்களைப் பகிர்கிறேன். 

----கீதா