போதைத் தீயில் கருகும் காதல்

 

எம்டிஎம்ஏ - கேரளத்தில் இப்படி நிறைய இடங்களில் பிடித்திருக்கிறார்கள்

காதலுக்குக் கண்ணில்லை என்பார்கள்.  காதல், சாதி, மதம், இனம், மொழி பாராமல் உருவாகி ஆட் கொள்ளும் திறன் வாய்ந்தது. உண்மையான காதல் உயிரினும் மேலாகக் கருதப்படும் ஒன்று.  காதலுக்காக உயிர் நீத்த எத்தனையோ காதலர்களை நம் வரலாறு இப்போதும் போற்றிப் பாடிக் கொண்டுதான் இருக்கிறது. காதல் மற்றும் கல்யாண ஆசை இளைஞர்களிடம் குறைந்து வருகிறது என்பதை அறிந்த ஜப்பான் அரசு, அதை நிலைநாட்ட எடுக்கும் தீவிரமான நடவடிக்கைகளிலிருந்து மனித இனத்திற்குக் காதல் எவ்வளவு இன்றிமையாதது என்பது தெளிவாக நம் ஒவ்வொருவருக்கும் புரிகிறது. 

இருப்பினும் இப்போது நிகழும் பல நிகழ்வுகளைப் பார்க்கும் போது, இளைஞர்களிடையே தீவிரமாகப் பரவி வரும் போதைப் பழக்கம் காதலையே புரட்டிப் போட்டு அதன் மேல் சம்ஹாரத் தாண்டவமாடுகிறதோ என்ற ஐயம் பலமாகத்தான் செய்கிறது.

கடந்த வாரம் கேரளாவில் தொடுபுழ எனும் இடத்தில் உள்ள ஒரு விடுதியில் அக்ஷயா ஷாஜி (22) யூனுஸ் ரசாக் (25) எனும் இருகாதலர்கள் போலீசாரால் கைது செய்யப்பட்டிருக்கிறார்கள். பிடிபட்ட போது அவர்களிடமிருந்து எம்டிஎம்ஏ எனும் போதைப் பொருளும் கைப்பற்றப்பட்டிருக்கிறது. ரசாக், அதை சின்ன கண்ணாடிக் குடுவையில் சூடாக்கி அதிலிருந்து எழும் புகையை இழுக்க முயலும் போது பிடிக்கப்பட்டிருக்கிறார். அக்ஷயா கதறி அழுதபடி போலீசாருடன் நடக்கும் காட்சி நெட்டில் வைரலாகியிருக்கிறது

அவரது நடையும்  கதறலும் நடிப்பு என்று பலரும் குற்றம் சாட்டினாலும், சிலர் எம்டிஎம்ஏ போன்ற போதைப் பொருளுக்கு அடிமையானவர்களின் இயல்பு அதுதான் என்கிறார்கள். எலும்பும் தோலுமாக நடக்க முடியாமல் நடக்கும் அந்த அக்ஷயாவின் வாழ்க்கை சில மாதங்களுக்கு முன்பு வரை சீராகத்தான் சென்று கொண்டிருந்திருக்கிறது. 

கொத்தமங்கலம் அருகே நெல்லிக்குழி இடநாடு எனும் இடத்தைச் சேர்ந்த அக்ஷயா ப்ளஸ் டு வில் நல்ல மதிப்பெண்களுடன் தேறி, எம் ஏ கல்லூரியில் இளம் கலை பட்டப்படிப்பில் சேர்ந்து அதிலும் நல்ல மதிப்பெண் பெற்று வெற்றி பெற்றவர்.

ஓவியம் வரைவதும், பாடுவதிலும் முதலிடம் பெற்று பல விருதுகள் பெற்ற நல்ல மாணவியாகத் திகழ்ந்தவர். பட்டப்படிக்குக்குப் பின் எர்ணாகுளத்தில் 6 மாத கால அக்கவுண்டிங்க் படிப்பில் சேர்ந்து ஏதேனும் ஒரு நல்ல வேலையில் அமர வேண்டும் என்ற ஆர்வத்தைக் கண்டதும், கூலி வேலை செய்யும் தந்தையும், சிறு கடை ஒன்றை நடத்தும் தாயும் அதற்குத் தடை சொல்லவில்லை.

இதனிடையே, எர்ணாகுளத்தில் இருக்கும் போது மொபைலில் தொடர்பு கொண்ட யூனுஸ் ரசாக்குடனான காதல், 4 மாதத்திற்கு மேல் படிப்பைத் தொடர அனுமதிக்கவில்லை.  இதனால் மனமுடைந்த தந்தை ஷாஜி அக்ஷயாவின் மொபைலை எறிந்து உடைத்தார். காதலனுடன் தொடர்பு கொள்ள முடியாததால் அக்ஷயா பூதத்தான் கெட்டு எனுமிடத்திலுள்ள அணைக்கட்டின் மேலிருந்து குதித்துத் தற்கொலைக்கு முயலவும் செய்திருக்கிறார்.

ஒரு ஆட்டோ ஓட்டுநர் உயிரைப் பணயம் வைத்து அவரைக் காப்பாற்றியிருக்கிறார். அதன் பின் அக்ஷயாவின் பெற்றோர் யூனுஸ் ரசாக்கின் வீட்டார்களைக் கண்டு திருமணம் பற்றிப் பேச, அவர்களுக்கு அந்தத் திருமணத்தில் சம்மதமில்லை என்று தெரியவந்ததும், அக்ஷயா, யூனுஸ் ரசாக்கை மறந்து வாழ்கிறேன் என்று உறுதி மொழி கூறியிருக்கிறார்.

அதன் பின் அருகிலிருந்த ஒரு துணிக்கடையில் விற்பனைப் பகுதில் வேலைக்குச் சென்றிருக்கிறார், அக்ஷயா. இதனிடையே எப்போது என்று தெரியவில்லை, எம்டிஎம்ஏ எனும் போதை மருந்து அவர்கள் காதலுடன் வளர்ந்து, காதலையே விழுங்கி அதற்காக அவர்கள் இருவரும் மீண்டும் ஒன்றாகத் தீர்மானித்திருக்கிறார்கள்.

விக்ரம் படத்தில் விஜய் சேதுபதி வாயில் போட்டுக் கடிக்கும் ஒரு நீல நிற திரவம் தான் Crystal Methamphetamine. எம்டிஎம்ஏ, பார்ட்டி ட்ரக் என்றெல்லாம் அழைப்படும் இந்தக் கொடிய போதை மருந்து நைஜீரியாவைச் சேர்ந்த போதைப் பொருள் மாஃபியைவைச் சேர்ந்தவர்கள், எம்டிஎம்ஏ வின் பல வகைகளை உணவு தயாரிக்கும் இடங்களில் தயாராக்கி தென்னகத்தின் பல பாகங்களுக்கு அனுப்புவதுண்டாம்.

ருசியோ, மணமோ இல்லாத இதை பழரசங்களில் கலந்து கொடுத்தால், குடிப்பவர்களுக்குக் குடிக்கும் போது தெரியாதாம். ஒருகிராம் எம்டிஎம்ஏ உள்ளே சென்றால் 12 முதல் 16 மணி நேரம் போதை உச்சத்தில் இருக்குமாம். ஒரு முறை பயன்படுத்தியவர்கள் இதன் அடிமையாகிவிட வாய்ப்பும் அதிகமாம். ஒரு முறை பயன்படுத்திவிட்டால் இதை இடையில் விடவே முடியாது, அப்படி முயன்றால் மனநிலை தவறுதல், கொலை முயற்சி, தற்கொலை முயற்சி இப்படி ஏதேனும் நிகழலாமாம்.

இதைப் பயன்படுத்துபவர்களது பற்கள் ஒரே வருடத்தில் சேதப்படும். இதயமும், சிறுநீரகமும் கடுமையாகப் பாதிக்கப்பட்டு 5 ஆண்டுகளிலிருந்து 10 ஆண்டுகளுக்குள் மரணம் உறுதி. இதைப் பயன்படுத்துபவர்களில் பெரும்பான்மையோர் இடையில் யாரையேனும் கொலை செய்து கைதாவது, தற்கொலை செய்து கொள்ளல் போன்ற சம்பவங்களும் நிகழ்கின்றனவாம். 

இப்படி, எப்போதோ யாராலோ இரையாக்கப்பட்ட யூனுஸ் ரசாக் விரித்த வலையில் சிக்கிய அக்ஷயா இப்போது போலீசாரால் கைது செயப்பட்டிருக்கிறார்.  போலீசாருக்குக் கிடைத்த விவரப்படி, ஒரு பெண், கல்லூரி வளாகத்தில் போதைப் பொருள் விற்கும் நோக்குடன் சுற்றுவதாகச் செய்தி கிடைக்க, சில நாட்களாக அக்ஷயாவைக் கண்காணித்தார்களாம்.

விடுதிக்கு வந்த பின் தான் அக்ஷயாவுடன் யூனுஸ் எனும் இளைஞனுக்கும் இதில் பங்கிருப்பது தெரிந்ததாம். இவர்களைப் போல் நாடெங்கும் போதைப்பழக்கத்திற்கு அடிமையான பல ஜோடிகள் போதைப் பொருட்களுடன் பள்ளி, கல்லூரி மாணவ மாணவியர்களை வட்டமிட்டுப் பறந்து கொண்டிருக்க வாய்ப்பிருக்கிறது. இது தெரியவரும் பொது மக்கள் உடனே இதுபற்றி விவரங்களைப் போலீசாருக்குத் தெரியப்படுத்த வேண்டியது மிக மிக அவசியம் என்று அறிவித்தும் இருக்கிறார்கள்.

இதனிடையே அக்ஷயாவின் தொடர்பைப் பற்றியும், போதைப் பழக்கத்தைப் பற்றியும் அறிந்த பெற்றோர், தற்கொலை செய்துகொள்ளவும் தீர்மானம் எடுத்திருந்தார்களாம்.  அக்ஷயாவின் தங்கையை நினைத்து எப்படியோ அதிலிருந்து பின் வாங்கியதாகச் சொல்லப்படுகிறது. ஆம்! இது ஒருவர் செய்த தவறு. அதற்கு மொத்தக் குடும்பமும் பலியாக வேண்டிய அவசியம்  இல்லைதானே?

போதை மருந்து பயன்படுத்துபவர்களுக்கு அது தேவை. அதற்குப் பணம் தேவை. பணத்திற்கு அதையே விற்று பணமாக்குவது என்ற முடிவை அவர்கள் சீக்கிரமாகவே எடுத்துவிடுவார்கள். இவர்கள்தான் விற்பனையாளர்கள். இப்படித்தான் இது போன்ற போதை மருந்து பயன்பாடு காட்டுத் தீயாய் நாடெங்கும் படர்கிறது.

வேண்டாம் என்பவர்களுக்கு அவர்களுக்குத் தெரியாமலேயே பழரசத்திலோ, ஐஸ்கிரீமிலோ, மிட்டாய்களிலோ கலந்து கொடுத்து அவர்களை அடிமையாக்கி, அவர்கள் வழியாகப் போதைப் பொருட்கள் விற்கப்படுகின்றன.

திருச்சூர் அருகே இது போல் ஒரு 17 வயதுப் பெண் போதைக்கு அடிமையாகி இடையிடையே காணாமல் போவதும், திரும்ப வீட்டுக்கு வருவதுமாக ஒரு செய்தி கடந்த மாதம் வந்திருந்தது. இது போன்றவர்களின் எண்ணிக்கை நாளுக்கு நாள் கூடிக் கொண்டிருக்கிறது. வாகன ஓட்டுநர்கள், பிற மாநிலத்திலிருந்து வந்து வேலை செய்பவர்கள், இப்படி நாம் தினமும் சந்திப்பவர்களிலும் போதைப் பொருள் பயன்படுத்துபவர்களின் எண்ணிக்கை அதிகரித்திருக்கிறது.

இவற்றை எல்லாம் கண்காணிப்பதும் கட்டுப்படுத்துவதும் அரசின் வேலை, போலீசாரின் வேலை என்று சொல்லிக் கொண்டிருந்தால் போதாது. அரசியல் கட்சித் தொண்டர்கள், சாதி சங்கங்கள், நடிகர் ரசிகமன்றங்கள், மகளிர் அமைப்புகள், பெற்றோர் உள்ளிட்ட பலவித கூட்டமைப்புகளும் மற்றும் ஒவ்வொருவரும் தனியாகவும், குழுக்களாகவும் இதற்கு எதிரான விழிப்புணர்வுக்காகவும், இவற்றை ஒழிக்கவும் போராட வேண்டும். குறைந்தபட்சம் நம் கண் படும் இடங்களிலேனும் போதைப் பொருட்கள் பயன்பாடு இல்லை என்று உறுதிப்படுத்திக் கொள்ள வேண்டும்.

காதலுக்குக் கண் வேண்டும் என்ற கருத்தும் வலியுறுத்தப்பட வேண்டும். அந்தக் கண் சாதி, மதம், இனம், மொழி இவை எதையும் பார்க்காவிட்டாலும் குறைந்தபட்சம், தான் காதலிப்பவர் போதை பழக்கத்திற்கு அடிமையில்லை என்பதை மட்டுமேனும் பார்த்துப் புரிந்து கொள்ள வேண்டும். அதோடு ஒரு போதும் போதைப் பழக்கத்தை மேற்கொள்ள மாட்டேன் என்று காதலிப்பவரிடம் உறுதியும் வாங்கிக் கொண்டுதான் காதலைத் தொடர்வேன் என்று காதலிப்பவர்கள் உறுதியாகவும் இருக்க வேண்டும். 

காதலர்களுக்கு மட்டுமல்ல, நாமும் வெளியில் உணவோ, பழரசமோ, ஐஸ்க்ரீமோ கூடியவரை சாப்பிடாமல் தவிர்ப்பது நல்லது. அல்லது கவனமாகத் தரமான உணவகங்களில் சாப்பிடுவது நல்லது. பெண்கள், பெண் குழந்தைகள் கவனமாக இருக்க வேண்டும். உலகம், குறிப்பாக இளைஞர் உலகம் மிகவும் மோசமாகப் பாதுகாப்பற்றப் பாதையில் பயணித்துக் கொண்டிருக்கிறது என்றே தோன்றுகிறது.

------துளசிதரன்