எனது மூன்றாவது விழியின் பார்வையில் - 16 - அகரா கிராமம் (AGARA VILLAGE) கோயில்கள், பெங்களூர்

அகரா கிராமம்/அகரா வில்லேஜிற்கு பெங்களூருக்கு இடம் பெயர்ந்த போது, கோவிட் சமயத்திற்கு முன் இரு முறை சென்றதுண்டு. அகரா வில்லேஜும் ஹெச் எஸ் ஆர் லே அவுட்டில்தான். 

(அந்தப் பகுதியில்தான் நம் கௌ அண்ணன் இருக்கிறார். அகரா வில்லேஜ் தாண்டினால் நம் பதிவர் அனு பிரேம் இருக்கும் இடம்.)

சமீபத்தில் அகரா வில்லேஜிற்குச் செல்ல நேரிட்டது. அதுவும் மழைநாளில் செல்ல வேண்டுமா? அப்படித்தான் ஆனது. இப்பகுதி பற்றி முன்பே எழுத நினைத்து வழக்கம் போல் தாமதித்து......சரி விடுங்க. கீதா அப்படித்தான்னு ஊர் அறிந்த விஷயமாச்சே. இப்போது  பதிவு.

பூரி ஜகன்னாதர் கோயிலைப் போன்று அதே வடிவமைப்பில், பெங்களூரில் உள்ள அகரா கிராமத்தில் (AGARA VILLAGE) சார்ஜாபூர் சாலையில் அமைந்துள்ளது இக்கோயில்.  

பேருந்து நிறுத்தம் – அகரா – அகரா வில்லேஜ். பேருந்து நிறுத்தத்தை ஒட்டியே உள்ளது கோயில்.

வருடந்தோறும் நடைபெறும் இதன் முக்கிய திருவிழாவான ரத யாத்திரையின் போது, பதினைந்தாயிரத்திற்கும் மேற்பட்ட பக்தர்கள் வருகை கலந்து கொள்கிறார்கள்.  பெங்களூரின் ஸ்ரீ ஜெகநாதர் கோவில் அறக்கட்டளையால் இந்த கோவில் பராமரிக்கப்படுகிறது என்று விக்கி உதவினார். 

கோவில் திறந்திருக்கும் நேரம் - காலை 6:00 மணி முதல் மதியம் 12:00 மணி வரையிலும், மாலை 4:00 மணி முதல் இரவு 9:00 மணி வரையிலும்.

இதுதான் பெங்களூரில் உள்ள பூரி ஜகன்நாதர் கோயில்

படி ஏறிச் சென்றால் கோயில். ஓரளவு பெரிய ஹால் நேரே கொஞ்சம் இருட்டாகவும், வெளிச்சப் புள்ளியும் ஏதோ உருவங்கள் இருப்பது போல் தெரிகின்றனவா? - நம் மொழியில் சொல்வதென்றால் மூலவர் ஜகன்நாதர், பலராமர், சுபத்ரா.  ஹாலிற்கும் சன்னதிக்கும் இடையில் படிகள் அவ்வளவே. உட்புறம் ஃபோட்டோ எடுக்கக் கூடாது என்று அங்கு அறிவிப்பு இருந்ததால் வெளியிலிருந்துதான் எடுத்தேன். உள்ளே சென்றவர் ஒருவர் மொபைலில் எடுத்துக் கொண்டுதான் இருந்தார்!!! அதெல்லாம் நாம கேட்க முடியுமா? 

கடைசிப் படியின் அருகே வலதுபுறம் கதவு திறந்திருப்பது தெரிகிறதா? ஆஞ்சநேயர் சன்னதி. அதன் பின்னில் சார்ஜாப்பூர் சாலை, மேம்பாலம்.

கோயில் இரு புறமும் தூரத்தில் சன்னதி இருப்பது தெரியுதா?  கோயிலை நாம் பார்த்து இருக்கும் திசையில் நம் இடப்புறம் இருக்கும் சன்னதி விமலா தேவி, வலப்புறம் லஷ்மி சன்னதி. விமலா தேவி லஷ்மியின் அம்சம், ஜகன்னாதரின் தாந்த்ரிக தேவியாம்.  

ஹால். மேலே சொல்லியிருக்கும் மூலவர் சன்னதி, ஜகன்னாதர், பலராமர், சுபத்ரா உருவ வடிவங்கள் ஒரிசா பாணியில்தான். இந்த ஹாலில் சாதாரண நாட்களில் சிலர் அமர்ந்து தியானம் செய்கிறார்கள். முன்பு ஓரிரு முறை சென்றிருந்த போது. ஹாலில்  வடநாட்டு பாணியில் பஜனைகள் நடந்து கொண்டிருந்ததைப் பார்த்திருக்கிறேன். 

கோயிலின் பக்கவாட்டில் - ஹால் தெரிகிறது பாருங்க...

கோயிலைச் சுற்றி படம் எடுத்துக் கொண்டே.....

விமலா தேவி சன்னதியின் இடப்புறம் லஷ்மி ஹயக்ரீவர் 

வராகர்

வராகர்

நரசிம்மர்

இது லக்ஷ்மி சன்னதியின் பின்புறத்தில் இந்தக் கோணத்தில் படம் எடுத்தேன் சிற்பங்களுக்காக

                        

இக்கோயிலின் எதிர்ப்புறம் மூலையில் சிறிய ராமர் கோயில், நடுவில் தெரு அகரா வில்லேஜின் உட்புறம் செல்கிறது. இதோ கீழே ராமர் கோயிலின் முகப்பு. 

ராமர் - ராதாகிருஷ்ணா கோயிலின் எதிர்ப்புறம் இதோ இந்தப்பெரிய ஆஞ்சநேயர் 102 அடி உயரம் திருஉருவச்சிலை. கோயில். உள்ளே கீழே ஆஞ்சநேயரின் பாதங்கள் சுற்றி வட்ட வடிவில் பீடம் இருக்கும். . வித்தியாசமான கோயில். 

முன்னில் ஒரு சிவப்பு வண்ணத்தில் பலகையுடன் கம்பிகள் தெரியுது பாருங்க அதுதான் ஆஞ்சநேயர் சன்னதி. சுற்றி வரும் போது சன்னதியின் இடப்புறப் பக்கவாட்டில் அழகான தோட்டம் உண்டு.  

கோயில் நேரம் - 9.00Am-12.00PM, 6.00PM-8.00PM

இந்தக் கோயிலுக்கும் ஜகன்நாதர் கோயிலுக்கும் இடையில் செல்லும் தெரு மேலே சொன்னது போல் அகரா கிராமத்தின் உட்புறம் செல்லும். ஆஞ்சநேயர் கோயிலும் பின்னில் மாலூர் ஸ்ரீ பாலாம்பிகா கோயிலும் (இது மிக மிக அழகாக இருக்கும். இதிலும் சுற்றிலும் தோட்டம்.) அதன் பின் அத்தெருவில் சிவன் கோயில், முருகன் கோயில், வெங்கடேஸ்வரர் கோயில் (இது தமிழ்நாட்டுப் பாணி கோபுரமுள்ள கோயில். அர்ச்சகர் தமிழ் பேசுபவர்). இப்பகுதியின் வேறு ஒரு இடத்தில் ஐயப்பன் கோயிலும் இருக்கின்றன.

இப்படி ஜகன்நாதர் கோயில், மிக உயரமான ஆஞ்சநேயர் கோயில் என்று பல கோயில்கள் இருப்பதால் தற்போது அகரா வில்லேஜ் சுற்றுலாப் பயணிகள், கோயில் உலா பயணிகள் வரும் தலமாக மாறியிருக்கிறது என்பது ட்ரிப் அட்வைசர் தகவல்!

நாங்கள் இருக்கும் பகுதியிலிருந்து 37 கிமீ தூரம்.  பேருந்தில் சென்றால் முன்பு 1 1/2 மணி நேரத்திற்கும் சற்றுக் கூடுதலாக ஆகும். இப்போது மெட்ரோ பணிகள் நடப்பதால், அதுவும் நாங்கள் சென்றது மழை நேரத்தில் என்பதால் 2.1/2 மணி நேரம் ஆனது. வீட்டருகில் இருக்கும் பேருந்து நிறுத்ததிலிருந்து ஏறுவது எளிது. 

கோயில் அருகில் மெட்ரோ பணிகள் நடப்பதால், சில பேருந்துகள் மட்டுமே முன்பு போல் பாலத்தின் அடி வழிச் சாலையில் செல்கின்றன. அப்படிச் சென்றால் முன்பு போல் கோயில் முன்னில் இறங்கிக் கொள்ளலாம். ஆனால் பல பேருந்துகள் மெட்ரோ பணி காரணமாக மேம்பாலம் வழி செல்வதால் மேம்பாலம் தொடக்கத்தில் இறக்கி விட்டுவிடுகின்றனர். 6 நிமிட நடை கோயிலுக்கு. பேருந்து நிறுத்தங்கள் முன்பு எளிதாக இருந்தது இப்போது பல இடங்களில் மெட்ரோ பணி காரணமாக இல்லை என்பது தெரிந்தது. 

திரும்பும் போது மிகவும் சிரமப்பட வேண்டியதானது. எங்கள் பகுதிக்குச் செல்லும் (எப்படியும் இரு பேருந்துகள் மாற வேண்டும்) பேருந்துகள் கீழ் வழிச் சாலையில் வரவே இல்லை. எல்லாம் மேம்பாலம் வழியாகச் சென்றதால், மேம்பாலம் இறங்கும் இடத்தில் போய் நிற்கச் சொன்னார்கள். 

அங்கு சென்று நின்றால் கை காட்டியும் பேருந்துகள் எதுவும் நிற்கவில்லை.  அந்த இடத்தில் இறங்கும் வண்டிகள் அடி வழியாக வரும் வண்டிகள் என்று எல்லாம் இணைந்து ஒரு குழப்பத்தை ஏற்படுத்துவதால் பேருந்துகள் நிற்காமல் சென்றுவிடுகின்றன.

அப்புறம் விமான நிலையம் செல்லும் ஒரு ஏசி பேருந்து நின்றதால் அதில் ஏறி மாரத்தஹல்லி எனும் இடம் வரை சென்று அங்கிருந்து நாகாவரா எனும் இடம் வரை சென்று அங்கிருந்து எங்கள் பகுதிக்குச் செல்லும் பேருந்தில் வந்து வீட்டருகில் 7 நிமிட நடையில் உள்ள நிறுத்தத்தில் இறங்க முடிந்தது. 

3 மணிக்கு வீட்டை விட்டு இறங்கி, வீடு வந்து சேர 9.30 மணி ஆனது என்றால் பார்த்துக் கொள்ளுங்கள். 

முதலில் நான் செல்வதாக இல்லை. மனதில் பிரார்த்தனை உண்டு. ஆனால் கோயிலுக்கு அதிகம் செல்வதில்லை. ஆனால் வீட்டுக்கு வந்தவங்களுக்குப் போக வேண்டும் என்று ஆசை. 

அங்கிருக்கும் அம்மை அப்பன் கோயில் மற்றும் முருகன் கோயில் செல்ல திட்டமிட்டுத் தயாரானோம். இரு வருடங்களுக்கு முன்னர் நான் எடுத்திருந்த புகைப்படங்கள் ரிப்பேர் ஆன ஹார்ட் டிஸ்கில் மாட்டிக் கொண்டதால், நப்பாசை எழுந்தது. குறிப்பாக இந்த ஜகன்நாதர் கோயில் புகைப்படம் எடுக்கவாவது செல்லலாமே என்று. அப்படித்தான் சென்றேன். 

இனியும் ஆசைப்படுவாயா கீதா இப்படிச் சென்று ஃபோட்டோ எடுக்க? என்று என்னை நோக்கி என் விரல் வடிவேலு பாணியில் நீண்டது!! 'ஃபோட்டோ எடுக்க என்றால் கண்டிப்பாக' என்று உள்ளிருக்கும் கீதாவின் பதில்!! 

பெங்களூர் போக்குவரத்தை நாம் தினமும் பயன்படுத்த வேண்டிய சூழல் என்றால் நம் வாழ்நாளின் பாதி நேரத்தைப் பேருந்திலேயே கழிக்க வேண்டியதுதான்! பாவம் பேருந்தில் வேலைக்குச் சென்று திரும்பும் மக்கள்! எண்டே பகவானே!

பதிவில் உள்ள படங்களையும் இன்னும் இருக்கும் சில படங்களையும் படங்களின் தொகுப்புக் காணொளியாகத் தந்திருக்கிறேன். விருப்பம் உள்ளவர்கள், நேரம் உள்ளவர்கள் பார்த்துக் கொள்ளலாம்.

https://youtu.be/5Jzj7wy6-lA

https://youtu.be/xx5ZAKq5d7g

------கீதா