சில்லு சில்லாய் – 5 - இன்ஸ்டன்ட் பலன் - பறவை நடனம்

 

இன்ஸ்டன்ட் பலன்!

சொந்தத்தில், அண்ணா ஒருவரிடம் இருந்து அழைப்பு.

“ஏம்மா வாட்சப் என்னாச்சு இல்லையா? எஸ் எம் எஸ் அனுப்பிருந்தேன். பதிலே இல்லையே"

“அண்ணா, ஸாரி அண்ணா, லேட்டாத்தான் பார்த்தேன்.  வருத்தமான செய்தி.....சின்ன   வயசில்லையா? என்ன பேசறது, சொல்றதுன்னு தெரியலை.”

அலைபேசியை மாற்றியதில் அவருடைய எண் பதிவாகவில்லை. குறுஞ்செய்திகள் பெரும்பாலும் முற்றிலும் வேண்டாத செய்திகள் – எல்லா வசதிகளும் உள்ள '........' இடத்தில் ஃப்ளாட்டுகள் விலை சல்லிசாகக் கிடைக்கிறது 1 கோடிதான்!!!!; உங்கள் இளமையைத் தக்க வைக்க வேண்டுமா? மசாஜ் கட்டணம் பாதிதான்; கடன் வேண்டுமா எங்களை அணுகுங்கள்; சென்னையில் ஏதோ ஒரு கடையில் எப்போதோ மூக்குக் கண்ணாடி வாங்கியதற்கு இன்னமும் குறுஞ்செய்தி வந்து கொண்டிருக்கிறது, ஆஃபர், பிறந்தநாள் வாழ்த்துகள் - என்பதால் குறுஞ்செய்திகளை நான் பார்ப்பதே மேம்போக்காகத்தான் அதுவும் தாமதமாக.

அப்படிப் பார்த்த போதுதான் தெரிந்தது அவர் அனுப்பியிருந்த அவரது குடும்பத்துச் செய்தி. எங்களுக்குச்  சொந்தமான பெண்ணின் திடீர் மரணச் செய்தி. மரணச் செய்திகள் அதுவும் வயதாகாத நிலையில் மரணம். சமீபத்தில் ஏற்பட்டுள்ள பயம் அவ்வளவே. 

மிகவும் நெருக்கமான உறவுகள், நட்புகள் என்றால் உடனே அழைத்துப் பேசிவிடலாம். நேரில் செல்ல  முடிந்தால் சென்றுவிடலாம். அவர்களுடன் இருந்து உதவிடலாம். நிறைய ‘லாம்’ களையும் போட்டுக் கொள்ளலாம்.

ஆனால் இக்குடும்பத்தில் ஒரு சிலருடன் மட்டுமே தொடர்பு இருக்கிறது. நேரடித் தொடர்பு இல்லாத உறவுகள், நட்புகளின் இப்படியான செய்திகளைக் கேட்கும் போது சம்பிரதாயச் செய்திகளை அனுப்புவதில், பேசுவதில் எனக்குக் கொஞ்சம் சங்கடம் உண்டு. அதுவும் மரணச் செய்திகள். 

உதட்டளவே தவிர மற்றபடி அதில் வேறு ஒன்றுமில்லை என்றே எனக்குப்படும். அதாவது எனக்குச் செய்தி கிடைத்தது என்ற தெரிவிப்பு.

அடுத்த நிமிடம் அதைக் கடந்துவிட்டு நம் வேலைகளில் இறங்கிவிடுவோம் என்பதால் அமைதியாக இருந்துவிட்டுப் போகலாமே என்று தோன்றும். ‘நீ சொல்வதில் ஆத்மார்த்தம் இருக்கிறதா’ என்று என் மனமே என்னிடம் கேட்கும். 

நாமாக ஆத்மார்த்தமாகச் செய்வது என்பது வேறு, சமூக நிர்பந்தத்திற்காகச் செய்வது வேறு. 

ஆனால், சமூகத்தில் அப்படி இல்லை. சில நிர்பந்தங்கள். இல்லை என்றால் பராதி வரும். நான் பராதிகளைக் கண்டுகொள்வதில்லை என்பது வேறு விஷயம். ஆனால் ஒரு சிலர் நம் மனதை, குணத்தைப் புரிந்து கொள்ளாமல் பாராமுகமாய் ஆகிவிடுகிறார்கள்.

அவர்கள் இருக்கும் போது, செய்தவை - அதுதானே இன்னும் முக்கியம்? - எல்லாம் அவர்களது Selective Amnesia வில் போய்விடும். இந்தச் சம்பிரதாயம் தான் முன்னில் நிற்கும். ஆத்மார்த்தம் இல்லாத இப்படியான சம்பிரதாயங்கள், வேஷங்கள் என் மனதிற்கு உடன்படுவதில்லை. அப்படி என்றால் நீ பின்பற்றுவதில்லையா என்று கேட்டால், சில சமயங்களில் வேஷம் போட்டுத்தான் ஆக வேண்டியுள்ளது என்பதை ஒப்புக் கொள்கிறேன்.

இந்தப்  பெண்ணை நான் நேரில் ஒரே ஒரு முறை, உறவுகளின் ஏதோ ஒரு நிகழ்வில் எப்போதோ பார்த்ததுண்டே தவிர மற்றபடி தொடர்பில்லை. என்றாலும் அவள் வயதை நினைத்துக் கொஞ்சம் அதிர்ச்சி. அவ்வளவே.

“எப்படி இப்படி திடீர்னு? என்னாச்சுண்ணா?”

“என்னத்த சொல்ல? ஏதோ கிரிவலமாம். கும்பலா போயிருக்காங்க. கொரோனா காலத்துல இது அவசியமா சொல்லு? கோயில் கூட்டத்துலருந்து வெளில வரப்ப திடீர்னு ஹார்ட் அட்டாக். ஆஸ்பத்திரிக்குக் கொண்டு போற வழியிலியே போய்ட்டா.”

“ஓ! ஏற்கனவே ஹார்ட் பிரச்சனை இருந்ததா?”

“அதெல்லாம் தெரியலை. ஆனா 40 வயசுக்கு மேல பெண்களுக்கு ஒரு மனோவியாதி வந்துடுதே.”

“மெனோபாஸ்?"

“அதில்லைம்மா, அதுக்குதான் டாக்டர் எல்லாம் இருக்காங்களே! இது டாக்டர் இல்லா வியாதி! இந்த பக்தி, ஆன்மீக வியாதி வந்துடுதேன்னேன்! இப்பத்தான் ஆன்மீகமும் சரி பக்தியும் சரி பிஸினஸ் ஆகிடுச்சே”

ஆன்மீகம், பக்தி என்ற பெயரில் வணிகம் நடக்கிறதே என்று அவர் சொல்வதில் தவறில்லைதான். ஆனால் நான் பதில் எதுவும் சொல்லவில்லை. 

பரம்பொருளுக்குப் பூமியில் நிறைய முகவர்கள் இருக்கிறார்கள். அந்தப் பெரும் சக்திக்கே விளம்பரம் கொடுக்கிறார்கள்! இந்தக் கோயிலுக்குச் சென்று வந்தால் இது நடக்கும், அந்தக் கோயில் சாமிக்கு பரிகாரம் என்றும் ஜோசியக்காரர்கள் ஒரு பக்கம், மற்றொரு பக்கம் ஆன்மீக இதழ்கள், ஆன்மீகம் என்ற பெயரில் ஏதேதோ...பரம்பொருளுக்கே விளம்பரம்! எண்டே ஈஸ்வரா! 

"ஹலோ என்ன பதிலே காணும்?  உன் கூட்டத்தை நக்கலடிக்கிறேன்னுதானே பதில் சொல்ல மாட்டேன்ற?”

என் கூட்டமா? அண்ணா என்ன சொல்கிறார் என்று புரியவில்லை.  அப்புறம் புரிந்தது ஓ பெண்கள் கூட்டம்!!!

“ஹாஹாஹா அண்ணா...This is too much! குத்தம் சொல்ல வேண்டாமே. எல்லாருக்குமே தங்களோட குறைகள், கஷ்டங்கள் ஏதேனும் ஒரு வழில சரியாகிடாதான்ற ஒரு பரபரப்பு, ஓர் எதிர்பார்ப்பு, ஏக்கம்....அதையும் பாசிட்டிவா பார்க்கலாமே.”

“என்னது பாசிட்டிவா? எத்தைத் தின்றால் பித்தம் தெளியும்ன்ற வியாதி. கொரோனா ஊசி இலவசமா போட்டுக்கோன்னு கத்தினா கூட ஒருத்தரும் போட்டுக்க மாட்டாங்க. ஆனா ‘இந்த சாமி கொரோனா சாமி. ஒரு மண்டலம் சுத்து சுத்தினா கொரோனாவா? மூச்! ஓடிவிடும்?! அண்டவே அண்டாதுன்னு’ கதை விட்டா கூட்டம் கூட்டமா போவாங்க, அந்தக் கூட்டத்துல கொரோனா தொத்திக்கும்னு கூட அறிவில்லாம......”

“அப்ப அவளுக்குக் கொரோனா வந்ததா? அதனால காம்ப்ளிக்கேஷன்?"

“யாருக்குத் தெரியும் ஏற்கனவே கொரோனா வந்தாலும் வந்திருக்கும்......என்னத்த சொல்ல? முக்குக்கு முக்கு திடீர் சாமிகள் முளைச்சிருக்காங்க கோயில் கட்றாங்க, 'இன்ஸ்டன்ட் பலன்' ‘நொடியில் ரெடி பலன்’ எல்லாமே இப்ப இப்படித்தானே தாரகமந்திரம்? ட்ரென்ட்? அத பெருமாளுக்கும் அப்ளை பன்றானுங்க பாவிங்க. உங்கள் துன்பத்தை நொடியில் போக்கிடுவார் 'இன்ஸ்டன்ட் பலன்'ன்னு சொல்லி கொள்ளை அடிக்கிறான், மக்களை ஏமாத்தறான்.....”

“நீங்க சொல்றது எல்லாம் ஓகே. ஏமாறவங்க ஏமாந்துட்டுப் போறாங்க விடுங்கண்ணா”

“ஏம்மா நம்ம பெருமாள், நமக்குன்னு பெருமாள் இருக்கப்ப, நம்ம பெருமாள கும்பிட்டா போறாதா? இப்படித் திடீர்னு முளைக்கற சாமிய எல்லாம்...ஹூம் என்னத்த சொல்ல? அதுவும் இப்ப பாரு பலரோட ப்ரொஃபைல் படமும் சாமின்னு சொல்ற ஒரு படம்தான்! இந்த சாமிக்கு மூலைக்கு மூலை கோயில். கோயில் கட்டி பிசினஸ். ஏதேதோ கோயில். கிரிவலம்...ரொம்ப முக்கியம் பாரு...இந்த வெயில்ல. என்னத்த சொல்ல. நான் சொன்னா யாரு கேக்கப்போறா?”

“அண்ணா அதான் சொல்றேன் விடுங்கன்னு. அது அவங்கவங்க நம்பிக்கை. ஏதோ ஒரு வகைல அவங்களுக்கு அது பாசிட்டிவ் வைப்ரேஷன், நம்பிக்கை, பற்றிக் கொள்ள ஒரு கோல், மகிழ்ச்சி. ஏன் குத்தம் சொல்லணும்? அதுக்கும் இவ ஹார்ட் அட்டாக்குக்கும் என்ன சம்பந்தம்?”

அவர் குடும்பத்துப் பெண் இப்படிச் சென்ற இடத்தில் மரணம் அடைந்ததால் அந்த அடக்க முடியாத வருத்தம் இப்படி கோபமாகப் பலதையும் சாடிப் பாய்கிறது என்பது புரிந்தது.

“இவ இப்படிக் கண்டபடி போணுமா சொல்லு? என்ன சாமியோ வேண்டுதலோ. போமா, நமக்குன்னு சம்பிரதாயங்கள், அனுஷ்டானங்கள் இருக்குமா....நான் சொல்றத நீ ஏத்துக்கமாட்ட தெரியும்....”

“அட! அண்ணா!!!!!!!! எப்பலருந்து இந்த அவதாரம்!!!!!!!?”

“என்ன அவதாரம்? எனக்குத்தான் பொறந்ததுலருந்தே சாமி நம்பிக்கையே கிடையாதே!!!!!!!!!!!!”

இப்பதிவை எழுதிய தினம் வியாழன். எழுதி முடிக்கிறேன், ரொம்ப ரொம்ப அபூர்வமாகச் செய்தி அனுப்பும் தோழியிடமிருந்து செய்தி. இந்தப் படத்தை 10 பேருக்கு அனுப்பவும், எனக்கும் சேர்த்து, அடுத்த நொடி, "...." உங்களை ஆச்சரியப்படவைப்பார். நீங்கள் நினைப்பது உடனே நடந்துவிடும்! 

***********

பறவை நடனம்

இங்கு பகிர்ந்திருக்கும் பறவை நடனம் காணொளியுடன், எபியில் வியாழனன்று ஸ்ரீராம் பகிர்ந்திருந்த பறவை நடனமும் சேர்த்திருந்தேன். ஸ்ரீராம் அங்கு பகிர்ந்திருந்ததால், இப்போது இது. 

சில பறவைகளின் அழகான நடனங்களை அவ்வப்போது பகிர எடுத்து வைத்திருக்கிறேன். தங்கள் இணையை ஈர்க்க ஆண் பறவைகள் ஆடும் நடனம்! இரண்டும் சேர்ந்து நடனம் என்று, என்ன ஒரு அழகு. பாலே நடனம் போல ஆடுகின்றன.  இயற்கையிலிருந்துதானே எல்லாமே மனிதர்கள் நாம்  கற்றுக் கொண்டோம். கற்றுக் கொள்கிறோம். நேரம் இருந்தால் பாருங்கள். இது Western Clark's Grebe - வெஸ்டர்ன் க்ளார்க்'ஸ் கிரெப் பறவைகளின் நடனம். அற்புதம்!

https://www.youtube.com/watch?v=-O8_DMfPJus

Western Clark's Grebe பறவைகளின் நடனம்

முந்தைய பதிவை வாசித்தவர்கள், கருத்திட்டவர்கள் அனைவருக்கும் மிக்க நன்றி

------கீதா