நலம் வாழ எந்நாளும் நலம் பயக்கும் உடற்பயிற்சி

 

தை பிறந்தால் வழி பிறக்கும்! தங்கமே தங்கமான எங்கள் நட்புகள் அனைவரும் நல்ல உடல் நலத்துடன் மகிழ்வாக வாழ்ந்திட வாழ்த்துகள்! (துளசிதரன், கீதா)

(இந்த வரியைப் பார்த்து வாழ்த்துகளை மட்டும் சொல்லிவிட்டு ஓடிடாதீங்க! இதை முன்னரே சில பதிவுகளில் சொல்ல நினைத்ததுண்டு. இப்ப எபி வியாழன் பதிவில் நம்ம ஸ்ரீராம் சொல்லியிருந்த ஒரு வரி எனக்கு இதை நினைவுபடுத்தியது!!)

நோயற்ற வாழ்வே குறைவற்ற செல்வம்!

இது எவ்வளவு உண்மை! இப்ப மருத்துவமனைச் செலவுகள் கதிகலங்க வைக்கிறது இல்லையா? நம்மில் பலரும் உணர்ந்திருப்போம். மருத்துவமனைக்குப் போகும் சூழல் வராமல் வாழ்பவர்களை மனதார வாழ்த்திடுவோம்!

பதினாறும் பெற்று வளமாக வாழ்க! இதில் மிக முக்கியமானது உடல்நலம். அதிருந்தால்தான் மற்ற 15ம்

நூறாண்டு காலம் வாழ்க!  இல்லை இப்படி வைச்சுக்குவோம், “ஆயுசு நூறு! இப்பத்தான் உன்னை நினைச்சேன் நீயே வந்துட்ட, கூப்பிட்ட” என்று யாரேனும் சொன்னால்

“நூறா யம்மாடியோவ் வேண்டவே வேண்டாம்பா....” ன்னு உடனே நம்மில் பலரும் சொல்வதுதான். இது எதிர்மறையான ஒன்று என்பது என் தனிப்பட்ட கருத்து.

சொல்பவர்களுக்கு நான் நன்றி சொல்வது வழக்கம். நூறாண்டு என்பது கணக்கில்லை. வாழும் வரை இந்த உலகை, இயற்கையை ரசித்து வாழப் பிடிக்கும். ஆனால், நிற்க.... வாழும் வரை நோய் நொடியில்லாமல் வாழ வேண்டும் என்ற எண்ணம் உண்டு.

விதி, நடப்பது நடக்கத்தான் செய்யும் என்று சொல்வது நம் கடமையிலிருந்து தப்பித்தல். ‘கடமையைச் செய்’ இதுதானே நம் தத்துவம் சொல்வது? சம்பாதிப்பதும், பிள்ளை குட்டிகளைப் பார்த்துக்கறதும் மட்டும் கடமை இல்லை. நம் உடல்நலத்தைப் பார்த்துக் கொள்வதும் நம் கடமை.

நம்மை மீறிய சக்தி எல்லாத்தையும் நமக்கு ஸ்பூனில் ஊட்டிக் கொண்டிருக்காதுங்க. நாம் தான் அந்த சக்தியை நம்முள் கொண்டு வர உழைக்க வேண்டும். எந்த முயற்சியும் செய்யாமல் விதியின் மீது பழி போடக் கூடாது. வாழும் வரையிலும் நம்ம உடம்பை நாமதானேங்க பாத்துக்கணும்.

சிறு வயதில் ஓடி ஆடி விளையாடுவது, பள்ளியில் விளையாட்டுகளில், குழுவில் பங்கெடுத்து விளையாடுவது, ட்ரில் போன்றவை எவ்வளவு நல்ல உடற்பயிற்சிகள்! அக்காலக்கட்டத்தைக் கடந்த பிறகு?

அதன் பின் பொதுவாக நம் உடல் நலனைப் பாதுக்காக்கத் தேவையான உடற்பயிற்சிகளுக்கு நாம் பழக்கப்படுத்தப்படுவதில்லை. பெற்றோர் பாதுகாப்பிலிருந்து நாம் வெளி வந்து தனியாக இயங்கத் தொடங்கிய பிறகும் கூட நம்மை நாம் பழக்கப்படுத்திக் கொள்வதில்லை. தொட்டில் பழக்கம் சுடுகாடுமட்டும்!

அளவான உடற்பயிற்சி, அளவான (இது மிக முக்கியம்) நல்ல ஆரோக்கியமான உணவு, நடைப்பயிற்சி, இதெல்லாம் நாம செய்யறதுக்குக் காசா பணமா? ஆனால் ஏனோ ஒரு சோம்பல். செய்யாததுக்கு ஏதோ ஒரு காரணத்தைக் கற்பித்தல்.

வீட்டு வேலைகள், வெளி வேலைகள், வீட்டிலுள்ளவர்களுக்காக உழைப்பது, நேரம் செலவழிப்பது என்றிருக்கும் பெரும்பான்மை ஆண்களும் சரி, பெண்களும் சரி தம்மைப் பாதுகாத்துக் கொள்ள நேரம் ஒதுக்குவதில்லை என்பதுதான் உண்மை. குறிப்பாகப் பெண்கள். நம்மையும் பார்த்துக் கொண்டு நம் குழந்தைகளையும் பழக்கலாம். பேரன் பேத்திகளையும் கூடப் பழக்கலாம்!!

அதுவும் தற்போதைய இளையவர்களில் பலரும் கணினித் துறையில் அல்லது பெரும்பாலும் கணினியில்தான், அதுவும் உட்கார்ந்து கொண்டே வேலை செய்ய வேண்டியதாக இருக்கிறது. மருத்துவத் துறையில் இருப்பவர்களுக்கும் பிரச்சனைகள் உண்டு.  

நேரம் கெட்ட நேரத்தில் வேலை, உணவு, உறக்கம், அதனால் சர்க்கேடியன் ரிதம் பாதிப்படைதல், அதனால் ஏற்படும் பின் விளைவுகள், நம் வாழ்க்கை முறை, எல்லாமே காரணக்கர்த்தாக்கள்தான்.

அதுவும் இக்காலகட்டத்தில் வளரும் (மத்தியதரக் குடும்பம், பணக்காரக் குடும்பம்) குழந்தைகளைப் பற்றிச் சொல்லவே வேண்டாம். கணினி அல்லது மொபைலில் விளையாட்டு, கையில் சாப்பாட்டைக் கொண்டு கொடுக்கும் பெற்றோர், எந்த வீட்டு வேலைகளையும் கொடுத்துப் பயிற்சி கொடுக்காமல் வளர்த்தல் என்ற வாழ்க்கை முறை. இவை எல்லாம் எதிர்காலச் சந்ததியின் உடல் நலக் கவலைகளாகின்றன.

உடலுழைப்பு என்பது வழக்கொழிந்து போய்விட்டது. (பங்களூரில் எங்கு நோக்கினும் உணவகங்கள், அடுமனைகள்) அதனால் முளைத்திருக்கும் work out மையங்கள்! ஆனால், எந்த வகைச் செலவும் இல்லாமல் வீட்டிலேயே இந்த வகைப் பயிற்சிகளை நாம் செய்யலாமே.

மருத்துவரிடம் செல்ல நேர்ந்தாலும், அவர்கள் அறிவுறுத்துவதை நாம் பின்பற்றி, சில பயிற்சிகளைத் தொடர்ந்து செய்து நம்ம நலத்தைப் பாதுகாக்கலாம் இல்லையா? நம் மனம் ஒத்துழைக்க வேண்டும்தான். இரண்டுமே ஒன்றை ஒன்று சார்ந்தவை. எனவே இங்கு சில அடிப்படை உடற்பயிற்சிகள் பற்றி மட்டும் சொல்லிச் செல்கிறேன்.

பாதத்திலிருந்து தொடங்குவோம்! (SURRENDER!)  உடலிலுள்ள மிகப் பெரிய தசைகளில் ஒன்றான கால்களுக்கு வலிமை தேவை என்பதோடு கால்கள் நன்றாக இருந்தால் எலும்பும், தசைகளும் வலுப்பெறும், உடல் வலிமையும் கூடும். கூடவே இவை அதிகமான கலோரிகளை எரிக்கும். (என் அனுபவமும். என் சர்க்கரை அளவு கட்டுப்பாட்டில் இருக்க உணவுக்கட்டுப்பாட்டோடு இந்தப் பயிற்சிகள் உதவுகின்றன. அதாவது மேலே சொன்ன WORK OUT)

கால்கள் நல்லாருந்தாதான் இடுப்பு மற்றும் முதுகுத் தண்டுவடம் நல்லாருக்கும். தோள்பட்டை, கழுத்து நல்லாருந்தாதான் முதுகு நன்றாக இருக்கும்.  இது வைஸ்வெர்சா என்றும் சொல்லலாம். ஒன்றுக்கொன்று தொடர்புடையவைதானே.

மட்டுமல்ல, கை வலி, கால் வலி, இடுப்பு வலி, கால் மூட்டு வலி, முதுகு வலி, கழுத்து வலி, தோள்பட்டை வலி இவற்றிற்கு ஃபிசியோதெரப்பி/உடற்பயிற்சி நிபுணர்களிடம் பயிற்சி  எடுத்துக் கொள்வது மிக மிக நல்லது. அவர்கள் சொல்லிக் கொடுக்கும் உடற்பயிற்சிகளை நாம் வீட்டில் தொடர்ந்து செய்வதும் நல்லது. கூடவே யோகாவும்.

சில ஃபிசியோதெரப்பி உடற் பயிற்சிகளிலும் சரி, யோகப் பயிற்சியிலும் சரி (யோகா செய்யும் முன் செய்யும் WARM UP பயிற்சிகள் இரண்டிலும் உண்டு), செய்யும் போது சரியாக மூச்சை உள்ளே இழுத்து வெளியே விடுவதும் முக்கியம். ஒவ்வொரு பயிற்சியின் இடையிலும் ஆழ்ந்த மூச்சு எடுத்து வெளியிடுதலும் வேண்டும். 

விடாது  கருப்பு போன்று, மறைந்திருந்து தாக்கும் சமீபத்திய வில்லன் தொடர்ந்து கொண்டுதான் இருப்பான் என்று தெரிகிறது. எனவே மூச்சுப் பயிற்சியுடனான இந்த உடற்பயிற்சிகள் நம் உடலுக்கு வலுவும், நுரையீரல் விரிந்து நன்றாக மூச்சு - பிராணவாயுவை - இழுத்து விடுவதற்கும், உடலில் உணவினால் சேரும் கலோரியை எரிப்பதற்கும் உதவுகின்றன. 

Prevent back pain with good posture

படங்கள் - இணையத்திலிருந்து

முதலில் நாம் கவனத்தில் கொள்ள வேண்டியது, நிற்கும் போது இரு கால்களையும் ஒரே அளவிலான அழுத்தம் கொடுத்து, வளைந்து நெளிந்து இல்லாமல் நேராகச் சரியான நிலையில் நிற்க வேண்டும். ஒரு காலில் அழுத்தம் கூடுதலாகக் கொடுத்து, தாறுமாறாகக் கால்களை வைத்துக் கொண்டு நின்றால் கால் வலி, இடுப்பு வலியோடு உடலின் பாகங்கள் பாதிப்படையவும் வாய்ப்பு உண்டு.

முதலில் நின்று கொண்டு செய்யும் சில பயிற்சிகள், நிறைய இருந்தாலும், எளிதாகச் செய்ய முடிந்த, நான் ஃபிசியோதெரப்பிஸ்டிடம் கற்றுக் கொண்ட சில பயிற்சிகள் பற்றி மட்டும், இணையத்திலிருந்து எடுத்த படங்களுடன் அடுத்த பதிவில் சொல்கிறேன்....விரைவில்....

தை பிறந்தால் வழி பிறக்கும்!  பழையன கழிதலும் புதியன புகுதலும்! நம் எல்லோர் மனதிலும் உடல் நலம் பேணும் வழி பிறக்கட்டும்!

-------கீதா