நீதி கிடைக்கும்! வாழ்வு தொலைந்திருக்கும்!

   

God sees the truth but waits லியோ டால்ஸ்டாயின் நெஞ்சைத் தொடும் கதை. செய்யாதக் கொலைக்காகச் சைபீரியச் சிறையில் 27 வருடங்கள் தண்டனை அனுபவிக்க வேண்டி அந்த அக்சியொனொவ் கதை.  வருடகங்களுக்குப் பிறகு தான் செய்தக் கொலைக் குற்றத்திலிருந்துத் தப்ப ரத்தக் கறை படிந்தக் கத்தியை அக்சியொனொவின் பையில் மறைத்து வைத்து அக்சியொனொவைக் கொலையாளியாக்கி, அக்சியொனொவ் மற்றும் அவரது குடும்பத்தினரின் வாழ்வை சீரழித்த மாக்கர் செமியோனிக் எனும் துரோகியை அடையாளம் கண்ட பின்னும், கைதியாய் சைபீரியச் சிறைக்கு வந்த மாக்கர் செமியோனிக் சிறையிலிருந்துச் தப்பிச் செல்ல சிறையினுள் குழி தோண்டுவதைக் கண்ட பின்னும், சிறை அதிகாரிகள், தப்பிச் செல்ல முயன்றது யார் என்று அக்சியொனொவிடமே கேட்ட பின்னும் தன் எதிரியைக் காட்டிக் கொடுத்து அவன் துன்புறுவதால் தனக்கு மன நிம்மதியோ இழந்த வாழ்வோ திரும்பக் கிடைக்கப் போவதில்லை என உணர்ந்த அக்சியொனொவ், தன்னால் சிறை அதிகாரிகளிடம் தப்பிக்க முயன்ற சிறைக்கைதி யாரென்று சொல்ல முடியாது என்று உறுதியாகக் கூறி கல்நெஞ்சக்காரனான அந்த மாக்கர் செமியோனிக்கின் கல்நெஞ்சை உருக்க வைக்கும் கதை. செய்யாதக் குற்றத்திற்காகத் தண்டனை அனுபவிக்கும் அக்சியொனொவை இனியேனும் விடுதலை செய்ய வேண்டும் என்று சிறை அதிகாரிகளிடம் மன்றாடித் தான் செய்த கொலை மற்றும் குற்றங்களை ஒப்புக் கொண்டு, சிறை அதிகாரிகளுடன் அக்சியொனொவின் விடுதலை உத்தரவுடன் வரும் பொது, இவ்வுலக வாழ்க்கையிலிருந்து விடுதலை பெற்றுச் சென்ற அக்சியொனொவைக் கண்டு குமுறி அழும் காட்சி, கதையை வாசிக்கும் எவரது மானதையும் ஒருபோதும் விட்டு நீங்காத ஒன்று.

இதற்குச் சமானமாக என்று சொல்ல முடியாது என்றாலும் நான் இச் சம்பவத்தை அறிந்த போது என் மனதில் இக்கதை தோன்றி மறைந்ததால், நான் இக்கதையை விவரித்தேன் அவ்வளவே!  . (அதனால்தான் இந்தக் கதை இரண்டாவது முறையாகக் குறிப்பிடப்படுகின்றது)

     திருச்சூர் இஞ்சினியரிங்க் கல்லூரியில் கெமிக்கல் எஞ்சினியரிங்க் பட்டம் பெற்ற பாலக்காடு யாக்கரையைச் சேர்ந்த சஜீவுக்கு, எஸ்பிஐ திருச்சியில் உள்ள ஒரு கிளையில் 2012 டிசம்பரில் பணியாற்ற வாய்ப்புக் கிடைத்தது.  பின் மேட்டூர் அணைக் கிளைக்கு இடம் மாற்றம் கிடைத்து அங்கு சென்றார்.  அவரது சக ஊழியரான ஷொர்ணூர் குளப்புள்ளியைச் சேர்ந்த அமிர்தகிருபா சி ஐ ஜெயதேவன் என்பவர், புதிதாய் வேலை மாற்றம் ஆகி வந்த  சஜீவனின் ஐடி மற்றும் பாஸ்வேர்டை உபயோகித்து அவர் அறியாமல் 2013 மே 21 ஆம் தேதி 65 அல்ட்சம் ரூபாயைக் கவர்ந்திருக்கின்றார்.  செய்யாதக் குற்றத்திற்குப் பலியாடானதோ சஜீவும் அந்தக் கிளை மானேஜரும். பணம் கவர்ந்த பின் இடையிடையே அனுமதி பெறாமல் பணிக்கு வராதிருந்த ஜெய தேவனை எஸ்பிஐ வேலை நீக்கம் செய்த பின்புதான், இந்தப் பண மோசடி தெரிய வந்திருக்கின்றது. மேலும் சஜீவின் ஐடி மற்றும் பாஸ்வேர்ட் உபயோகிக்கப் பட்டதால் சஜீவ்தான் குற்றவாளி என்றும், இதற்கு உடந்தை என்று கூறி கிளை மேனஜரும் கடந்த ஒரு வருடத்திற்கு மேலாக சிறை தண்டனை அனுபவித்து வருகின்றனர். 

     இதனிடையே மகன் செய்யாதக் குற்றத்திற்குத் தண்டனை அனுபவிப்பதைத் தவிர்க்க சஜீவின் தந்தை எவ்வளவோ முயன்றும் பயனின்றி மனமுடைந்து சில மாதங்களுக்கு முன் இறந்தே போனார்.   தான் குற்றம் செய்யவில்லை என்பதை நிரூபிக்க உதவி வேண்டி பல முறை ஜெயதேவனைக் காண சஜீவ் சென்றிருக்கிறார். ஜெயதேவன் உதவ மறுத்தது மட்டுமின்றி, இனிமேல் தன்னிடம் வந்து இதைப் பற்றிப் பேசவும் கூடாது என்று எச்சரித்தும் இருக்கின்றார். பிறகு எப்படியோ, காவல் துறைக்கு சஜீவும், கிளை மேலாளரும், பணம் கையாடல் செய்யவில்லை என்று தெரிய வந்திருக்கின்றது.  கையாடல் பற்றித் தெரிய வரும் முன் வேலை நீக்கம் செய்யப்பட்ட ஜெயதேவனின் ஆடம்பர வாழ்க்கை பற்றி அறிந்ததாலும் வழக்கை விசாரணை செய்து உண்மையானக் குற்றவாளியான ஜெயதேவனைக் கையோடு பிடித்துவிட்டார்கள்.  செய்யாதக் குற்றத்திற்கு தண்டனை அனுபவித்தது மட்டுமல்ல, மற்றவர்களின் ஏளனத்திற்கும், ஏசல்களுக்கும் இரையாகி இத்தனைக் காலம் வேதனையுடன் வாழ்ந்த, சஞ்சீவனின் கண்களில் ஆனந்தக் கண்ணீர்.  ஆம் தர்மத்தின் வாழ்வுதனை சூது கவ்வும்.  ஆனால் தர்மம் மறுபடியும் வெல்லும் என்பது உண்மையானது.  இதைப் போல் நம்மிடையே வாழும் குற்றவாளிகள் என்று கருதப்படுபவர்கள் எத்தனை பேர் செய்யாதக் குற்றத்திற்கு தண்டனை அனுபவிக்கின்றனரோ?  அந்த இறைவனுக்குத்தான் வெளிச்சம்.  எத்தனைக் குற்றவாளிகள் சட்டத்தின் பிடியிலிருந்து தப்பினாலும், ஒரு நிரபராதியும் தண்டிக்கப்படக் கூடாது என்று சொல்லும் சட்டம் இது போல் செய்யாதக் குற்றத்திற்கு தண்டனை அனுபவித்தவர்களுக்கு ஒரு பிராயச் சித்தமும் செய்வதில்லையே.

 

     சட்டத்தில் கண்டிப்பாக இனியேனும் இது போன்றவர்களுக்கு ஏதேனும் நஷ்ட ஈடு கிடைக்க வழி வகை செய்யும்விதமாக்ச் சட்டத்தைச் சீர்திருத்தி, அவர்களுக்கும் ஏதேனு நன்மை செய்ய வேண்டும்.  அப்போதுதான் சட்டத்தை ஓட்டை இல்லாத ஒன்றாக எல்லோரும் பாராட்டிப் போற்ற முடியும். 

படம்: கூகுள்