காதோடுதான்.....

 

சில நாட்களுக்கு முன் பிரயாணம்.வேனலினால் காதிற்குள் கட்டி, சீழ் எனற நிலை! மூன்றாவது காது பயன்படுத்த முடியாத நிலை. காதோடுதான் நான் பாடுவேன்/பேசுவேன்னு நீங்க பேசினாலும் ம்ஹூம் கேட்காது. எனவே மனதோடுதான் நான் பேசுவேன்! விழியோடுதான் விளையாடுவேன்! விழியோடுதான் விளையாடிக் கொண்டிருந்தேன். இப்போது பிரச்சனை தீர்ந்து மூன்றாவது காதைப் போட்டுக் கொள்ள முடிகிறது. எனவே நீங்கள் என் காதிலும் பாடலாம், பேசலாம்.... மனதோடும் பேசலாம், நான் விழியோடும் விளையாடலாம்.

எல் ஆர் ஈஸ்வரி அவர்களின் குரல் வித்தியாசமான தொண்டை திறந்து பாடும் high decibel குரலை எம் எஸ் வி அவர்கள் ரகசியம் பேசும் குரலில் பாட வைத்திருப்பார். அந்த ரகசியத்தையும் கேட்டு ரசிக்க முடியும் இப்போது!

மூன்று வருடங்களுக்கு முன், மூன்றாவது காதை மாற்ற வேண்டியதானது. எனவே Audiologist - செவித்திறன் வல்லுநர்? பார்க்கச் சென்ற போது வழக்கமான, காது கேட்கும் திறனை பரிசோதிக்கும் சோதனைகள் எல்லாம் முடிந்த பின்

"வேலை செய்கிறீர்களா"

"இல்லை."

"ஹெட்செட் பயன்படுத்துவீங்களா?"

"அவ்வப்போது வரும் வேலைகள் வீடியோ வேலைகள்ன்றதுனால அப்ப மட்டும் தொடர்ந்து. வேலை இல்லைனா அடிக்கடி பயன்படுத்துவதில்லை."

"ஏன் கேட்டேன்னா, இப்ப சின்ன பசங்க 22-54 வயதிற்குள்ள உள்ளவவங்களுக்கு Hearing Loss செவித்திறன் குறைஞ்சு மூன்றாவது காது போடும்படி ஆகிட்டு வருது. காரணம், Ear Phone or Head Set போட்டு கேக்கறது அதிகமாகியிருக்கறதுனால..... இதுவரை என்ன மாடல் பயன்படுத்தினீங்க?"

"Resound - Analog. Manual. 7 வருஷம் ஆச்சு. எனக்கு ரொம்ப வசதியாக இருக்கிறது. அதிலேயே இப்பவும் கிடைச்சா நல்லது."

ஒரே ஒரு முறை பழுதாகி சரி செய்யப்பட்டு வந்தது. இதில் நாமே Volume ஐ கூட்டிக் குறைத்துக் கொள்ளலாம்.

ANALOG மாடல்கள் எல்லாவித சத்தங்களையும் சம அளவில் கொடுக்கும். சுற்றி வர சத்தங்கள் எல்லாம் கேட்கும்தான், சத்தமாக இருக்கும் தான். கொஞ்சம் கஷ்டமாக இருந்தாலும் பழகிவிட்டது. தனியாக வெளியில் செல்வதால் சுற்றி நடக்கும் சத்தங்களும் கேட்க வேண்டுமே. பறவைகளின் சத்தம் நன்றாகக் கேட்கும்! எனக்கு இதுவே செட் ஆகிவிட்டது. விலை கம்மி என்பதால் அல்ல. நீண்ட நாட்கள் வரும். பழுது சரி செய்வதும் எளிது.

அவர் பேசிக் கொண்டே, "நீலப்பல்லோடு சேர்ந்து வரும் Samsung Hearing Aid இருக்கு. உங்க வேலைக்கு ரொம்ப வசதியா இருக்கும். நீலப்பல்லை செயல்படுத்திட்டீங்கனா, Head Set போடாம, யுட்யூப் கேட்கலாம், உங்க பட வேலை எல்லாம் செய்யலாம். முயற்சி பண்றீங்களா?"

"Digital? விலை? அப்ப Analog Model இல்லீங்களா?"

"Analog இல்லைங்க. இந்த நீலப்பல்லோடு இருக்குல்ல இது ஒரு காதுக்கு 39 ஆயிரம், இது தள்ளுபடியில். இல்லைனா 50 ஆயிரம் மேடம், ANALOG நோ யூஸ் இனிமேல்"

"இல்லைங்க எனக்கு அதுதான் வசதியாக இருக்கு"

Digital என்றால் Programmed Hearing Aid.  நம் காதில் மூன்றாவது காதைப் பொருத்தி, அதில் ஒரு wire இணைத்து அதை கணினியோடு இணைத்து நம்மிடம் பேசி பரிசோதிப்பார்கள். சத்தங்கள் - உதாரணமாக அலைபேசி அடிக்கும் சப்தம்; அடுத்த அறையிலிருந்து பேசினால் கேட்கிறதா; அலைபேசியில் பேசினால் எப்படிக் கேட்கிறது; இப்படி பரிசோதித்து, கணினியில் அந்தக் கருவியின் program ல் கூட்டிக் குறைத்து, குறிப்பாக வெளிச் சத்தத்தைக் குறைத்து, கேட்கிறதா என்று கேட்டு, செட் செய்து தருவார்கள்.

அப்படி இந்த நீலப்பல் உள்ள செட்டை எனக்குப் போட்டு மேலே சொன்னவற்றைச் செய்து பரிசோதித்தார். எனக்கு அது சரியாகவில்லை. ஒரு சத்தம் கேட்கும், மற்றவை கேட்காது. ஒரு வேளை உள் மனம் Digital க்குத் தயாராகவில்லை என்பதாலும், விலை பயமுறுத்தியதாலும் இருக்கலாமோ என்று என்னையே நான் ஆராய்ந்தேன்!  

அவரிடம் ANALOG மாடல்கள் இல்லை. சிக்னியா மாடல் DIGITALல் இருந்தது. 18 ஆயிரம். அதையும் போட்டுப் பரிசோதித்து எனக்குச் சரியாக இல்லை என்று சொல்லியும், அவரோ தனது சந்தைப்படுத்தல் திற்மையை வெளிப்படுத்த வார்த்தைகள் மேல் வார்த்தைகள் போட்டு, Analog-ஐ  விட DIGITAL-ல்தான் நல்லது; தேவையில்லாத இரைச்சல் இருக்காது; இனி DIGITAL லில்தான் வரும் ANALOG வகைகள் அவ்வளவாக வராது என்று பேசினார். அவருடைய வாடிக்கையாளர்களை உதாரணம் சொல்லி அதுவும் அமெரிக்கா ஆப்பிரிக்கா என்று புகழ் பாடிட....

நம்மவர் "பிரச்சனை உங்கிட்டதான். HEARING AID ல் இல்லை" என்று என்னவோ இதைப் பயன்படுத்திய அனுபவம் உள்ளது போன்று சொல்லி அங்கு என்னை அதிகம் பேசவிடவில்லை. அந்த மூன்றாவது மனிதர் முன் வாக்குவாதம் வேண்டாம் என்று கப்சிப். வாங்கி வந்து ஒரு வாரம் கடந்த போதும் கூட எனக்குச் சத்தங்கள் சரியாகக் கேட்கவில்லை. பேச்சும் தெளிவாகக் கேட்கவில்லை. வெளியில் செல்லும் போது வண்டிகளின் சத்தம் சரியாகக் கேட்கவில்லை. கடைக்காரரிடம் பேச சிரமப்பட்டேன்.

மீண்டும் இருமுறை அதே Audiologist டிடம் சென்று என் பிரச்சனைகளைச் சொல்லி செட் செய்து கொண்டு வந்த பிறகும் ஒரு மாதம் ஆகியும் சரியாக வரவில்லை. போட்டுக் கொள்ளும் போது சரியாக இருக்கும். ஒரு மணி நேரத்தில் வால்யூம் குறைந்து விடும். யார் பேசினாலும் திரும்பச் சொல்லுங்கள் என்று கேட்கும் நிலை. அப்படி இரண்டு மாதங்கள் ஓட்டினேன்.

அடுத்து வேறு Audiologist டிடம் போனால் மீண்டும் 15 ஆயிரமாவது ஆகுமே என்ற ஒரு மனஉளைச்சல். என்னடா இது பரிசோதனை. இப்போதுதான் 18 ஆயிரம் செலவாயிருக்கு. மீண்டும் என்னை நோக்கிக் கை நீட்டினார்கள்.  பிரச்சனை என்னிடம் தான் என்று.

இருந்துவிட்டுப் போகட்டும். காட்டிவிட்டுப் போகட்டும், என் பிரச்சனை எனக்குதான் தெரியும். இந்த DIGITALலை அப்பாவுக்குக் கொடுத்துப் பார்க்கலாம் என்று நினைத்து மீண்டும் என்னிடம் இருந்த பழைய Resound மூன்றாவது காதை போட்டுக் கொண்டு சமாளிக்கத் தொடங்கினேன். ஆனால் அது இரண்டு வாரங்கள் கூட தாங்கவில்லை. பொசுக்கென்று கேடாகிவிட்டது. அதைச் சரி செய்ய மும்பைக்குதான் அனுப்ப வேண்டும். 

வேறு வழியில்லை, நம்மவரிடம் மெதுவாகப் பிரச்சனையை சொல்லிட, வேறு ஒரு Audiologist-ஐ பார்த்துவிடலாம் என்று சென்றோம்.

அங்கும் மீண்டும் அதே Signia  நிறுவனத்தின் Digital Model. வேறு எந்த நிறுவனத்தின் Analog மூன்றாவது காதுகள் இல்லை.

"எதுக்கும் Digital செட் பண்ணி பார்த்திடலாமா" என்று முயற்சி செய்தார். ஆனால் எனக்குச் சரியாக இல்லை. அவர் என் எதிரில் அமர்ந்திருக்கும் போதே அவர் பேசியது தெளிவாக இல்லை.

"ANALOG உங்களுக்கு வசதியாக இருந்தால் அதையே தருகிறேன். உங்களுக்கு எது வசதியோ அதுதான் நல்லது"

என்று தேடினார்!!!!!!!!!!!

ஓன்று இருந்தது. Signia Analog. நல்ல காலம்! அவர் அதிகம் வார்த்தைகளால் மயக்கவில்லை. நல்ல பெண்மணி! 13 ஆயிரத்திற்கு வாங்கிக் கொண்டு வந்து இதோ அதுதான் இப்போது வரை ஓடிக் கொண்டிருக்கிறது.  3 வருடங்கள் ஆகிவிட்டன.

வாங்கிய DIGITALலை அப்பாவின் காதில் பொருத்திப் பார்த்தேன் என்று சொன்னேன் இல்லையா? சத்தம் எல்லாம் கேட்கிறது. ஆனால் நாம் பேசுவது தெளிவாக இருப்பதில்லை அவருக்கு. திரும்பவும் சொல்லச் சொல்லிக் கேட்பார். எனக்கிருந்த அதே பிரச்சனைதான். அதனால் பொறுமையாக நிறுத்தி நிதானமாகப் பேசுவேன்.

இந்தப் பெண் AUDIOLOGIST-ம் ANALOG மாடல்கள் குறைந்துவருகின்றன. இனிமேல் DIGITALல் வகைகள்தான் சந்தையில்  அதிகம் வரும் என்று பயமுறுத்தினார்.

புகைப்பிடித்தல், குடி இவற்றிற்கு கூடவே ஒரு சட்டபூர்வ எச்சரிக்கை வருமே அப்படி ஒரு எச்சரிக்கை Ear phone/Head set காரர்களும்   அப்பெட்டியில் கொடுக்கிறார்கள்தான்.

Head Set பயன்படுத்துவதைக் கூடியவரையில் தவிர்க்கவும் என்று  சொன்னாலும், என் வேலைக்குப் பயன்படுத்தாமல் இருக்க முடிவதில்லையே!

என் தங்கைகளில் ஒரு தங்கையின் மகள் Audiologist. மணிப்பால் மருத்துவமனையில் இக்கல்வி கற்று அங்கேயே இப்போது மேற்படிப்பு படித்துவருகிறாள். இப்பிரச்சனைகளுக்கு மிகவும் புகழ்பெற்ற மருத்துவமனை என்று தெரியவந்தது! அவளையும் விடுவேனா?

அவளும் சொல்வது Analog விட Digital நல்லதுதான்...

"பெரியம்மா உங்களுக்கு என்னெல்லாம் டெஸ்ட் பண்ணினாங்க?"

சொன்னேன்.

"அடக் கடவுளே!" என்று தலையில் கை வைத்துக் கொண்டாள். "அது வேலைக்காவாது, பெரியம்மா. பெரும்பான்மையான Audiologists எல்லாரும் வியாபாரம் தான்." என்று சொன்னதோடு அவர்கள் மருத்துவமனையில் என்னென்ன எடுப்பார்கள் என்று ஒரு பட்டியல் சொன்னாள். மிகத் துல்லியமான, சரியான Hearing Aid அல்லது வழி முறை பரிந்துரைப்பார்களாம்.

"ரெண்டு options. உடுப்பில மருத்துவமனைக்கு வர முடியும்னா எனக்குச் சொல்லுங்க. ஒரே ஒரு நாள். பெங்களூர்லருந்து ராத்திரி ரயில் ஏறி உடுப்பி வந்தீங்கனா, நானும் இருப்பேன். இங்க ஒரு நாள் பரிசோதனை முடிச்சு, பிரச்சனை என்னன்னு துல்லியமாகத் தெரிஞ்சுகிட்டு அதுக்கேத்த Hearing Aid சொல்வாங்க. அன்னிக்கு ராத்திரி ரயில்ல பெங்களூர் போய்டலாம். இல்லைனா பெங்களூர் மணிபால் மருத்துவமனைகள்லயும் இருக்குன்னு நினைக்கிறேன். அங்க கூட நீங்க போய் டெஸ்ட் எடுத்துக்கலாம்" 

அவள் சொல்லி 6 மாதங்கள் ஆகிவிட்டன. உடுப்பி என்றால் நான் திட்டமிட்டுப் பயணம் செய்ய வேண்டும். இங்கிருக்கும் மணிப்பால் மருத்துவமனைகளிலும் இருக்கின்றது என்பது தெரியவந்தது. யோசித்துக் கொண்டே இருக்கிறேன். இப்போது பயன்படுத்தும் மூன்றாவது காது பழுதாகும் போது பார்த்துக் கொள்ளலாம். இப்போது வீட்டின் நிதித்துறைத்தலைவர் ஒப்புதல் அளிப்பதற்குக் காத்திருக்க வேண்டும்.

இந்த ANALOG வகைகள் என் விருப்பத் தேர்வு என்றாலும் DIGITALல் ஒத்துவரவில்லை என்றாலும், போகப் போக ANALOG கிடைப்பது சிரமம் என்பதால், நான் இந்த DIGITAL க்கு அதுவும் நீலப்பலுடன் வரும் மூன்றாவது காதிற்குப் பழகியே ஆக வேண்டும்!

கேட்கும் வரை கேட்கட்டும்.....(மூன்றாவது) காதோடுதான் வாழ்க்கை என்றாகிவிட்டது....எனவே மூன்றாவது காதோடுதான்......போகப் போக ஆகிவிடுமோ?!!! மனதோடுதான் நான் பேசுவேன்.....விழியோடுதான் விளையாடுவேன்! 

----கீதா