தலக்காடு - 3 - பாடலேஸ்வரா / பாதாளீஸ்வரர் / வாசுகீஸ்வரர் கோவில்

முந்தைய பதிவில் சொல்லியிருந்தேன் இல்லையா? தலக்காடு கோவில்கள் காவிரி நதிக்கரையில் மணல் மூடி புதைந்து கிடந்தவற்றை மீட்டெடுத்தனர் என்று அப்படியான கோவில்களில் பஞ்சலிங்கேஸ்வரர் கோவில்களில் ஒன்றான பாதாளே/ளீஸ்வரர் கோயிலைச் சென்றடைந்தோம் என்று சொல்லியிருந்தேன். இப்ப அந்தக் கோவிலைப் பற்றி..... 

இப்படித்தான் இறங்கிச் செல்ல வேண்டும்....அதோ கீழே நம்ம சின்னப் பையன் தெரிகிறாரா!!!

இங்கு ஒரு அறிவிப்பு தெரிகிறதா? குனிந்து வாருங்கள் என்று (நீங்களும் குனிஞ்சு உத்துப் பாருங்க!!!!!!....நிலைப்படி மிகவும் சிறியது. (குகைக்கோவில் என்றும் கூடச் சொல்லப்படுகிறது. ராஷ்டிரக்கூடர்கள் பாறையில் குகைக் கோவிலாக நிர்மாணித்ததாகவும் சொல்லப்படுகிறது.

பஞ்சலிங்கேஸ்வரர்களில் இதுவும் முக்கியமான கோயில்.  இதன் சிறப்பு இங்குள்ள லிங்கம் காலையில் சிவப்பு, மதியம் கருப்பு, இரவில் வெள்ளை நிறமாக மாறும் என்று சொல்லப்படுகிறது. நாங்கள் பார்த்த போது எல்லா சிவலிங்கங்களும் இருப்பது போன்றுதான் இருந்தார் இறைவன். ஒரு வேளை நாங்கள் சென்ற சமயம் மதிய நேரம் என்பதால் கருப்பு நிறத்தில் இருந்திருக்கலாம். காலையில் அல்லது இரவு சென்று பார்த்தால்தான் தெரியும்.

திருச்சுற்றில் சுற்றிக் கொண்டே க்ளிக்ஸ் எடுத்துக் கொண்டே....விமானம் எல்லாம் பின்னாடி கட்டியதாகத் தெரிகிறது.

8 ஆம் நூற்றாண்டில் ராஷ்டிரகூடர்களால் ஒரு பழைய பாறையில் செதுக்கிக் கட்டப்பட்டதாகச் சொல்லப்பட்டாலும் 10 ஆம் நூற்றாண்டில் மேலை கங்கர்களால் கட்டப்பட்டதாகவும் சொல்லப்படுகிறது.

அதன்பின்தானே தலக்காடு மணல் மேடுகளில் புதைந்து சமீப வருடங்களில் மீட்கப்பட்டிருக்கின்றன. 30 அடி கீழே பாதாளத்தில் இருப்பதால் 'பாதாளேஸ்வரர்' என்று அழைக்கப்படுகிறதாகச் சொல்லப்படுகிறது. 

மேலும் வாசுகி (பாம்பு) சிவனை இங்கு பூஜித்து வழிபட்டதால் வாசுகீஸ்வரர் என்றும் இக்கோயில் சொல்லப்படுகிறது.

கருவறை ஆகமவிதிப்படி எளிமையாக உருவாக்கப்பட்டிருக்கிறதாம். உள்ளே படம் எடுக்க அனுமதிக்கவில்லை.

மிகச் சிறிய கோயில். கிழக்கு நோக்கிய கோயில்.  

பாரம்பரியப்படி ஒவ்வொரு 12 வருடங்களுக்கு ஒருமுறை பஞ்சலிங்க தரிசனம் என்று திருவிழா நடைபெற்று வந்தது என்றாலும் சில சமயங்களில் 4-5 வருடங்களுக்கு ஒரு முறையும் கொண்டாடப்படுமாம். கார்த்திகை மாதம் அமாவாசை தினத்தில், குஹ யோகமும் விசாக நட்சத்திரமும் சேரும் சமயத்தில். ஒரே சமயத்தில் ஐந்து கோவில்களிலும் திருவிழா. அப்படி சென்ற 2020ல் கொண்டாடப்பட்டதாம். அடுத்தது எப்போது என்று கர்நாடகா சுற்றுலாத் துறை அல்லது அங்கிருக்கும் கோவில் நிர்வாகிகள் அறிவிப்பார்களாம்.

கோயிலின் உள்ளே தட்சிணாமூர்த்தி, விஷ்ணு, துர்க்கை மற்றும் பைரவர் ஆகியோரின் சிற்பங்கள் உள்ளன. கருவறைக் கற்களில் ஒன்றில் சோழர் கால கல்வெட்டுகள் உள்ளனவாம். மேலைகங்கர்களைச் சோழர்கள் வென்ற போது இங்கு பொறிக்கப்பட்டதாகச் சொல்லப்படுகிறது.

வெளியில் சுவற்றில் இந்த இரு கற்களில் சில எழுத்துகளைப் பார்க்க  முடிந்தது. 

இதோ எழுத்துகள் வாசிக்க முடியுதா என்ன? தமிழ் எழுத்துகள். சோழர்கள் இங்கு இருந்திருக்கிறார்கள் என்பதற்கான சான்று

படியிறங்கும் போது இடப்புறம், ஏறும் போது வலப்புறம் இருக்கும் லிங்கங்கள் மண்ணிலிருந்து அகழ்ந்தெடுக்கப்பட்ட எடுக்கப்பட்ட 5 சிவலிங்கங்கள்

தலக்காடு பகுதி கங்கர்கள், சோழர்கள், ஹோய்சாலர்கள் மற்றும் விஜயநகரப் பேரரசுகளால் ஆளப்பட்டது என்பதால் இப்பகுதியில் இருக்கும் பழமையான கோயில்கள் இன்றும் அந்த வரலாற்றை பறைசாற்றுகின்றன எனலாம். 

அப்படியாக இங்கு தரிசனம் செய்து ஃபோட்டோ ஷூட் முடித்துவிட்டு அடுத்த கோவிலான மாரளீஸ்வரர் கோவிலை நோக்கி, மீண்டும் மணலில் கால்கள் புதையப் புதைய நடக்கத் தொடங்கினோம்.

----கீதா