ரங்கனதிட்டு பறவைகள் சரணாலயம் - ஸ்ரீரங்கப்பட்டினம் கோயில் - பயணம் - 4

 எல்லாரும் படகில் ஏறத் தயாராக இருக்கீங்கதானே! 

நம் படகை செலுத்துபவர். பெயர்  நஞ்சுண்டசாமி

ரங்கனதிட்டு பற்றி சில தகவல்கள். பல பாதுகாக்கப்பட்ட பகுதிகளில் வாழும் உயிரினங்களுக்கும் சுற்றுச்சூழலுக்கும் மனிதர்கள் கேடு விளைவிக்கும் அதே நேரத்தில், காவிரி நதியின் குறுக்கே, மைசூர் ராஜா கண்டீரவ நரசிம்ஹராஜ உடையார் (வாடியார்) 1645 - 1648 வருடங்களின் இடையில், ஸ்ரீரங்கப்பட்டினம் அருகே காவிரி நதியின் குறுக்கே அணைக்கட்டு கட்டிட, அதற்கு எதிர்வினை புரிவது போல், ஆனால் பறவைகளுக்குக் கொடைவள்ளலாக, வரப்பிரசாதமாக இயற்கை இந்த ரங்கனதிட்டைப் பரிசாக உருவாக்கியிருக்கிறது. எப்படி?  

அணைக்கரை உருவானதும் காவிரி, தன் பாய்ச்சலை அதற்கேற்ப மாற்றிக் கொண்டு, 25 பெரிய தீவுகள் மற்றும் குட்டித் தீவுகளை/திட்டுகளை இப்பகுதியில் உருவாக்கியதால் ரங்கனதிட்டு உருவாகி தனித்து விளங்கும் பகுதியானது.  பல நீர்ப்பறவைகள், அழிந்து வரும் உயிரினங்கள் கூடு கட்டுவதற்கும் ஓய்வெடுப்பதற்கும் ஏற்ற சூழலை உருவாக்கியிருக்கிறது.  

உலகப் புகழ் பெற்ற நம் இந்திய பறவையியல் வல்லுநரும், இயற்கையியல் அறிஞருமான சலீம் அலி, இப்பகுதி நிறைய பறவைகளை ஈர்ப்பதைப் பார்த்து, இதைப் பாதுகாக்கப்பட்ட பகுதியாக அறிவிக்க வேண்டும் என்று 1940 ல் அப்போதைய மைசூர் மன்னருக்கு வேண்டுகோள் விடுத்தார். ராஜாவும் அறிவித்தார். போன பதிவில் சொல்லியிருந்த மஹாராஜா கோபுரம் இப்படி உருவானதுதான். அப்படி ரங்கனதிட்டு பறவைகள் சரணாலயம் உருவாகியது.

காலப் போக்கில் இயற்கையின் சீற்றத்தால், தொடர்ந்து சுற்றுச் சூழலைப் பாதிக்கும் வகையில் நம் செயல்பாடுகள் இருப்பதால்  பல தீவுகள் உருமாறி தற்போது 6 பெரிய தீவுகளும் 6 சிறிய தீவுகளும்/திட்டுகளும் இருக்கின்றன. அங்கு தங்கள் இனப்பெருக்கத்திற்கும் ஓய்விற்கும் நீர்ப்பறவைகளும், நீர் சார்ந்த கரைப்பறவைகளும் வருகின்றன. 

ரங்கனதிட்டு, ஆகஸ்ட் 2022 இல் ராம்சார் தளமாக அறிவிக்கப்பட்டது. இந்த ராம்சார் தளம்/இயக்கம் பற்றி முன்பே ஒரு பதிவில் சொல்லியிருக்கிறேன். சதுப்பு நிலங்கள், ஈர நிலங்களைப் பாதுகாக்கும் அமைப்பு. கர்நாடகாவில் ராம்சார் தளமாக அறிவிக்கப்பட்ட முதல் ஈரநிலம் இதுதான்.

சரி படகில் ஏறியாச்சு. இந்த இடத்தில் நதியின் ஆழம் 40 அடி.

ரங்கனதிட்டிற்கு அல்லது இப்படிப் படகுகளில் சென்று பார்க்கும் பறவைகள் சரணாலயத்திற்குச் செல்வதென்றால் சில பரிந்துரைகள். குறிப்பாகப் பறவை ஆர்வலர்களுக்கும், படங்கள், காணொளிகள் எடுப்பவர்களுக்கும் - இங்கு நான், என் அனுபவத்தில் கற்றதை உங்களுக்கும் பயன்படலாம் என்பதால் சொல்கிறேன்.

1. ரங்கனதிட்டில், எல்லாரும் செல்லும் பொதுவான படகுகள் 8-10 பேரிலிருந்து 18 பேர் வரை செல்லும் படகுகளும், இருக்கின்றன. பெரும்பாலும் கூரையுள்ள படகுகள். 8-10 பேர் செல்லும் படகுகளில் 4 பெஞ்சுகள். ஒரு பெஞ்சில் படகோட்டி, மற்ற 3 பெஞ்சுகளில் பயணிகள். எனவே, கூடுதலாக இரண்டு பேர் இருந்தாலும் நமக்கு நகர்வது கொஞ்சம் சிரமமாக இருக்கும். படகின் ஓரத்தில் உட்கார இடம் கிடைத்தால் நன்று. அப்படிக் கிடைத்தாலும் மறுபக்கம் இருக்கும் பறவைகளைப் படம் பிடிப்பது கொஞ்சம் சிரமம்.

சற்று தூரத்தில் - 4 பேர் சென்று கொண்டிருக்கும் சிறப்பு படகு சவாரி - கூரை இல்லாத படகு. ஓரத்தில் ஒருவர் இந்தப் பக்கமும் ஒருவர்

இப்படத்தில் மேலே மூடியிருக்கும் சிறப்புப் படகு சவாரி - இடப்புறம் முன்னில் தெரிகிறதா? அதில் மூவர் உட்கார்ந்திருக்கிறார்கள்

2. (நட்பு/குடும்ப உறுப்பினர்) குழுவாகச் செல்கிறோம் என்றால் 4 பேர் அல்லது 2 பேராக இருந்தாலும், 2000 ரூ கொடுக்க சிரமம் இல்லை என்றால், சிறப்புப் படகு சவாரியை தேர்ந்தெடுக்கலாம். ஆனால் நாம் ஓட்ட அனுமதி கிடையாது. இந்த வகையில் கூரை உள்ள படகும், (படத்தில் இருக்கு) திறந்தவெளிப் படகும் (படத்தில்) இருந்தாலும், ஆர்வலர்கள், படங்கள், காணொளிகள் எடுப்பவர்கள் கூரை இல்லாத படகில் (படத்தில் இருக்கும் பாருங்க) செல்லலாம். பறவைகளை நன்றாகப் பார்த்துப் படங்கள் காணொளிகள் எடுக்கலாம்.

நாங்கள் இருவர். ரூ 2000 எங்கள் பாக்கெட்டிற்குக் கொஞ்சம் பெரிது. பொதுப்படகில் - 8-10 பேர் செல்லும் கூரையுள்ள படகில் ஏறிக் கொள்ளச் சொன்னார்கள். அப்போது அவ்வளவுபேர்தான் இருந்தோம். ஒருவேளை கூட்டம் இருந்திருந்தால் 18 பேர் செல்லும் படகில் கூட ஏற்றியிருப்பார்கள். எங்களுடன் பெரியவர்கள் சிறுவர்கள் என்று 12 பேர்.

இப்படிப் படகின் ஓரத்தில் உட்கார அல்லது நிற்க இடம் கிடைத்தால் நல்லது. நான் இங்கு நிற்கலாம் என்று அடி எடுத்து வைத்த போது இருவர் அந்த இடத்தைப் பிடித்துக் கொண்டனர்.

2. ஒரு வேளை படகின் ஓரத்தில் உட்கார இடம் கிடைத்தால், பெஞ்சில், குதிரையில் அமர்வது போன்று அமர்ந்தால் படங்கள் காணொளிகள் எடுப்பது எளிது. என் அனுபவம் - எனக்குப் படகு ஒரம் உட்கார அல்லது நிற்க ஆசை. ஆனால் நாங்கள் கடைசியில் ஏறியதால் எனக்கு இடம் கிடைக்கவில்லை.

3. கையில் மொபைல் அல்லது கேமரா இருந்தால் கவனமாக இருக்க வேண்டும். கீழே விழுந்துவிடாமல். கூடவே, கவனம் - படகின் அசைவில் படங்கள் எடுக்கும் போது கேமரா/மொபைல் ஷேக் ஆகும் வாய்ப்புகள் அதிகம். (என் அனுபவம்) எனக்குப் பல படங்கள் காணொளிகள் எடுக்கும் போது ஷேக் ஆயிற்று.

4. என்னைக் கேட்டால் நின்று கொண்டு செல்வது நல்லது.  படகின் ஓரத்தில் தடுப்பருகில் நின்றால் படங்கள் காணொளிகள் எடுக்க சௌகரியமாக இருக்கும். ஆனால் மறுபக்கம் யாரேனும் நின்று கொண்டிருந்தால் நமக்கு அப்பக்கம் உள்ள பறவைகளைப் படம் பிடிப்பது கடினம். படகின் ஆட்டத்தில் நாம் இங்கும் அங்கும் அடி எடுத்து வைக்கும் போது இடையில் உட்கார்ந்திருப்பவர்களின் கால்களை மிதிக்காமல், படகு ஆட்டத்தில் அடி எடுத்து வைக்கக் கொஞ்சம் தடுமாற நேரிடலாம். அதற்குள் படகு, காட்சிகளைக் கடந்துவிடும் அல்லது பறவைகள் பறந்துவிடவும் கூடும்!

ஆர்வத்தில் இருபக்கமும் பறவைகளைப் பார்க்கும் போது எதை எடுக்க என்று ஒன்றை எடுக்கும் போது மற்றொரு பக்கம் காட்சிகள் அல்லது பறவைகள் விட்டுப் போகலாம். படகின் கம்பிகள் கூரை இவை எல்லாம் சில கோணங்களில் முட்டுக்கட்டையாக இருக்கலாம். எனவே திறந்தவெளிப் படகை, சிறப்புப் படகை நான் சிபாரிசு செய்வேன். அல்லது கூரையுள்ள பெரிய படகுகளின் கடைசியில் இருக்கும் இடைவெளியில் நிற்க வேண்டும். எனக்கு அந்த இடமும் கிடைக்கவில்லை.  

எனவே படகின் கடைசிப் பகுதியில் அல்லது ஓரத்தில் நிற்க இடம் பார்த்துக் கொள்வது நல்லது. ஆனால் உயரமானவர்களுக்கு நிற்பது சிரமம் என்று நினைக்கிறேன். கூரை தட்டும்.

(என் அனுபவம்) எனக்கு இடம் கிடைக்காததால், நான் குள்ளமாக வேறு இருப்பதால் நின்று கொண்டேன். இரு புறமும் பார்த்து படம் எடுக்க சௌகரியம் என்று. ஆனால் அதுவும் சிரமமாக இருந்தது. காரணம் படகின் ஒரு ஓரத்தில் இரு  பெண்மணிகள் நின்று கொண்டுவிட்டனர். இத்தனைக்கும் அவர்கள் படங்கள் எடுக்கவில்லை. மறுபுறத் தடுப்பின் அருகில் குழந்தைகள். நான் நடுவில் மாட்டிக் கொண்டேன். பொதுவாகவே படகோட்டி நிதானமாகத்தான் படகைச் செலுத்துகிறார் ஆனால் படகு அங்குமிங்கும் அசைந்தது. 

நிறைய பறவைகள், அதுவும் சில மிகவும் சிறியவை. இப்புறம் எடுத்துக் கொண்டிருக்கும் போது, "இல்லி பக்ஷிகளு" என்று படகோட்டி சொல்வார். நான் உடனே அப்பக்கம் கொஞ்சம் நகர வேண்டும். நான் இப்புறமும் மறுபுறமும் மாறி மாறி எடுக்க. கோணம் பார்த்து ஜூம் செய்து எடுப்பதற்குள் படகு நகர்ந்து சில பறவைகள், காட்சிகள் ஃப்ரேமில் சிக்காமல் போய்விட்டன. சரி கொஞ்சம் ஜூம் செய்து கடந்ததை இப்புறம் திரும்பி எடுக்கலாம் என்றால் பறவைகளுக்குப் பதில் நின்றவர்கள் படத்தில் வந்தார்கள்!

எனவே அப்படி நின்று கொண்டு அவர்களுக்கிடையில் எடுக்கும்படியான சூழலில் ஓரளவுதான் எடுக்க முடிந்தது. பல இடங்களில் படகு அசையும் போது நான் கம்பியைப் பிடித்துக் கொள்ளும்படி ஆனதால் படங்கள் எடுக்க முடியாமல் போனது. படங்களில், காணொளிகளில் shakes தெரியும். 

ஒருவர் துப்பாக்கி போன்ற நீண்ட ஜூமிங்க் லென்ஸ் கேமரா வைத்திருப்பது தெரிகிறதா? மேலே இருக்கும் அதே படம். 4 பேர் சென்று கொண்டிருக்கும் கூரையில்லா படகுதான். சிறப்புப் படகு

5. பறவைகளைப் படம் பிடிக்க நல்ல மொபைலாக இருந்தால் நல்லது. இல்லை என்றால் ஜூம் செய்து எடுத்தாலும் அத்தனை தெளிவாக வருவதில்லை என்பது என் அறிவுக்கும் அனுபவத்திற்கும் எட்டிய ஒன்று. கேமராவாக இருந்தால் பறவைகளையும் படம் பிடிக்கும் அளவு சக்தி வாய்ந்த DSLR வகை கேமராக்களாக இருந்தால் நல்லது.  அதாவது ஜூம் செய்தாலும் நன்றாக வரும் அளவு. 

இனி படகில் உலா சென்று பார்க்க முடிந்த பறவைகளைப் பார்க்கலாம், வாங்க…. படகில் ஏறியதும் என்னால், மொபைல் மற்றும் கேமரா இரண்டையும்  கையாள்வது கடினம் என்பதால் என் மொபைலை நம்ம வீட்டவரிடம் கொடுத்து அதில் படங்கள் எடுங்கள் என்று சொல்லிவிட்டு நான் கேமராவை  பயன்படுத்தினேன். அவருக்குப் புகைப்படங்கள் எடுக்கும் அனுபவம் அவ்வளவு கிடையாது.  

என் கேமரா பற்றி ஏற்கனவே சொல்லியிருக்கிறேன். என் கைக்கு வந்த, பயன்படுத்தப்பட்ட ஆனால் அதிகம் பயன்படுத்தப்படாமல் ரொம்ப நாள் சும்மா இருந்த சாதாரண கேமரா. அது திறக்கவும் மூடவும்  கொஞ்சம் மக்கர் பண்ணும். சட்டென்று திறந்தாலும் பல சமயங்களில் blurred ஆக வரும். 

எனவே, படகில் ஏறியதும் அதை ஆன் செய்து தயார் நிலையில் வைத்தேன். பேட்டரி வேறு டக்கென்று சார்ஜ் போய்விடும். வேறு பேட்டரியும் கையில் இல்லை. இடம் இல்லாததால் வசதியாக நிற்க வேண்டும் என்று இடம் பார்த்துக் கொண்டிருந்ததில் படகு கிளம்பும் போது கொஞ்சம்  அசைந்ததும்  லென்ஸ் பகுதி கம்பியில் அடி வாங்கியது. எனக்கு அழுகையே வந்துவிட்டது. "இதற்குத்தானா கீதா நீ ஆசைப்பாட்டாய்!" "போ வந்தது வரட்டும்" என்று எடுக்க முடிந்ததை ஓரளவு வந்ததைப் பகிர்கிறேன். 

கொக்கு தன் அலகில் குச்சியைப் பிடித்துக் கொண்டு பறப்பது தெரிகிறதா? என் மொபைலில் கணவர் எடுத்த படம். ஜூம் செய்யவில்லை.

பறக்கும் பெலிக்கன்கள் மேலே உள்ள இருபடங்களிலும்

நாரை பறப்பது தெரிகிறதா?

https://youtu.be/fE5dZjbxx_M

சிறிய காணொளிதான். மரத்தில் பறவைகளும், நாரையும், கூழைக்கடாவும் அங்குமிங்கும் பறப்பதும், கடைசியில் வானில் மிகவும் உயரே நிறைய பறவைகள் பறப்பதும் தெரியும்

*************************

https://youtu.be/x7xvSPoi2iI

மேலே இருக்கும் அடைகாக்கும் பறவைகள் போன்று வேறு ஒரு மரத்தில், இச்சிறிய காணொளியில் மற்றும் வேறு பகுதியில் பறவைகள்

*********************

முதலைகளும் பறவைகளும்

இரண்டு கொக்குககளுக்கும் நடுவில் முதலை சின்னதாகத் தெரிகிறதா?

https://www.youtube.com/watch?v=wTxTbHL0T3U

முதலைகள், பறவைகளின் சிறிய காணொளி

அடுத்த பதிவில், படகிலிருந்து எடுத்த இன்னும் சில படங்களையும் காணொளியையும் பகிர்கிறேன். 

-------கீதா