ரங்கனதிட்டு பறவைகள் சரணாலயம் - ஸ்ரீரங்கப்பட்டினம் கோயில் - பயணம் - 2

பாண்டவபுரா ரயில் நிலையம். வலப்புறம் தெரியும் 2 வது நடைமேடையில் இறங்கி நடைபாதை மேல் பாலம் வழியாக 1 ஆம் நடைமேடையில் இறங்கும் முன் இந்த வளைவு தெரிந்ததும், அழகாக இருக்கா, ஒரு க்ளிக்

இறங்கியதும் அழகான யானை ஓவியம் கண்ணில் பட்டது. முழுவதும் வர வேண்டும் என்றால் நான் கிட்டத்தட்ட நடைமேடையின் நடு வரை செல்ல வேண்டும். மக்களின் நடமாட்டம். இப்படி ஆங்காங்கே ஓவியங்கள் வரையப்பட்டிருக்கின்றன. டக்குனு இந்த மனிதர் அங்கு வந்து அமர்ந்தார். 

உங்களை எல்லாம் ரயில் நிலையத்தில் காத்திருக்கச் சொன்னேன் இல்லையா...இப்ப வாங்க...ஹாங் அதுக்கு முன்ன....முக்கியமானது...

 அந்த ஓவியத்தின் முன்னில் இருந்த பெஞ்சுல உக்காந்து இந்த வேலைய நாம முடிச்சுடுவோம்

வெளியில் செல்ல இறங்கியதும் நிலைய வளாகத்துள் காவிரி அன்னை நமக்குத் தண்ணி காட்டிட்டாங்க பாருங்க! எல்லாரும் ரொம்ப குப்பை போட்டு, என்னென்னல்லாமோ என் மேல கட்டி அழுத்தி, என்னை அழுக்காக்கறீங்களே எதிர்காலத்துல நான் இப்படி ஆகிடுவேன்னு ரொம்ப சோகத்துல இருந்தாப்ல இருந்துச்சு.

ஸ்டேஷனுக்கு வெளிய வந்தாச்சு

வெளியில் வந்து அங்கு நின்று கொண்டிருந்த ஆட்டோக்களையும் டாக்சிகளையும் நோட்டம் விட்டோம். இருவர்தானே, ஆட்டோவில் சென்றுவிடலாம் என்று ஆட்டோ ஸ்டாண்ட் அருகே சென்றதும் நாங்கள் தமிழில் பேசியதைக் கண்டு ஒரு ஆட்டோ ஓட்டுநர் முன்வந்தார்.

நாம போன ஆட்டோ வலப்புறம் கொஞ்சமா தெரியுது...ஓட்டுநர் சென்டிமென்ட் நபர் போல...நாம முதல் சவாரி ...ஃபோட்டோ 'பேடா'ன்னாரு. நான் உங்க வண்டிய எடுக்கலைங்கன்னேன்.

ரங்கனதிட்டு செல்ல ரூ 350 என்றதும், (15/16 கிமீ. கொண்டு விட்டு அவர் திரும்ப வரும் போதுக்கான சார்ஜ் கேட்கலையே என்று மீண்டும் ரேட் கேட்டதும் 350 ரூ என்று உறுதிப்படுத்தினார். ஏறியாச்சு. 

ஊரின் சாலை, ஆரம்பத்தில் கொஞ்சம் மேடு பள்ளம். ஆட்டோ ஆடியதில் பல படங்கள் சரியாக வரவில்லை. நம்ம கொக்கரேபெல்லூர் ஆட்டோ ஓட்டுநர் நினைவுக்கு வந்தார் மெதுவாக ஓட்டிச் சென்றாரே! 

நான் வழக்கம் போல ஓட்டுநருடன் கொஞ்சம் பேச்சுக் கொடுத்தேன். ஓட்டுநரின் தமிழும் கன்னடம் கலந்த ஒன்று. அவருக்குப் பேசுவதில் சில சிரமங்கள் இருந்ததும் தெரிந்தது. ஆட்டோ சத்தம் கொடுமை. சத்தத்தில் எனக்குக் கேட்கவில்லை சரியாக. அவர் என்ன சொல்கிறார் என்று நம்ம வீட்டவரிடம் அவ்வப்போது கேட்டுக் கொண்டேன். ஆட்டோ ஓட்டுநர் திருவண்ணாமலையைச் சேர்ந்தவராம். தாத்தா காலத்திலிருந்து இங்கு குடிபெயர்ந்து இருக்கின்றனராம். கூடவே, இங்கு நிறைய பார்ப்பதற்கு இருக்கின்றன. எல்லா இடங்களும் போய்வந்துவிடலாமா? என்றார். நாங்கள், ரங்கனதிட்டுவும், ஸ்ரீரங்கப்பட்டினம் கோவிலும் மட்டும்தான் என்றோம். அவர் பாண்டவபுரா பெயர்க்காரணத்தைச் சொல்லத் தொடங்கினார். 'தெரியும் என்றாலும் நீங்களும் சொல்லுங்க' என்றேன்.

பாண்டவபுரா என்றால் "பாண்டவர்களின் நகரம்". உங்கள் எல்லோருக்கும் தெரிந்த மஹாபாரதக் கதைதான். அவர் ஆரம்பித்தது கொந்தம்மா என்று. ஆட்டோ சத்தத்தில் எனக்குக் கேட்கவும் இல்லை புரியவும் இல்லை. அவரது மொழியின் சங்கடமும் சேர்ந்து கொண்டது, நம் வீட்டவர் அவர் சொன்னதை என்னிடம் சொன்னார், அப்பதான் புரிந்தது குந்தியைச் சொல்கிறார் என்று. கன்னடத்தில் குந்தி - கொந்தம்மா. தர்மர் - தர்மராயா. பீமன் - பீமண்ணா. 

பாண்டவர்கள், அரக்குமாளிகைத்தீயில் இறந்துவிட்டதாகச் சொல்லப்பட்டு யாருக்கும் தெரியாமல் அஞ்ஞாதவாசம் செய்தாங்க இல்லையா? அப்ப அவங்க இங்கேயும் வந்து கொஞ்ச காலம் ஏகசக்கரபுரா ன்ற கிராமத்துல இருந்தார்களாம். அப்ப இங்குதான் பகாசுரனை பீமன் கொல்லும் சம்பவம் நடந்ததாகவும் அந்த அடையாளமாகத்தான் ஊருக்குச் சற்று வெளியே இருக்கும் மலை குந்தி மலை - குந்தி பெட்டா என்று சொல்ல்லப்படுகிறது. பீமன் பகாசுரனைக் கொன்றதும், தர்மரை கிராமத்தின் தலைவனாக இருக்கச் சொல்கிறார்கள் மக்கள். தர்மர், இங்கு வெகுகாலம் எல்லாம் எங்களால் தங்க முடியாது, மூடி சூட்டிக் கொள்ளவும் முடியாது என்பதால், “அரக்குமாளிகைத் தீயில் இறந்து போன பாண்டவர்களின் நினைவாக இந்த ஊரை பாண்டவபுரா என்று அழையுங்கள்” என்று சொல்லிட பாண்டவபுரா ஆனது. ஆட்டோ ஓட்டுநரின் குழந்தைகள் இதை அவருக்குச் சொன்னார்களாம் இக்கதையை.  குந்தியின் பெயரில் அடையாளமாகச் சொல்லப்படும் குந்தி பெட்டாவில் மலையேற்றம் செய்யலாம். இதைப் பற்றியும் நான் இணையத்தில் பார்த்து அறிந்திருந்தேன். அங்கு சென்று பார்த்தால்தான் தெரியும் ஏதேனும் தடையங்கள் இருக்கின்றனவா என்று. இது புராணக் கதை.

 

வரலாற்றின் படி இந்த ஊர் “ஃப்ரெஞ்சு ராக்”. ஹைதர் அலி, திப்பு சுல்தான் இருவரும் ஆங்கிலேயர்களுக்கு எதிராகப் போர் புரிந்ததோடு தொடர்புபடுத்தப்படுகிறது. இப்பகுதியைத்தான் பிரெஞ்சு இராணுவம் தங்களின் முகாமாகப் பயன்படுத்தியது என்றும் அதனால் அங்குள்ள அந்தப் பாறை மலை "பிரெஞ்சு பாறை" என்றும் சொல்லப்படுகிறதாம். “அதுக்கும் போலாமா” என்றார். இப்போதில்லை என்று சொல்லிவிட்டோம். இந்த விஷயங்கள் கொஞ்சம் தெரியும். வேற ஏதாவது புதுசா இருக்கா? "இருங்க காட்டறேன்" என்றார்.

நான் பாட்டுக்குக் கதை சொல்லிக் கொண்டே வருகிறேன் படங்கள் காட்ட வேண்டாமா? இதோ…

காவிரி

கீழே இதுவும் காவிரியின் குடும்பம்தான்

வழி முழுவதும் காவிரியின் அரவணைப்பில் செழிக்கும் வயல்களும் தென்னைகளும் கண்கொள்ளாக் காட்சி. (மாண்டியா, சாம்ராஜ்நகர் பகுதிகள் முழுவதுமே காவிரியின் கைகளில் தவழ்வன.) பாண்டவபுராவிலிருந்து 10/11 கிமீட்டரில் ஸ்ரீரங்கப்பட்டினம். (கோவிலல்ல. அதற்கு ஊருக்குள் உள்ளே செல்ல வேண்டும்) நெடுஞ்சாலை பெயர்ப்பலகை வரும் முன் காவிரியைக்  கண்டதும் நடந்தாய் வாழி காவேரி என்று மனதுள் ஓடியது. அடுத்து, கூடவே ஒரு ரஜனி பாட்டு உண்டே, காவிரி நதியும் கைக்குத்தல் அரிசியும்னு அந்தப் பாட்டும் நினைவுக்கு வந்தது. 

நெடுஞ்சாலையிலிருந்து ரங்கனத்திட்டு செல்ல ஒரு சந்திப்பில் வலப்பக்கம் திரும்பும் பக்கம் (திரும்பும் பக்கத்தில் மீண்டும் காவிரியின் ஒரு கிளை... அப்படங்கள் அப்புறம் வரும் தனியாக) “இங்க பாருங்க, நீங்க புதுசா ஏதாச்சும் சொல்லுங்கன்னு கேட்டீங்க, இந்த இடம் பேரு Paschimavahini பஸ்சிமவாஹினி….என்று சொல்லி சில தகவல்கள் சொன்னார். முடிஞ்சா இந்தப் பெயரை நினைவு வைச்சுக்கோங்க.  இந்த இடத்தைப் பற்றித் தனியாகப் பதிவு வரும். ஓட்டுநர் சொன்னது அந்த இடத்தில் ஆட்டோ சத்தத்தில் சரியாகக் காதில் விழவில்லை. பரிச்சயம் இல்லாத குரல் வேறு.  நான் மீண்டும் கேட்பதற்குள் அந்த இடத்தைக் கடந்திருந்தார். அப்பகுதி வலப்பக்கம் இருந்ததால் ஆட்டோ உள்ளிலிருந்து வெளியில் சரியாகப் பார்க்கவும் முடியவில்லை. சரி வரும் போது பார்த்துக் கொள்வோம் என்று நம்மவீட்டவரும் சொல்லிட நேரே ரங்கனத்திட்டு. 

மீண்டும் அச்சாலையிலிருந்து வலப்புறம் பறவைகள் சரணாலயத்திற்கான பெயருடன் வளைவு இருக்கும் சாலைக்குள் செல்லும் போது காவிரியின் குடும்பத்தில் ஒன்று பெண்ணோ பேத்தியோ இடப்பக்கம் ஓடிட அதைப் பார்த்துக் கொண்டே கொஞ்சம் காணொளியும் எடுத்துக் கொண்டே சென்றேன். அப்படியே அது இடப்பக்கம் வளைந்திட, நாம் நேரே பறவைகள் சரணாலயம் செல்லும் சாலைக்குள் போகிறோம். இரு பக்கமும் மரங்களும், வயல்களும் தான். இதோ காணொளி. கடைசியில் கொஞ்சமாக செக்போஸ்ட் தெரியும்.

https://youtube.com/shorts/POFdJ9Xnr2s

சிறிய காணொளி முடிந்தால் பாருங்கள்

சரணாலயம் நுழைவு வாயிலுக்கு முன் செக்போஸ்ட். அங்கிருந்து நுழைவு வாயில் ஒரு 3-5 நிமிட நடைதான். நம் வண்டியை உள்ளே அனுமதிக்க ரூ 20. ஒவ்வொரு வண்டிக்கும் ஏற்றார் போல் கட்டணம். வண்டி விவரங்களைக் குறித்துக் கொண்டு அனுப்புகிறார் காவலர்.  

நுழைவு வாயில் பகுதி தெரிகிறதா? செக்போஸ்டிலிருந்து 3-5 நிமிட நடைதான்.

எல்லாவிதமான டிக்கெட் விவரங்கள்

இங்கு என்னவெல்லாம் பறவைகளைப் பார்க்கலாம் என்ற பட்டியல். ஒவ்வொரு பறவையின் சீசன் பொருத்து அங்கு பார்க்க முடியும். இவற்றில் சிலவற்றை பெங்களூர் ஏரிகளில் பார்க்கலாம். அவற்றில் நான் ஹெரான் வகைகள் பற்றி படங்களுடன் பதிவு போட்டிருக்கிறேன். மற்ற பறவைகள் பற்றி பதிவுகள் வரும் மெ      து       வா        க.

 மேலே செக்போஸ்டிலிருந்து நேரே தெரியுதான்னு கேட்டிருந்தேன்ல அந்த நுழைவுவாயில் இதுக்குள்ள நமக்கு அனுமதி இல்லை. இடப்பக்கம்தான்

நாம் செல்லும் நுழைவு வாயில். இதோ கீழே படம்.

 

நுழைவு வாயில்

உள்ளே கொண்டு விட்டதும் நம் ஆட்டோ ஓட்டுநர், நாங்கள் பார்த்து முடித்ததும் அவருடைய அலைபேசி எண்ணை அழைத்தால் தான் வருவதாகச் சொல்லி அலைபேசி எண்ணைக் கொடுத்து, நம் அலைபேசி எண்ணையும் வாங்கிக் கொண்டார். பாண்டவபுராவிலிருந்து ரங்கனதிட்டு வருவதற்கு 20-25 நிமிடங்கள் ஆகும் என்பதால் வெளியில் வருவதற்கு 20 நிமிடங்கள் முன்பே தன்னை அழைக்குமாறு சொன்னார். சரி என்று அவருக்குப் பேசிய தொகையைக் கொடுத்துவிட்டு நாங்கள் உள்ளே சென்றோம். நீங்களும் வாருங்கள் நுழைவுச் சீட்டு எடுக்க வேண்டுமே!    

அடுத்த பகுதியில் ரங்கனதிட்டு உள்ளேயும், பறவைகளையும் பார்ப்போம். அப்பகுதி மட்டுமே 2 பதிவாக வரலாம். 

தொடர்கிறேன்...

 

-----கீதா