அழகே! அழகே! பாரதத்தின் தென் கோடி அழகே - 4

கருத்திடுபவர்களுக்கு - நீங்கள் கருத்திடும் போது உங்கள் Profile - பெயர்தாங்கி வராமல் 'பெயரில்லா' என்று வந்தால் கருத்தின் கீழ், நான் என் கருத்துகளின் கீழ் என் பெயரைக் குறிப்பிடுவது போல், உங்கள் பெயரைக் குறிப்பிட்டால், யாரென்று புரிந்து கொள்ள எனக்கு உதவியாக இருக்கும். 

============================================================================

பீமநகரி - 2  பண்டைய காலத்தில் வீமனசேரி - வழக்கில் பீமனேரி

சென்ற பதிவில்அதோ தெரிகிறதா ஊர்? அதுதாங்க பீமநகரி கிராமம். இங்க சுத்தி இயற்கையைப் பார்த்துக் கொண்டே ஆசுவாசப்படுத்திக்குவோம். அப்புறம் ஊருக்குள்ளாற போவோம்...என்று படத்தோடு சொல்லியிருந்தேன் இல்லையா...இப்போது நாம் நடக்கத் தொடங்குவோம் சரியா... 

இயற்கை எழில் கொஞ்சும் மேற்கு தொடர்ச்சி மலை அடிவாரத்தில், நீண்ட நெல் வயல்களும் தென்னந்தோப்புகளும் நிறைந்த சூழலில் அமைந்துள்ளதால், இந்த ஊர், இந்த ஊர் மட்டுமல்ல சுற்றி இருக்கும் அத்தனை ஊர்களும் (ஏகப்பட்ட ஊர்கள் இருக்கின்றன. அத்தனை ஊர்களுக்கும் சென்று படம் பிடித்து இங்கு சொல்ல வேண்டும் என்று நினைத்திருந்தேன். வெள்ளம் வந்ததால் போகமுடியாமல் ஆனது.) எப்போதும் பசுமையாகவும், கண்ணிற்குக் குளுமையாகவும் இருக்கும். நாஞ்சில் பகுதி. சுற்றி ரசித்துக் கொண்டே செல்வேன். சென்றேன்.

கிராமத்திற்குள் நுழையும் முன் பாருங்கள் இடப்புறம் கிராமத்தின் வெளியில் வயலில் வீடுகள் வரத் தொடங்கிவிட்டன! 

இப்படம் கிராமத்தின் தெருவிற்குள் நுழையும் முன் இதற்கு அடுத்தாப்ல இருக்கும் படத்தில் இடப்புறம் உள்ள வயலின் மூலையில் இருந்து எடுத்தேன்...பச்சையையும் மலைகளையும் காட்ட!

பீமநகரி கிராமத்திற்குள் நுழைந்தாயிற்று....இடப்புறம் தங்க வர்ணம் பூசப்பட்ட தூண்கள் தெரிகின்றன இல்லையா...அதுதான் இக்கிராமத்தின் அடையாளமாகத் திகழும் கோவில். படங்கள் கீழே...

பாலபரமேஸ்வரி அம்மன் கோவில் 

நான் சென்றிருந்த போது கோவிலுக்குள் யாரும் இல்லாததால் அனுமதி கேட்காமல் படம் எடுக்க மனம் ஒப்பவில்லை. அம்மனைச் சுற்றியிருந்த கிரில் கம்பிக் கதவும் மூடியிருந்தது. பீமநகரிப் பகுதி பற்றி எழுதத் தொடங்கியதில் இருந்தே சக்தி ரூபமான வடிவத்தின் படம் இல்லையே மக்களுக்குக் காட்டிட என்று, மனதில் ஆழமாகத் தோன்றிக் கொண்டே இருந்தது அந்த வடிவம். 

பாலபரமேஸ்வரி அம்மன்  -  சுப்பு அக்காவிற்கு நன்றி. 

இப்பதிவை நேற்று எழுதிக் கொண்டிருந்த போது, எங்கள் ஊரைச் சேர்ந்த இக்கிராமத்தில் இருந்து பின் திருமணத்திற்குப் பின் அங்கிருந்து புலம் பெயர்ந்து சென்னையில் பல வருடங்களாக இருக்கும் சுப்பு அக்காவிடம் (இவருடைய அப்பா சுப்பையா வாத்தியார் அம்பாளை பூஜித்து வந்தவர்) நான் போன போது எடுக்க முடியவில்லை என்பதைச் சொல்லி "அக்கா, பீமநகரி அம்மன் படம் எடுக்க அனுமதி உண்டா? நீங்க எடுத்திருக்கீங்களா? படம் இருக்கா? இருந்தால் அனுப்புங்களேன்" என்ற செய்திக்கு

"கீதா இன்னிக்கு நான் பீமனேரி கோவில் பூஜைக்கு வந்திருக்கேன்." என்ற செய்தியுடன் மேலே உள்ள பால மரமேஸ்வரி அம்மன் படமும் வர - "என்னை ஊர் உலகம் அறியட்டும்" என்ற ரீதியில்??!!!..- என் ஆச்சரியத்திற்கு அளவே இல்லை! 

உடனே அக்காவை அழைத்துப் பேச, அவரும் சொன்னார் "ரொம்பவே ஆச்சரியமா இருக்கு கீதா" என்று! இத்தனைக்கும் அவர் அங்கு சென்றிருப்பார் என்பதை நான் சற்றும் எதிர்பார்க்கவில்லை. அவர் பயணம் பற்றியும் தெரியாது எனக்கு. எனக்கு ஆல்ஃபா மன தியானத்தில் நம்பிக்கை உண்டு!

பீமநகரியின் அடையாளமாகத் திகழ்வது இங்குள்ள பாலபரமேஸ்வரி அம்மன் கோவில். இது மிகவும் சக்திவாய்ந்த கோவிலாகச் சொல்லப்படும். கிராமத்து மக்களால் ஆராதிக்கப்படும் கிராமத்துக் கோவில். (அரசின் கீழ் அல்ல) நாங்கள் சின்ன வயதில் விடுமுறை நாட்களில் கிராமத்திலிருந்து கூட்டுச் சேர்ந்து ஒரு குழுவாகச் செல்வதுண்டு.  

குறிப்பாக பௌர்ணமி நாட்களில் ஆடி, தை மாதங்களில், இங்கு சிறப்பு பூஜைகள்,  வழிபாடுகள் விமரிசையாக நடைபெறும். நாங்கள் சென்றால் அங்கு கோயிலில் பிரசாதமாக மதியச் சாப்பாடு எல்லாம் சாப்பிட்டுவிட்டுதான் வீட்டுக்கு வருவோம். போவதே அதுக்குத்தானே!

கூட்டத்தோடு கோவிந்தாவாக ஆளுக்கொரு ஸ்ருதியில் அயிகிரி நந்தினியைப் பாடிவிட்டு, அதன் பின் record player album போன்று என்னுடைய standard பாடல்களான, நானொரு விளையாட்டு பொம்மையா, ஸ்ரீ சக்கர ராஜ சிம்ஹாச, அம்பா நீ இரங்காயெனில், அருள வேண்டும் தாயே பாடிவிட்டுதான் கிளம்புவேன்! பின்ன அம்பாள் கொடுக்கும் பிரசாதத்திற்கு நியாயம் செய்யணுமில்லையா! 

அம்பாள் வாய்ஸ் - புளிச்சுப் போச்சு திரும்பத் திரும்பக் கேட்டு. வேற பாட்டு பாடேன்! 

என் வாய்ஸ் - சட்டில இருந்தாதானே!

சுற்றுவட்டார மக்கள் மட்டுமின்றி, அந்த ஊரைச் சேர்ந்த ஆனால் தற்போது வெளியூர்களில் வசிப்பவர்களுக்கு இது ஒரு முக்கிய 'குலதெய்வ' வழிபாட்டுக் கோயில். 

தெருவில் நுழைந்து கோயிலை அடைவதற்கு முன் வலப்பக்கம் கோயில் குளம். எதிரில் ஒரு கோயில் தெரிகிறது இல்லையா...அந்தச் சாலை வழியாகத்தான் சுற்றி பார்த்துக் கொண்டே நம்ம வீட்டுக்குப் போய்விடலாம். 

 அழகான விவசாய பாசனத்திற்கான பம்ப் செட் கிணறு. மழை வெள்ளத்தில்  நிறைந்திருக்கிறது. 

கிராமத்திற்குள் சென்ற சாலை வழியாகவே வெளியில் வரும் போது இடப்புறம் உள்ள தென்னந்தோப்பில், கொட்டிய மழையில் தேங்காய்கள் விழுந்து கிடக்க அதை ஒருவர் எடுத்து வெளிப்புறச் சாலையில் அங்கு போட்டுக் கொண்டிருந்தார். இச்சாலை வழி நெடுஞ்சாலைக்கும் செல்லலாம். திருப்பதிசாரம் கிராமத்திற்கும்...

தோப்பின் இப்பக்கம் சாலை...தேங்காய்கள் அடுக்கி வைக்கப்பட்டிருக்கின்றன. இச்சாலை வழியாகத்தான் நடை...

அப்போது மிக மிகச் சிறிய கிராமமாக 10-12 வீடுகள் மட்டுமே கிராமம் இப்போது  பீமநகரி ஊராட்சியாக வளர்ந்துள்ளது. Extension என்றெல்லாம். அதை இச்சாலை வழியே போகும் போது பார்க்கலாம். 

சாலையின் வலப்புறம் வயல்வெளிகள்...

சில அடி தூரத்தில் வித்தியாசமான பெயருடன் ஒரு விநாயகர் கோயில் உண்டு. பதிவு பெரிதாகிவிட்டதால், அதை அடுத்த பகுதியில் பார்ப்போமா?

-------கீதா