ஒழுக்கம் உடைமை குடிமை

 

(சிம்லா நாட்கள் - 3 விரைவில் வரும். முடிவுத் தொடர். துளசிக்குச் சற்று உடல் நலம் சரியில்லாததால் காணொளிக்கான குரல் அவரால் கொடுக்க முடியவில்லை. இந்த வாரம் அனுப்புகிறேன் என்று சொல்லியிருக்கிறார். பார்ப்போம்.)

பரிந்தோம்பிக் காக்க வேண்டிய ஒழுக்கம்

சுஜாதா அவர்கள் எழுதிய கதையான ஓலைப்பட்டாசு கதையில் சுஜாதா சொல்லியிருந்த ஒரு சம்பவம் குறித்து  எங்கள் ப்ளாகில் நம்ம ஜெ.கே. அண்ணா, தான் வேலை பார்த்த இடத்தில் தனக்கும் கிட்டத்தட்ட அதே போல ஒரு சம்பவம் நடந்ததாகச் சொல்லி எபியில் சென்ற சனிக்கிழமை எழுதியிருந்தார்.

எனது நெருங்கிய உறவுக்காரர் ஒருவருக்கும் அதை ஒத்த ஒரு சம்பவம் கசமுசா புத்தகம் அல்ல ஆனால் கசமுசா சம்பவமே நடந்தது. இங்கல்ல வெளிநாட்டில். பெயர்கள் எதுவும் குறிப்பிடாமல் பொத்தாம் பொதுவாகச் சம்பவத்தைச் சொல்கிறேன்.

நம்ம கதாபாத்திரம் ஆப்பிரிக்க நாடுகளில் மக்கள் தொகை கொஞ்சம் அதிகம் இருக்கும் நாட்டில் மிகவும் பழமைவாய்ந்த தேசிய பல்கலைக்கழத்தில் கல்லூரி பேராசிரியர் பணிக்குச் சென்றார். தலைநகரிலேயே இருந்தது அப்பல்கலைக்கழகக் கல்லூரி. நம்ம அண்ணா யுனிவெர்சிட்டி போல என்றும் சொல்லலாம். அந்த நாட்டின் கல்வி அமைச்சகத்தின் கீழ் என்பதால் மாணவர்களின் சேர்க்கையும் அதன் பொறுப்பில். அதன் தலைமை நம்ம நாட்டில் தேசிய அளவில் மிகவும் புகழ்வாய்ந்த கல்வி நிறுவனத்தில் பேராசியராக இருந்த ஒருவர்.

அமைச்சகத்தின் கீழ் நேரடியாக என்பதால் நம் நபரும் ஆர்வத்துடன் சென்றார். இருப்பிடமும் தலைநகரிலேயே. இன்னொரு தமிழர், பெங்களூரைச் சேர்ந்த இருவர், மஹாராஷ்டிராவைச் சேர்ந்த ஒருவர், ஆந்திராவைச் சேர்ந்த ஒருவர் - அப்படியாக 6 பேர் ஒரே சமயத்தில் சேர்ந்தனர். இந்த ஆறு பேரும் தங்குவதற்கு ஒரு வீடு பார்த்தார்கள். அந்த வீட்டு உரிமையாளர் பெண்மணி அந்நாட்டவர் என்றாலும் அமெரிக்காவில் வாசம்.

அந்த வீட்டின் அமைப்பு கீழ் தளம் மற்றும் இரண்டு மேல் தளங்களை உடையது. கீழ் தளத்தில் எல்லாருக்கும் பொதுவான அடுக்களை, வரவேற்பு அறை, இரண்டு அறைகள். முதல் தளத்தில் இரண்டு சிறிய அறைகள் கதவில்லாமல். அதற்கும் மேலே இரண்டாவது தளத்தில் இரு அறைகள்.

இந்த வீட்டில் ஏற்கனவே ஆந்திரா/தெலுங்கானாவைச் சேர்ந்த இருவர் இரண்டாவது தளத்தில் இருந்தனர். எனவே இந்த 6 பேரில் தமிழர்கள் இருவரும் முதல் தளத்திலும், மஹாராஷ்ட்ராவைச் சேர்ந்த இருவரும் வீட்டின் கீழ் தளத்திலும் தங்கிட, பெங்களூரைச் சேர்ந்த இருவரும் அடுத்த குடியிருப்பில் தங்குவதற்கு இடம் பார்த்துக் கொண்டனர். எல்லோருமே திருமணமானவர்கள். குடும்பம் உள்ளவர்கள். இருவருக்கு சமீபத்தில் திருமணம் ஆகியிருந்தது. எல்லோரது குடும்பங்களும் இந்தியாவில்.

நான் சொல்லும் நபரின் துறையில் பல பிரச்சனைகள் இருந்தன. அதை வேறொரு சமயத்தில், பதிவைப் பற்றிய நினைவிருந்தால் சொல்கிறேன். இங்கு சொல்லப் போவது கசமுசா சம்பவத்தால் வந்த பிரச்சனை மட்டுமே.

நம்ம நபர் அவருடன் இருந்த மற்றொரு தமிழ் நபரையும் தவிர மற்றவர்கள் எல்லோரும் தண்ணியும் அடிப்பார்கள் என்பது தெரிந்திருந்தாலும், இந்தச் சம்பவம் வீட்டிலேயே அம்பலம் ஆவது  வரை அவர்களுக்குத் தெரிந்திருக்கவில்லை அவர்கள் இரவில் விலைமாதுகளின் வீட்டிற்குச் செல்வது அல்லது அப்பெண்கள் வீட்டிற்கு வருவது என்பது.

அப்படி ஒரு நாள் அவ்வப்போதான வழக்கம் போல வீட்டிற்கு வந்திருக்கிறாள் அந்த விலைமாது. இரண்டாவது தளத்திலிருப்பவர்கள் கீழே வந்துவிடுவதுண்டாம். எல்லோரும் சேர்ந்து தண்ணி அடித்துவிட்டு சாப்பிட்டு அதகளம் செய்வார்கள் என்பதால் முதல் தளத்தில் இருந்த நம் நபர்கள் தங்கள் அறைக்குச் சென்று விட்டால் பின்னர் வெளியில் வரமாட்டார்கள் என்பதால் இருவருக்கும் கீழே நடப்பது தெரிந்திருக்கவில்லை. நல்ல உறக்கத்தில் ஆழ்ந்துவிடுவார்கள்.

அன்றும், இரண்டாவது தளத்தில் இருந்த இருவரும் வழக்கம் போல கீழே வந்து காரியம் முடிந்ததும் மேலே சென்றுவிட, கீழ்தளத்துக் காரர்களும் வேலையை முடித்ததும்தான் பிரச்சனை தொடங்கியிருக்கிறது. பேசிய ரேட்டை அவர்கள் கொடுக்கவில்லையாம். ஏற்கனவே பாக்கி இருந்திருக்கிறது. அன்று தருகிறோம் என்று சொல்லி வீட்டிற்கு வரச் சொல்லியிருந்திருக்கிறார்கள். ஆனால், காரியத்தை  முடித்துவிட்டு ரேட் கூடுதல் என்று வாதிட்டிருக்கிறார்கள் கீழுள்ளவர்கள்.

தனக்கு வர வேண்டிய பாக்கியும், அன்றைய ரேட்டும் சேர்த்து தர வேண்டும் என்றிட கீழிருந்த இருவரும் மேலே உள்ளவர்களிடம் கேள் என்று சொல்லிட அவளுக்கு மேலே நம்ம நபர்களும் இருக்கிறார்கள் என்பதெல்லாம் தெரியாதே.

இவர்கள் இருவரும் நல்ல உறக்கம். திடீரென்று அறைக்குள் அப்பெண் வந்து இருட்டில் நம்ம நபரைப் பிடித்துக் கொண்டு காச் முச்சென்று ஹை டெசிபலில் அவர்கள் மொழியில் கன்னாபின்னாவென்று கத்தியிருக்கிறாள். நபர் வெலவெலத்துப் போய்விட்டார். கூட இருந்த மற்றவர் அவளைப் பிடித்து தள்ளி இந்த நபரைக் காப்பாற்றி லைட்டை ஆன் செய்யப் போனால் கரன்ட் இல்லை என்பது தெரிந்திருக்கிறது. அங்கு இரவு நல்ல குளிர் என்பதால் ஃபேன் போட்டுக் கொள்ளத் தேவையிருக்கவில்லை. அதனால் மின்சாரம் இல்லை என்பதும் தெரியவில்லை.

கீழே இருந்தவர்களும் மேலே தள்ளாடிக் கொண்டு வந்திருக்கிறார்கள். அவளைப் பிடித்து இழுத்திட, அவளுக்குத் தெரிந்துவிட்டது தான் தவறான அறைக்கு வந்திருக்கிறோம் என்று உடனே மற்ற இருவர் எங்கே என்று கேட்டிட, நம்ம நபர்களில் இளைஞர் மேலே சென்று அவர்களையும் கூட்டிக் கொண்டு வந்திருக்கிறார். இரண்டாவது தளத்தில் இருந்த இருவரையும் அவள் இழுத்துக் கொண்டு வந்திருக்கிறாள் கீழே, பஞ்சாயத்திற்கு.

மற்ற நால்வரும், இரவில் விலைமாதுகளின் வீட்டிற்கோ, அவர்களின் கூடும் இடத்திலோ அல்லது அவர்களை வீட்டிற்கோ வரவழைப்பது வழக்கம் என்றும் இப்பெண்ணும் அவர்களில் ஒருவர். அவ்வப்போது வீட்டிற்கு வந்து செல்பவள் என்றும் அப்போதுதான் தெரிந்திருக்கிறது.

ஆறு பேரும் கீழே ஹாலில். மின்சாரம் இல்லை. எனவே யாரும் ஓடிடக் கூடாது என்று வாசல் கதவை தாழ் போட்டுக் கொண்டு அப்பெண் கதவருகில் நின்று கொண்டு,  நம்ம நபர்கள் இருவரிடமும் மற்ற நால்வரும் எவ்வளவு தர வேண்டும் என்றும் தன்னை ஏமாற்றுவது பற்றியும் சொல்லி நியாயம் கேட்டிருக்கிறாள். இவர்கள் தங்களுக்கும் அதற்கும் எந்த சம்பந்தமும் இல்லை என்று சொல்லிட அவளோ, "என் ஆட்கள் அத்தனை பேரையும் கூப்பிடுவேன், போலீஸையும் கூப்பிடுவேன். நீங்க எல்லாரும் வேறு நாட்டவர்தானே" என்று மிரட்டியிருக்கிறாள். அந்நாட்டில் விபச்சாரம் என்பது சட்டத்திற்குப் புறம்பானதல்ல.

பதற்றமான நிலை.

எந்த இடத்திலும் பரிந்தோம்பிக் காக்க வேண்டிய ஒழுக்கத்தை ஒரு வெளிநாட்டில் போய் இப்படி ஒரு மோசமான மனநிலையில் நம்மமக்கள். இருக்கும் இடம், தாங்கள் செய்யும் உன்னதமான தொழில், தங்கள் குடும்ப ஸ்டேட்டஸ் எல்லாம் புறம் தள்ளி, குடும்பத்திற்கும் துரோகம் இழைத்து, என்ன ஒரு கீழ்த்தரமான வாழ்க்கை. ஒழுக்கம் கெடுதல் இழிந்த பிறப்பின் தன்மையாகி விடாதா?

ரொம்பவே Authentic நபரான நம் நபர் மற்ற நால்வரையும் நன்றாகத் திட்டியிருக்கிறார். தாங்கள் சிக்குவது மட்டுமில்லாமல் தங்களோடு தங்குகிறவர்களையும் பிரச்சனையில் மாட்டிவிடுவதற்காகவும், மனைவி குழந்தைகள் இருக்க இப்படி வெளிநாட்டில் ஆசிரியர் வேலைக்கு வந்து அசிங்கமாக நடந்து கொண்டதற்கும், நம்ம நாட்டைப் பற்றிக் கேவலமாக நினைக்க வைக்கிறார்களே என்றும்.

அந்த நால்வரிடமும் அவள் கேட்கும் பணத்தைக் கொடுக்கச் சொன்னால் அந்த நால்வரும் சேர்ந்து இவர்களுடனும் சண்டைக்கு வர குடி வாடையும், வாந்தியும் என்று  சூழலே மோசமாகிட, நம்ம நபர்கள் இருவரும் அவளைக் கெஞ்சி மறுநாள் காலையில் வந்து அவர்கள் தெளிந்ததும், பேசிக் கொள்ளலாம் என்று சொல்லி சமாதானப்படுத்தி அனுப்பிய பிறகும் அன்றைய இரவு உறக்கம் போய் எப்படா விடியும் என்று உறங்காமல் விழித்திருந்திருக்கிறார் நம்ம நபர். கூட இருந்த இளைஞர் அவர் சம்பவத்தைச் சட்டென்று கடந்துவிட்டார். இந்த நபரால் அது முடியவில்லை.

விடிந்ததும் இந்த இருவரும் செய்த முதல் வேலை தங்குவதற்கு வேறொரு இடம் பார்த்து இவர்கள் இருவரும் மட்டுமே தங்கும்படியான இடத்திற்கு உடனே மாறிவிட்டார்கள்.

அந்த நால்வரும் இந்த நபருக்கு எதிர்வினைகள் ஆற்றத் தொடங்கியிருக்கிறார்கள். 

ஒரு நாட்டில், வெளிநாட்டவர்கள், இப்படி ஏதேனும் வம்பில் சிக்கிக் கொண்டால் அந்த நாட்டின் சட்டம் அவர்களின் வாழ்க்கையையே தடம் புரட்டிப் போட்டுவிடுமே! அதுவும் குற்றமே செய்யாமல் வாழ்க்கை பறி போனால்?

நல்ல தட்பவெப்ப நிலையும், வளம் மிகுந்த பூமியும், சல்லிசான விலையில் தரமான பொருட்களும் நிறைந்த இடமாக இருந்தது என்றாலும் நம்ம நபருக்கு அந்தச் சம்பவம் மிகவும் பாதித்ததோடு இவர் வேலை பார்த்த துறையில் ஊழல்களும் இருந்ததாலும், கல்வித் துறை அமைச்சகத்தின் தலைமை 'ரிசைன் பண்ணாதீர்கள்' என்று கேட்டுக் கொண்டாலும் கூட, தன்னால் இப்படியான சூழலில் வேலை செய்வது கடினம் என்று நேரடியாகவே எழுதிக் கொடுத்துவிட்டு, வேலையை விட்டுவிட்டு வந்துவிட்டார். மிஞ்சிப் போனால் 8 மாதங்கள் இருந்ததாகச் சொன்ன நினைவு. ஆனால் அந்த விலைமாது சம்பவத்தின் தாக்கம் மட்டும் அவர் மனதை விட்டு அகல பல வருடங்கள் ஆயிற்று.

-----கீதா