கோபாலசுவாமி பெட்டா

நான்கு மாதங்களுக்கு முன்பு நல்ல குளிர் சமயத்தில் பந்திப்பூரில், தமிழ்நாடு, கேரளா எல்லையின் அருகில், கர்நாடகாவின் எல்லைக்குள், 1450 மீட்டர் உயரத்தில் இருக்கும் ஹிமவத் கோபாலசுவாமி பெட்டா (மலை) எனும் மலைக்கோயிலுக்குச் சென்றோம்.

கேரளத்தையும், தமிழ்நாட்டையும், கர்நாடகாவையும் இணைக்கும், முதுமலை, பந்திப்பூர், கூடலூர், ஊட்டி/கோழிக்கோடு வரை செல்லும் நெடுஞ்சாலையில், எங்கள் பகுதியான எடக்கராவிலிருந்து  சுமார் 90 கிமீ தூரத்தில் 2 1/2 - 3 மணி நேரப் பயணத்தில் இருக்கிறது இந்தக் கோயில்.

கூடலூர் தாண்டியதும், முதுமலை, பந்திப்பூர் காடுகள் இரு புறமும் என்பதால் மான் கூட்டமும், யானைக் கூட்டமும் காண முடிந்தது. (காணொளியில் காணலாம்)

குண்டுலுபெட் வரை நம் வண்டியில் செல்ல  முடியும். மலையில் தனியார் வண்டிகளுக்கு அனுமதி இல்லை என்பதால் கோயில் இருக்கும் மலைக்கு அங்கிருந்து கர்நாடகா அரசுப் பேருந்து ஷட்டிலில் தான் செல்ல வேண்டும். நாம் வண்டியில் சென்றால் வண்டியை நிறுத்துமிடம் சென்று அங்கு வண்டியை நிறுத்திவிட்டு அங்கிருந்து மலைக்குச் செல்லும் கர்நாடகா அரசுப் பேருந்தில் செல்ல வேண்டும்.

சென்று வர ஒருவருக்கு டிக்கெட் விலை ரூ 60.

குளிர் சமயம் என்பதால் மஞ்சு படர்ந்திருந்தது. சுற்றிலும் மஞ்சு சூழ்ந்த மலைகள் மரங்கள் என்று இயற்கையின் அழகு காணக் கண் கொள்ளாக் காட்சியாக இருந்தது. கோயிலுக்குச் சென்ற போது பனியுடன் கூடவே மழைச் சாரலும் இருந்தது. கீழே காணொளியில் காணலாம்.

கோயிலில் நல்ல தரிசனம் கிடைத்தபின், மதியம் பிரசாதமாக அன்று பொங்கல் கிடைத்தது.  

அதன் பின் சமீபத்தில் மீண்டும், என் சொந்தமான லீலா சேச்சி சசி அண்ணனுடன் சென்றோம். அப்போது குளிர் இல்லை. வெயில் இருந்தாலும், நல்ல இதமான காற்று அடித்தது. நிழலில் கொஞ்சம் தணுப்பு இருந்தது. 

அன்று கோயிலில் பிரசாதமாகத் தக்காளி சாதம் கிடைத்தது. பிரசாதம் எவர்சில்வர் தட்டில் தருவார்கள். நாம் சாப்பிட்ட பின் அதைக் கழுவி அங்கு கொடுத்திட வேண்டும். வனத்தையும் பசுமையையும் காக்க மற்றும் அங்குள்ள வனவிலங்குகளுக்குப் பாதுகாப்பாகவும் இருப்பதற்காக இந்த ஏற்பாடு என்று தெரிகிறது. அங்கு ப்ஸாஸ்டிக் பொருட்கள் பயன்பாட்டிற்கு அனுமதி இல்லை.

கோயிலுக்கு எதிரில் பாழடைந்த மண்டபம் போன்று இருப்பதன் அருகில் கழிப்பிட வசதி உள்ளது.

மலையிறங்கி வீட்டிற்கு வரும் வழியில் ஒரு அழகான பூந்தோட்டம். கூடலூரில் டிஃபன் சாப்பிட்டுவிட்டு வீட்டிற்கு வந்து சேர்ந்தோம். போகும் வழியும், இந்தக் கோயில் அமைந்துள்ள இடமும் இயற்கையின் அழகும் மனதிற்கு இனிய நினைவுகளையும் மகிழ்வையும் தந்தது.

மைசூரிலிருந்து இக்கோயில் 78.4 கிமீ தூரத்தில் 1.45 - 2 மணி நேரப் பயணம் என்று கூகுளில் தெரிந்து கொள்ளலாம். மைசூர் - குண்டுலுபெட். அங்கிருந்து பந்திப்பூர் செல்லும் வழியில் 8 கிமீ தூரத்தில் இக்கோயிலின் வளைவு இருக்கிறது.

பேருந்து என்றால் மைசூரிலிருந்து குண்டுலுபெட்டிற்கு நிறைய பேருந்துகள் இருப்பதாகவும் தெரிகிறது. அங்கிருந்து பேருந்துகள் கோவில் மலைக்கு இருக்கின்றன. இணையத்தில் பார்த்து தெரிந்து கொள்ளலாம்.

படங்களை விட காணொளிகள் எடுத்ததால் எல்லாம் இணைத்து ஒரு சிறிய காணொளியாகக் கொடுத்திருக்கிறேன். முடிந்தால் பாருங்கள். 4 மாதங்களுக்கு முன் சென்றதும், சமீபத்தில் சென்றதும் என்று வித்தியாசமான காலநிலையையும் இந்த இடத்தின் அழகையும் பார்க்கலாம். 

https://youtu.be/8wMjt0Ppqpo

-----துளசிதரன்