இந்திய கடற்படையின் கிழக்கு கரையோர தலைமையக நகரத்தில் பயணம் - 5 - ஐ என் எஸ் குர்சுரா - நீர் மூழ்கிக் கப்பல் அருங்காட்சியகம்

 

அடுத்து என்ன பார்த்தோம் என்று அடுத்த பதிவில் தொடர்கிறேன் அது மிகவும் சுவாரசியமானது என்று முடித்திருந்தேன்.

சிம்மாச்சலத்திலிருந்து 2 மணி அளவில் வந்தோம், கொஞ்சம் ஓய்வு எடுத்துக் கொண்டு 3 மணிக்கு மீண்டும் ஊர் சுற்றக் கிளம்பினோம் என்று முந்தைய 4 வது பதிவில் சொல்லியிருந்தேன் இல்லையா, சரியாக 4 மணிக்குக் கிளம்பி ஆட்டோவில், காலையில் ரசித்த அதே கடற்கரையை சென்றடைந்தோம்.

அழகான ராமகிருஷ்ணா கடற்கரையின் ஓரத்தில்!! கடற்கரையின் காளி மாதா கோயிலில் (இரண்டாவது/மூன்றாவது பதிவில் சொல்லியிருந்த நினைவு) இருந்து 17-20 நிமிடம் கடற்கரை ஓரம் நடக்கும் தூரத்தில் இருக்கிறது இந்த அருங்காட்சியகம்

இப்படி உள்ள போய் பார்க்கலாம் எல்லாரும் வரிசையா வாங்க

கப்பலின் உள்ளே சென்றதும் நிறைய கருவிகள் பொருத்தப்பட்ட சுவர்கள். இடது புறம் சிறிய ஏணிப்படி . கீழ்த் தளம் மேல் தளம். மேல் தளத்திற்கு சிறிய ஏணிப்படி இருக்கிறது. 

மேலே நடக்கும் போது இடையில் ஓரு இடைவேளி கீழே தெரிகிறதா

அதில் ஏறி நீள நடந்தால் இப்படி ஒவ்வொரு அறையும் வரும். பெரும்பாலும் வலது புறம் எல்லா அறைகளும். இடது புறம் கருவிகள் இணைப்புகள். 

சில படங்கள் கண்ணாடி வழியாக எழுத்ததால் சரியாக வரவில்லை. ஏற்கனவே என் மூன்றாவது விழி மக்கர் பண்ணும் இதில் வெளிச்சம் க்ளார் அடித்ததால் கொஞ்சம் சிரமமாக இருந்தது..

ராமகிருஷ்ணா கடற்கரையில் அழகுப் பெண்ணாய் காட்சி கொடுத்துக் கொண்டு அனைத்து சுற்றுலாப்பயணிகளையும் தன் பக்கம் ஈர்ப்பவள். ஐஎன்எஸ் குருசுரா நீர்மூழ்கிக் கப்பல் நங்கை. அப்படி விசாகப்பட்டினத்தின் சுற்றுலாவின் முக்கிய அங்கமாக, ஒர் அடையாளமாகி இருப்பவள்! (நான் சும்மா பெண் வடிவம் கொடுத்து எழுதத் தொடங்கிவிட்டு, சில தகவல்களை உறுதிப்படுத்திக் கொள்ள இணையத்தில் தேடினால், விக்கியிலும் பெண்ணாக அவளைப் பற்றி மிகவும் உணர்வுபூர்வமாகச் சொல்லி பெருமைப்படுத்தி யாரோ எழுதியிருக்காங்க. எழுதிச் சேர்த்தவருக்கு பாராட்டுகளும் வாழ்த்துகளும்!!!)

1969 ஆம் ஆண்டு ரஷ்யாவில் பிறந்த இவள் சோவியத் பில்ட்-ஐ-641 - வகையைச் சேர்ந்தவள். 18 டிசம்பர் 1969 அன்று இந்தியக் கடற்படையில் சேர்க்கப்பட்டு பணி அமர்த்தப்பட்டவள்.  பாருங்க பிறந்ததுமே நம்ம நாட்டு படையில் சேர்ந்தாச்சு!

சமையலறை

பாவம் குழந்தை, 2 வயசுல - 1971 இன் இந்திய-பாகிஸ்தான் போரில் பங்கேற்று சாகசங்கள் செய்து, அங்கு ரோந்து பணிகளில் முக்கிய பங்கு வகிச்சுருக்கு. பின்னர் மற்ற நாடுகளுடன் கடற்படை பயிற்சிகளில் பங்கேற்று பிற நாடுகளுக்கு goodwill - நல்லிணக்க விஜயங்களை மேற் கொண்டிருக்கு. எவ்வளவு பெரிய சேவை!

18 டிசம்பர் 1969 இல் சேர்ந்தாளில்லையா, 31 வருட சேவைக்குப் பிறகு 27 பிப்ரவரி 2001 அன்று பணிநீக்கம் செய்யப்பட்டிருக்கிறாள். (ஏன் பணி நீக்கம் செய்யப்பட்டிச்சோ? வயசாகிடுச்சோ? இவங்களுக்கும் பணி ஓய்வு உண்டு போல! பென்ஷன் உண்டா? அதான் தனி மரியாதை எல்லாம் கொடுத்து காட்சியகமாக மிளிர வைச்சுட்டாங்களே!)

பணி நீக்கம் செய்யப்பட்டதும் 9 ஆகஸ்ட் 2002 அன்று ஆந்திரப் பிரதேசத்தின் அப்போதைய முதலமைச்சர் திரு என். சந்திரபாபு நாயுடு நாட்டிற்கு அர்ப்பணித்துவிட்டார். (நேர்ந்து விட்டுவிட்டார்னும் சொல்லலாமோ!)

அர்ப்பணித்த பிறகு ஊருக்குள்ள வர வேண்டாமா? ஓய்வெடுக்க? தன் இறுதிப் பயணமாக  விசாகப்பட்டினத்துக்கு வந்து, 24 ஆகஸ்ட் 2002 முதல் ஆர்.கே கடற்கரையில் பொதுமக்கள் பார்ப்பதற்கான  அருங்காட்சியகமாக இருக்கிறாள். தெற்கு ஆசியாவிலேயே முதன் முதலாகக் காட்சியகமாக நிறுவப்பட்ட பெருமையும் இவளுக்கு உண்டு.

குர்சுரா அசல் தன்மையைத் தக்கவைத்துக்கொள்ளும் மிகச் சில நீர்மூழ்கிக் கப்பல் அருங்காட்சியகங்களுள் ஒன்றாகும். அதனால் இது விசாகப்பட்டினத்தின் “பார்க்க வேண்டிய இடங்கள்” என்பதில் முதலில் வந்துவிடும். அதான் ஆர் கே கடற்கரை யில்தானே இருக்கிறது. அதோடு வந்துவிடும்.

நீளமான கரிய உடல் என்றாலும் கரிய நிறத்து யானை நம்மை ஈர்ப்பது போல் இவளும் மையல் கொள்ளச் செய்கிறாள்.

உள்ளே சமையலறை முதல் படுக்கை அறை, நூலகம், வாசிக்கும் அறை என்று எல்லா வசதிகளும் உண்டு. படங்களைப் பார்த்தாலே தெரியும்.

பார்த்தாச்சா....இப்படி இறங்கி வாங்க எல்லாரும்...யாரும் உள்ளே இல்லைதானே!!

இதற்கு மேலே உள்ள படத்தில் உள்ள ஆயுதம் பற்றி

பணிநீக்கம் செய்யப்பட்ட நீர்மூழ்கிக் கப்பலாக இருந்தாலும், கடற்படையின் "டிரஸ்ஸிங் ஷிப்" (கீழே சின்ன விளக்கம்) மரியாதையை இன்னும் பெறுகிறாள். இது வழக்கமாக, செயல்பாட்டில் உள்ள கப்பல்களுக்கு மட்டுமே வழங்கப்படும் ஒன்று. பாருங்க வயாசிடுச்சு ஓரமா இருந்துக்கனு பழைய பொருட்கள் கிடங்குல போட்டு பூட்டாம பாழடையச் செய்யாம மரியாதை கொடுத்து அலங்காரம் எல்லாம் செய்து வைத்திருப்பது, பாதுகாப்பது மிகவும் உணர்வுபூர்வமான ஒரு விஷயம்.

குடியரசு தினத்தன்று, கிழக்கு கடற்படையைச் சேர்ந்த நான்கு பேர் கொண்ட குழு இந்திய கடற்படையின் அனைத்து 52 அதிகாரப்பூர்வ கொடிகளையும் தேசியக் கொடியுடன் சூரிய உதயத்தில் குர்சுரா நீர்மூழ்கிக் கப்பலில் ஏற்றுவார்கள்.

இந்திய கடற்படையின் முதல் தலைமுறை நீர்மூழ்கிக் கப்பல்களில் ஒன்றானதாலும், 1971 இல் நடந்த இந்திய-பாக் போரில் முக்கிய பங்கு வகித்ததாலும், இந்திய கடற்படை அதற்கு “டிரஸ்ஸிங் ஷிப்” என்ற அந்தஸ்தை வழங்கி, தொடர்ந்துவருகிறது. இந்த குர்சுரா பற்றிய சிறிய தகவல் ஆங்கிலத்தில். நன்றி :  விசாகப்பட்டினம் மெட்ரோ தளம்

Life on a Submarine: 

Submarine undergone rigorous trainng at INS Sathavahana which includes damage control,drills and emergencies,battle tactics and escape training through a vertical(100’)tower.

 A sea experience of 6 months qualifies the submarine for the prestigious Dolphin Badge, envied all over.

Space in a submarine is premium,giving Importance to equipments,ammunitions,life saving systems taking priority.

 Officers and Sailors do hot Bunking,which is sharing limited bed space in turn.

The day to day activities in a submarine includes action stations,maintenance,weapons firing etc.,

In a Kitchen of size 4’*6’”, 2 cooks prepare meals for the whole crew.

77 men on board share 2 wash basins and 2 toilets for month at sea.

விசாகப்பட்டினத்தில் கட்டாயம் பார்க்க வேண்டிய சுற்றுலா இடமான ஐஎன்எஸ் குருசுரா நீர்மூழ்கிக் கப்பல் அருங்காட்சியகம் இந்தியர்களுக்குப் பெருமை சேர்க்கும் அடையாளம் என்பதை நான் இங்கு பெருமையுடன் சொல்லிக் கொள்கிறேன்.

நுழைவுக்கட்டணம் - பெரியவர்களுக்கு - ரூ 30 - குழந்தைகளுக்கு - ரூ 20 (அப்போது)  காமரா - ரூ 40/50 (மறந்து போச்) 

நேரம் -  2 pm-8.30pm

உள்ளே விவரங்கள் சொல்லிக் கொண்டு வரும் வழிகாட்டி உண்டு.  நான் மட்டுமே விரும்பினேன்.  அதனால் வைத்துக் கொள்ளவில்லை.  படங்கள் போட்கிருக்கிறேனே அதுல பாத்தா புரியாது??!!!

“டிரஸ்ஸிங்க் ஷிப்” என்றால் என்ன? அதிலேயே இருக்கிறது அதன் பொருள்.

Courtesy - The Hindu

டிரஸ்ஸிங் லைன் எனப்படும் நீண்ட கயிற்றில் கடல்சார் சமிஞை கொடிகள் கட்டப்பட்டு, ஏற்றப்படுவது ​​கடல்சார் பாரம்பரிய கொண்டாட்டத்தின் ஓர் அடையாளம்.

நன்றி - கூகுள்

இந்திய கடற்படைக் கப்பல்கள் குடியரசு தினம் (ஜனவரி 26), கடலோர காவல்படை தினம் (பிப்ரவரி 1), கடல்சார் தினம் (ஏப்ரல் 5), சுதந்திர தினம் (ஆகஸ்ட் 15) மற்றும் கடற்படை தினம் (டிசம்பர் 4) ஆகியவற்றின் போது (dress overall) முழுவதுமாக அதாவது டிரஸ்ஸிங்க் லைன் எனப்படும் நீண்டக் கயிற்றில் கட்டப்படுவது தவிர, முழுவதும் டிரஸ் செய்யப்படுகின்றன. அதாவது அலங்கரிக்கப்படுகின்றன.

இந்திய குடியரசுத் தலைவர் அல்லது பிற நாட்டுத் தலைவர்கள் பயணம் செய்யும் போதும் தேசிய முக்கியத்துவம் வாய்ந்த சந்தர்ப்பங்களிலும் கப்பல்கள் ஒட்டுமொத்தமாக டிரஸ் செய்யப்படுகின்றன.

பகல் நேரத்தில், கடற்கரைக்கு வருபவர்கள் இந்த ‘டிரெஸ்ஸிங்க் கப்பல்களை’ காண முடியும். கப்பல்களில் கடல்சார் சமிஞை கொடிகள் கப்பலின் முன்பகுதியில் (ஜாக்ஸ்டாஃப்) இருந்து அதன் பின்புறம் (என்சைன் ஸ்டாஃப்) வரை நடுவில் உள்ள மற்ற மாஸ்ட்கள் (பாய்மரம்) வழியாக கட்டப்படும்.

சூரிய அஸ்தமனத்திற்குப் பிறகு, நங்கூரத்தில் உள்ள கப்பல்கள் எல்லாம் ஒளிரச் செய்வார்கள். விளக்குகளால் அலங்கரிக்கப்பட்டு தூரத்தில் இருந்து பார்த்தாலும் கல்லபின் வளைவுகள் கோடுகள் தெரிவது போல அலங்காரம் செய்யப்படும்.

(இதைப் பற்றி மேலும் தெரிந்து கொள்ள இணையத்தில் உலா வந்தால் நிறைய தென்படும் என்பதால் நான் இங்கு தரவில்லை என்பதோடு எனக்கு மொழி பெயர்க்க நேரமும் இல்லை) 

(இன்னும் நிறைய படங்கள் உள்ளன. இப்பகுதி மட்டுமின்றி முந்தைய பகுதிகளுக்கும். அவற்றைத் தொகுத்து காணொளியாகப் போட்டுவிட்டுச் சுட்டி தருகிறேன். அடுத்த பகுதி வரும் போது. அல்லது அதன் பின். இப்போது தொகுத்து போட நேரம் இல்லை)

அடுத்து சென்ற இடமும் அழகான இடம். அடுத்த  பகுதியில் சொல்கிறேன். கொஞ்சம் பிஸி. தாமதமாகும்.

---கீதா