எனது மூன்றாவது விழியின் பார்வையில் - 17 - லால்பாக் மற்றும் மலர் கண்காட்சி - 1

லால்பாக் என்றாலே எல்லோருக்கும் தெரிந்துவிடும். பெங்களூருவில் உள்ள லால்பாக் என்று. லால்பாக் - லால் என்றால் சிவப்பு. பாக் என்றால் தோட்டம். ஹிந்தி மற்றும் உருது கலந்த மொழியான ஹிந்துஸ்தானி-பாரசீக மொழியில் சிவப்புத் தோட்டம் மற்றும் மனதிற்கினிய தோட்டம் என்று பொருள்.  தாவரவியல் கலைப்படைப்பு மற்றும் தாவரங்களைப் பாதுகாப்பதற்கான மையமாக சர்வதேச அளவில் புகழ்பெற்ற, Incredible India ல் இடம் பெற்ற, ஆசியாவிலேயே மிகப் பெரிய தாவரவியல் பூங்கா. 

240 ஏக்கர் பரந்து விரிந்திருக்கும் இப்பூங்காவைச் சுற்றிட ஒரு நாளில் இயலாது. 

வருடந்தோறும் இப்பூங்காவில் மலர்க்கண்காட்சி நடக்கும். கோவிட் சமயத்தில் கண்காட்சி நடை பெறாததால் இந்த வருடம் மலர் கண்காட்சி நடைபெற்றது.  

என் வாழ்நாளில் முதன் முறையாக நான் பார்த்த மலர் கண்காட்சி. பார்வைக்கு வைக்கப்பட்டிருந்த மலர்கள் அனைத்தும் மனதைக் கவர்ந்தாலும், வழக்கம் போல் ஏதோ எதிர்பார்த்துச் சென்ற காரணத்தினாலோ என்னவோ, கண்காட்சியின் அமைப்பும் நடைபெற்ற விதமும் மனதைக் கவரவில்லை. 

ஒவ்வொரு வருடமும் ஏதாவது ஓர் அடையாளச் சின்னம் அல்லது கர்நாடக மாநிலத்தைச் சேர்ந்த முக்கியப் பிரபலங்களின் வாழ்க்கையைச் சித்தரிக்கும் விதத்தில் மலர் கண்காட்சி பூங்காவின் புகழ்பெற்ற கண்ணாடி மாளிகையில் நடைபெற்று வருவதுண்டாம். 

அப்படி இம்முறை மறைந்த நடிகர் ராஜ்குமார் மற்றும் அவரது மறைந்த மகன் நடிகர் புனித் ராஜ்குமார் இவ்விருவரின் வாழ்க்கை வரலாற்றைச் சொல்லும் வகையில் மலர் கண்காட்சி நடைபெற்றது. அவர்களது வீடுகளைப் போன்று 3 1/2 லட்சம் மலர்களால் தத்ரூபமாக வடிவமைக்கப்பட்டிருந்ததாம். 

கண்ணாடி மாளிகைக்குள் செல்ல பெரிய வரிசை மற்றும் கூட்டம் தள்ளு முள்ளு என்பதாலும் இப்படியான மலர் கண்காட்சிகளைக் காணும் மனம் இல்லை என்பதாலும்  நான் உள்ளே செல்லவில்லை.

பூங்காவிற்குள் சென்று சிறு பகுதியைப் பார்த்துக் கொஞ்சம் சுற்றிவிட்டு,  மரத்தில் செதுக்கப்பட்டிருந்த அழகான வடிவங்கள் கண்ணில் பட்டவற்றை க்ளிக்கிக் கொண்டு, மலர் கண்காட்சியில் விற்பனைக்கு வைக்கப்பட்ட பூக்களைக் கண்டு சில க்ளிக்ஸ் எடுத்துவிட்டு, பூங்காவில் பூச்செடிகளில் அழகாக வடிவமைத்திருந்த சில வடிவங்களையும் அடாது மழை பெய்தாலும் விடாது க்ளிக்குவோம்னு க்ளிக்கிவிட்டு வெளியில் வந்தாச்சு. 

அவற்றில் சில இப்பதிவிலும் மிச்சத்தை அப்புறம் சில பதிவுகளாகவும் போடுகிறேன்.

லால்பாக் மெட்ரோ நிலையத்தில் இருந்து இறங்கி நடந்தால் அப்பகுதியில் உள்ள நுழைவுவாயில் வழியாக உள்ளே சென்ற போது அங்கிருக்கும் விளக்குக் கம்பத்தில் ஒன்று

அப்பகுதியில் நுழைந்து கொஞ்சம் நடந்ததும் உள்ள ஆழகான பாறையும் அதன் மேல் இருக்கும் மண்டபமும் மண்டபம் முழுவதும் எடுக்க முடியவில்லை மக்கள் கூட்டம் அதிகம் இருந்ததால். இதுவுமே நான் எடுத்த போது ஃப்ரேமிற்குள் டக்கென்று அமுல் ஐஸ் வண்டி நுழைந்துவிட்டது!

பாறையின் மடிப்புகள் என்ன அழகு!! இல்லையா? இப்படி தானாக உருவாகிய வடிவம்தானோ?  நான் மிகவும் ரசித்துப் பார்த்தேன். நிறைய எடுக்க ஆசை ஆனால் மக்கள் அதிகம் ஃப்ரேம் சரியாக வைக்க முடியவில்லை.

புறாக்களுக்கான வீடு கொஞ்சம் கிட்டப் பார்வையில் - எபி யில் தூரத்துப் பார்வையில் எடுத்தது போட்டிருந்த நினைவு

புறாக்களின் வீட்டைக் கடந்து உள்ளே நடந்த போது.... தூண்

ஏரியை நோக்கி நடந்த போது......கையையும் விரல்களையும் விரித்து நடன வடிவத்தில் போஸ் கொடுப்பது போன்று!!!

இதுவும் சிகை அலங்காரத்துடன் இப்படித் தலையைத் தாழ்த்தி நிமிர்த்தி ஆடும், ஒரு குழு நடனம் போல என் மனதில் தோன்றியது

இந்த மரங்கள் கொஞ்சம் தூரத்திலிருந்து ஒரு கோணத்தில்...

அதே மரங்கள்தான்... நேரே கோணத்தில். இரு புறமும் ஏரி. நடுவில் பாலமும் அதைத் தொடர்ந்து இந்த மரங்களின் அணிவகுப்பின் இடையில் பாதை. மக்கள் அதிகம் நடந்து கொண்டிருந்ததால் அவர்கள் வராமல் எடுத்த படம்

கொஞ்சம் கூட்டம் குறைந்து அடுத்து மக்கள் வருவதற்குள் இன்னும் கேமராவை சற்று தழைத்து டக்கென்று ஒரு க்ளிக். மழை மேகம் மழை பொழியத் தயாராக...

இதுவரை உள்ள படங்கள் பூங்காவில் எடுக்கப்பட்டவை. இனி காட்சியில் வைக்கப்பட்டிருந்த பூக்கள், மற்றும் வேறு படங்கள் அப்புறம் வரும் பதிவுகளில். மலர் கண்காட்சின்னு சொல்லிவிட்டு ஒரு பூப் படம் கூடப் போடவில்லை என்றால்? அதனால ஒன்று இப்போது.

Bromelia - ப்ரோமெலியா வகை

மலர் கண்காட்சி என்பதைவிட சாப்பாட்டுக் கடைகள்தான் அதிகம் இருந்தன. மலர்களுக்குத் தேனீக்களும் வண்டுகளும் வரவில்லை.  ஆனால் சாப்பாட்டுக் கடைகளை மக்கள் கூட்டம் மொய்த்தது.

மக்களுக்கு அறிவில்லை என்றால் பூக்காட்சியை நிறுவியவர்களுக்கும் அறிவு வேணாம்? மலர் கண்காட்சிக்குப் பிறகு பூங்கா முழுவதும் சாப்பாட்டுக் குப்பைகளும், கடைகள் நடத்தியவர்கள் போட்ட குப்பைகளும் என்று பூங்கா குப்பைக் கிடங்காக மாறி இருந்த படங்களைப் பார்த்த போது இந்த மலர் கண்காட்சி எல்லாம் தேவையா என்று தோன்றியது. 

கீழுள்ள இந்த மூன்று படங்களும் கூகுள்-இணையம்-ஹிந்து நாளிதழிலும் மற்றொரு செய்தித் தளத்திலிருந்தும் எடுக்கப்பட்டவை - நன்றி

(துளசியின் பதிவுகள் வந்திருக்க வேண்டும். 3, 4 சொல்லியிருந்தார். ஆனால், ஞாயிறிலிருந்து அவரைத் தொடர்பு கொள்ள இயலாத நிலை, யாரையுமே தொடர்பு கொள்ள இயலாத நிலை (விட்டு வந்த மொபைல் இன்றுதான் வரும் என்று நினைக்கிறேன்) என்பதால் என்னிடம் இப்பதிவு ஏற்கனவே கொஞ்சம் தயாராக இருந்ததால் சட்டென்று இன்று போடுகிறேன். பதிவு புதியதாய் எழுதவும் நேரமின்மையும் காரணம். மொபைல் இல்லாததால் என் மின்னஞ்சலுக்கும் செல்ல முடியவில்லை. ஆனால் ப்ளாகருக்குள் செல்ல முடிந்ததால் பதிவு, கருத்துகள் என்று..) 

 

----கீதா