காசர்கோடு கலோல்சவம் - பகுதி - 1

கேரளத்தில் பள்ளி முதல் கல்லூரி வரை கல்வியுடன் மாணவ மாணவியர்க்குக் கலையார்வத்தையும் வளர்க்க ‘கலோல்சவம்’ என்ற பெயரில் கலை நிகழ்ச்சிகள் எல்லா வருடமும் நடத்தப்படுவதுண்டு. அவற்றில் வட்ட, மாவட்ட, மாநில அளவில் மாணவ மாணவியர்கள் போட்டியிடுவதும் உண்டு. ஒப்பனா, சவுட்டு நாடகம், யக்ஷகானம், ஓட்டம் துள்ளல், நாட்டுப்புறப்பாடல்கள் போன்ற மதம் சார்ந்த, பிரதேசம் சார்ந்த பல அரிய கலைகளை எல்லோரும் அறியவும் காணவும் இதனால் முடிகிறது என்பதுதான் இதன் சிறப்பு அம்சம்.

கோவிட் காரணமாகக் கடந்த இரண்டு வருடங்கள் அவற்றிற்குத் தடை விதிக்கப்பட்டிருந்த்தாலோ என்னவோ இவ்வருடம் பள்ளி கல்லூரிகளில் ஒரு புத்துணர்வுடன் மீண்டும் கலோல்சவங்கள் வலம் வரத் தொடங்கியிருக்கின்றன. அப்படி நடத்தப்பட்ட கேரள ஆரோக்கிய சாஸ்திர பல்கலைக்கழக யூனியனின் (“KERALA UNIVERSITY OF HEALTH SCIENCES ) North Zone Cultural Fest – 22 ஐப் பற்றிய காட்சிகள் மற்றும் அனுபவங்களையும் மற்றும் இதன் அருகில் இருந்த கடற்கரை மற்றும் பேக்கல் கோட்டையைச் சுற்றிப் பார்த்ததையும் இங்கு நான் உங்களுடன் பகிர்ந்து கொள்ளப் போகிறேன்.

நடந்த இடம் SI-MET Nursing College, Periya, Kasaragod (State Institute of Medical educ ation andtechnology).   எனவே பேக்கல் கோட்டை மற்றும் கடற்கரையைப் பார்க்கவும் முடிந்தது.

கலோல்சவ தொடக்க விழாவில் சமீபத்தில் திரையிடப்பட்டு மிகவும் வரவேற்கப்பட்ட “ன்னா தான் கேஸ் கொடுக்கு” (‘நீ போய் கேஸ் போடு’) படத்தில் நடித்த காசர்கோட்டைச் சேர்ந்த புதுமுகங்களான வழக்குரைஞர்கள், ஆசிரியர்கள், சாதாரண மனிதர்கள் போன்றவர்களை அழைத்து கௌரவித்ததால் அந்தத் திரைப்படத்தைப் பற்றியும்  அதிகம் அறிய முடிந்தது.

கலை நிகழ்ச்சிகளில் பங்கெடுத்த என் மகளுக்கு நாடோடி நிர்த்தத்தில் (கிராமிய நாட்டியத்தில்) முதலிடம் கிடைத்த மகிழ்ச்சி வேறு. இப்படிப் பல நிகழ்வுகள் இருக்கின்றன, பகிர்ந்து கொள்ள. எனவே எல்லாவற்றையும் மூன்று பகுதிகளாகத்தான் சொல்ல இருக்கிறேன். வாருங்கள் பயணிப்போம் காசர்கோட்டிற்கு.

ஆரோக்கிய சாஸ்திர பல்கலைக்கழகத்தின் கலோல்சவத்தில் மருத்துவக்கல்லூரி மாணவர்களில் அலோபதி, ஹோமியோ, சித்தா, ஆயுர்வேத மாணவ மாணவியர்களும், செவிலியர் மற்றும் பல் மருத்துவ மாணவ மாணவியர்களும் பங்கெடுப்பதுண்டு.

மகள் பங்கெடுத்த மோனோ ஆக்டிங்க்

                        குச்சிப்புடி                          

கிராமிய நடனம்

செப்டம்பர் 2, 3, 4, 5 தேதிகளில் என் வீட்டிலிருந்து 230 கிமீ தூரத்திலுள்ள காசர்கோட்டிற்கு அருகே உள்ள ‘பெரியா’ எனுமிட்த்தில் நடந்த கலோல்சவத்தில் கண்ணூர் அரசு மருத்துவ கல்லூரியில் இரண்டாமாண்டு பயிலும் என் மகள் அபிராமியின் குச்சுப்பிடி, நாடோடி நிர்த்தம் (கிராமிய நடனம்), மோனோ ஆக்டிங்க், கதாபிரசங்கம் (கதா காலட்சேபம்) எனும் நிகழ்வுகள் 3, 4, 5 ஆம் தேதிகளில் இருந்ததால் 2 ஆம் தேதி காலை 10 மணிக்கு மனவி, மகன், மகளுடன் காரில் கிளம்பினேன்.

மகள் பங்கெடுத்த கதா பிரசங்கப் போட்டி

கண்ணூர் போகும் போதெல்லாம் மாஹியில் பெட்ரோல் மற்றும் டீசலுக்கு 9ரூ குறைவு என்பதால் அங்கு காருக்கு கூடுதல் பெட்ரோல் போடுவதுண்டு. அப்படி காரில் பெட்ரோல் போட்டுவிட்டு தலசேரி கடலோரம், கொண்டு சென்ற சாப்பாட்டை உண்டோம். இரவுக்குக் கண்ணூர் சிறைச்சாலையில் தயாரிக்கப்படும் சப்பாத்தி, சிக்கன் கறி மற்றும் பிரியாணி வாங்கிய பின் (கண்ணூர் சிறைச்சாலைக்கு வெளியே ஒரு விற்பனை நிலையம் உண்டு), 7 மணியளவில் கலோல்சவம் நடக்கும் SI-MET கல்லூரியை அடைந்தோம்.

அக்கல்லூரி ஒரு கிராமப்பகுதியில் இருப்பதாலும் தங்குவதற்கான விடுதிகள் கொஞ்சம் தொலைவிலுள்ளதாலும் ஹோம்ஸ்டே பற்றி விசாரித்தோம். மனைவியின் பள்ளி தலைமை ஆசிரியையின்  சகோதரியான உஷா டீச்சரின் உதவியால் அவரது நண்பரான கலோல்சவ நிகழ்ச்சி கமிட்டி உறுப்பினர் திரு நாராயணன் என்பவர் ஒருவர் வீட்டில் தங்க ஏற்பாடு செய்வதாகச் சொன்னார். அவரைக் கண்டோம். SI-MET க்கு அருகிலுள்ள ஒரு வீட்டுக்கு அழைத்துச் சென்றார்.

நாங்கள் தங்கியிருந்த வீடு

அந்த வீட்டில் ஒரு வயதான அம்மா, மருமகள், பேரன் மூன்றே பேர். மாடியில் 2 அறைகளை எங்களுக்குத் தங்க தயாராக்கித் தந்தார்கள். நீண்ட பயணக் களைப்பால் சாப்பிட்டுப் படுத்ததும் நல்ல உறக்கம். மறு நாள்....

மறு நாள் காலை, நாங்கள் நால்வரும் குளித்துவிட்டு SI-MET கல்லூரியை அடைந்தோம். சிற்றுண்டிக்குப் பின், அபிராமியின் போட்டிக்கான பதிவு முடிந்த பின் 4 ஆம் அரங்கில் மோனோ ஆக்டிங்கான, சீட்டு குலுக்கலில் இவளுக்குக் கிடைத்த எண் 22. 21 பேருக்குப் பிறகுதான் எனவே 12 மணிக்குத்தான் மேடையில் ஏற முடியும்.

நான் அரங்கின் வெளியே அடுக்கி வைப்பட்டிருந்த வெட்டுக்கற்களைப் பார்த்தேன். காசர்கோடு வெட்டுக்கற்கள் வீடு மற்றும் மதில் கட்ட பேர் பெற்றவை. தமிழகத்தில் பெரும்பாலும் கட்டிடங்கள் செங்கற்களும் கருங்கற்கள் மற்றும் சிமென்ட்,, ஹாலோ பிரிக்ஸ் போன்றவை பயன்படுத்தப்படுகின்றன. ஆனால் கேரளத்தில் பெரும்பான்மையான இடங்களில் இந்த வெட்டுக் கற்கள்தான் பயன்படுத்தப்படுகின்றன.

வெட்டுக்கற்கள்

மஞ்சள் மற்றும் சிவப்பு நிறமுள்ள பாறையளவுக்குக் கடினமல்லாதவை என்றாலும் பாறைக்குப் பதிலாகப் பயன்படுத்தப்படும் கற்கள்தான் இவை கல்லூரி வளாகத்தில் உள்ள இந்த வெட்டுக்கற்கள் பாறையை இரண்டு தட்டாய் வெட்டி சமப்படுதியிருந்தார்கள்.

வெட்டுக்கல் தரை

இந்த வெட்டுக்கற்கள் வீடு கட்டவும், மதில் கட்டவும் மட்டுமல்ல தரையில் அடுக்கி இடைவெளியை சிமென்டால் அடைத்து அருமையான கான்க்ரீட் வழி போல் பல இடங்களிலும் பயன்படுத்தப்படுகின்றன.

நாங்கள் தங்கிய வீட்டின் முற்றமும் இப்படி வெட்டுக்கல்லால் அமைக்கப்பட்ட ஒன்றுதான். அவற்றைப் பல் சக்கர யந்திரத்தால் அறுத்து ஒரு அடி நீளம் முக்கால் அடி அகலம் அரை அடி உயரமுள்ள கற்கலாக வெட்டி எடுக்கும் குன்று இதுதான்.

வெட்டி எடுக்கப்படும் கற்களை இப்படிப் பயன்படுத்தி ஒரு வீடாகக் கட்டியிருப்பதைத்தான் இப்போது நீங்கள் பார்க்கிறீர்கள். இப்படிப்பட்ட கற்களில் சிறிய துவாரங்கள் நிறைந்திருந்தாலும் காலம் செல்ல செல்ல இதன் கடினத் தன்மை கூடிக் கொண்டிருக்கும் என்று சொல்லப்படுகிறது.

பேக்கல் கோட்டை

1650 ல் சிவப்ப நாயக்கரால் கட்டப்பட்ட, 40 ஏக்கரில் பரந்துகிடக்கும் பேக்கல் கோட்டையே இந்த வெட்டுக்கற்களால்தான் கட்டப்பட்டிருக்கிறது என்பதிலிருந்து அதன் உறுதித் தன்மையையும், கேரளத்தில் அதன் முக்கியத்துவத்தையும் நாம் உணர முடியும். இயக்குநர் மணிரத்தினம் இயக்கிய பாம்பே படத்தில் வரும் ‘உயிரே உயிரே வந்து என்னோடு கலந்துவிடு’ பாடல் எடுக்கப்பட்டது காசர்கோடு அருகே இள்ள இந்த பேக்கல் கோட்டையில்தான்.

இவற்றின் தொகுப்பை ஒரு காணொளியாகவும் கொடுத்திருக்கிறேன் (9.6 நி தான்) குறிப்பாகக் காணொளியின் 6.13 நி-க்குப் பின் வெட்டுக்கல் பற்றி. சுட்டி இதோ...

https://youtu.be/l2CoJIjjj6I

அனுபவங்கள் தொடரும்....

----துளசிதரன்