அக்கரைச் சீமை அழகினிலே - மனம் மயக்கும் மலேசியா - பகுதி - 1

 

மலேசியா - கோலாலம்பூர் நகரம்

நீண்ட நாட்களாகப் பிள்ளைகள் ஒரு வெளிநாட்டு சுற்றுலா பற்றிப் பேசிக் கொண்டே இருந்தார்கள்.  மூத்த மகன் ரஷ்யா ஆர்க்எங்கல்ஸில் மருத்துவம் படிப்பதால் அவன் அங்கிருந்து வரும் முன் நானும், மனைவியும், மகன் விநாயக் மற்றும் மகள் அபிராமியுடன் அங்கு போய் மகனுடன் மாஸ்கோ, செயின்ட் பீட்டர்ஸ்பர்க் மற்றும் ஆர்க்ஏங்கல்ஸ் சுற்றிப் பார்த்து திரும்ப முடிவு செய்திருந்தோம். எதிர்பாராமல் ரஷ்யா உக்ரெய்ன் போர். அந்த முயற்சியைக் கைவிட்டோம்.

அருண், கடந்த ஜூன் 18 அன்று கோழிக்கோடு கரிப்பூரில் வந்து இறங்குவான் என்று முடிவானது. பிள்ளைகளை இனியும் அமைதிப்படுத்த முடியாது எனும் நிலை. அவர்களுக்கும், எனக்கும் அதிக நாள் விடுமுறை எடுக்க முடியாது. யோசித்ததில், கடைசியாக ஸ்கைஹின்ட் Skyhind எனும் Travels and Tours Companyன் ஒரு சுற்றுலா Package ஏற்றதாய் தோன்றியது.  ஆளுக்கு ரூ 37,500. 3 இரவுகள், 4 பகல்கள் அடங்கும் சுற்றுலா. மலேசியா மட்டும். ரஜீஷ் என்பவருடன் பேசினேன். 

இணையத்திலிருந்து - நன்றி கூகுள்

முன்பணம் கொடுத்துப் பதிவும் செய்தேன். 29-06-22 இரவு 11.30க்குக் கொச்சி விமான நிலையத்திலிருந்து கோலாலம்பூருக்கு ஏர் ஏசியா விமானத்தில். திரும்புவது 03-07-22 அதே விமானத்தில் அங்கிருந்து இரவு 9.30க்குக் கிளம்பி இங்கு இரவு 11 மணிக்கு வரும்.

இரு நாடுகளுக்கும் 2.30 மணிநேரம் வித்தியாசம். போகும் போது 4 மணி நேரப் பயணத்துடன் அதைக் கூட்ட வேண்டும். திரும்பும் போது குறைக்க வேண்டும்.

அப்படிப் போகும் போது இரவு 11.30க்குப் புறப்படும் நாங்கள் காலை 6.20க்கு  அங்கு சென்று சேர்வோம். அங்கிருந்து திரும்பும் போது இரவு 9.30 ற்கு விமானமேறி இங்கு இரவு 11 மணிக்கு வந்து சேர்வோம்.

கோவிட் சான்றிதழ், PAN கார்ட் எல்லாம் விசாவுக்காகத் தேவைப்பட்டது. கூடவே மலேசியா அரசின் Mysejahtera ல் பதிவு செய்து பயண அட்டையும் எல்லோருக்கும் கிடைத்தது.

இரு நாட்களுக்குப் பின் மொத்தப் பணமும் ஸ்கைஹிண்டுக்கு அனுப்பப்பட்டது. அடுத்து என் வகுப்புகளும், விநாயக், அபிராமியின் வகுப்புகளும் அதிகம் வீணாகாமல் போய் வர ஆலோசனை செய்யத் தொடங்கினேன்.

நான் 29-06-22 வகுப்பு முடித்துக் கிளம்பலாம். அபிராமி கண்ணூரிலிருந்து மதியம் ரயில் ஏறி, திருச்சூரில் இறங்கும் நேரம் நாங்கள் அங்கு சென்று அழைத்துப் போகலாம். விநாயக் திருவனந்தபுரத்திலிருந்து மதியம் வருவது சிரமம் ஆதலால் 28-09-22 இரவே நிலம்பூர் ரயில் ஏறி 29-09-22 காலை வீடு வர முடிவு செய்தேன். நாங்கள் பயணம் முடிந்து வரும் இரவே விநாயக் மீண்டும் திருவனந்தபுரம் போக குருவாயூர் சென்னை ரயிலில் ஆலுவாவிலிருந்து ஏற பயணச் சீட்டு பதிவு செய்தேன். கொஞ்சம் தூங்கி ஓய்வு எடுத்துக் கொண்டு செல்லலாம். 5.15ற்கு திருவனந்தபுரம் சென்ட்ரலில் இறங்கலாம்.

ஆனால் இரவு 12.42 க்கு ஆலுவா ரயில் நிலையம் சென்றடைய வேண்டும். கவலைப்படத் தேவையில்லை. திரும்பும் அன்று இரவு 11 மணிக்கு விமான நிலையம் வந்து விடுவோமே. 2 மணி நேரம் 40 நிமிடங்கள் இருக்கிறதே என்ற சமாதானம். இதை எதற்குச் சொல்கிறேன் என்பது கடைசிப் பதிவில் தெரியும்.

வீட்டிலிருந்து கொச்சி விமானநிலையம் வரை காரில் சென்று அங்கு நான்கு நாட்கள் பார்க் செய்ய முடிவு செய்தேன். நாள் ஒன்றுக்கு ரூ 250 வீதம் ஆகும். இப்படி ஓரளவு எல்லாம் முடிவாகியது. 29-06-22 க்காகக் காத்திருந்தோம்.

29-06-22 அதிகாலை விநாயக் வீடு வந்து சேர்ந்துவிட்டான். எல்லாப் பொருட்களும் பெட்டி பைகளில் வைத்துத் தயாராகி விட்டன. இரவுச் சாப்பாட்டிற்குப் பொதிகளும் தயார். நான் வகுப்புகள் முடித்து 1 மணிக்கு வீட்டை அடைந்து சரியாக 2 மணிக்குக் கிளம்பினோம்.

வழக்கம் போல் வண்டூர் சிவனருள் பெற்றுப் பயணமானோம். மகளும் ரயிலேறி திருச்சூர் வந்து இறங்க, நான் காரை சாலை ஓரம் நிறுத்தி வேகமாகச் சென்று, அபிராமியை ஒரு ஆட்டோவில் அழைத்து வந்து காரில் ஏறும் போது ஒரு காவலர் வண்டியை எடுக்கக் கை காட்ட, உடனே கிளம்பினோம்.

எதிர்பார்த்ததை விட சாலையில் அதிகமாக வாகனங்கள். அங்கமாலியை அடையும் போதே இரவு 8 மணி. சுற்றுலாக் குழு (25 பேர் கொண்ட குழு) வாட்சப் குழுமத்தில் புகைப்படங்கள் வரத் தொடங்கியது. அப்போது வரை சாப்பிட்டிருக்கவில்லை.

வசதியான ஒரு இடத்தில் வண்டியை நிறுத்தி, சாப்பாட்டுப் பொட்டலங்களைப் பிரித்து அவசர அவசரமாகச் சாப்பிட்டோம். நேரம் 8.30 மணி. மீண்டும் பறந்தோம். விமான நிலையத்தில் புறப்பாடு குறி காட்டும் வழியில் போய், தூண் எண் 8 நோக்கிச் சென்றோம். அங்குதான், எங்களுடன் வரும் திரு ராஜீஷ், குழுவினருடன் காத்திருப்பதாய்ச் சொன்னார்.

கொச்சி விமான நிலையம்

அவரைக் கண்டு எல்லோரையும் அவரிடம் ஏற்பித்து விட்டு, காரை நிறுத்தும் இடத்தில் நிறுத்தச் சென்றேன். நான்கு நாட்களுடன் சில மணி நேரங்கள் அதிகமாவதால் 5 நாட்கள் என்றார், கட்டணம் வாங்கியவர். சரி என்று பணம் அடைத்து ரசீதைப் பெற்றுக் கொண்டு வண்டியை நிறுத்திவிட்டு, வேகமாகக் குழு இருக்கும் இடத்தை அடைந்தேன்.

எல்லோரும் போர்டிங்க் பாஸ் வரிசையில் நின்று வாங்கினோம். கோவிட் சான்றிதழ் காண்பிக்க வேண்டியிருந்தது. அடுத்து பாதுகாப்புச் சோதனை. பெல்ட், கைக்கடிகாரம், சில்லறைகள் என்று எல்லாம் காட்டி, அந்த இட்த்திலிருந்து தப்பித்து சிறிது நேரம் காத்திருந்த பின் ‘ஏர் ஏசியா’ விமானத்தில் ஏறினோம்.

இரு புறமும் மூன்று இருக்கைகள். 23, ஏபிசிடிஇ என்று எங்களுக்கான இருக்கைகள். அடுத்த நான்கு மணி நேரம் ஆகாயத்தில். சோர்வில், பல சிந்தனைகளுக்கு இடையே எப்போதோ மயங்கிவிட்டேன். அறிவிப்பும், சலசலப்பும் எழுப்ப, ஜன்னல் வழியே கீழே பார்க்க மலேசியா அதிகாலை இருளில் மிளிர்ந்தது.

குழு நபர் ஒருவர் எடுத்த படம்

கோலாலம்பூர் கோபுரத்திலிருந்து - கோலாலம்பூர் நகரம் - பறவைப் பார்வை

கொஞ்சம் கொஞ்சமாகச் சாலைகளும், அதில் பாயும் வாகனங்களும் தெளிவானது. கோலாலம்பூர் விமான நிலையத்தில் விமானம் இறங்க, நாங்களும் இறங்கினோம். எங்கள் ஒவ்வொருவருக்கும் கைப்பை. அருணுக்கு மட்டும் ஒரு 20கி பெட்டி.

மலேசியா விமான நிலையம்

அங்குள்ள குளியலறைகளில் களைப்பு போக கொஞ்சம் எங்களை Refresh செய்து கொண்டோம். ராஜீஷ் என்பவர்தான் எங்களோடு எப்போதும் இருக்கும் பயண வழிகாட்டி என்றாலும், மலேசியாவில் எங்களுக்கான வழிகாட்டியான நிர்மலா என்பவரும், எங்களை அழைத்துச் செல்ல இருந்த பேருந்து ஓட்டுநர் சந்தோஷும் அவர்களது நிறுவனரும் எங்களை வரவேற்றார்கள். 40 இருக்கை உள்ள பேருந்து எங்களைச் சுமந்து நகர்ந்தது. முடிந்தால் இந்தக் காணொளியைப் பாருங்கள். 

மலேசிய விமான நிலையத்திலிருந்து நாங்கள் தங்கியிருந்த இடத்திற்குச் சென்ற போது எடுத்த காணொளி. என் குரலுடன். யுட்யூப் சுட்டியும் இதோ

https://youtu.be/nl9ymjKp1ec

பேருந்தில் என் மனதில் எழுந்த நினைவுகளையும் பகிர்ந்து கொண்டே மலேசியாவையும் சுற்றிப் பார்ப்போம். என்னுடன் வாருங்கள். நாம் பேசிக் கொண்டே பயணிப்போம்.

என் பதிவுகளை, படங்களை கீதாவுக்கு இப்படி அனுப்பிட அவர் மற்றவற்றைக் கவனித்துக் கொள்கிறார். மற்றவர்களின் பதிவிற்கும் இப்படி அல்லது தமிழை ஆங்கிலத்தில் எழுதி அனுப்பிவிடுவது வழக்கம். இப்படித்தான் எங்கள் வலைப்பூ இது வரை இயங்கிக் கொண்டிருக்கிறது.

---துளசிதரன்