அக்கரைச் சீமை அழகினிலே - மனம் மயக்கும் மலேசியா - பகுதி - 2

 

//பேருந்தில் என் மனதில் எழுந்த நினைவுகளையும் பகிர்ந்து கொண்டே மலேசியாவையும்  சுற்றிப் பார்ப்போம். என்னுடன் நீங்களும் வாருங்கள். நாம் பேசிக் கொண்டே பயணிப்போம்.// பகுதி ஒன்றின் முடிவு. அப்பகுதியைப் பார்வையிட்ட, கருத்திட்ட அனைவருக்கும் நன்றி.

இப்பகுதியைத் தொடர்கிறேன்...

விமான நிலையத்தில் இருந்து  பேருந்தில் தங்கும் இடம் செல்லும் போது  தங்கும் இடத்தின் அருகில் இருக்கும் ‘புத்ரஜயா’ எனும் இடத்திற்கு அழைத்துச் செல்லப்பட்டோம். இந்த ‘புத்ரஜயா’ பற்றி சொல்வதற்கு முன் நாம் கொஞ்சம் பின்னோக்கிச் சென்று மலேஷியா உருவாகிய விதத்தையும்  பார்ப்போம். எனவே இந்த இரண்டாவது பகுதியில், ஊரின் வரலாற்றையும் (சுருக்கமாகத்தான். இணையத்தில் தகவல்கள் இருப்பதால்), அதனோடு தொடர்பாக என் மனதில் எழுந்த எண்ணங்களையும் பகிர்கிறேன்.  

நன்றி விக்கி

கடாரம் வென்ற சோழனை நினைத்துக் கொண்டே மலேஷிய மண்ணைப் பார்த்தேன். கிபி 1025 ல் கடல் வழியாக இம்மண்ணை சொந்தமாக்கிய முதலாம் இராஜேந்திர சோழனை மனக்கண்ணில் தரிசித்தேன். 1044ல் இம்மண்ணில் கொல்லப்பட்டதாகச் சொல்லப்பட்டாலும், ஆர்க்காட்டிலுள்ள பிரம்ம தேசத்தில் உடல் எரிக்கப்பட்டதாகவும், மனைவி வீரமாதேவியார் உடன் கட்டை ஏறியதாகவும் சொல்லப்படுகிறது. வரலாறு எப்போதும் அப்படித்தான்.

வளைக்கப்படும்; திருத்தப்படும்; மறைக்கப்படும்; மாற்றப்படும். எப்படியோ 19 ஆண்டுகள் இராஜேந்திர சோழனின் ஆட்சியில் இருந்த கடாரம் இது. அதன் பின்னும் குலோத்துங்க சோழன் கிபி 1063 ல் இங்கு வந்ததாகச் சொல்லப்படுகிறது. எப்படியோ 11-ம் நூற்றாண்டில் கடாரமும் ஸ்ரீ விஜயம் எனும் இன்றைய இந்தோனேஷியாவின் பாகங்களும் அதனுடன் கம்போடியா, தாய்லாந்து போன்ற நாடுகளும் சோழ மன்னர்களின் ஆட்சியில் இருந்திருக்கிறது என்பது உண்மை.

பரமேஸ்வரா எனும் இஸ்கந்தர் ஷா - நன்றி - கூகுள்

மலேஷியாவில் மன்னரான பரமேஸ்வரா (1344-1414) இஸ்லாம் மதத்திற்கு மாறி 'இஸ்கந்தர் ஷா' வாக 1424 வரை மலாக்கா சுல்தான் ஆக தன் நாட்டை விரிவுபடுத்தியிருக்கிறார். மலாய் அன்னல்ஸ் – MALAY ANNALS - எனும் மலேஷியாவின் வரலாறு கிபி 1400லிருந்துதான் ஆரம்பிக்கிறது. அதில் முதல் சுல்தான் இஸ்கந்தர் ஷா தான். கேரளாவிலும் வைணவ மதம் ஏற்ற மார்த்தாண்டவர்மா 18 ஆம் நூற்றாண்டில் புதிதாய் எழுதிய சரித்திரம்தான் இன்றும் நம்பப்படுகிறது. அதன் முன்புள்ள சம்பவங்களை விவரிக்கும் எல்லா ஓலைகளையும் சேகரித்துத் தீக்கிரையாக்கி அழித்து  மறைத்தது போல 11,12,13,14 நூற்றாண்டு வரையிலான சம்பவங்களையும் 1612 ல் எழுதப்பட்ட மலாய் ஓரியன்டல்ஸ் – MALAY ORIENTALS – மறைத்திருக்கலாம்.

ஆனால், கிபி 1511 ல் கடாரம் வந்த போர்ச்சுக்கீசியர்கள் அவர்களது சுமா ஓரியண்டல்ஸ் – SUMA ORIENTALS – எனும் புத்தகத்தில் அரிய பல தகவல்களையும் எழுதியிருக்கிறார்கள். குறிப்பாக TOME PIRES – (1465-1524) என்பவர் மூன்றாண்டு காலம் மலாக்காவில் தங்கி ஆராய்ந்து அரிய பல வரலாற்று நிகழ்வுகளையும் எழுதியதால்தான் இஸ்லாம் மதம் மாறிய மன்னர் பெயர், மதம் மாறும் முன் பரமேஸ்வரா என்பதை அறிய முடிகிறது. 

அதன் முன், மதமாக பௌத்தமும், பிராமணீயமும் இருந்ததாகவும் சொல்லப்படுகிறது. (HINDUISM என்பது ஆங்கிலேயர்கள் உருவாக்கியதுதானே. அதுவும் 18, 19ஆம் நூற்றாண்டுகளில். சுமா ஓரியண்டல்ஸ் எழுதப்பட்டது 16 ஆம் நூற்றாண்டில்). சோழர்களின் சைவ மதம் 12, 13, 14, ஆம் நூற்றாண்டுகளில் வைணவத்திற்கு வழி மாறி சாதிகள் முளைத்திருக்கலாம். பிராமணர்களின் அதிகாரத்தில் மன்னர்கள் ஆள வேண்டிய சூழல்கள் ஏற்பட்டிருக்கலாம். இப்படி எல்லாம் ஊகங்கள். ஊகங்கள்தான் பல நேரங்களில் வரலாறாகவும் எழுதப்படுகிறது.

ஒவ்வொரு மதமும் அழியக் காரணம், மனித அழிவுக்குக் காரணமாகும், ஏதோ ஒரு புற்றுநோய் செல் உடலிலேயே தோன்றுவது போல், அம்மதத்திலேயே தோன்றுவதால்தானே.

மலேஷியாவின் முதல் பிரதம மந்திரி துங்கு அப்துல் ரஹ்மான் (Tunku Abdul Rahman) நன்றி - விக்கி

போர்ச்சுக்கீசியருக்குப் பின் 1641-ல் டச்சுக்காரர்களும், 1824 ல் பிரிட்டிஷ்காரர்களும் மலேஷியாவை ஆண்டிருக்கிறார்கள். அப்போதும் சுல்தான் 'இஸ்கந்தர் ஷா' வின் பின் வந்த தலைமுறையினரின் செல்வாக்கு குறையவே இல்லை. 20 ஆம் நூற்றாண்டின் முதல் பாதியில் மலேய மக்களுக்குக் கிடைத்த கல்வியறிவு, பிரிடிட்டிஷாருடன் பேசி கத்தியின்றி ரத்தமின்றி திரு. துங்கு அப்துல் ரஹ்மானின் (Tunku Abdul Rahman) தலைமையில் 31 ஆகஸ்ட் 1956 ல் சுதந்திரம் பெற உதவியானது. 

அப்படி மலேஷியா, 70% மலாய் மக்களும் 20% சைனா மக்களும், 7% இந்தியர்களும் (தமிழர்களும்) 3% மற்றவர்களும் அடங்கிய ஒரு இஸ்லாமிய நாடானது. எல்லோரும் மதங்களின் ஒற்றுமையை பேச்சளவில் மட்டுமல்ல செயலிலும் கடைப்பிடிப்பதை இங்குக் காணலாம். இங்குள்ள 9 மாநில சுல்தான்களும் 5 வருடம் மாறி மாறி மலேஷியாவை ஆளும் முறை நிலவுகிறது.

அதனுடன் மக்களவை தேர்ந்தெடுக்கப்படும். அரசவையும் உண்டு. பிரதமரும் மற்றும் அமைச்சர்களும் உண்டு. மலேஷியாவின் வளமும் இதன் செழுமையும் ஒரு முக்கியக் காரணம். முன்பு உலகில் ‘டின்’ (Tin) அதிகமாகக் கிடைத்த இடம் என்றால் இன்று பாமாயில் மற்றும் ரப்பர் உற்பத்தியில் உலகில் முதலிடம் வகிக்கும் நாடு.

இயற்கை அன்னை எல்லா வளங்களையும் வாரி வழங்கியிருக்கும் நாடு. 3.3 கோடி மக்களின் நலனில் அக்கறை செலுத்தும் அரசு. அதற்கு நல்ல ஓர் உதாரணம், சாலைகள் தான். மேலை நாடுகளைப் போல் அருமையான சாலைகள், மேம்பாலங்கள், சாலையோர ஒடைகள். போக்குவரத்து சிக்னலில் காத்திருக்க வேண்டிய அவசியமில்லாத நிலை. லஞ்சம் ஊழல் இல்லாததால் மொத்த பணமும் சாலைகளில் செலவிடப்படுவதும் ஒரு முக்கியக் காரணமாக இருக்கலாம்.

இப்படிப் பல சிந்தனைகளில் மலேஷிய சாலைகளைப் பார்த்துக் கொண்டே வந்த போது கூடவே கேரளத்திற்கும் மலேஷியாவிற்கும் தொடர்பான வருத்தமான நிகழ்வும் நினைவுக்கு வந்து, திடீரென லீ சீன் பென் – Lee Seen Ben - நினைவுக்கு வந்தார். குற்ற உணர்வால் மனது கனத்தது.

பாலக்காடு கொளப்புள்ளி சாலை உலக வங்கியின் நிதி உதவியுடன் 1613 கோடி செலவில் செய்யத் தயாரான PATI எனும் மலேஷிய நிறுவனத்தின் முதன்மை திட்ட மேலாளர் (Chief Project Manager). கேரளத்தில் உள்ள சாலைகளில் 16 ஆண்டுகளுக்குப் பின்னும் தரமாக இப்போது நிலை நிற்கும் அந்தச் சாலையை நிறுவியவர்தான் லீ சீ பென் – Lee See Ben.

லஞ்சம் ஊழல் பற்றித் தெரியாத காரணத்தால் (நிறுவனமும் அதை ஊக்கப்படுத்தாதுதான்) அரசிடம் இருந்து பணம் சரியான நேரங்களில் கிடைக்காமல் போனது. திட்டம் பாதியில் நின்று விட மனமுடைந்து மலேஷியா சென்று தன் நிறுவனத்திற்கும் தன் மனைவிக்கும் நிலைமையை விளக்கி (அவரது கடிதத்தில் ஊழல் செய்த பல அரசியல்வாதிகள் முக்கியப் புள்ளிகள் பலரின் பெயர்களையும் குறிப்பிட்டிருந்திருக்கிறார்) கடிதம் எழுதி வைத்துவிட்டுத் தற்கொலை செய்து கொண்டவர். இந்தச் செய்தி இணையத்தில் நிறைய இருப்பதால் நான் இங்கு அதிகம் விவரிக்கவில்லை. Actually he came and worked sincerely in a wrong place, in a wrong time. Mr. Ben, we are terribly sorry. We pray for your soul.

PATI போன்ற நிறுவனங்களும் லீ சீன் பென் போன்ற முதன்மை திட்ட மேலாளர்களும் உருவாக்கியிருக்கும் மலேஷியாவில் அருமையான சாலைகளிலும் மேம்பாலங்களிலும் பேருந்து அதி வேகத்தில் சென்றாலும் குலுங்கல் தெரியாமல் சென்று ‘புத்ரஜயா’ எனும் இடத்தில் நின்றது. 

புத்ரஜயா - பின்னில் இருப்பது பிரதமரின் அலுவலகம். அங்கு 9 மாகாணங்களின் கொடிகளும் கொடிக்கம்பத்தில்

600 ஆண்டுகளுக்கு முன்பு வைணவம் துறந்து இஸ்லாம் ஏற்ற மன்னரும் மக்களும் இப்போதும் சம்ஸ்கிருதத்தை தம் மொழியிலிருந்து துறக்கவில்லை என்பதன் அடையாளம்தான் இந்தப் பெயர். ‘புத்ர’ என்பது இப்போதும் மன்னர்களின் பெயரில் உண்டு. அது போல் வெற்றியைக் குறிக்கும் ‘ஜயா’ என்பதும். அதே போல் பல பெயர்களுடனும் இப்போதும் ‘Chulan’  (சோழன் என்பதுதான்) பயன்படுத்தப்படுகிறது. சோழனின் பின் தலை முறையினராக இருக்கலாம்.

ஆனால் மலேஷியாவிலுள்ள தமிழினத்தில் பெரும்பான்மையினர் ஆங்கிலேயர் காலத்தில் இலங்கை மற்றும் இந்தியாவிலிருந்து வந்தவர்கள் என்று சொல்லப்படுகிறது.

இது மட்டுமல்ல ஆங்கில மொழியையும் அவர்கள் ஒதுக்கவில்லை. ஆங்கில எழுத்துக்களைத்தான் தங்கள் மொழிக்கு எழுத்து வடிவமாக அவர்கள் இப்போதும் பயன்படுத்துகிறார்கள். இப்படி எல்லாவற்றையும் ஏற்றுக் கொள்ளும் தன்மையுடையவர்கள்தான் மலேஷியர்கள்.

கோலாலம்பூரின் நெரிசலுக்கு முடிவு கட்ட பிரதமர் மற்றும் அமைச்சர்களின் அலுவகங்களுடன், அரசு அலுவகங்களும், அரசு ஊழியர்கள் குடியிருப்புகளும் ஓரிடத்தில் அமைக்க முடிவு செய்து, அப்படி உருவாக்கப்பட்ட ஒரு நகரம்தான் ‘புத்ர ஜயா’. மலேஷியாவின் தலைநகர் கோலாலம்பூர். நிர்வாகத் தலைநகர் புத்ரஜயா. 

புத்ரஜயாவின் முன்புறம் - பிரதமர் அலுவலகத்திற்கும் மேலே உள்ள படத்தில் உள்ள புத்ரஜயா எழுத்துகள் உள்ள இடத்திற்கும் பிரதமர் அலுவலகப் பகுதிக்கும்  இடையில் உள்ள பகுதி - மலேஷியாவில் எங்களுக்கான பயண வழிகாட்டி நிர்மலா அவர்கள் - மேலே படத்தில் இருக்கும் 9 மாகாணங்களின் கொடிகளும் கொடிக்கம்பத்தில் இதிலும் தெரியும்

புத்ரஜயா மேம்பாலம்

புத்ர மசூதி - Putra Mosque - நன்றி - விக்கி

செயற்கையாக உருவாக்கப்பட்ட ஓரு ஏரியும் இங்கு உண்டு. பிரதமரின் மாளிகையும் தொழுவதற்கான ஒரு மிக பிரம்மாண்டமான மசூதியும் உண்டு. 

பசிபிக் எக்ஸ்பிரஸ் ஹோட்டல் - நன்றி - கூகுள்

அவற்றைப் பார்த்தபின் காலை சிற்றுண்டியும் உண்டுவிட்டு, நாங்கள் தங்கவிருந்த, சைனா டவுனில் உள்ள பசிபிக் எக்ஸ்பிரஸ் ஹோட்டலை அடைந்தோம். 25 பேருக்கு 13 டீலக்ஸ் அறைகளை ஸ்கைஹிண்ட் ட்ராவல்ஸ் பதிவு செய்திருந்தது. மனைவியும் மகளும் 8226 ஆம் எண் அறையிலும், நானும் இரண்டாவது மகனும் 8225 ஆம் எண் அறையிலும் பெரியவனும் மற்றும் கேரள மின்சாரவாரியத்திலிருந்து ஓய்வு பெற்ற திரு ஜேக்கப்பும் 8223 ஆம் எண் அறையிலுமாக எல்லோரும் ஓய்வெடுத்தோம். 

மலேஷியாவில் தங்கவிருந்த 3 நாட்களில் நம் பதிவர் தம்பி ரூபன் ராஜாவை எப்படியேனும் சந்திக்க வேண்டும் என்ற ஆர்வம் இருந்தது. ஆனால் அவர் இலங்கையில் இருப்பதாக அறிந்ததும் கொஞ்சம் வருத்தமாகிவிட்ட்து. அவரையும் சந்தித்திருந்தால் அவருடனான அந்த அரிய நேரத்தையும் இங்கு உங்களுடன் பகிர்ந்திருப்பேன். அவரும் மலேஷியா பற்றி மேலதிக விவரங்கள் தந்திருப்பார்.

அடுத்த பகுதியில் குழுவில் வந்திருந்த ஒரு குடும்பம் பற்றிய நெகிழ்ச்சியான சம்பவமும், குழுவினர் பற்றியும், அன்று மாலையில் சென்ற இடங்கள், மறுநாள் (இரண்டாவது நாள்) சென்ற இடங்கள், அன்று நடந்த பதற்றமான சம்பவம் அது என்ன என்பது பற்றியும் சொல்கிறேன்.

https://youtu.be/asE94ZDdOwo

2.05 நிமிடங்கள்தான். முடிந்தால் பாருங்கள். நகரத்திற்குள் எங்களுக்கான பேருந்தில் சென்ற போது எடுத்த காணொளி 

-------துளசிதரன்