உயிர் ஊசலாடிக் கொண்டிருக்கும் பொது உடைமை நிறுவனங்கள்

      கடந்த புதனன்று, 17.09.2014, தூர்தர்ஷனில் செய்திகள் வாசித்தவர் சீனக் குடியரசுத் தலைவரான க்சி ஜின்பிங்கின் (Xi Jinping) பெயரைத் தவறுதலாக உச்சரித்து, விவாதத்திற்கு உள்ளானது எல்லோரும் அறிந்ததே.  தற்காலிகச் செய்தி வாசிப்பவரான அவரது வேலையும் இதனால் பறிபோனது.  க்சி என்று உச்சரிக்க வேண்டியச் சொல்லான xi  ஐ அவர் தவறுதலாக   XI ரோமன் எண் பதினொன்று என்று நினைத்து லெவன் ஜின்பிங்க் என உச்சரித்தது தான் பிரச்சினையாகிவிட்டது. செய்தி வாசித்தவர், இந்தியா வரவிருக்கும் சீனக் குடியரசுத் தலைவரைப் பற்றியும், அவரது பெயரைப் பற்றியும் அறியாது இருந்தது குற்றம்தான்.  அதனால்தான் அவர் பெயரை இப்படி “லெவன்” சின்பிங்க் என்று வாசிக்க வேண்டியதானது. 

இதுபோன்ற பொறுப்பான பதவி வகிப்பவர் இத்தகைய தவறிழைத்தது மன்னிக்க முடியாதக் குற்றம்தான். இதில் தண்டனை பெற்ற அவரை மட்டும் குற்றம் சொன்னால் போதுமா?  நன்றாகச், சுத்தமாகத் தெளிவாகச் செய்தி வாசிப்பவர்கள், தூர்தர்ஷனுக்கு எளிதாகக் கிடைப்பதில்லையாம்.  எனவே தற்காலிகமாகக் கிடைத்தவர்களை எடுக்க வேண்டிய சூழலாம்.  துர்தர்ஷனுக்கு செய்தி வாசிக்க நிரந்தரமான ஆட்கள் இல்லையாம்.  நூற்றுக்கணக்கானத் தனியார் சானல்கள் வந்ததும், அவர்களுடன் போட்டியிட முடியாமல் தூர்தர்ஷன் திணறுவது தெரிகிறது.

இதே போன்று முன்பு, ஹெச் எம் டி கைக்கடிகாரங்கள், ஒவ்வொரு இந்தியரின் கைகளிலும் அவர்களுக்கு நேரத்தைக் காட்டி பெருமை சேர்த்த காலமும் உண்டு.  டைட்டான் போன்ற கைக்கடிகாரக் கம்பெனிகள் வந்ததும் ஹெச் எம் டி கைக்கடிகாரங்கள் லிமிட்டெட் போன்ற பொதுவுடைமை நிறுவனங்கள் காணாமல் போய்விட்டன. தனியார் கூரியர் சர்வீஸ் தொடங்கப்பட்டதும் இந்தியத் தபால் துறை சற்று ஆட்டம் கண்டது.  பொதுவுடைமை நிறுவனங்களான இவற்றை எல்லாம் நிலை நிறுத்த.  அரசும், சம்பந்தப்பட்ட அதிகாரிகளும் ஏன் ஆவன செய்வதில்லை?  இது போல், வரும் நாட்களில் பொதுவுடைமையிலுள்ள நிறுவனங்கள் எவையெல்லாம் உயிரழக்கப் போகிறதோ தெரியவில்லை!  இறைவனுக்குத்தான் வெளிச்சம்!

படங்கள் : கூகுள்