ரங்கனதிட்டு பறவைகள் சரணாலயம் - ஸ்ரீரங்கப்பட்டினம் கோயில் - பயணம் - 6

ரங்கனதிட்டு - இப்பதிவில் பறவைகளைப் பார்வையிடும் கோபுரம் 

படகிலிருந்து இறங்கியதும் நேரே இருக்கும் கடையிலிருந்து (சென்ற பதிவில் போட்டிருந்தேனே அக்கடைதான்) வலப்புறம் இதோ பாருங்க ஒரு தகவல் கைகாட்டிப் பலகை. தொங்கு பாலம், கண்ணாடி பாலத்துக்கான வழி என்று காட்டுகிறது.

அப்படி நடக்கும் போது மூங்கில்

வலப்பக்கம் ஏறிப் பார்க்கும் பார்வையாளர் கோபுரங்கள் என்று இருக்கின்றன. 

பார்வையாளர் கோபுரங்களை விட்டுவிட முடியுமா? என்னவோ என் கேமரா அழகான படங்களையும் காணொளிகளையும் எடுத்துத் தள்ளும் என்ற நினைப்பில் ஆர்வத்துடன் இருக்கும் என் குழந்தை மனசை ஏமாற்றக் கூடாதில்லையா அதனால ஏறி சில காட்சிகளை எடுத்துக் கொண்டேன். அவற்றை மட்டும் இங்கு இப்பதிவில் பகிர்கிறேன்.

முதல் கோபுரத்திலிருந்து இந்த இரண்டும் எடுத்துக் கொண்டு அடுத்த கோபுரத்திலிருந்து பார்ப்போம் ஏதாச்சும் காட்சிகள் கிடைக்கின்றனவா என்று இறங்கி நடந்தப்ப, 

இடப்புறம் பல வகை மரங்களின் பூங்கா என்ற பலகை. ஆஹா! இப்ப ஒரு க்ளிக். 2 வது கோபுரத்தில் ஏறிப் பார்த்துவிட்டு வருகிறேன். இந்த கீதா உங்களை எல்லாம் பார்க்காமல் போய்விடுவாளா என்ன? என்று அதுங்களுக்கு வாக்குறுதி கொடுத்துவிட்டு....

இரண்டாவது கோபுரத்திற்கு வந்தாச்சு. அங்கிருந்து பார்க்கப் பார்க்க...பார்த்துக் கொண்டே இருக்கலாம் போல இருந்தது. பறவைகள் அங்குமிங்கும் தண்ணீரில் உரசிக் கொண்டு பறந்தபடியும், இந்தத் திட்டிலிருந்து அந்தத் திட்டிற்கு என்று பறந்து உட்கார்ந்து ...ஒன்று உட்கார மற்றொன்று எழுந்து பறக்க என்று... நான் காட்சிகளைப் படமும் பிடித்தேன் காணொளியும் எடுத்தேன். எல்லாம் கொஞ்சம் ஜூம் செய்துதான் எடுக்க முடிந்தது. காணொளிகளைத் தொகுத்துக் கீழே கொடுத்துள்ளேன்.

 நான் எடுக்க முயற்சி செய்தது ஒரு பறவை பறப்பதை. அங்கு அப்போது குச்சி மிதப்பது போன்றுதான் எனக்குக் கேமராவில் தெரிந்தது. ஆனால் வீட்டிற்கு வந்து கணினியில் ஏற்றிப் பார்க்கும் போதுதான் தெரிந்தது பறவை கேமராவில் வரவில்லை, மிதப்பது குச்சியும் இல்லை அது முதலை என்று தெரிந்தது. உங்களுக்கும் தெரிகிறதா?அதுக்குக் கொஞ்சம் முன்னர்தானே படகில் இந்த இடமெல்லாம் சென்று வந்தோம் என்று நினைத்துக் கொண்டேன். 

பறவைகள் பறப்பது தெரிகின்றதா?

 இப்படத்தில் என்ன தெரிகிறது எதை நான் எடுக்க முயற்சி செய்திருக்கிறேன் என்று கண்டுபிடிக்க முடிகிறதா?

அப்படி இரண்டாவது கோபுரத்திலிருந்து எடுத்துக் கொண்டிருந்த போது ஒரு நத்தைகுத்தி நாரை அந்தத் திட்டிலிருந்து பறந்து வந்து கோபுரத்தின் அருகில் இருக்கும் இம்மரத்தின் கிளையில் உட்கார்ந்தது. நான் ஜூம் மோடில் காணொளி எடுத்துக் கொண்டிருந்ததால், கிளை அருகில் என்பதால் பறவை  கேமராவில் காணொளி ஃப்ரேமிற்குள் வரவில்லை. உடனே ஜூம் அவுட் செய்து கொஞ்சம் பிடித்தேன் காணொளியில். கீழே காணொளியில் கடைசியில் சேர்த்திருக்கிறேன். அது உட்கார்ந்ததும் ஒரு க்ளிக் எடுத்தேன். அது என்னைப் பார்ப்பது தெரிகிறதா? 

https://www.youtube.com/watch?v=Nv9rWihb3uU

பறவைகள் அங்குமிங்கும் பறப்பதும் அமர்வதும் என்று...

 

கோபுரத்திலிருந்து இறங்கி தொங்கு பாலம், கண்ணாடி பாலம் என்பவை எப்படி இருக்கும் என்ற நினைத்துக் கொண்டே பூங்காவிற்குள் நடக்கத் தொடங்கினோம். அங்கு பார்த்தவை அடுத்த பகுதியில்.

-----கீதா