திருநெல்வேலி - நாகர்கோவில் - (ஆரல்வாய்மொழிப் பகுதி) - 4

பெங்களூர் – நாகர்கோவில்  (கடம்போடுவாழ்வு, திருவனந்தபுரம் வழி திருவண்பரிசாரம்) – 9

திருநெல்வேலி - நாகர்கோவில் - 1

திருநெல்வேலி - நாகர்கோவில் - 2

திருநெல்வேலி - நாகர்கோவில் - 3

காவல்கிணறை அடுத்து மிக அருகில் உள்ள முப்பந்தல் எனும் சிறு கிராமத்திலிருந்து கன்னியாகுமரி மாவட்ட எல்லை தொடங்குகிறது. இக்கிராமம் ஆரல்வாய்மொழி பகுதியில்தான் இருக்கிறது. 

நன்றி இணையம். இதோ இந்த வரைபடத்தில் மஹேந்திரகிரி மலைப்பகுதி  ஆரால்வாய்மொழி எல்லாம் தெரிந்து கொள்ளலாம்

சேர சோழ பாண்டிய மன்னர்களை அழைத்து ஓளவையார் இங்கு ஒரு திருமணத்தை நடத்தியதாக வரலாறு இருப்பதாகச் சொல்லப்படுகிறது. அப்போது மூவேந்தர்களும் பந்தல் அமைத்து தங்கியதால் முப்பந்தல் எனப் பெயர் பெற்றதாகவும் சொல்லப்படுகிறது. (எனது தமிழ் ஆசிரியை சொல்லிக் கொடுத்தது ப்ளஸ் விக்கியிலும் அப்படித்தான் இருக்கிறது)

முப்பந்தல் இசைக்கியம்மன் கோயில் மிகவும் புகழ்பெற்ற கோயில். இக்கோயில் நெடுஞ்சாலையிலேயே உள்ளது. கோயில் அருகிலேயே பேருந்து நிறுத்தம். 

ஔவையாரின் உருவச் சிலைகள் இரண்டு இருக்கிறது என்று தோழி ஒருவர் சொன்னார். எனக்குப் பார்த்ததாக நினைவு இல்லை. இங்குதான் ஔவையார் மரணம் அடைந்ததாகச் சொல்லப்படுவதாகவும் அத்தோழி சொன்னார்.

பேருந்துவழித் தடத்தில் பழைய நெடுஞ்சாலையில் சாலை ஓரத்திலேயே உள்ள இந்தக் கோயிலை ரயிலில் சென்ற போது கொஞ்சம் தூரத்தில் தெரியும் என்றாலும் டக்கென்று அடையாளம்  காண முடியவில்லை. மாற்றங்கள் இருந்ததால். அதனால் படம் எடுக்காமல் விட்டுவிட்டேன். 

இங்கு வீசும் காற்றில் அதிக அளவு ஈரப்பதம் உள்ளதால் காற்றாலை மின் உற்பத்தி அதிகம் நடைபெறுகிறது.

ஆரல்வாய்மொழி பஞ்சாயத்தில் உள்ல முப்பந்தல் இசைக்கியம்மன் கோயிலினால் இப்பகுதி புகழ்பெற்றது என்றால்  இப்போது காற்றாலைப் பண்ணையால் மிகவும் புகழ்பெற்றுள்ளது. ஒரு காலத்தில் ரொம்பவும் பிற்பட்டு இருந்த இக்கிராமம் இப்போது இந்தக் காற்றாலைப் பண்ணையால் மின்சாரம் பெறுகிறது. வேலைவாய்ப்புகளும் பெற்றிருக்கிறதாகத் தெரிகிறது. நல்ல விஷயம்.

இது செயல்பாட்டில் உள்ள காற்றாலைப் பண்ணை. இந்தியாவில் 2வது பெரிய பண்ணை. தமிழ்நாடு எரிசக்தி மேம்பாட்டு முகமை (தமிழ்நாடு எனர்ஜி டெவலப்மென்ட் ஏஜன்ஸி) உருவாக்கி நிறுவுகிறது. இந்தியாவின் பிற காற்றாலைப் பண்ணைகளின் முன்னோடியாகவும் திகழ்கிறது. உலகில் செயல்பாட்டில் உள்ள காற்றாலைப் பண்ணைகளில் 3 வது இடத்தைப் பெற்றிருக்கிறது. 

காற்றாலைப் பண்ணையைப் பார்க்கலாம். ஒரு சேர எண்ணற்றக் காற்றாலைகளையும் அவை சுற்றுவதையும் பார்க்க மிக அழகாக இருக்கும்.

மேலே உள்ள இரு படமும் ஒரு புறமுள்ள மலைகள். மறுபுறம் உள்ள மலைகள் கீழே. வண்டியின் முன்புறம் அல்லது கடைசியில் பயணம் செய்தால் இரு புறமும் மலைகளும் இடையில் பாதையுமாகப் படம் எடுக்கலாம். அதுக்குத்தான் இதோ கீழே ஆரல்வாய்மொழி கணவாய் வரைபடம் கொடுத்திருக்கிறேன்

வரைபடத்தில் நீலக்கலர் மார்க்கிங்க் இருக்கு இல்லையா, அதுதான் கணவாய். அருகில் இருக்கும் மற்ற மலைகளின் பெயர்களும், ஊர்களின் பெயர்களும் இருக்கின்றன பாருங்கள். நன்றி - திரு ராஜ் பகத் 

முப்பந்தலில் இருந்து அடுத்த 3, 4 நிமிடத்தில் ஆரல்வாய்மொழி ஊர் என்றாலும் அதன் முன்னரேயே ஒரு பக்க ஆரல்வாய்மொழி கணவாய் மலைகள் தொடங்கிவிடும். இது சிறிய கணவாய் தான். (இதை விடக் கொஞ்சம் பெரிய கணவாய் ஆரியங்காவுக் கணவாய் திருநெல்வேலி மாவட்டத்தின் மேற்குத் தொடர்ச்சி மலையில் செங்கோட்டையிலிருந்து கொல்லம் செல்லும் வழியில் கணவாயைக் கடந்துதான் செல்ல வேண்டும். கண்கொள்ளாக்காட்சி. இந்த வழியாகவும் பயணிக்க வேண்டும் என்ற ஆசை உண்டு.)

ஆங்கிலேயே ஆட்சியில் ஆரம்போலி/ பாஸ் என்று அழைக்கப்பட்ட ஆரல்வாய்மொழி/கணவாய் மிகவும் முக்கியமான பகுதி. பண்டு திருவிதாங்கூரையும் மெட்ராஸ் பிரெசிடென்சியையும் இணைக்கும் பகுதி. சேர ஆட்சியின் மீது நடந்த படையெடுப்புகள் எல்லாம் இக்கணவாய் வழியாகத்தான்.

ஆரல் என்றால் கோட்டை. படையெடுப்புகளைத் தடுக்க வேனாடு(கேரளப்பகுதி) ஆட்சியாளர்களால் கட்டப்பட்டு பின்னர் திருவிதாங்கூர் சமஸ்தானத்தினால் பராமரிக்கப்பட்ட கோட்டை என்பதாலும் காற்று (ஆரல்) அதிகம் (ஆசியாவிலேயே என்றும் சொல்லப்படுகிறது) வீசும் பகுதி அதாவது காற்றின் மொழி!!! என்பதாலும் இப்பெயர் என்று சொல்லப்படும். அப்போதைய திருவிதாங்கூர் சமஸ்தானத்திற்கு மிக முக்கியக் கோட்டை. வேறு வரலாறும் உண்டு எப்படி ஆங்கிலேயர் கைப்பற்றினர் என்று.

அக்கோட்டையின் எச்சங்கள் உண்டு. ஆரல்வாய்மொழி ரயில் நிலையம் பின்னே. ஆனால் ரயில் நிற்காததால் ஃபோட்டோ எடுக்க முடியவில்லை. ஆனால் பார்த்தால் கோட்டையின் பகுதியா என்று வியக்கும் அளவிற்கு மோசமாக இருக்கும். ரயில்வேயும் அதை கண்டு கொள்ளவில்லை. தொல்லியல் துறையும் கண்டு கொள்ளவில்லை என்பது மிகவும் வேதனையான விஷயம். கன்னியாகுமரி கண்டு கொள்ளப்படாத மாவட்டம் என்பது பல வகைகளில் புலனாகிறது.

பதிவில் கொடுக்காத, மற்றும் கொடுத்த படங்களின் தொகுப்பு சிறிய காணொளியாக. இங்கு பார்க்க முடியவில்லை என்றால் யுட்யூபிற்குச் சென்றும் பார்க்கலாம் சுட்டி இதோ.

https://youtu.be/PaPWIgud0Oo

கணவாய்/மலைகளுக்கு இடையில் உள்ள பாதையில் குதிரையில் சென்றால் எப்படி இருக்கும் என்று தோன்றியதில் இந்த இசைதான் கொஞ்சம் கிட்டத்தட்ட இருந்ததால் அதை இணைத்துள்ளேன் 

 

ஆரல்வாய்மொழி கணவாய் மலைகளும் (ஒரு பக்கமுள்ள மலைகள்தான்) காற்றாலைப் பண்ணையும்

இப்போது ஆரல்வாய்மொழி மலைகளைப் பார்த்துக் கொண்டிருங்கள். அதற்கு அப்புறம் நாகர்கோவில் ஸ்டேஷன் வரை உள்ள பகுதிகள் அடுத்த பதிவில். 

----கீதா