நாகர்கோவில் - கடம்போடுவாழ்வு - 2

//நீங்களும் வாருங்கள். கொஞ்சம் காத்திருங்கள். கடம்போடுவாழ்வு கிராமத்தைக் காட்டுகிறேன். என் உறவினர்களையும் அறிமுகப்படுத்துகிறேன். // என்று சொல்லியிருந்தேன்.  இதோ ஊருக்குள் நுழையப் போகிறோம்.

நுழையும் போதே நம்ம செல்லங்கள், எந்தப் போக்குவரத்துத் தொல்லையும் இல்லாமல் ஜாலி நடை போடுது பாருங்க. ஆனா பாவம் எல்லாம். பரிதாபமான ஜீவன்கள்.

வலப்பக்கம் ஒரு அறிவிப்பு பலகை தெரிகிறதா? ஏர்வாடி மொட்டை மலை படம் - பாருங்க இந்த மலைதான் (திருநெல்வேலி) ஏர்வாடியின் அடையாளம் - படம். அதில் ஏர்வாடி சிறப்புப் பேரூராட்சி எல்லை என்று சொல்லும் பலகை. பேரூராட்சி ஓகே. சிறப்புப் பேரூராட்சினா? 

உங்களுக்குத் தெரிந்திருக்கும் ஆனால் எனக்குத் தெரியவில்லை. கூகுள் செல்லத்துக்கிட்ட கேட்டப்ப அதன் சார்பில் இதோ விக்கி சொல்கிறார்.

பேரூராட்சிகள் ஐந்து வகையில் அதன் வருவாய்க்கு ஏற்ப பிரிக்கப்பட்டுள்ளன. அவை :-

1.     மூன்றாம் நிலை பேரூராட்சி - ஆண்டிற்குப் பத்து இலட்சத்துக்கு குறைந்த வருவாய் உடையது

2.     இரண்டாம் நிலை பேரூராட்சி - ஆண்டிற்குப் பத்து இலட்சத்திற்கு மேல் வருவாய் உடையது

3.     முதல் நிலை பேரூராட்சி – ஆண்டிற்கு இருபத்து ஐந்து இலட்சத்துக்கு மேல் வருவாய் உடையது

4.     தேர்வு நிலை பேரூராட்சி - ஆண்டிற்கு ஐம்பது இலட்சத்துக்கு மேல் வருவாய் உடையது 

5.    சிறப்பு நிலை பேரூராட்சி - ஆண்டிற்கு ஒரு கோடிக்கு மேல் வருவாய் ஈட்டுபவை. இப்படி நகராட்சியைப் போலவே அதன் வருவாய்க்கு ஏற்பப் பிரிக்கப்படுகிறது. இந்தப் பேரூராட்சிகள், நகராட்சியைப் போலவே தன்னிச்சையாகச் செயல்படும் தன்னாட்சி அதிகாரம் பெற்றுள்ளன.

நன்றி விக்கி

திருநெல்வேலி மாவட்டத்தில் உள்ள மிக அழகான பசுமையான, வளமான - இப்படி  அடைமொழிகள் பல சொல்றதுல என்ன ஒரு சந்தோஷம் பாருங்க! - கிராமங்களில் ஒன்று கடம்போடுவாழ்வு. மிகச் சிறிய கிராமம். வள்ளியூர், களக்காடு, நாங்குனேரி, ஏர்வாடி, திருக்குறுங்குடிக்கு டக்குனு நினைச்சதும் போகக் கூடிய தூரத்தில்  அருகே இருக்கும் கிராமம். - திருக்குறுங்குடியும் என் மனதிற்கு நெருக்கமான ஊர்! எந்த ஊர் தான் உனக்குப் பிடிக்கலை அதைச் சொல்லு - ஒரு தொடக்கப்பள்ளி இருக்கிறது. தனியார் ஆசிரியர் பயிற்சிக் கல்லூரி (ஊருக்கு வெளியே) களக்காடு சாலையில் இருக்கிறது.  

கடம்போடுவாழ்வு கிராமத்தின் தெற்குப் பகுதியில்தான் என் சித்திப்பாட்டியும் அவரது இரு மகள்களும் இருக்கின்றனர். கிராமத்திற்கும் தெற்குப் பகுதிக்கும் இடையே அரை கிலோமீட்டர். இந்த அரை கிலோமீட்டர் பகுதி இருபுறமும் வயல்களும், வாழைத்தோப்பும், ஓடைகளும் என்று பசுமை பசுமை. ஒரு வேளை நான் போனது மழை சமயம்ன்றதுனாலயோ? கோடைகாலத்துல போய்ப்பார்க்கணும் ஒருதடவையாவது.  

மளிகைப் பொருட்கள், பிற பொருட்கள் வாங்க களக்காடு டவுன் அல்லது ஏர்வாடிக்குச் செல்ல வேண்டும். வீட்டருகில் ஆபத்பாந்தவன் என்று வெகு சிறிய கடை உள்ளது.

அது சரி இப்படி, கடம்போடுவாழ்வு ன்னு ஒரு அழகான பெயர் இந்தக் கிராமத்துக்கு எப்படி வந்திருக்கும்னு மூளையில் நியூரான்களின் குடைச்சல். கடம்பர் எனும் குயவர்கள் இங்கு முன்னர் இருந்திருப்பாங்களா? ஆனால் பேருக்கு ஒரு சட்டி, பானை கூட கண்ணுல படலையே. கடம்ப மரம், நிறைய இருந்து கடம்பவனம் இருந்திருக்குமோ? கடம்ப மரம் ஒன்று கூடக் கண்ணில் படவில்லை. ஒரு வேளை கடம்பன் - முருகனோடு சம்பந்தப்பட்ட ஊராக இருக்குமோ? ஆனா முருகனையும் காணும். ஊர்மக்களுக்கும் தெரியவில்லை. 

(இந்தக் கடம்பமரம் படம் என்னிடம் ஏதேச்சையாக இருக்கிறது சென்னையில் எடுத்தது. முன்பு இங்கு பகிர்ந்து இது என்ன என்று யாராவது சொல்ல முடியுமா என்று கேட்டிருந்தேன். ஆனால் அப்போது பதில் கிடைக்கவில்லை. இப்போதுதான் அது கடம்ப மரம் என்று தெரிந்துகொண்டேன். மீண்டும் அதை 'என் மூன்றாவது விழியின் பார்வையில்' பகுதியில் போடுகிறேன்)

ஊரில் பிராபல்யம் முத்துமாரியம்மனும், சுடலையும். சரி விடு கீத்ஸ் அந்த ஊர்க்காரங்க அல்லது சுத்துப்பட்டு யாராச்சும் இதைப் பார்த்தா பெயர்க்காரணம் சொல்லலாம்.  நீ பாட்டுக்கு க்ளிக் பண்ணித் தள்ளு அதானே உன் வேலை!!

கடம்போடுவாழ்வு கிராமத்திற்குச் செல்லும் சாலை. போகும் போது ஆட்டோவிலிருந்தபடியே சில க்ளிக்ஸ்

ஆட்டோலருந்துதான் எடுத்தேன்னு அத்தாட்சி வேணாமா!!! 

இதற்குஅப்புறமான கீழே உள்ள படங்கள் ஆட்டோவிலிருந்து எடுக்கப்பட்டவை அல்ல!

இதோ ஊருக்குக் கிட்ட வந்தாச்சு. அதாவது தெற்கு கடம்போடுவாழ்வு. அந்த சர்ச் அடையாளம். அடுத்தாப்ல கீழ வரவேற்கும் போர்ட் 

வந்தாச்சு கடம்போடுவாழ்வு கிராமத்திற்குள். பாருங்க கிராமம் வரவேற்கிறது! பசுமையான கிராமத்துக்கு இப்படி அழுதுவடியும் ஒரு போர்ட்

அடுத்தாப்ல இப்படி ஒரு போர்ட்! 

ஒரு நீலக்கலர் வீடு தெரிகிறதா அதை ஒட்டிய அடுத்த தெருவில்தான் சித்திப் பாட்டி குடும்பத்தின் வீடு. இந்த நீலக்கலர் வீட்டின் நேர் மேலே மலையில் - களக்காடு மலைப்பகுதி - சின்னதாக இரு வெள்ளைக் கோடுகள் தெரிகிறதா? தெரியலைனா என்னை அடிக்க வராதீங்க!!! அது ஓர் அருவி. இந்த மலைப்பகுதியில்தான் திருக்குறுங்குடி மலைநம்பி கோயில் இருக்கிறது. சற்று பெரிய வெள்ளைப் புள்ளியாகத் தெரியும். அருவியும் தெரியும் கோடாக.  ஆங்கிள் பார்த்து கிளிக்கினோம்ல! அந்தப்படம் அப்புறம் வரும். மலைநம்பி இருக்கும் இடம் என் மனதிற்கு மிகவும் நெருக்கமான, ரசித்த இடம்.  

வீட்டின் வாசலில் செல்லங்கள்! அம்மாவும் குட்டியும். புதுசா யாரோ வந்திருக்காங்களேன்னு ஆராய்ச்சி. செக்கிங்க்! மாஸ்க் போட்டிருக்காங்களான்னு பாக்குதோ?!! போஸ் கொடுத்தும் எடுக்கலைனு அந்தச் செல்லங்கள் வருத்தப்படக் கூடாதில்லையா! எனக்கும் தூக்கம் வராதே! 

வீட்டின் முன்புறம்

 என் அப்பாவின் சித்தி (எனக்குச் சித்திப்பாட்டி) அவரது கடைசி மகள், முதல் மகள் (என் அத்தைகள்)

சிறு வயதிலிருந்தே என் மனதிற்கு நெருக்கமான உறவுகள் இவர்கள். சித்திப்பாட்டி, கடம்போடுவாழ்வில் தாய்சேய் நல விடுதியில் பிரசவம் பார்த்தவர். ஆயா என்று அழைக்கப்பட்டவர்! சுற்றியுள்ள பத்மநேரி, களக்காடு, வள்ளியூர் அருகில் உள்ள செட்டிகுளம் கிராமப்பகுதிகளில் வேலையில் இருந்திருக்கிறார். ஆனால் கடம்போடுவாழ்வில்தான் அதிகமான வருடங்கள். 30 வருட செர்வீஸ். அதனால் இக்கிராமம் மற்றும் சுற்றுப்பட்டுக் கிராம மக்களிடையே ஆயா/ஆச்சி என்று பிரபலம். சித்தியின் வயது 87 (என் அப்பாவை விட சில மாதங்களே பெரியவர்)

கிராமத்திலேயே அவருடைய பெரிய மகளும் அங்கன்வாடி ஆசிரியையாக வேலை பார்த்துவந்தார். ஊர்மக்களால் டீச்சரம்மா என்று அழைக்கப்படுபவர். கடைசி மகள், திருச்செந்தூர் வட்டத்தில் இருக்கும் உடன்குடி கிராமத்தில் (உடன்குடி கிராமப்பகுதியில் முக்கியமான தொழில் பனைதொழில். உடன்குடி கருப்பட்டி என்பது மிகவும் புகழ்பெற்றது. அது போன்று வெற்றிலைக்கும் சிறப்பு பெற்ற ஊர்) சுகாதார மேற்பார்வையாளராக வேலை பார்த்து ரிட்டையர் ஆனவர். தற்போது 70 வயதைத் தொடுகிறார். இந்த அத்தை ஜாதகம் பார்ப்பார். முறையாகக் கற்றவர்.  சித்திப்பாட்டிக்கு ஒரு மகன் (எனக்குச் சித்தப்பா) உண்டு. அவர் ஸ்ரீவில்லிப்புத்தூர் அருகில் இருக்கிறார். 

என் அப்பாவழிப் பாட்டியும் தாத்தாவும், வள்ளியூரிலும், திருக்குறுங்குடியிலும் இருந்த போது சித்திப்பாட்டியும் குடும்பமும் அடிக்கடி வந்து சென்றதுண்டு. பாட்டியின் கடைசித் தங்கை இவர். அவர்களுக்கும் எங்கள் குடும்பத்தின் மீது மிகுந்த பாசம். என் தங்கைகளின் பிரசவ சமயத்தில் சித்திப்பாட்டிதான் உதவிக்கு வந்து 3, 4 மாதங்கள் வரை இருந்துவிட்டுச் செல்வார். 

சமீபகாலத்தில் அப்பா, ஊரில் இருந்த போது தீபாவளிக்கு அங்கு சென்றதுண்டு. அது தவிர திருக்குறுங்குடி செல்லும் போதெல்லாம் அங்கு தங்குவதுண்டு. சமீபத்தில் தீபாவளி சமயத்தில் ஊருக்குச் சென்றதால் இறங்கியதுமே நேரே கடம்போடுவாழ்வுக்குச் சென்று அவர்களுடன் தீபாவளி. மிகவும் மகிழ்ச்சியான நேரங்கள்.  

நாகர்கோவில், திருவனந்தபுரம்,  திருக்குறுங்குடி, இந்த ஊர், திருநெல்வேலி என்று பசுமையான சுற்றுப்பட்டில் இருக்க ரொம்பவே ஆசைதான். ஆசையை அடக்கு கீதா! யதார்த்தம் வேறு திசையில்!

ஊருக்குள் வரும் அதே சாலை வீட்டின் பின்புறம். இச்சாலைதான் களக்காடு செல்லும் முக்கிய சாலையில் இணைகிறது. 1 1/2 கிமீ. உழுதுவிட்டு வரும் விவசாயி! ட்ராக்டர் பாருங்க அழகு.

ஊரின் அழகும், பசுமையும் இங்கிருக்கும் ஒரு சில படங்களிலேயே உங்களுக்குத் தெரிந்திருக்கும். மற்ற படங்கள் அடுத்தடுத்த பதிவில்.

இப்படியான நிறைய படங்கள் உண்டு

இப்பத்தானே ஊருக்குள் வந்திருக்கோம். கொஞ்சம்  ஆற அமர உட்கார்ந்துவிட்டு ஊரின் வளத்தை, செழிப்பை, உழைப்பைப் பார்க்க அடுத்த பகுதியில் ஊர் சுற்றுவோம்.  

---கீதா