நாகர்கோவில் - கடம்போடுவாழ்வு - 1

பெங்களூர் – நாகர்கோவில்  (கடம்போடுவாழ்வு, திருவனந்தபுரம் வழி திருவண்பரிசாரம்) – 11 

சென்ற பதிவில் - திருநெல்வேலி - நாகர்கோவில் பதிவு - 5 ல் நாகர்கோவில் சென்றதும் அங்கிருந்து கடம்போடுவாழ்வு செல்வதற்காகப் பேருந்து ஏற வடசேரி பேருந்து நிலையம் செல்வது பற்றிச் சொல்லி முடித்திருந்தேன்.  மீண்டும் யு டர்ன் வந்த வழியே ஆனால் சாலை வழிப்பயணம் ஏர்வாடி வரை. எனவே அதே வெள்ளமடம், தோவாளை, ஆரல்வாய்மொழி, முப்பந்தல், காவல்கிணறு, பணகுடி, வள்ளியூர், ஏர்வாடி.

[என்னடா மீண்டும் ரயில் படமான்னு நினைக்காதீங்க! முந்தைய பதிவுகளில் நாகர்கோவில் ரயில் நிலையத்திற்குள் நுழையும், முன் பகுதியை எடுத்த படங்கள் இரண்டு. உங்களுக்கு நினைவிருக்கும் என்று நினைக்கிறேன். 

முன்பகுதி மட்டும் போட்டிருக்க உன் பெட்டிக்குப் பின்னால் உள்ள நாங்களும் நல்லா வளைவோமாக்கும், படத்தை ஏன் போடாமல் விட்டுட்டே என்று அந்தப் பெட்டிகளுக்கு வருத்தமாயிடுச்சுனா!! அதான் இந்தப் படம். அப்போது போட மறந்தும்விட்டேன்.

மட்டுமல்ல, ஆரல்வாய்மொழி கணவாய் இடையே வரும் போது இரு பக்கமும் மலைகள்  இடையே ரயில் வருவதை படம் எடுக்க வழி இல்லையே என்று நினைத்தேன். ஆனால் இங்கு மலைகள் பின்புலத்தில் அவற்றின் இடையே வருவது போன்று இருக்கு பாருங்க அதனால் இப்படம் இங்கே!!]

நாகர்கோவில் நிறைய மாறியிருக்கிறது. வடசேரி பேருந்து நிலையம் உள்ளே இருக்கும் ஆரியபவன் வாசலில் நம் ஆட்டோ நண்பர் இறக்கிவிட்டுச் சென்றதும் உள்ளே நுழையாம இருக்க முடியுமா?!  பூரி மசால்!!! தலைவாழை இலை போட்டு பரிமாறல்! இரண்டு பூரி, உருளைக்கிழங்கு மசால் - நன்றாக இருந்தது. பூரி பெரியதாக இருந்தது என்பதால் அப்பாவுடன் பகிர்ந்துகொண்டு (அப்பாவிற்கு நான் கொண்டு போயிருந்த மிளகாய்பொடி தடவிய இரு இட்லி சாப்பிட ஆசை எனவே அதை அவரிடம் கொடுத்துவிட்டேன்!) 

சாப்பிட்டு முடித்து ஒரு காஃபியும் குடித்து விட்டு - ரூ100 நோ டிப்ஸ்! - (இந்தப் பக்கங்களில் இன்னும் கவுண்டரில் தான் பில்லிற்கான கட்டணம் செலுத்த வேண்டும். டிப்ஸ் வாங்குவதில்லை. மங்கலான வெளிச்சம் உள்ள ஹோட்டல்களைப் பற்றித் தெரியாது. 

வெளியில் வந்தால் பேருந்து தயாராக நின்று கொண்டிருக்க,  ஏர்வாடியில் (திருநெல்வேலி மாவட்ட ஏர்வாடி) நிற்கும் என்று தெரிந்ததும், ஜன்னல் இருக்கை வேறு கண்ணில் பட்டதும் உடனே ஏறிட மாட்டேனா!  அதுவும் இடதுபுறம்! ஏதோ ஜாக்பாட் அடிச்ச பரம சந்தோஷம்! 

போகும் வழியில் ஜன்னல் வழிப் பார்வையில் க்ளிக்கிக் கொண்டே. பேருந்தில் செல்லும் போது ஃபோட்டோ எடுப்பது சிரமம்தான். விடுவமா!! நாகர்கோவிலில் இருந்து 13.5 கிமீ தூரத்தில் இருக்கும் (கீழே இதோ) தோவாளை முருகன் கோயில். எங்கள் ஊரிலிருந்து 6 கிமீ தூரம்தான்.  

மிகவும் புகழ்பெற்ற கோயில்.  இப்படம் கோயிலுக்குச் செல்லும் வழி. தோவாளை வழியாகச் செல்லும் பெரும்பான்மையான பேருந்துகள் இங்கு நிற்கும். 

கோயிலுக்குச் செல்லும் வழி, நுழைவு வாயில். புதுசு. என் சிறு வயதில் பார்த்ததாக நினைவில்லை

இக்குன்றின் - திருமலை -  மீது பாலசுப்ரமணியன், மயிலுடன் நின்ற கோலம். அவரைப் பார்க்கணும்னா தோராயமாக 108 படிகள் ஏற வேண்டும். ஏற முடியாதவங்க எல்லாம் கீழேயே அவர் மாமாவான பாலகிருஷ்ணன் கோயிலில் மருமகனுக்குச் சேதி சொல்லிடலாம். பாருங்க Their Telegram is very fast you know!!! இருவருமே குழந்தை வடிவங்களில்! 

இக்கோயிலில் சூரசம்ஹாரம் மிகவும் பிரசித்தி. மாறுபடு சூரரை வதைத்த முகனார் ஒவ்வொரு வருடமும் வித விதமான அலங்காரங்களில் சூரனை சம்ஹாரம் செய்வார்! ஆடி மாதம் கடைசி வெள்ளிக் கிழமை அன்று மலர்முழுக்கு விழா. பின்னே தோவாளை பூக்களின் ஊரல்லே!

இயற்கை அன்னை சூழ உள்ள இந்தக் கோயில் எனக்கு மிகவும் பிடிக்கும். காரணம், கோயிலின் கடைசியில் ஒரு மண்டபம் போலத் தெரிகிறதா? அங்கிருந்து பார்த்தால் சுற்றிலும் ஆரல்வாய்மொழி, மகேந்திரகிரி, அசம்பு மலைத்தொடர்கள், கீழே குளங்கள் என்று கண்ணிற்கும் மனதிற்கும் இதமான மெய் மறக்கும் காட்சிகள் பார்க்கலாம். 

தோவாளை முருகன் கோயில் சன்னதியின் முன்னே உள்ள தூண்களில் ராமர், கிருஷ்ணர், ஹனுமார் என்று நிறைய சிற்பங்கள் உண்டு. கல்வெட்டு கூட உண்டு. 15, 16 ஆம் நூற்றாண்டுகளில் இக்கோயில் உருவானதாகச் சொல்லப்படுகிறது. 

இந்திரன் அடிக்கடி ஏதாவது தப்பு பண்ணிட்டு பரிகாரம் தேடுவானே.  அப்படி சுசீந்திரம் மும்மூர்த்திகளை வழிபட வந்தப்ப தோவாளை மலர்களின் வாசம் அவனைக் கவர்ந்தது என்றும் அம்மலர்களைக் கொண்டு சுசீந்திரம் சிவனை பூஜித்து சாபவிமோசனம் பெற்று தேவலோகம் சென்ற பிறகும் இந்தப் பூக்களால்தான் பூஜை செய்தானாம். அதற்கு இங்கிருந்து பூக்களைக் கொண்டு போக ஏஜன்ட்ஸ் தேவர்கள்! அடுத்தாப்லதானே மகேந்திரகிரி! அங்கிருந்து ட்ரான்ஸ்போர்ட் அப்பவே இருந்திருக்குமோ!!

தோவாளையும் சுற்றுப் பகுதிகளும் பூக்களுக்கு மிகவும் பிரசித்தி பெற்றது. இங்கிருந்துதான் பல பகுதிகளுக்கும் பூக்கள் செல்கின்றன. மல்லி, ரோஜா, சாமந்தி, பிச்சி என்று பல விதமான பூக்கள் சாகுபடி செய்யப்படுகிறது. திருவனந்தபுரத்திற்கு இங்கிருந்துதான் பூக்கள் செல்லும் குறிப்பாக ஓணம் சீசனில் தோவாளை பூமார்க்கெட்டிற்கு அடிபொளியானு! பூ வியாபாரம் முக்கியத் தொழில் இங்கு.

நான் சமீபத்தில் அங்கிருந்த போது மழை காரணமாக மல்லி, பிச்சி எல்லாம் கிலோ 2000 - 3000-3500 இருந்ததாக நம்ம ஊர் மக்கள் பேசிக் கொண்டார்கள்.  இப்போதைய ரேட் ரூ 1500 ஆகியிருப்பதாகத் தெரிகிறது. நான் பூக்களை மிகவும் ரசிப்பேன். சூடும் வழக்கம் இல்லை.

நான் எடுத்த படங்கள் அல்ல. படங்கள் இணையத்திலிருந்து - நன்றி 

இங்கு படத்தில் உள்ள திருமலை முருகன் கோயிலைத் தவிர அதன் பின் புறம் தெரியும் மலைப்பகுதியில்  இக்கோயிலில் இருந்து 3 கிமீ தூரத்தில் இயற்கை சூழ், 'சித்தர்கிரி/தெக்கர்கிரி - சித்தர்கள் வாழ்ந்த தெக்கர்கிரி எனும் மலை. அங்கும் முருகன் கோயில் உள்ளது. தென்பழநி என்றும் சொல்லப்படுகிறது. இக்கோயிலை இப்போது சுற்றுலாத் தளமாக்க உள்ளார்கள் என்றும் தெரிந்தது. இக்கோயிலுக்கும் செல்ல ஆசை இருந்தது. (நேரில் செல்லாததால் என்னிடம் படங்கள் இல்லை.) இதைப் பற்றி இணையத்தில் நிறைய வீடியோக்கள், படங்கள், தகவல்கள் உள்ளன.

இம்முறை பல தடைகள் - கோவிட் தடைகள், தனியாகச் செல்ல முடியாத இடங்கள், கனமழை, சில கோயில்கள், மலைக் கோயில்கள் போகக் கூடாது (ஒரு வருடத்திற்கு) என்று ஒரு வீட்டு ரூல் - இருந்ததால் என் லிஸ்டில் இருந்த பல இடங்களுக்குச் செல்ல முடியவில்லை.  SO SAD. 

Do not wait for the perfect opportunity, instead, grab any opportunity and make it

கிடைத்ததையும் கொஞ்சம் தான் பயன்படுத்திக் கொள்ள முடிந்தது. எனவே இம்முறை என் நேரிடை அனுபவங்கள் இல்லாததால் கோயில்களைப் பற்றிய, ஊரைப் பற்றிய பொதுவான விஷயங்கள்தான். 

தோவாளை கோயில் தாண்டியதும் அதன் பின் புறம் உள்ள பெரிய குளம். 

சாலையின் இடப்புறம் கூடவே வரும் நீரோடை. ஆங்காங்கே இந்த அளவிலும் கொஞ்சம் சிறியதாகவும் வள்ளியூர் வரை. மழை சீசன் என்பதால் வெளியில் தெரிந்தது. மற்ற சமயங்களில் சிறிதாக மாறும் இடங்களில் தண்ணீர் சில  இடங்களில் தெரியாது. அல்லது சாக்கடையாகத் தெரியும்.

மீண்டும் அதே ஆரல்வாய்மொழி மலைப்பகுதி ஒன்றே ஒன்று இங்கு மற்றவை கீழே காணொளித் தொகுப்பில்

ப்ளாட் போட்டுருக்காங்க பாருங்க!  வாங்கறவங்க வாங்கிக்கோங்க! ஆனா நான் பொறுப்பல்ல!! கேட்டோ!!!!

ஏர்வாடி வந்தாச்சு என்பதன் அடையாளம் இந்த இரு மொட்டை மலைகள்!  ஏர்வாடியைச் சுற்றி எங்கு சென்றாலும் இந்தக் குன்றுகள் நம்முடன் வரும்!எனக்கு  இந்த இரு மலைகளும் மறக்க முடியாத ஏர்வாடிஅடையாளங்கள்.  வள்ளியூர், திருக்குறுங்குடி எனக்குப் பழக்கமான ஊர்ப்பகுதிகள். மட்டுமின்றி அடிக்கடி வேலைக்கான தேர்விற்காகத் திருநெல்வேலிக்குப் பயணம் செய்த பகுதி

(ஏர்வாடியா? ஏருவாடியா? சமீபத்திய குழப்பம். நான் அறிந்தவரை ஏர்வாடி, இப்போது ஏருவாடி என சில இடங்களில் எழுதப்பட்டிருக்கிறது. ஒரு வேளை இராமநாதபுரம் ஏர்வாடி (தர்கா மனநல காப்பகம்- சேதுபடம்) எனும் ஊர் இருப்பதாலோ? நோ ஐடியா. எனக்கு ஏர்வாடிதான்!)

ஏர்வாடியைச் சுற்றிலும் வயல்கள், விளை நிலங்கள் வாழைத்தோட்டம், மலைகள், குன்றுகள், குளங்கள், வாய்க்கால்கள். ஒரு காலத்தில் மக்கள் ஏர் பிடித்து பாடிக் கொண்டே வயல்களை  உழுததால் 'ஏர்பாடி' என்பது மருவி 'ஏர்வாடி' என்று ஆனதாக என் பாட்டி சொல்லிக் கேட்டிருக்கிறேன். சுற்றுப்பட்டில் நிறைய கிராமங்கள் டோணாவூர், திருக்குறுங்குடி, களக்காடு, நாங்குநேரி என்று பல. 

பேருந்திலிருந்து இறங்கியதும் கடம்போடுவாழ்வு செல்ல ஆட்டோ ஏறினோம்.  6 கிமீ 120 ரூ.

 ஆட்டோவில் ஏறி செல்லத் தொடங்கியதும் ஒரு கணபதி ஆலயம் ஒட்டி ஒரு வாய்க்கால் உடனே க்ளிக். ஆனா பாருங்க கோயில்லருந்து குழா நீட்டிட்டுருக்கு.....கழுவி விடும் தண்ணி இதில் விழும் போல....பிள்ளையாரப்பா!! ஏம்பா!!!

அடுத்தாப்ல ஒரு  க்ளிக் ஒரு சின்ன வாய்க்கால். இதை அடுத்து (கீழே உள்ள படம்) நம்பி ஆறு

நம்பி ஆறு. ஆற்றின் நிலையைப் பாருங்கள். நான் வள்ளியூரில் (5, 6 ஆம் வகுப்பு) இருந்த போது இப்படிப் பார்த்ததே இல்லை. ஆட்டோவிலிருந்தே க்ளிக்!

இந்த நம்பி ஆறு ஏர்வாடியை வடக்கு ஏர்வாடி, தெற்கு ஏர்வாடி என்று பிரிக்கிறது. இந்த ஊரில் பெரும்பாலான தெருக்கள் முடியும் இடம் நம்பி ஆறாகத்தான் இருக்கும்.  வள்ளியூரில் இருந்த போது ஏர்வாடிக்குச் சென்றிருக்கிறேன்.  

ஏர்வாடியில் இந்த நம்பி ஆற்றுப் பாலத்தைக் கடந்ததும் (ஒரு நிமிடத்தில்) இடப்புறம் திரும்பி 6 கிமீ பயணித்தால் கடம்போடுவாழ்வு! 

பதிவில் இல்லாத சில க்ளிக்ஸ் சேர்த்து ஒரு சின்ன காணொளித் தொகுப்பு சுட்டியும்

https://youtu.be/LqwLLoLZ2R4

நீங்களும் வாருங்கள். கொஞ்சம் காத்திருங்கள். கடம்போடுவாழ்வு கிராமத்தைக் காட்டுகிறேன். என் உறவினர்களையும் அறிமுகப்படுத்துகிறேன். பதிவு பெரிதாகிவிட்டதோ? பொறுத்துக்கோங்க!  

---கீதா