நாளாம் நாளாம் திருநாளாம் தமிழ் வலைப்பதிவர் கூடும் பெருநாளாம்!

அக்டோபர் 11, 2015 

மன்னாரு அண்ணே!  பதிவர் விழா அழைப்பிதழ் எல்லாம் வந்துருச்சு போல!

டேய் தம்பு!  உன்னையத்தான் தேடிக்கிட்டிருந்தேன்.  ஆமாம் விழா அழைப்பிதழ் வந்துருச்சு.  இப்பதான் முத்துநிலவன் ஐயா அனுப்பியிருந்தாரு. அப்புறம் நம்ம சகோ மைதிலி கூப்பிட்டு பேசினாங்க...

சரி இப்ப நான் என்ன பண்ணனும்?  நம்ம பதிவர் நண்பர்களை எல்லாம் அழைக்கணும் அவ்வளவுதானே..பண்ணிட்டா போச்சு...அப்படியே கொஞ்சம் அந்த லேப்டாப்ப எங்கிட்ட கொடுங்கண்ணே!  

ம்ம் அதானே பார்த்தேன் உன் குடுமி சும்மா ஆடாதேனு....சரி நான் சொல்லறத அப்படியே தட்டி விடு....

வலை அன்பர்கள் அனைவருக்கும் வணக்கம்!

நாம் எல்லோரும் சந்திக்கும் நாள் வெகு தொலைவில் இல்லை!  இதோ நெருங்கிவிட்டது.  10 நாட்களே உள்ளன.  சந்திக்கும் நாள் நினைவில் உள்ளது தானே! 11-10-2015 அன்று புதுக்கோட்டையில்.  இடம் எல்லாம் மேலே பாருங்கள்!  அதில் இருக்கிறதே! 

குறித்துக் கொண்டிருப்பீர்கள். புதுக்கோட்டையே விழாக் கோலம் பூண்டிருக்கின்றதாம்!  நாம் எல்லோரும் இருப்பது பல இடங்களில், வெவ்வேறு மாநிலங்களில், வெவ்வேறு நாடுகளில் என்றாலும் நம்மை எல்லாம் இணைத்தது இந்த வலைத்தளமே!  யாதும் ஊரே யாவரும் கேளிர் என்று இருந்த இடத்திலிருந்தே, முகம் பார்க்காமலேயே வலையுலகினால் அறிமுகமாகி, மீன் பிடிக்க உதவும் வலை போல் இந்த வலை நம்மை எல்லாம் இணைத்து பல கருத்துகளைப் பகிர்ந்து, எண்ணங்களை விதைத்து, பகிரச் செய்து, உறவாட வைத்திருக்கிறது என்றால் அது மிகையல்ல.  சென்ற மூன்று வருடங்கள், சென்னை, மதுரை என்று நிகழ்ந்த வலை உறவுகளின் சந்திப்பு, இந்த வருடம் புதுக்கோட்டையில்! நாம் சந்திக்கவிருக்கும் தருணமும், அந்த நாளும் வந்திடாதோ என்று நெருங்கிவிட்டது!  வாருங்கள், வாருங்கள் எல்லோரும்!  கை கோர்ப்போம்!  சந்திப்போம் மகிழ்வுடன்! கொண்டாடுவோம் அந்த இனிய பெருநாளை!

நாங்கள் ரெடி!  அப்போ நீங்களும் தானே!  On Your Mark! At your Place! Set! Ready! Come On! Meet At Puthukottai! 11-10-2015, ஞாயிறு! இதோ அழைப்பிதழ்!

மிக்க நன்றி!