துபாய் நாட்கள் – ஐந்தாம் நாள் – 30-10-2023 மற்றும் துபாய்க்கு விடை சொல்லும் நாள் – 31-10-2023

 

முந்தைய பதிவுகளை வாசித்தவர்கள், கருத்திட்ட அனைத்து நட்புகளுக்கும் எங்கள் மனமார்ந்த நன்றி. என் துபாய் பயணத்தின் ஐந்தாவது நாள் சென்ற இடங்கள் மற்றும் கடைசி நாள். 

துபாய் நாட்கள் – ஐந்தாம் நாள் – 30-10-2023

அன்று நாங்கள் தனியாக மெட்ரோ மற்றும் பஸ் ஏறி மிராக்கிள் கார்டன்  - Miracle Garden – அதிசயப் பூங்கா சென்று பார்க்க வேண்டும். காலை வழக்கம் போல் Baniyas Square லிருந்து மெட்ரோ ரயிலில் ஏறி Mall of Emirates – மால் ஆஃப் எமிரெட்ஸ் நிலையத்திற்குப் பயணித்தோம். போகும் வழியில் துபாய் ஃப்ரேமை – Dubai Frame ஐ மிகவும் அருகில் பார்த்தோம். 1 (காணொளியில்)

Mall of the Emirates ரயில் நிலையம்

ரயில் நிலையத்தில் இறங்கி Mall of Emirates – மால் ஆஃப் எமிரெட்ஸ் பேருந்து நிலையத்திற்கு லிஃப்ட் வசதி இருந்ததால் அதன் வழி பேருந்து நிலையத்தை அடைந்தோம். 2

மிராக்கிள் கார்டனுக்குச் செல்லும் பேருந்து - பேருந்தில் பயணம்

 -பேருந்து நிறுத்தம்

தகவல் அறியும் இடத்தில் கேட்ட போது மிராக்கிள் கார்டனுக்குச் செல்லும் பேருந்து நிறுத்தம் 105 என்றதும், அந்த நிறுத்தத்தைத் தேடிக் கண்டுபிடித்து அங்கு காத்திருந்தோம். தாமதமின்றி துபாய் பேருந்து, மிராக்கிள் கார்டன் என்ற டிஸ்ப்ளே போர்டுடன் வந்தது. 3

அங்கிருந்து Global Village – க்ளோபல் வில்லேஜ்  உட்பட பல சுற்றுலா மையங்களுக்குப் பேருந்துகள் இருக்கின்றன. மெட்ரோ ரயிலுக்குப் பயன்படுத்தும் கார்டையே துபாய் பேருந்திலும் பயன்படுத்தலாம் என்பது மிகவும் வசதியாக இருந்தது. 30 நிமிடத்தில் மிராக்கிள் கார்டன் நிறுத்தத்தில் இறங்கினோம். 4

உள்ளே நடக்க சிரமம் உள்ளவர்களுக்கு வாகன வசதி 

இணைய வழி நுழைவுச் சீட்டு பதிவு செய்து

எங்களுக்கு, ஜமாலுதீன் அவர்கள் ஏற்கனவே இணைய வழி நுழைவுச் சீட்டு பதிவு செய்து தந்திருந்தார். ஒரு நபருக்கு 85 AED – அமீரக திர்ஹாம் ஆனது. நேரடியாகவும் எடுக்கலாமாம். ஆனால் 95 AED – அமீரக திர்ஹாம் ஆகுமாம். இணைய வழி நுழைவுச் சீட்டு பதிவு செய்திருந்ததால் அந்த வழி உள்ளே சென்றோம். உள்ளே உணவுப் பொருகள் கொண்டு செல்ல அனுமதி இல்லை. நாம் கொண்டு சென்றால் நுழைவு வாயிலில் உள்ள லாக்கரில் வைத்துவிட்டுச் செல்லலாம். உள்ளே நடக்க சிரமம் உள்ளவர்களுக்கு வாகன வசதி உண்டு. 9

Miracle Garden - மிராக்கிள் கார்டனின் சில படங்கள் 

2013, ஃபெப்ருவரி மாதம், 14 ஆம் தேதி வாலண்டைன்ஸ் தினத்தில் துவங்கப்பட்ட மிராக்கிள் கார்டன், அதன் பின் ஒவ்வொரு வருடமும், குளிர்காலம் தொடங்கும் சமயத்தில் அதன் கதவுகள் மீண்டும் திறக்கப்படுகின்றன. 150 மில்லியனுக்கும் அதிகமான பூக்கள் பூத்துக் குலுங்கும், இந்த 72,000-ச.மீ பரப்பளவு, ஒரு தசாப்தத்திற்கும் மேலாக இப்பருவத்தில் மட்டும் இப்பகுதியின் மிக அழகிய, இனிமையான வாசனையுள்ள அதிசயமான சொர்கமாக மாறிவிடுகிறது. இப்பூந்தோட்டத்தின் பராமரிப்பும் அதிகம் தான். 5

ஒரு நாளைக்கு சராசரியாக 757,082 லிட்டர்கள், துபாய் முனிசிபாலிட்டி நகரத்தின் கழிவு நீரை வாங்கி பூந்தோட்டத்திற்கு நேரடியாக அனுப்புகிறதாம். தோட்டத்தில் அந்த நீரை வடிகட்டி சுத்திகரித்து நல்ல நீராக்கி சொட்டு நீர்ப் பாசன முறையில் பூச்செடிகளுக்குப் பாய்ச்சி பராமரிப்பதாக துபாய் மிராக்கிள் கார்டனின் அதிகாரிகளின் தகவல். 6

துபாய் மிராக்கிள் கார்டன் மூன்று கின்னஸ் உலக சாதனைகளைப் படைத்துள்ளது. 2013 இல், இது உலகின் மிகப்பெரிய Vertical வெர்ட்டிக்கல் தோட்டமாக அறிவிக்கப்பட்டது. தற்போது தோட்டத்தில் உள்ள ஏர்பஸ் ஏ380 மலர் அமைப்பு உலகின் மிகப்பெரிய மலர் அமைப்பாக கின்னஸ் உலக சாதனைகளால் பட்டியலிடப்பட்டுள்ளது. 7

எல்லா வருடமும் அக்டோபர் மாதம் முதல் ஏப்ரல் வரைதான் இதைக் கண்டு களிக்க முடியும். கோடை வெயிலில் இப்பூந்தோட்டத்தைப் பராமரிப்பது கடினம் என்பதால்தான். அப்படி ஒரு செயல்பாடு. நாங்கள் சென்றது அக்டோபர் மாதம் என்பதால் கண்டு களிக்க முடிந்தது. 8

பச்சை செடிகளாலான யானை, குதிரைகள்,

அரபிப் பெண்

கூஜாவிலிருந்து கொட்டும் பூக்கள்

பூக்களாலான கடிகாரம், 

எமிரெட் விமானம் 

கண்கவரும் நீரூற்று, ஜயன்ட் வீல் (காணொளியில்), பச்சை செடிகளாலான யானை, குதிரைகள், அரபிப் பெண், கூஜாவிலிருந்து கொட்டும் பூக்கள், அலாவுதீன் பூதம் (காணொளியில்), இசையோடு ஆடும் பொம்மைகள் (காணொளியில்), பூமரங்கள், பூக்களாலான கடிகாரம், எமிரெட் விமானம் என்று காணுமிடமெல்லாம் பூக்களாலான மாயாஜாலங்கள். 10 (மிராக்கிள் கார்டன் பூக்கள் படங்கள் காணொளிகள் எல்லாமும் கீழே உள்ள காணொளித் தொகுப்பில் காணலாம்)

தின்பண்டங்கள் மற்றும் நினைவுப் பொருட்கள், அன்பளிப்புப் பொருட்கள் வாங்க கடைகள்

உள்ளே தின்பண்டங்கள் மற்றும் நினைவுப் பொருட்கள், அன்பளிப்புப் பொருட்கள் வாங்க கடைகள் உள்ளன. 11

இதன் அருகே வண்ணத்துப் பூச்சிப் பூங்காவும் உண்டு. அதற்கும் தனியாக நுழைவுக் கட்டணம் தேவை. ஆனால் நேரமில்லாததால் அங்கு செல்லவில்லை. 8

மூன்று மணி நேரம் அந்த அற்புத தோட்டத்தில் பட்டாம் பூச்சியாய் பறந்தோம். மூன்று மணி நேரம் அங்கு கடந்து போனதை பசி வந்த போதுதான் உணர்ந்தோம். முதல் நுழைவு வாயில் அருகே ஒரு நல்ல மலபார் உணவகம் இருப்பதாக அங்கிருந்த பாதுகாப்பாளர் சொன்னார். அங்கு சென்று பிரியாணி சாப்பிட்டு பேருந்து நிறுத்தத்தில் காத்திருந்தோம். பேருந்து வந்தது. ஏறி மெட்ரோ ரயில் நிலையம் வந்து மெட்ரோ ரயிலில் துபாய் மாலில் இறங்கினோம். 12

புர்ஜ் கலிஃபா இரவில் வண்ண விளக்குகளுடன் - Burj Kalifa

கதிரவன் மறைந்ததால் Furj Khalifa – ஃபுர்ஜ் கலிஃபா மின் விளக்கு ஆடை அணிந்து ஜொலித்துக் கொண்டிருந்தது. (காணொளியில் விளக்குகள் மின்னும் முழு காட்சியையும், நீரூற்றும் காணலாம்) சிறிது நேரம் அங்கு நின்று அதன் அழகை ரசித்த பின் மெட்ரோ ஏறி அறையை அடைந்தோம். 13

“Day to Day” க்குச் சென்று கடைசி நாள் ஷாப்பிங்க்

பொருட்கள் சிலது வாங்க வேண்டியவை இருந்ததால், “Day to Day” க்கு மீண்டும் சென்றோம். தேவையான பொருட்களை வாங்கி பெட்டிகளில் அடுக்கி வைத்தோம். மறுநாள் காலை 9.30க்கு விமான நிலையம் செல்ல வேண்டும். மறு நாள் மதியம் 12.55 ற்கு துபாய்க்கு விடை சொல்லியே ஆக வேண்டுமே. அந்த அனுபவங்களை அடுத்த இறுதிப் பகுதியில் சொல்கிறேன். 14

துபாய்க்கு விடை சொல்லும் நாள் – 31-10-23

லாட்ஜ் ஊழியர்களிடமும் பசியாற்றியவர்களிடமும் நன்றி கூறி விடை பெற்றோம்

துபாய் நாட்களில் துபாய்க்கு விடை சொல்லும் நாள் அன்று காலை, கடந்த ஐந்து நாட்களாக உணவு மற்றும் தின்பண்டங்கள் கிடைத்த இடங்களுக்குச் சென்று பசியாற்றியவர்களிடம் விடை பெற்றோம். லாட்ஜ் ஊழியர்களிடமும் விடை பெற்று எங்கள் பயணப் பெட்டிகளுடன் தயாரானோம். 15

க்ளோபல் வில்லேஜ்

பால்ம் ஜுமைரா - பார்க்க முடியாமல் போன இடங்கள் - இப்படங்கள் 3ம் இணையத்திலிருந்து

பார்க்க முடியாமல் போன இடங்கள் நிறைய. இன்னும் இரண்டு நாட்கள் கூடுதலாகத் தங்க முடிந்திருந்தால் Global Village  க்ளோபல் வில்லேஜ், Dubai Gate – துபாய் கேட், Palm Jumeirah-பால்ம் ஜுமெய்ரா, Fish Market – மீன் சந்தை, போன்றவற்றைக் கண்டு மகிழ்ந்திருக்கலாம். 

ஜமாலுதீன் அவர்களுடன் 

என்ன செய்ய? இன்று மதியம் 12.55 ற்கு துபாய்க்கு விடை சொல்லியே ஆக வேண்டுமே. Spice Jet டெர்மினல் 1 லிருந்து என்பதால் மெட்ரோ ரயிலில் செல்லலாம். எனவே எங்கள் பயணப்பெட்டிகளுடன் மெட்ரோவில் ஏறி விமான நிலைய நிறுத்தத்தில் இறங்கினோம். ஜமாலுதீன் அவர்கள் காத்திருந்தார். 16

ஜமாலுதீன் அவர்களின் மருமகள் விமாநிலையத்தில் எமிகிரேஷன்

10 மணிக்கு அவர் மருத்துவமனைப் பணிக்குச் செல்ல வேண்டும். அவரது மருமகள் விமாநிலையத்தில் எமிகிரேஷன் – Emigration பிரிவில்தான் பணி புரிகிறார் அதுவும் டெர்மினல் 1 ல் என்பது மிகவும் உதவியாய் இருந்தது. கூடவே வந்து பெட்டிகளை செக்கின் செய்ய சிரமமின்றி நடத்தித் தந்தார். அவருக்கு நன்றி கூறிக் காத்திருப்பு அறையில் காத்திருந்தோம். 17

விமானத்தில்

விமானத்தில் ஏற அழைப்பு வந்ததும் விமானம் ஏறினோம். எங்கள் பெட்டிகளும் ஏற்றப்பட்டன. விமானம் நகர்ந்தது. வேகம் கூடியது. துபாய்க்கு விடை சொல்லி பறந்து உயர்ந்தது. அழகான துபாயின் காட்சிகளை ஆகாயத்திலிருந்து பார்த்தோம். நன்றி துபாய்! எங்களுக்கு 6 நாட்கள் அடைக்கலம் தந்து மகிழ்வித்ததற்கு!...18

துபாய் பயணக் கட்டுரை நிறைவு பெறுகிறது. விரைவில் அடுத்து ஒரு பதிவில் சந்திப்போம். என்னோடு பயணித்த உங்கள் அனைவருக்கும் மனமார்ந்த நன்றிகள் பல! காணொளியை முடிந்தால் பாருங்கள்! விமானம் மேலே உயரும் போது எடுத்த துபாய் காட்சிகள், மிராக்கிள் கார்டன் எல்லாம் பார்க்கலாம்.

https://youtu.be/Jz7lz0Cauj0

--------துளசிதரன்