சில்லு சில்லாய் - 20 - பரவசம் - கட்டிடக் காடாய் மாறிவரும் பெங்களூர் - Kempe Gowda பன்னாட்டு விமான நிலையம்

வேறொரு பதிவை தயார் செய்து கொண்டிருந்த வேளையில் இன்று வெங்கட்ஜியின் பதிவில் காங்க்ரீட் காடுகள் என்பதைப் பார்த்ததும் இதைப் பற்றியும், இதற்கு முன்பு அவர் எழுதியிருந்த கங்கா ஆரத்தி பார்த்த கமயம் உணர்வுபூர்வமாகக் கண்களில் நீர் வந்ததையும் எழுதியிருந்ததை வாசித்த போதும் என் அனுபவத்தை எழுதி வைத்திருந்தேன். மற்ற பதிவை அடுத்த பதிவாக ஓரங்கட்டிவிட்டு இன்று இதை தட்டிக் கொட்டிப் போட்டுவிடலாம் என்று இதோ.... 

சில்லு - 1 - பரவசம் 

வெங்கட்ஜியின்  கங்கா ஆரத்தி பதிவை வாசித்து வந்த போது //“ஹர் ஹர் Gகங்கே”, “Gகங்கா மையா கி ஜெய்” என்ற கோஷ சொற்களும் ஆரத்தி பத்தி வாசிக்கும் போதே என்னை அறியாமல் கண்களில் நீர்! ஜனகணமன என்று தொடங்கினாலே என் கண்களில் நீர் வந்துவிடும்! அதுவும் ஜெயஹே எனும் போது! 

உங்களிலும் சிலருக்கு இது நேர்ந்திருக்கலாம். அல்லது மயிர்கூச்சம் புல்லரித்தல் என்று சொல்வோமே அது போன்றும். எனக்கு இப்படிச் சில இடங்களில், நேரங்களில் நேர்ந்ததுண்டு.

ஆனால், நான் வியந்த தருணம் - எந்தவித சத்தமும் இல்லாமல், கோஷங்கள் இல்லாமல்,  கண்களில் கண்ணீர் துளிர்த்ததும், புல்லரித்ததும் என்றால் ஷிம்லா, மணாலி சென்றிருந்த போது இமயமலையைப் பார்த்ததும் கண்களை விரித்துக் கொண்டு இரு  கன்னங்களிலும் கைகளை வைத்துக் கொண்டு அப்படியே ஸ்தம்பித்து நின்றேன். ஹையோ என்ன பிரம்மாண்டம்! நாம் எல்லாம் ஒன்றுமே இல்லை என்ற ஆனந்தக் கண்ணீர். மணாலி போகும் போது பியாஸ் நதியையும் சுற்றிலும் இமயமலைத் தொடரையும் கண்டு பரவச நிலை. சுற்றிலும் மலைத்தொடரும் நதியும் மட்டுமே

சலசலவென்று துள்ளி ஓடும் பியாஸ் நதி. வழி முழுவதும் ஆங்காங்கே மலைகளின் நடுவில் ஆழத்திலும் சில இடங்களில் சாலைக்குச் சமமாகவும் பயணிப்பதைப் பார்க்கப் பார்க்க ஏதோ ஒரு இனம் புரியாத உணர்வுடனான மன நிலை. அந்த அமைதி, இயற்கை, இயற்கையின் ஒலிகள் அனைத்தும் இயற்கையை நினைத்துப் பேரானந்தம் கொடுத்த ஒரு ஆன்மீக உணர்வை இங்குச் சொல்லிட வார்த்தைகள் இல்லை. ஆனந்த நிலையிலான கண்களின் நீர் தளும்பல்! 

பனி மூடிய சிகரங்கள். நம் நாட்டின் பெருமை! அழகு! கம்பீரம். எவ்வளவு பார்த்தாலும் அலுக்காத அழகு. பார்த்துக் கொண்டே இருக்கலாம் என்ற உணர்வு.காட்சிகளோடு என்னை இணைத்துக் கொண்டு அதில் மூழ்கி ரசித்துக் கொண்டே சென்ற அனுபவம் இன்னும் பசுமையாக மனதில் இருக்கிறது. அங்கு நாம் கொஞ்ச நாட்களேனும் இருந்துவிட மாட்டோமா என்ற ஏக்கமும், ஆசையும், கற்பனையும் இடையே. இரண்டு முறை அப்படிக் கிடைத்த அனுபவங்கள். இனியும் அந்த வாய்ப்பு கிடைத்திடாதா என்ற ஏக்கம் மனதில் இருக்கிறது.

சில்லு - 2 - கட்டிடக் காடாய் மாறி வரும் பெங்களூர் 

சமீபத்தில் கனகப்புரா சாலையில் கண்டது. தில்லி குருகிராமம் போன்று வானைத் தொடும் அளவு பல அடுக்குமாடிகள்! ஒரே வளாகத்தில் 25 அடுக்கு மாடிகள் கொண்ட குடியிருப்புகள், A-Z, அதாவது ஒவ்வொன்றிலும் 25 அடுக்குகள் அப்படி 26!!!  தெய்வமே! 25 மாடிகள்!  மற்றொரு இடத்தில் 15 ஆயிரம் Flat களாம்!  இவ்வளவு குடும்பங்களுக்கும் தண்ணீர் கொடுக்க வேண்டுமே! எங்கிருந்து கொண்டு வருவார்கள்? Bore?

ஒரு காலத்தில் கனகபுரா சாலை முழுவதும் காடுகள். பார்த்துக்கோங்க எவ்வளவு அழிஞ்சுருக்கும்னு. ஆச்சரியம், அரசு எப்படி இப்படியான இடங்களை வழங்குகிறது என்பதும். ஒரு நகரம், மாநகரம், நாடு எனும் போது இவ்வளவுதான் குடியிருப்பிற்கு, இவ்வளவு நிலம் முன்னேற்றங்களுக்கு என்று ஒதுக்கித்தானே திட்டமிட வேண்டும்? நான் ரொம்ப Idealistic ஆகப் பேசுகிறேனோ?! யோசித்துக் கொண்டே பார்த்த போது புரிந்தது. அரசு அங்கு Metro போட்டிருப்பதால் இருபுற நிலங்களும் தனியார் Real Estate Rவிற்கப்பட்டிருக்கும் என்று தோன்றியது.

இயற்கை தெய்வம்! அவ்வப்போது கோபத்தில் சிறு சிறு பகுதிகளாகத் தேர்ந்தெடுத்து தாண்டவம் ஆடுகிறதுதான்! மாபெரும் சக்தி! மனிதர்கள் நாம் அதற்கு எதிராகச் செய்யும் ஒவ்வொன்றையும் கணக்கில் வைத்துக் கொண்டு, தெய்வம் நின்று கொல்ல நேரம் பார்த்துக் கொண்டிருக்கிறதோ?!

சில்லு - 3 - பெங்களூர் Kempe Gowda பன்னாட்டு விமான நிலையம் / Terminal 2

யுனெஸ்கோவின் Prix Versailles 2023 இன் சமீபத்திய அறிவிப்பு - Kempe Gowda பன்னாட்டு விமான நிலையம் தனித்து நிற்பதாகவும், "உலகின் மிக அழகான விமான நிலையமாக" இருப்பதாகவும் அறிவித்தது. இதன் உட்புற அழகிய பூங்கா போன்ற வடிவமைப்பிற்காக 2023ல் உலகின் சிறப்புப் பரிசும் பெற்றுள்ளது. இந்த அறிவிப்பின் முன்னரே நான் இந்த விமான நிலையத்தைப் பார்க்கும் வாய்ப்பு கிடைத்தது. செடிகள், செயற்கை அருவி, சிற்பங்கள் என்று நிஜமாகவே விமான நிலையமா இல்லை பூங்காவா என்ற வியப்பு!  கீதாவின் மைன்ட் வாய்ஸ். ஹூம், ஒரு காலத்து Garden City இப்ப வெளிய எல்லாத்தையும் அழிச்சுட்டு உள்ளார இப்படி வைச்சு என்ன பயனோ? அதுவும் செயற்கையாக! அப்படிச் சொல்லிக் கொண்டே ஒரு காணொளியும் எடுத்தாச்சு! 

https://youtube.com/shorts/YCehAezCIt4

சில்லு - 4 -  கை வண்ணம்

எப்பொழுதோ போட்ட எம்ப்ராய்டரி - சிறு பகுதி இங்கு - Warli - வார்லி ஓவியம் தெரிந்து கொண்ட புதிதில் வரைந்ததும், அதைச் சுற்றி பாசி வைத்துத் தைத்ததும் இங்கே. இப்போது எல்லாம் எதன் மீதாவது விரிப்பாகக் கிடக்கிறது. அழுக்காகி தோய்த்து தோய்த்து வரைந்தவை இளித்திட நூல்களும் விரிந்து அந்தத் தையலே கோணலாகி....இதை எல்லாம் இப்ப பார்க்கும் போது விவேக்கின் புகழ்பெற்ற வசனம்தான் நினைவுக்கு வரும். இப்போதும் செய்யலாம் தான். யாருக்காக? எதற்காக என்ற கேள்விகளும் கூடவே! பராமரிப்பது சிரமமாக இருப்பதாலும். சமீபத்தில் தைத்ததை வேறொரு பதிவில் படம் எடுத்துப் போடுகிறேன்.

Double herringbone Stitch

Feather Stitch 

வேறொரு பதிவில் நான் கற்றுக் கொண்டவற்றைச் சொல்கிறேன். வேலைப்பாடுகள், வீட்டில் கண்ணில் பட்டால் பகிர்கிறேன். 

முந்தைய பதிவுகளை வாசித்த, கருத்திட்ட அனைவருக்கும் மிக்க நன்றி! 

----கீதா