துபாய் நாட்கள் - மூன்றாம் நாள் - 28-10-2023

====> துபாய் நாட்கள் முதல் நாள் - துபாய் நாட்கள் இரண்டாம் நாள்<==== 

கில்லர்ஜி இந்தியாவிற்கு வந்துவிட்டதால், (இந்தப் பயணத்தின் போது இந்தியாவில் இருந்தார். தற்போது இதை எழுதும் சமயம் அபுதாபியில் இருக்கிறார் என்பதை அறிகிறேன்) நம் சகோதரி பதிவர் மனோ சாமிநாதன் அவர்கள் அச்சமயம் தஞ்சையில் இருந்ததாக அறிந்து கொண்டேன். இறை அருள் கிடைத்தால் அபுதாபியிலுள்ள தம்பி பரிவை சே குமாரைக் காண வேண்டும் என்ற ஆவல். அலைபேசியில் பேசினோம். அபுதாபி நகரத்திற்கு வரும் போது கூப்பிட்டு அவருக்கு வரவோ, எனக்கு அவர் இருக்கும் பகுதிக்குப் போகவோ முடிந்தால் பார்க்க வேண்டும் என்று முடிவு செய்து கிளம்பினேன். 1

ஜமால் வீட்டிற்கு மெட்ரோவில் சென்ற போது

மெட்ரோவில் யூனியன் ரயில் நிலையத்திலிருந்து சிவப்பு நிற வழித் தடத்தின் இறுதி மெட்ரோ நிலையமான சென்டர் பாயின்ட் அருகில்தான் எங்களுக்கு அங்கு உதவிய நண்பர் ஜமால் அவர்களின் வீடு. மெட்ரோ நிலையத்தில் இறங்கி அவரது மகன் ஆமீர் ஓட்டி வந்த வேனில் ஏறி அவரது வீட்டை அடைந்தோம். 2

அவரும் அவரது மனைவி ஹஸீனாவும் அரசு மருத்துவ மனையில் பணிபுரிகிறார்கள். மகள் ஹன்னா தன் கணவர் மற்றும் இரண்டு குழந்தைகளுடன் அங்குதான் இருக்கிறார்கள். மூத்த மகனும் இரண்டாவது மகனான ஆமீரும், ஜமால் அவர்களது சகோதரர் நடத்தும் “Dive Tech” – டைவ் டெக் எனும் கப்பல் பராமரிப்பு நிறுவனத்தில் பணியாற்றுகிறார்கள். (அதைப் பற்றி அடுத்த 4 ஆம் நாள் பகுதியில் சொல்கிறேன். அன்றுதான் Dive Tech – டைவ் டெக் பார்த்தோம்) இரண்டு கடைக்குட்டிகள் 10 மற்றும் 9 ஆம் வகுப்பில் அங்கு பயில்கிறார்கள். 3

அன்று எங்களுடன் ஜமால், ஹஸீனா, மகள் ஹன்னா அவரது இரண்டு குழந்தைகள் கூடவே தேரோட்டியாக ஆமீர் எல்லோருமாக அபுதாபி கிரான்ட் மசூதிக்குப் பயணமானோம். 4

ஜமால் அவர்களின் மகன் ஆமீர் ஓட்டி வந்த Van

துபாய் நகரின் வானளாவி நிற்கும் கட்டிடங்கள் - கீழே பதிவின் தொகுப்புக் காணொளியில் இப்பகுதி ஏதோ 3D படம் போன்று இருப்பதைக் காணலாம்

Van ல் பயணித்த போது துபாய் நகரின் வானளாவி நிற்கும் கட்டிடங்களைக் காணத்தான் எத்தனை அழகு! ஏதோ ஒரு கவிஞர் கற்பனையில் கண்ட கான்க்ரீட் காடுகள் போல்தான் இருக்கிறது. 5

தூரத்தில் தெரியும் துபாய் Frame - ஃப்ரேம் - 2 செகன்ட் காணொளிதான்

வழியில் 150 மீ உயரமுள்ள துபாய் Frame - ஃப்ரேமை தூரத்தில் காண நேர்ந்தது. அதன் மேல் ஏறினால் இரண்டு Tower களுக்கும் இடையிலான கண்ணாடிப் பாதையில் நடக்கலாம். ஒரு சாதாரண மீனவர்களின் கிராமமாய் இருந்த துபாய் எப்படி உலக வியாபார மையமாக மாறியது என்பதை விளக்கும் கண்காட்சி மையமும் உண்டென்று சொல்லப்படுகிறது. அங்குச் செல்ல முடியுமா என்று தெரியவில்லை.  - 6

Grand Mosque போகும் வழியில் தொழிற்சாலை

Last Exit – Mad X

“Last Exit – Mad X - வித்தியாசமாக வடிவமைக்கப்பட்ட சுற்றுலாத்தலம் போன்ற நெடுஞ்சாலை உணவகம். 

போகும் வழியில், “Last Exit” எனும் ஓரிடம். பாலைவனத்தின் நடுவே உள்ள இந்த “Last Exit – Mad X எனும் இடம் நம் ஊரில் நெடுஞ்சாலைகள் ஓரத்தில் இருக்கும் உணவகம் போன்ற ஒன்றுதான். ஆனால் மிகவும் வித்தியாசமாக வடிவமைக்கப்பட்ட சுற்றுலாத்தலம் போன்ற உணவகம். ஏதோ ஹாலிவுட் படத்துக்கான ஒரு படப்பிடிப்பு இடம் போல் காட்சியளித்தது. சாப்பாடு Truck-ட்ரக்குகளும், ராட்சச வாகனங்களும் நிறைந்த ஏதோ ஒரு மாயாஜால இடம் போல் இருந்தது. அது ஒரு வித்தியாசமான அனுபவம். சுவர் நிறைய ஒட்டப்பட்ட வித்தியாசமான போஸ்டர்களும், தொங்கவிடப்பட்ட வாகனங்களும் வாகனங்களின் பாகங்களும் காணவே ஒரு திகில் காட்சி அமைப்பு போன்று இருந்தது. 7

மதியம் போல் அபுதாபி Grand Mosque (கிரான்ட் மசூதி) அடைந்தோம். பாதுகாப்பு பரிசோதனை முடித்து காண்பதற்கறிய காட்சிகளைக் கொண்ட அந்த மசூதியைக் கண்டு வியந்தோம். 8

அபுதாபியிலுள்ள, 2007 ல் திறக்கப்பட்ட Sheikh Zayed Grand Mosque ஷேக் சையது கிரான்ட் மாஸ்க், 40,000 பேர் தொழுகை நடத்த வசதியுள்ள ஒரு மசூதி. 107 மீட்டர் உயரமுள்ள நான்கு minarets மினாரெட்களை (கோபுரங்கள்) கொண்டது. 1,80,000 சதுர அளவு பரப்பளவைக் கொண்டது. 33 அடி விட்டமும் 49 அடி உயரமுள்ள அலங்கார விளக்கின் அழகை வார்த்தைகளால் விவரிக்க முடியாது. அவ்வளவு அழகு. 8 (காணொலியில்)

அதன்பின் அபுதாபியின் அழகை காரிலிருந்தே கண்களிலும் மனதிலும் சேமித்தோம். என் அலைபேசியிலும். (காணொளியில் Van ல் நகர உலாவைக் காணலாம்)

வித்தியாசமான வடிவில் இருந்த பைன் ஆப்பிள் கட்டிடம், நாணய வடிவில் இருந்த Coin கட்டிடம் இவற்றைக் கீழே காணொளியில் காணலாம்.

காலிகட் உணவகத்தில்

அபுதாபி டவுனில் 3 மணியளவில் ஒரு காலிகட் உணவகத்தில் நல்ல உணவு உண்ட பின் பரிவை சே குமார் அவர்களை அழைத்தேன். இருவருக்கும் இடையே உள்ள தூரமும், நாங்கள் பயணம் செய்ய வேண்டிய நீண்ட தூரமும், இடைப்பட்ட நேரமும் சதி செய்தது. மிகவும் வருத்தத்துடன் இயலாமைக்கு வருந்தி அலைபேசியில் நானும் குமாரும் விடை பெற்றோம். 12

Jebel Hafeet - மலையின் இரவுக் காட்சிகள்

Jebel Hafeet - மலையின் இரவுக் காட்சிகள்

மூன்று மணி நேர பயணத்திற்குப் பின் அல் அயின் – Al ain ல் உள்ள Jebel Hafeet (Al Ain Part of Abu Dhabi) ஜெப்பல் ஹஃபிட் (அல் எய்ன் அபுதாபியின் ஒரு பகுதி) ஐ அடைந்தோம். மலை உச்சியில் ஆக்ரோஷத்துடன் வீசும் காற்று கீழே விண்மீன்கள் சிதறிக் கிடப்பது போல் நகரங்களின் மின் விளக்குகள். காண்பதற்கு அரிய காட்சி. 13

1959 ஆம் ஆண்டு டென்மார்க்கைச் சேர்ந்த தொல்பொருள் ஆராய்ச்சியாளர்களின் கருத்துப்படி 5000 ஆண்டுகளுக்கு முன்பே மனித இனம் செம்மையாக வாழ்ந்த இடமாம் அது. ஜெப்பல் ஹஃபிட் மலை உச்சியில் அதிக நேரம் செலவிடவில்லை. 14

மலையிலிருந்து இறங்கி கிரீன் முபர்ஜராஹ் Green Mubarzzarah எனும் இடத்தை அடைந்தோம். ஒரு சிறிய நீரோடை ஹஃபீத் மலையிலிருந்து உற்பத்தியாகி ஓடும் நீரோடை. அரபு நாட்டவரின் சுற்றுலா மையம் என்று தோன்றியது. குடும்பத்துடன் இருக்கைகள் மற்றும் உணவுடன் வந்து அவரவர்களது வாகனத்திற்கு அருகிலும், கிடைத்த இடத்திலெல்லாம் அமர்ந்து மகிழும் மக்கள் வெள்ளம். நீரோடை என்னவோ மிகச் சிறியதுதான் என்றாலும் அதற்கு மக்கள் கொடுக்கும் முக்கியத்துவம் அளவற்றது. 15 (இப்பகுதி காணொளியில். இரவு என்பதால் தெளிவாக எடுக்க முடியவில்லை)

ஜமால் அவர்களின் குடும்பத்தினருடன் நாங்கள்

அதன் பின் ஜபல் ஹஃபீத்துக்கும் – Jabal Haffeeth, கிரீன் முபாஜராஹ் – Green Mubazzarah கிற்கும் விடை சொல்லி, ஜமாலவர்களின் குடும்பத்தினரை அவர்கள் வீட்டில் இறக்கிய பின் ஆமீர் எங்களை நாங்கள் தங்கியிருந்த மெலடி க்வீனில் – Melody Queen – சேர்த்தார். 16

காலை 9 முதல் இரவு 1 மணி வரை வாகனத்தை ஓட்டிய ஆமீரின் உதவி பேருதவி. மறு நாள் காலை மீண்டும் எங்கள் பயணம் வேறு திக்கில். எங்கு? காத்திருங்கள். வருகிறேன் உங்களையும் என்னோடு அழைத்துச் செல்ல. 17

https://youtu.be/7APRT4dBbBU

----துளசிதரன்