சில்லு சில்லாய் - 18 - இந்தியாவின் சிலிக்கன் நகரம் உணவு நகரமாய் மாறி வருகிறதா - 3

சில்லு - 1 - சிலிகான் சிப் நகரம் சிப்ஸ் நகரமாக?!

இதற்கு முன் பெங்களூருக்கு வந்த போதும் சரி, இருந்த போதும் சரி சாப்பிட்டுப் பார்க்காத, ஆனால் நான் வீட்டில் அவ்வப்போது செய்து வந்த மத்துர் வடையை இப்போதைய பங்களூர் வாசத்தில் ஒரு சில கடைகளில், உணவகங்களில் சாப்பிட்டுப் பார்க்க விரும்பிச் சாப்பிட்டதுண்டு.  வடை என்ற பெயர் இருந்தாலும் வடையும் அல்ல, தட்டையும் அல்ல. இரண்டிற்கும் நடுவான ஒரு தின்பண்டம். ரவை, அரிசிமாவு, மைதா எல்லாம் ஒரு கணக்கு வைத்து கலந்து (செய்த படங்களுடன் பின்னர் வரும்) நிறைய வெங்காயம் போட்டு (இதுதான் இதில் முக்கியம்) எள்ளு, தேங்காய், நிலக்கடலை எல்லாம் போட்டு, தட்டி எண்ணையில் பொரிக்க வேண்டும்.

நன்றி விக்கிபீடியா

உணவகங்களில் என்றால் ஒரு வடை ரூ 30, 40 தேங்காய்ச் சட்னியோடு தருகிறார்கள். கடைகளில் என்றால் 3 அல்லது 6 வடைகள் ஒரு கவரில் இருக்கும். ஒரு வடை ரூ 10. கடைகளில் என்றால் மங்களூர் கடை மத்துர் வடை நன்றாக இருக்கும் 6 வடை 30ரூ. உணவகம் என்றால் நம் ஏரியாவில் இருக்கும் IDC இட்லி தோசா காஃபி உணவகத்தில் நன்றாக இருந்தது.

ஒரு சில கடைகள், உணவகங்களில் ஓரங்களில் மொறு மொறு என்றும் நடுவில் வரும் போது தட்டையும் இல்லை வடையும் இல்லை போன்று இருக்கும். சில இடங்களில் மட்டுமே வெங்காயத்தின் சுவை நன்றாகத் தெரியும்படி இருக்கிறது. இப்படிச் சாப்பிட்டுப் பார்த்ததில் வீட்டில் நான் நிறையவே வெங்காயம் போட்டு வெங்காயச் சுவையுடன் செய்கிறேன் என்று தெரிந்தது.

மங்களூர் பன் -  நன்றி இணையம்

அடுத்ததாக நான் இங்கு வந்து அறிந்தது மங்களூர் பன்கள்.  வழக்கமான பன்கள் அல்ல. இது பூரியின் ஒரு வடிவம்னு சொல்லலாம். மைதா வாழைப்பழம் கலந்து பூரி போன்று பொரிக்கப்படும் இந்த பன் சாப்பிடுவதற்கு மென்மையாக மிகவும் பஞ்சு போன்று இருக்கு. இங்க பெரும்பான்மையான ஹோட்டல்களில் இருக்கு. சட்னி மற்றும் சாம்பாருடன் தருகிறார்கள். ஆறிப் போனாலும் பரவால்ல நல்லாதான் இருக்கு.

புத்தரேகுலு - வெல்லம் போட்டதும், சீனி போட்டதும் -  நன்றி இணையம்

பெங்களூர் வந்த பிறகு புதிதாகத் தெரிந்து கொண்ட இன்னொரு ஸ்வீட் புத்தரேகுலு. இங்கு ரொம்ப ஃபேமஸான, ஒரு ஸாஃப்ட் இனிப்பு. பல லேயர்ஸ் இருக்கும். அரிசி மாவை கொஞ்சம் நீர்க்கக் கரைத்துக் கொண்டு அதில் சுத்தமான துணி அல்லது ப்ரஷ் போன்ற சாதனத்தை அதில் முக்கி தோசைக் கல்லில் மேலும் கீழும் ஓரிரு முறை இழுத்து ஓரிரு நிமிடத்தில் அப்படியே தோசை போன்று வந்ததும் அதைப் பொடிந்துவிடாமல் எடுத்து தனியாகத் தட்டில் வைக்க வேண்டும். அப்படி நாலைந்து லேயர்கள் செய்த பின் உள்ளே உலர் பருப்புகள் பழங்கள் சர்க்கரை அல்லது வெல்லம் சேர்த்து வைத்து மடிக்க வேண்டும். புத்தரேகுலு நான் சுவைத்தது எங்கேனா ஜெயநகரில் உள்ள புல்லா ரெட்டி ஸ்வீட்ஸ் கடையில். சின்ன கடைதான்.  ஆனா செம டேஸ்ட். இப்ப வீட்டிலும் செய்வதுண்டு.

நன்றி இணையம்

என்னை மிகவும் கவர்ந்த ஒரு போளி/ஸ்வீட் கடை ஜெயநகரில் இருக்கும் ஃபேமஸ் மனே ஹோலிகே (போளி). நம்ம கண் முன்னேயே போளி தட்டிக் கல்லில் போட்டுச் சூடாகத் தருவாங்க. கிட்டத்தட்ட 20 வகை செய்யறாங்க. அன்னாசி, குல்கந்த் போளி சூப்பரா இருக்கும். Pocket friendly!

மெஜஸ்டிக்கில் உள்ள ஸ்ரீ வெங்கடேஸ்வரா ஸ்வீட் ஸ்டால் மைசூர் பாக்கு ஃபேமஸாம். வாயில் கரையுமாம். நான் முயற்சி செய்ததில்லை. விலையும் சல்லிஸாம். பழ சிப்ஸும் நல்லாருக்குமாம். பழ சிப்ஸாவது (ரொம்ப பிடிக்கும்) அடுத்த முறை வாங்கிப் பார்க்க வேண்டும் என்று நினைத்திருக்கிறேன்.

அது சரி உனக்கோ உடம்பு முழுக்க சர்க்கரையை வைச்சுக்கிட்டு ஸ்வீட்டா சாப்பிடறியான்னு இங்கு என்னைப் பத்தி தெரிஞ்ச நட்புகள் கேட்கலாம். நான் எங்க சாப்பிட்டேன்!!! வாங்கி ஒரு சின்ன குட்டியூண்டு பீஸ் டேஸ்ட் அம்புட்டுத்தான். மத்ததெல்லாம் நம்ம வீட்டு சீனி வாஸன் தான்! ஆனா இப்ப அந்த சீனி வாஸ்னும் சீனியை தீண்டுறதில்ல.

வித்யார்த்தி பவன் ரொம்ப ஃபேமஸ்னு சொன்னாங்களா, விலையும் நம்ம ஜேப்பிக்குச் சரிதான்னு ஒரு நாள் போய் சாப்பிட்டுப் பார்க்கலாம்னு பார்த்தா, ரசிக்கவில்லை. ஒரு தோசை சாப்பிடுவதற்குள் திகட்டிவிட்டது. பிழிந்தால் ஒரு செக்கு எண்ணை வரும் போல! அந்த அளவுக்கு நெய்யும் எண்ணையும்!

பெங்களூரில் சக்கைப் போடு போடுவது நடைபாதை உணவகங்களும், துரித உணவகங்கள் குறிப்பா சாட் கடைகள். அதுவும் சாலையோரங்களில் பானிபூரி, பேல் பூரி, மசாலா பூரி கடைகள் எக்கச்சக்கம். 10 அடிக்கு ஒன்று பார்க்கலாம். அடுத்தடுத்தும் கூடப் பாக்கலாம். அதிலும் பங்காருபெட் சாட் ரொம்ப ஃபேமஸ்.

முக்குக் கடைகள்ல கூட தேநீர், காஃபியோடு சமோசா, வடை, போண்டா ப்ரெட் சான்ட்விச் என்று எல்லாம் கிடைக்கின்றன. எங்கு திரும்பினாலும் சாப்பாட்டுக் கடைகள். 10 அடிக்கு ஒன்றென்று தீனிக் கடை இல்லை எனில் ஜெகத்தினை அழித்திடுவோம்! நிலை !

பெங்களூரில் இந்த 5 வருடங்களில் நான் பார்த்த வகையில் தெரிந்து கொண்டது இதுதான். மக்கள் வெளியில் அதிகம் சாப்பிடுகிறார்கள். சாப்பாடும் அதிகம் சாப்பிடுகிறார்கள். என்ன சுவை என்பதெல்லாம் கணக்கில் இல்லை என்றே தோன்றுகிறது. ஏனென்றால் புகழ்பெற்ற உணவங்களும் சரி, சாதாரண உணவகங்களும் சரி கூட்டம் நிறைந்திருக்கின்றன. எந்த உணவகத்திலும், சாலையோரக் கடைகளிலும் கூட எந்த உணவை எந்தப் பெயரில் எப்படிக் கொடுத்தாலும் சாப்பிடுகிறார்கள். சாப்பிடுபவர்கள் அதிகமானதால் உணவகங்கள் பெருகினவா அல்லது உணவகங்கள் பெருகியதால் சாப்பிடும் மக்கள் கூட்டம் அதிகமானதா என்ற பட்டிமன்றம் வைக்கலாம் என்ற அளவு மொத்தத்தில் உணவு மேளா போல பெங்களூர் இருக்கிறது என்பதுதான் நான் கண்டது.

அளவுக்கு அதிகமானா அமிர்தமும் நஞ்சு! அதனால் சிலிகான் சிப் நகரம் சிப்ஸ் நகரமாக மாறும் பதிவுகளுக்கு முற்றுப் புள்ளி.

(பின் குறிப்பு - முரண் – பணக்கார ஹைடெக் சிப் நகரத்தின் மறுபுறக் காட்சி ஏரியா ஏரியாவாக நகரும் ஜிப்ஸி கூட்டத்தை (கழுதை வளர்க்கிறார்கள்) மேம்பாலங்களின் அடியில், கழுதைகளோடும், பன்றிகளோடும், நாய்களோடும் வாழ்க்கை நடத்துவதை பார்க்கலாம். 

மற்றொரு கூட்டம் கூலி வேலை செய்பவர்கள். கட்டிடத் தொழில், வீட்டு வேலை செய்பவர்கள், நடைபாதையில் பொருட்கள் விற்பவர்கள், வடை சுடுபவர்கள் என்று ரோட்டோரங்களில் அல்லது வெற்று நிலங்களில் ஓரமாகக் கூடாரம் போட்டுக் கொண்டு வாழ்வதையும் பார்க்கலாம். இவர்களுக்கும் சல்லிஸான விலையில் இந்த ஹைடெக் பணக்கார நகரம் உணவு அளிக்கிறது. கடையில் பொருட்கள் வாங்கிச் சமைப்பதை விட சாலையோரக் கடைகள் சிறிய உணவகங்களில் மிகவும் குறைந்த அளவில் சாப்பாடு கிடைப்பது ஒரு ப்ளஸ் பாயின்ட்! இவர்களின் வாழ்வாதாரத்திற்கு!)

(துளசியின் துபாய் பதிவு இரண்டாவது பகுதி வந்திருக்க வேண்டும். துளசியும் பிஸி,  பல்கலைக்கழக ஆங்கிலப்பாடத்திட்டம் தயாரித்தல், அவர் மனைவிக்குச் சில மருத்துவங்கள் என்று. எனக்கும் வேலைப் பளு. பதிவு படங்கள் வீடியோக்கள் எல்லாமே தயார்தான். துளசியின் குரல் பதிவு வந்ததும் கோர்க்க வேண்டும். அடுத்து வரும். எனவே என் தொடர் பதிவின் கடைசிப் பகுதியை போட்டு மங்களம் பாடியாச்சு!!)

சில்லு - 2 - துளசியின் இரண்டாவது மகன் விநாயக் வரைந்த படம் 

சில்லு - 3 - காஃபி இன் காபி ராகம் - சிக்கில் குருசரண்

https://www.youtube.com/watch?v=tfZcz-sBckM

நன்றி யுட்யூப்

வாட்சப்பில் வந்திருக்கலாம். கேட்காதவர்கள் கேட்டு ரசிக்கலாம்! பேஷ் பேஷ் காபி நன்னாருக்கு! கேட்டேளா!

lyrics by P R Sudarrsan - பாடல் வரிகள் எழுதியவர் பி ஆர் சுதர்சன்

--- கீதா