துபாய் நாட்கள் - முதல் நாள் - 26-10-2023

 

கரிப்பூர் (கோழிக்கோடு) விமான நிலையத்திலிருந்து துபாயில் இறங்கிய

முதல் நாள் – 26-10-2023

Travel is recess and we need it. ஆம்! பயணங்கள் என்பது ஒரு இடை ஓய்வு. அது நம் ஒவ்வொருவருக்கும் மிக மிக அவசியம். பல முறை ஏதேனும் ஒன்றைப் பற்றிக் கேட்கும் போது ஒரு முறை அதைப் பார்க்க ஆவல் உண்டாகும் தானே! 1

 

சஃபாரி யுட்யூப் சானல் நடத்தும் சந்தோஷ் ஜார்ஜ் குளங்கரா - படங்களுக்கு நன்றி - இணையம்

அப்படித் துபாய் பயணத்தைப் பற்றிப் பலரும் சொல்லக் கேட்டு (முக்கியமாக Safari சானல் நடத்தும் Santhosh George Kulangara - சந்தோஷ் ஜார்ஜ் குளங்கரா – இவரைப் பற்றித் தெரிந்து கொள்ள கூகுளில் இவர் பெயரைப் போட்டுப் பார்த்தால் நிறைய தெரிந்து கொள்ளலாம்) கூடவே படங்கள் மற்றும் காணொலிகளைக் கண்டு, ஒரு முறை அங்கு போகும் ஆவல் தொற்றிக் கொண்டது. 2

என் மனைவியின் (1980 களின்) கல்லூரி நண்பர்களின் ஒரு வாட்சப் குழுவில் உள்ள சிலர் அதற்கான முயற்சிகள் எடுத்தனர். அதிலுள்ள ஜமாலுதீன் என்பவர், ‘நாங்களிருக்க பயமேன்! விமானமேறுங்கள்’ என்று தைரியமூட்டினார். 3

என் மனைவி அதில் இணைந்ததுடன் என்னையும் இணைத்ததும், அதுவரை இதெல்லாம் தேவையா என்றிருந்த நான் ‘தேவையே’ என்று சொல்லி பயணத்திற்குத் தயாரானேன். 4

நண்பர் ஜமாலுதீன் அவர்கள் இந்தப் படத்தில் 

துபாயில் குடும்பத்துடன் கடந்த 30 ஆண்டுகளாகத் தங்கியிருக்கும் ஜமாலுதீன், அவரது நண்பரான பயண ஏற்பாட்டு முகவரைப் (Travel Agent) பார்த்து, பயணச் சீட்டு, விசா, தங்கும் ஹோட்டல் போன்றவற்றை உறுதிப்படுத்தச் சொன்னார். சொன்னபடி செய்தோம். மனைவியின் தோழிகள் (எல்லோரும் 55 ஐக் கடந்தவர்கள்) 5 பேர். கூடவே நானும். அப்படியாக நாங்கள் 6 பேர். 5

கரிப்பூர்/கோழிக்கோடு விமான நிலையம்

விமானத்தில் போக வர - 26-10-2023 காலை இங்கிருந்தும் 31-10-2013 மதியம் அங்கிருந்து விமானமேறுவது வரை - ஹோட்டலில் தங்க, விசா இவற்றிற்கு, நபர் ஒருவருக்கு ரூ 38,500. கடந்த அக்டோபர் 26 ஆம் தேதி காலை 5.40க்கு கரிப்பூர் (கோழிக்கோடு) விமான நிலையத்தை அடைந்தோம். செக்யூரிட்டி செக் -  பாதுகாப்பு பரிசோதனை பிரச்சனை இல்லை. இமிகிரேஷன் செக்கில் பரிசோதித்தவர் வரிசையில் நின்ற எங்களைப் பார்த்து “வாட்சப் குரூப் டூரா”  என்று கேட்டு ஒரு நமட்டுச் சிரிப்பும் சிரித்தார். 6

ஏர்இந்தியா எக்ஸ்ப்ரஸ் விமானம் 8.30க்கு எங்களை ஏற்றிப் பறந்தது. 21/2 மணி நேரப் பயணத்திற்குப் பின் ஆகாயத்திலிருந்து கீழே அதிசய பூமியான துபாயைக் கண்டோம். (விமானத்திலிருந்து இறங்கி ஏர்போர்ட் ஷட்டிலில் நிலையத்திற்குள் வந்ததை காணொளியில் காணலாம்.)

நண்பர் ஜமாலுதீன் துபாய் விமான நிலையத்திற்கு வெளியில் எங்களை வரவேற்க வந்த போது

நண்பர் ஜமாலுதீன் அவரது மகன் பணி புரியும் Dive Tech - டைவ் டெக்கிற்குச் சொந்தமான 10 பேர் பயணம் செய்யக் கூடிய ஒரு வேனுடன் காத்திருந்தார். 7 (கார் பகுதி காணொலியில்)

நாங்கள் தங்கியிருந்த ஹோட்டல் மெலடி க்வீன் நுழைவாயில்

இதன் மேலே, கீழே இருக்கும் படங்கள் அப்பகுதியில் Deira பகுதியில் எடுத்த படங்கள் 

Deira பகுதியில் உள்ள Baniyas Square – பனியாஸ் ஸ்கொயர் எனும் பகுதியில் Melody Queen Hotel ல் எங்கள் 6 பேருக்கும் 2 அறைகள் பதிவு செய்திருந்தோம். சிக்கனமாகப் போய்வர விரும்புபவர்களுக்கு ஏற்ற 3 நட்சத்திர ஓட்டல். அங்குத் தங்கியிருந்தவர்கள் 90% ஆப்பிரிக்க நாட்டவர்கள். 8

பொருட்களை அறையில் வைத்தபின் நடந்து அருகிலுள்ள தலசேரி ஓட்டலில் சாப்பாடு சாப்பிட்டோம். இலையில் பரிமாறப்பட்டது, மிகவும் அதிசயமாக இருந்தது. 9

கடந்த தினம் வரை தாங்கமுடியாத வெப்ப நிலையில் இருந்த துபாய், நாங்கள் போகும் முன்னும், போன தினமும் மழை பெய்ததால் துபாய் வீதிகளில் நடந்த எங்களுக்குச் சுகமான கால நிலை. 10 இப்பகுதி காணொலியில்

துபாய் க்ரீக் -  காணொலியில் பார்க்கலாம்

க்ரீக்கில் படகில் சென்றதை காணொலியில் காணலாம்

ஜமாலுதீன், அருகிலுள்ள (Creek) க்ரீக்கிற்குச் சென்று போட்டிங்க் போய் விடுவோம் என்றார். (Baniyas Square Metro) பனியாஸ் ஸ்கொயர் மெட்ரோ ரயில் நிலையம் வழியாகச் சிறிது நடந்ததும் Creek ஐ அடைந்தோம். 100 அமீரக திர்ஹாமிற்கு (United Arab Emirates Dirhams – அமீரகத்தின் திர்ஹாம் ஏறத்தாழ 1 திர்ஹாமிற்கு 22 ரூ கொடுக்க வேண்டும்) ஒரு படகில் நாங்கள் 7 பேர். ஏறக்குறைய ½ மணி நேரம் (Creek)- க்ரீக்கி ல் பயணித்தோம். இடையிடையே மழையும் பெய்தது.11

மனிதன் உருவாக்கிய Creek ன் இரு கரைகளிலும் துபாய், வானளாவிய கட்டிடங்களுமாய்ப் பரந்து கிடந்தது காணக் கிடைக்காத கண் கொள்ளாக் காட்சி. இடையிடையே Creek ஐக் கடந்து போகும் பாலங்கள். 12 (காணொலி)

அதன் பின் துபாய் வீதிகளில் நடந்து, காட்சிகள் பலதும் கண்டபின் அறையை அடைந்து தூங்கினோம். ஜமால் அவரது வீட்டுக்குச் சென்றார். 13(இதுவும் காணொலியில்)

இரண்டாம் நாள் எங்கு சென்றோம் என்பது அடுத்த பதிவில். பதிவின் வழி முதல் நாள் என்னோடு பயணித்த அனைவருக்கும் நன்றி. அடுத்த பதிவில் சந்திப்போம்.

(உங்கள் பதிவுகளுக்கு வர முடியாமல் வேலைப்பளு. ரப்பர் பணிகள், பயணங்கள், எதிர்பாரா பயணங்கள், பல்கலைக்கழக ஆங்கில துறைக்கான பாடங்கள் திட்டம் தயாரித்தல், தேர்வுத்தாள்கள் திருத்துதல் என்று இடைவிடாத பணிகள். இடையில் சில பதிவுகள் வாசிப்பதுண்டுதான்.)

https://youtu.be/U5JTCeu-pC8

7 நிமிடம் 22 நொடிகள் தான் முடிந்தால் பாருங்கள்

-----துளசிதரன்