துபாய் நாட்கள் - நான்காம் நாள் – 29-10-2023

 

தளத்தின் பதிவுகளை வாசிப்பவர்கள், கருத்திடுபவர்கள் அனைவருக்கும் மிக்க நன்றி.

நாங்கள் தங்கியிருந்த இடத்தின் அருகே ஒரு சின்ன உணவகம். கண்ணூர்க்காரர் நடத்துவது. அங்குதான் இரண்டாம் நாள் இரவு முதல் சாப்பிட்டோம். இன்றும் (நான்காம் நாள்) காலை இட்லி வடை சாப்பிட்டுவிட்டு Baniya Square – பனியா ஸ்கொயர் மெட்ரோ நிலையத்தில் மெஷினில் ரீசார்ஜ் செய்தோம். ஏடிஎம் மெஷின் போல் திரையில் பார்த்து கவனமாகச் செய்ய வேண்டும்.  

பின் அங்கிருந்து யூனியன் ரயில் நிலையம் சென்று சிவப்பு நிற தடத்திற்கு மாறி இறுதி பாயின்ட் அடைந்து வேனில் அங்கிருந்து ஆமிர் பணி புரியும் டைவ் டெக் Dive tech சென்று பார்த்தோம். ஹன்னாவின் குழந்தைகள் வரவில்லை. அவர்களது அப்பாவுடன் வேறு எங்கோ போக முடிவு செய்ததால். 

அன்றைய தினம்  Khorffakkan Beach – கொர்ஃபாகான் கடற்கரை, நீர்வீழ்ச்சி, Al Bidya அல் பித்யா மசூதி மற்றும் Friday Market – வெள்ளிக்கிழமை சந்தை இங்கெல்லாம் போகப் போகிறோம் என்றார் ஜமாலுதீன் அவர்கள். 

போகும் வழியில் பாலைவனம் தொடங்கும் இடம் கண்டதும் எல்லோரும் இறங்கி, படமும், காணொளியும் எடுத்துக் கொண்டோம். தனியாகப் பாலைவனம் காண்பதற்கு ஒரு தினம் ஒதுக்கி, விருந்து மற்றும் பெல்லி நடனம் நம் வயதுக்கும் உடலுக்கும் மனதுக்கும் ஏற்றதல்ல. மட்டுமல்ல செலவிட நேரமும் வேண்டுமே. குறைந்த நேரத்தில் கூடுதல் காட்சிகள் என்பதால் அரபு நாடுகளில் காண்பதற்கரிய இடங்களையும் காட்சிகளையும் வேனில் பயணம் செய்து காண்பதற்கு முக்கியத்துவம் கொடுத்தோம். அங்கிருந்து மீண்டும் பயணமானோம். Voice 4 - 25 

மணல் மேடுகளைத் தாண்டி மலைகள் தோன்றத் தொடங்கின. காடு சூழ்ந்த, மரங்கள் நிறைந்த மலைகளை மட்டும் கண்டுப் பழக்கப்பட்ட கண்களுக்கு அந்தக் கற்கள் மற்றும் பாறைகளாலான அம்மலைகளின் காட்சி வியப்பளித்தது.  

புதிய ஷார்ஜா-கோர்ஃபக்கான் சாலையானது 89 கிமீ நீளமுள்ள சாலைத் திட்டம். இது இரு நகரங்களுக்கிடையேயான பயண நேரத்தை அதாவது துபாயில் இருந்து கோர்ஃபக்கான் நகரத்திற்கு 45 நிமிடங்களிலிருந்து 90 நிமிடங்கள் வரை குறைக்குமாம். 

சாலைகள் அமைக்கவும் மற்றும் பல உபயோகத்திற்கும் பாறைகளை வெட்டி எடுக்கும் இடங்கள் இடையிடையே கண்ணில்பட்டன. மலைகளின் இடையே அருமையாக உருவாக்கிப் பராமரிக்கப்படும் சாலைகள். 

இடையில் மலைகளைக் குடைந்து உருவாக்கப்பட்ட 2.7 கிமீ நீளமான சுரங்கப்பாதை. கோர் ஃபக்கானை ஷார்ஜாவுடன் இணைக்கும் இந்தச் சுரங்கப்பாதை மத்திய கிழக்கின் மிக நீளமான சுரங்கப்பாதையாம். இந்தப் பெரிய சுரங்கப் பாதையைக் கடந்ததும் வித்தியாசமான சூழலைக் கொண்ட Khorffakkan கொர்ஃபாகான் கண்ணில் பட்டது. Khorffakkan கோர்ஃபக்கான் நகரத்தில் பயணித்தோம். (காணொளியில் பார்க்கலாம்)

குன்றின் உச்சியிலிருந்து எடுத்த காட்சிகள்

பின் அமீர் ஒரு குன்றின் மேல் வேனை ஓட்டிச் சென்று, அதன் உச்சியில் நிறுத்திவிட்டு இறங்கச் சொன்னார். இறங்கி அவரைப் பின் தொடர்ந்தோம். Khorfakkan-கொர்ஃபாகான் பகுதியில் இருக்கும் அந்த மலை உச்சி மற்றும் இடத்தின் பெயர் AI Rabi Tower-ராபி டவர். ஜமால் அவர்கள் கையை நீட்டிச் சுட்டிக் காண்பித்த திக்கில் கடலும், கப்பல்களும் கொஞ்சம் தொலைவில் கண்ணுக்கு விருந்தாய் Khorfakkan–கோர்ஃபக்கான் கடற்கரையும் தெரிந்தன. நீண்ட நேரம் அங்கு நின்று இயற்கையின் அழகை ரசித்த பின் Khorfakkan-கொர்ஃபாகான் கடற்கரைக்குச் சென்றோம். 

ஷார்ஜாவில் உள்ள இந்த Khorfakkan-கோர்ஃபக்கான் என்ற கடலோர நகரம் உண்மையிலேயே ஐக்கிய அரபு எமிரேட்ஸில் காண வேண்டிய பல அழகிய இடங்களைத் தன்னகத்தே கொண்ட ஒரு சுற்றுலா நகரம். அதில் கோர்ஃபக்கான் கடற்கரைக்குப் பெயர் பெற்ற கோர்ஃபக்கான் ஒரு முக்கிய சுற்றுலாத்தலமாகும். நீர் விளையாட்டுகளுக்குப் பெயர் பெற்றது.  மதிய நேரமானதால் அதிகம் ஆட்கள் இல்லை. சில சுற்றுலா பயணிகள் கடலில் தூரத்தில் நீந்திக் கொண்டிருந்தார்கள். சிறிது நேரத்திற்குப் பின் அங்கிருந்து கிளம்பி அடுத்து ஒரு மிகப் பழமை வாய்ந்த ஒரு மசூதியைக் காண பயணமானோம். 

போகும் வழியில் வண்டியில் இருந்து கொண்டே செயற்கையாக உருவாக்கிய Khorffakkan கோர்ஃபக்கான் நீர்வீழ்ச்சியைக் கண்டோம். 

வரும் போதும் மீண்டும் திரும்பிப் போகும் போதுமான இந்தச் சாலைப் பயணம் மிகவும் ரசித்து அனுபவிக்கத்தக்க ஒரு பயணம் எனலாம். போகும் வழியில் மீண்டும் மலைகளின் இடையில் பயணம். காணக் கண்கொள்ளாக் காட்சி. அதன் பின் அமீரகத்தில் உள்ள ஒரு பழமையான மசூதியை அடைந்தோம்.

அல் பித்யா மசூதி

மரங்கள் எதுவும் பயன்படுத்தாமல் அங்கு கிடைக்கப்பெற்ற பொருட்களான மண் மற்றும் கல்லால் கட்டப்பட்ட அமைப்பு. 

மசூதி பற்றிய விவரங்கள்

 

நூற்றாண்டுகளுக்கு முன்பு – கிபி 1424 ல் கட்டப்பட்ட மிகவும் பழமை வாய்ந்த வரலாற்றுச் சிறப்பு மிக்க அந்த Al bidya மசூதியும் நம் வேப்ப மரம் போல் இலைகளைக் கொண்ட ஒரு மரத்தின் அருகே உள்ள ஒரு கிணறும், நூற்றாண்டுகளுக்கு முன்பு அங்கு வாழ்ந்த மக்களை மனத்திரையில் காண்பித்தன. 

பிரார்த்திக்கும் இடம்

மசூதி பற்றிய விவரங்கள்

ஃபுஜைரா எமிரேட்ஸில் உள்ள அல் பித்யா எனும் ஒரு கிராமத்தில் அமைந்துள்ளதால் "அல் பித்யா மசூதி" என்று அழைக்கப்படுகிறது. "உஸ்மானிய மசூதி" என்றும் அழைக்கப்படுகிறது. மரங்கள் எதுவும் பயன்படுத்தாமல் அங்கு கிடைக்கப்பெற்ற பொருட்களான மண் மற்றும் கல்லால் கட்டப்பட்ட அமைப்பு. உள்ளே செல்ல உடை கட்டுப்பாடுகள் உண்டு. பிரார்த்தனை மண்டபத்தில் ஒரு சிறிய மிஹ்ராப்  அதாவது மெக்காவின் திசையைக் குறிக்கும் சுவரில் உள்ள இடம் உள்ளது. பிரார்த்தனை கூடத்தின் உள்ளே, பல சிறிய அலங்கார ஜன்னல்கள் மசூதிக்குள் ஒளி மற்றும் காற்று வருவதற்கு வசதியாக இருக்கின்றன. இந்த மசூதியில் தினசரி பிரார்த்தனைகள் நடக்கின்றன. கூடவே இது ஒரு சுற்றுலாத் தலமாகவும் உள்ளது.  

அரபு ஸ்டைலில் உணவகம்

அரபு நாட்டவர்கள் சாப்பிடுவது போல உணவு உண்டோம். காணொளியில் பார்க்கலாம்

மதியம் 3 மணி ஆனதால் பசி வேறு வாட்டியது. இடையிடையே பழங்கள் மற்றும் நொறுக்குத் தீனி இல்லாமல் இல்லை. ஒரு நேரமேனும் அரபு நாட்டவர்கள் சாப்பிடுவது போல உணவு உண்டால் நல்லது இல்லையா என்றார் ஜமாலுதீன் அவர்கள். நாங்கள் எல்லோரும் ஆர்வத்துடன் ஆமாம் என்றோம். சிறிது நேரத்தில் வேன் ஒரு உணவகம் முன் நின்றது. கம்பளம் விரித்த தரையில் அமர்ந்து அரேபியன் ஸ்டைலில் உணவருந்தினோம். Voice 12 – 1 min

அதன் பின் நேரமின்மையால் Fujairah நகரத்தில் இறங்காமல் வேனிலிருந்து கண்களின் வழி மனதிலும் மொபைலிலும் காட்சிகளை பிடித்துக் கொண்டு சென்றோம். மலைகளினிடையே Flag Pole & Resistance Monument Khorfakkan - கோர்ஃபக்கான்  ரெஸிஸ்டன்ஸ் மோனுமென்ட் கண்டு கொண்டே சென்றோம். ஷார்ஜா மசூதியையும்,  வேனிலிருந்து கண்டு கொண்டே பயணித்தோம்.  Hajar ஹஜர் மலையைக் கடந்து Friday Market – ஃப்ரைடே மார்க்கெட்டை அடைந்தோம். (இப்பகுதியின் காணொளியில் காணலாம்)

பழங்கள் காய்கறிகள் விற்கும் கடைகளும், உணவகங்களும் துபாயில் பிரபலமான பேரீச்சம்பழங்களில் முக்கிச் சாப்பிடும் சிறிய வடைகளைக் கண்டோம். பேரீச்சம் பழ மரத்தின் தலை பாகத்தைச் சீவி அதனுள் இருக்கும் குருத்தைப் பலரும் காத்திருந்து வாங்கிக் கொண்டு போனார்கள். (இப்பகுதியும் காணொளியில்)

அங்கிருந்து கிளம்பி நீண்ட பயணம். 8 மணிக்குத் துபாயிலுள்ள Nesto Hyper Market – நெஸ்டோ ஹைப்பர் மார்க்கெட் சென்று அங்கிருந்து பொருட்கள் வாங்கினோம். 

அறையை அடைந்து தங்குமிடம் அருகே உள்ள Day to Day – டே டு டே எனும் Shopping Mall – ஷாப்பிங்க் மாலுக்குச் சென்று தேவையான பொருட்கள் வாங்கினோம். விலை குறைவு. ஆனால் தரம் இல்லை.

மறுநாள் – 30-10-2013 ஒரு நாள் தான். அன்று நாங்கள் மிக அழகான ஓரிடத்திற்குச் சென்றோம். அது என்ன என்பதை அடுத்த பதிவில் சொல்கிறேன் படங்களுடன், காணொளிகளுடன், காத்திருப்பீர்கள்தானே!

  

https://youtu.be/OP6ah_ETrzg

-----துளசிதரன்