சில்லு சில்லாய் - 16 - மங்கையா ராகப் பிறப்பதற்கே...- கங்கு கீரை - வானுலகம்

 

சில்லு - 1 - மங்கையராகப் பிறப்பதற்கே...

மங்கையராய் பிறந்திட மாதவம் செய்திடல் வேண்டும் என்று எங்கள் ஊர் தாத்தா கவிமணி பாடியிருக்கிறார். கல்லூரியில் படித்த போது இதை நான் மேடை தோறும் முழங்கியிருக்கிறேன். ஆனால் அந்த முழக்கம் எல்லாம், எப்போது பெண்கள் பாலியல் துன்பத்துக்கு ஆளாவதும், சிவப்பு விளக்கிற்குத் தள்ளப்படுவதும் என்னைத் தாக்கத் தொடங்கியதோ அப்போது நின்றுவிட்டது.

தனிப்பட்ட முறையில் எனது தேவைக்காக உளவியல் கற்ற போது (பாடசம்பந்தாமாகவோ பரீட்சை எதுக்காகவோ இல்லை) பொதுவாக, என் தலைமுறை வரை - நம் சமூகத்தில் திருமணமான ஓர் ஆணுக்கு மனநிலை சரியில்லை என்றால் அவ்வளவாகப் பிரச்சனைகள் இல்லை. கல்லானாலும் புருஷன் என்ற ரீதியில் மனைவி பார்த்துக் கொள்வதுண்டு. ஆனால் அதே சமயம் பெண்ணுக்குச் சற்று மனநிலை தடம் புரண்டால் அங்கு முடிந்தது! பல மருத்துவமனைகளில் இதைக் கண்டதுண்டு. இப்போது நிலை மாறிவிட்டது. ஆணுக்கொரு நீதி பெண்ணுக்கொரு நீதி என்றில்லை. பெரும்பாலும் ரத்துதான்!

இது கவிதைக்கும், கட்டுரைக்கும், மேடையில் முழங்கவும் நல்லாதான் இருக்கும் ஆனால் நடைமுறையில், அதுவும் பச்சிளம் பெண் குழந்தைகள் பாலியல் துன்பத்துக்கு உட்படும் போது, இந்த வரி எனக்குக் கேள்விக்குள்ளாகத் தொடங்கியது. இது என் தனிப்பட்டக் கருத்து.

“உனக்கு முடியலைல்லியா, போய் ரெஸ்ட் எடுத்துக்க. நான் சமையல பாத்துக்கறேன்”

ஆஹா! நான் ரெஸ்ட் எடுக்க போயாச்சு. அப்போதுதான் கண் அசந்திருப்பேன்.

“புடலங்காய் பொரிச்ச கூட்டுதானே நான் கட் பண்ணிட்டேன், சின்னதா பண்ணனுமா?”

“பரவால்ல எப்படி இருந்தா என்ன? நோ ப்ராப்ளம்”

எனக்கு எந்தவித ஸ்பெசிஃபிக்கேஷனும் கிடையாது. இப்படித்தான் அப்படித்தான் செய்ய வேண்டும் என்றோ இது போட வேண்டும் அது போடவேண்டும் என்றோ. ஏதோ ஒன்று நமக்கு முடியாத போது செய்யப்படுகிறதே என்று இருப்பேன். இந்த பங்களூர் மக்கள் மாதிரின்னு வைச்சுக்கோங்க எதை எப்படிக் கொடுத்தாலும் சாப்பிடும் ரகம். நம் வீட்டில் எல்லாருமே இந்த ரகம் தான்.

“பாசிப்பருப்பா? துவரம்பருப்பா?”

“பாசிப்பருப்பு”

“எவ்வளவு போடணும்?”

“1/3 சரியா இருக்கும்”

“தண்ணி எவ்வளவு விடணும்? சரியான்னு பாத்து சொல்றியா…”

சென்றேன். கேள்விகள் செயல்பட்டிருக்கவில்லை. எல்லாம் செய்துவிட்டு, “கொஞ்சம் படுத்துக் கொண்டுவிட்டு வந்து மீதிய செய்யறேனே”

“ஓகே அவ்வளவுதானே? போய் ரெஸ்ட் எடு”

மீண்டும்….

“ரெட் ரைஸ் தானே?”

“ஆமா”

“குக்கர்லே வேற ஏதாவது வைக்கணுமா?”

“இல்லை…”

“ரெட் ரைஸ் எவ்வளவு?”

“அரை கப்”

“கூட்டுக்கும் குக்கர் உள்ள வைக்கணும்தானே…?”

மீண்டும் எழுந்து சென்று அரிசி அலசி தண்ணீர் வைத்து, கூட்டுக்கும் உள்ளே வைத்து குக்கர் மூடி இண்டக்ஷனில் டைமர் போட்டாச்சு. கொஞ்சம் நேரம் படுத்துக் கொள்ளலாம்.

“சரி நீ போய் படுத்துக்க மீதிய பார்த்துக்கறேன்”!!!!!!!!!!!!!!!!!!!!!!!!!!!!!!!!!!!!!!!!!!!!!!

கண் அயரத் தொடங்கிய போது…

“கூட்டுக்கு என்னெல்லாம் வறுக்கணும்?”

மீண்டும் எழுந்து போனேன். வறுத்து அரைத்து……மதியத்துக்குக் கொண்டு போக டிஃபனும் செய்து…..ரெடி…மீண்டும் கொஞ்சம் படுத்துக் கொள்ளலாம் என்று படுக்கப் போனேன்

“நான் ரெக்கார்டிங்க் பண்ணின இந்த வீடியோ சரியா ப்ளே ஆகல இன்னிக்கு அனுப்பணுமே….இல்லைனா திரும்பவும் ரெக்கார்ட் பண்ணனும்……இது என்ன பண்ணி பார்த்தாலும் ஸ்ட்ரக் ஆகுது”

“ம்…என்னன்னு பார்க்கணுமா?”

“பார்க்கறியா? இல்ல வேண்டாம்….நீ படுத்துக்க….ஆனா இன்னிக்கு அனுப்பினா பேமென்ட் பண்ணிடுவான்…அதான் யோசிக்கறேன்……..”

ஏழுந்து சென்றேன். தலையைத் தூக்கவே முடியவில்லை அத்தனை பாரம்….

மங்கையாராகப் பிறப்பதற்கே……….!!! ம்ஹூம் நான் முடிக்க மாட்டேனே!

சில்லு - 2 - கங்கு கீரை - தண்ணீர்க் கீரை

சில நாட்களுக்கு முன் கடைத் தெருவில் உலா வந்த போது இதோ இந்தக் கீரை கண்ணில் பட்டது. கீரையின் பெயர் அறிந்ததில்லை. ஆனால் எங்கள் ஊர் ஆற்றங்கரை, வாய்க்கால் பக்கங்களில் பார்த்ததுண்டு. என்றாலும் அது சமைக்க உதவும் கீரை வகை என்று அறிந்ததில்லை. கேட்டேன் அவர் ஏதோ ஒரு பெயர் சொன்னார். புரியவில்லை. ஆனால் பொரியல் செய்யலாம் என்றார். ஆ! எங்கள் ஊரில் இலவசமாகக் காடு போல் வாய்க்கால், ஆற்றங்கரையில் வளர்ந்திருந்தப்ப செய்ததே இல்லையே!

தண்ணீர்க்கீரையும் அதில் உள்ள பூவும்

வாங்கிக் கொண்டேன். கோமதி அக்காவுக்குப் படம் அனுப்பிக் கேட்டேன். தெரியவில்லையே என்றார். கூகுளில் தேடினேன். கங்கு கீரை (எங்கள் ஊரில் கங்கு என்றால் தீக்கங்கு) – தண்ணீர்க்கீரை – தண்ணீர் பசலைக்கீரை – water spinach என்றாள் கூகுள் தோழி. கூடவே இக்கீரையின் மருத்துவப் பயன்களும் சொன்னாள். கல்லீரல், மஞ்சள் காமாலை, தோல் பிரச்சனைகளுக்கு இக்கீரை நல்லதாம். பசலை என்பதற்கேற்ப கொஞ்சம் வழ வழப்பு இருந்தாலும் பொரியல் செய்ய முடிந்தது. தண்டும் சேர்த்துச் செய்யலாம். தண்டு தாமரைத் தண்டு போல, வாழைத்தண்டு போல உட்புறம் தண்ணீரை உள் வாங்கிக் கொள்ளும் ஸ்பாஞ்ச் போன்று இருந்தது. நான் வெங்காயம் இல்லாமல் செய்வது இல்லை! இதோ அக்கீரையும் நான் செய்த பொரியலும்! நல்ல சுவை! சூப்பும் செய்யலாம்.

 

சில்லு – 3 – என் மூன்றாவது விழியில் சில ஷாட்ஸ் 

வியந்து பார்த்து ரசித்து அங்கு நடப்பது போல் கனவு கண்டு சஞ்சரித்து  எடுத்த சில காட்சிகள். வர்ணித்திட வார்த்தைகள் இல்லை! 

இப்படியான காட்சிகள் படங்களாகவும், காணொளிகளாகவும் அவ்வப்போது பதிவுகளில் வரும். 

பதிவு உங்களுக்குப் பிடித்திருக்கும் என்று நினைக்கிறேன். வாசிக்கும், கருத்திடும் அனைவருக்கும் மனமார்ந்த நன்றி!

------கீதா