ஒன்று கூடல் நிகழ்வும், ஈஷா பயணமும் பகுதி – 2

மகிழ்ச்சி என்பது இயற்கை, ஆனால் துக்கம் என்பது செயற்கை அதாவது துக்கம் என்பது நாமாக உருவாக்கிக் கொள்வது - இது சத்குருவின் வாக்கு. அதனால்தான் இறைவனை துதித்துப் பாடி ஆடி ஆனந்தம் கொள்வது ஈஷா மையத்தில் நித்ய நிகழ்வாகிறது. - 1

“சிவ சிவ என்றிடத் தீவினை மாளும். சிவ சிவ என்றிட என்னச் சிவகதி தானே” எனும் சான்றோர் வாக்கும் அதுதானே. பிறவிப் பெருங்கடலை நீந்தி இறைவன் திருவடி சேர்வதுதானே சைவ நெறி. அதைப் பின்பற்றும் சத்குருவின் ஈஷா மையத்தில் தூரத்திலிருந்து நம்மை அதிசயம் கொள்ள வைக்கும் பிறை சூடிய சிவரூபம் வரவேற்கிறது. - 2

சத்குரு சிவனை ஆதியோகியாகக் காண்கிறார். ஆதியோகியே யோகத்தின் மூலம். 15000 வருடங்களுக்கு முன்னே, மதங்கள் தோன்றுவதற்கு முன்பே முதல் யோகியான ஆதியொகி, யோக அறிவியலை தன் ஏழு சீடர்களான சப்தரிஷிகளுக்கு வழங்கினார். 112 அடி உயரமுள்ள இந்த ஒளி பொருந்திய திருமுகம், ஒருவர் நல்வாழ்வு வாழ்ந்து முக்தியடைய ஆதியோகி நமக்கு அருளிய 112 வழிகளைக் குறிக்கிறது. – 3

மட்டுமின்றி அங்கிருந்து மாட்டு வண்டியிலோ நடந்தோ மலை அடிவாரத்திற்குச் சென்றால் அங்கு நாம் கண்டு வணங்கி அருள் பெற வேண்டியவைகள், தியானலிங்கம், திரிமூர்த்தி சிற்பங்கள், நந்தி, நாகசந்நிதி, சூரிய குண்டம், சந்திர குண்டம் மற்றும் லிங்கபைரவி. – 4

இத்துடன் தியானலிங்கத்தில் அமையப்பெற்றுள்ள பெண் தெய்வமான வனஸ்ரீ, உண்மையிலேயே ஒரு அரசமரத்தின் சிற்பமே. அதன் மத்தியில் உள்ள தங்க இலை வளத்தையும் செழிப்பையும் குறிக்கிறது. பெண்களுக்கும் குழந்தைகளுக்கும் இதன் தெய்வீகச் சூழலில் தியானம் செய்வது சிறப்பான பலன் தரும் என்று நம்பப்படுகிறது. – 5

திரிமூர்த்திகளான ருத்ரனும் ஹரனும் சதாசிவனும் வருவோர்களுக்கு அருள் புரிகிறார்கள். இங்கு மும்மூர்த்திகள் பிரம்மா, விஷ்ணு, சிவ சங்கல்பத்தில் அல்ல என்பது குறிப்பிடத்தக்கது. வைணவம் கலந்திடாத சைவ நெறியைப் பின்பற்றும் சத்குருவின் சங்கல்பத்தில், சிவ சக்தி திரிமூர்த்திகளாகச் சங்கல்பிக்கப்படுகிறது. உண்மையிலேயே எல்லா மதங்களிலும் உட்பிரிவுகள் உள்ளன. கிறித்தவர்களில் காத்தோலிக்க மற்றும் ப்ராட்டஸ்டான்ட் போல முஸ்லிம்களிலும் சுன்னிகள், ஷியாக்கள். இவை எல்லாம் அம்மதங்கள் தோன்றிய பின் பிரிந்தவை. அம்மதங்களின் மூலம் ஒன்றே. – 6

ஆனால் இந்துமதம் என்பது சைவ, வைணவக் கலவை. இவற்றின் மூலங்கள் வேறு. எனவே ஒட்டுதல் முறையில்தான் ஒன்று சேர்க்க முடியும். சைவம் கலந்த வைணவம் தான் இப்போதைய இந்து மதம். கேரளத்தில் இப்போதெல்லாம் சைவம் மறைந்தே போன ஒன்றாகிவிட்டது. குளியும் தேவாரமுமாக வாழ்ந்த மலையாளிகளுக்குத் தேவாரம் என்பது ஏதோ சந்தனம் அறைக்கும் கல் அல்லது கிண்டி என்றே ஊகிக்கும் நிலை. தேவாரமும் திருவாசகமும் சைவ மதம் விட்டு வைணவ மதத்துக்கு மாறிய மார்த்தாண்டவர்மன் 18 ஆம் நூற்றாண்டில்  தீக்கிரையாக்கியேவிட்டார். – 7

ஆனால், இந்நிலை கர்நாடகத்தில் இல்லை.  வைணவ மதத்தின் ஆதிக்கத்திலிருந்து விடுபட லிங்காயத்துகள் அவர்களை ஒரு ஜாதியாக மட்டுமல்ல ஒரு மதமாகவே மாற்ற வேண்டும் என்று வாதிட்டுக் கொண்டிருக்கிறார்கள். இதன் தாக்கம் ஒரு வேளை சத்குருவிற்கும் ஏற்பட்டிருக்க வாய்ப்பிருக்கிறது. – 8

எப்படியோ வைணவ மத ஆதிக்கம் அதிகமில்லாமல் ஒரு வழிபாட்டு முறையை ஏற்படுத்தி இருக்கும் சத்குரு ஒரு விதத்தில் சைவத்தையும் சித்தர்களின் வழிபாட்டு முறைகளையும் புதிய காலத்திற்கு ஏற்ப மாற்றி இருக்கிறார் என்றுதான் சொல்ல வேண்டும். இளைஞர்களும் இளம் பெண்களும் இனம், மொழி, சாதி பாராது தியானத்திலும், காண வருவோருக்கு வழிகாட்டியும் இறையுணர்வை பேணுவது மனதுக்கு இதமளித்தது. – 9

தியானலிங்க தரிசனம் காலை 6 மணி முதல் இரவு 8 மணி வரை உண்டு. நாத ஆராதனை காலை 11.50 முதல் 12.10 மற்றும் மாலை 5.50 முதல் 6.10 வரையும் நடை பெறுகிறது. – 10

லிங்க பைரவி தரிசனம் காலை 6.30 முதல் மதியம் 1.20 வரையும், மாலை 4.20 முதல் இரவு 8.20 வரையும். அபிஷேகம் காலை 7.40க்கும் நண்பகல் 12.40க்கும். – 11

இலவச யோகா வகுப்புகள் 20 நிமிடங்களுக்கு ஒரு முறை என்று காலை 9.30 முதல் மாலை 4.00 மணி வரை நடை பெறுகிறது. - 12.

ஆதியோகி திவ்ய தரிசனம் இரவு 7 மணிக்கு. அந்த ஒலி ஒளி நிகழ்ச்சிதான் சுற்றுலா பயணிகளின் மனம் கவரும் ஒர் இடமாக ஈஷா மையத்தை மாற்றி இருக்கிறது. – 13

சூர்ய குண்டம் (ஆண்களுக்கு) சந்திர குண்டம் (பெண்களுக்கு) காலை 8.30 முதல் இரவு 8 மணி வரை. சூரிய குண்டம் மூன்று லிங்கங்களால் சக்தியூட்டப்பட்ட புனிதமிக்க நீர் நிலை. இதில் குளித்து தியான லிங்கத்தின் சக்தியை உள்வாங்க முடியும் என்று சொல்லப்படுகிறது. சந்திர குண்டம் இதே போல் பெண்களுக்கானது. – 14

எல்லா சிவராத்திரி நாட்களிலும் பஞ்சபூதகிரியா நடைபெறுகிறது. பஞ்சபூதங்கள் நம் உடலில் எப்படி செயல்படுகிறது என்பதைப் பொருத்துதான் உடல் நலமும், நலக்கேடும், மகிழ்ச்சியும், துயரமும், அமைதியும் குழப்பமும் ஏற்படுவதாக சத்குரு சொல்கிறார். எனவே பஞ்சபூதங்களோடு ஒன்றி இருந்து சக்தியை உணர வேண்டும் என்கிறார் சத்குரு. – 15

மட்டுமல்ல, ஆற்றல் வாய்ந்த ஒரு சக்தி மூலத்தைத் தன்னுள் உள்வாங்கிக் கொள்ள ஆதியோகியை வலம் வர வேண்டும் என்கிறார் சத்குரு. – 16

ஆதியோகியின் முன்புள்ள யோகேஸ்வர லிங்கத்திற்கு வேப்பிலை மற்றும் நீர் அற்பணித்து அதன் சக்தியைப் பெறலாம். அதற்கு அங்கு கூட்டத்தைக் குறைக்கவும், தேவையில்லாதவர்கள் செய்யாமல் இருப்பதற்கும் ரூ 20 வசூலிக்கப்படுகிறது. அத்துடன் பௌர்ணமி தினங்களில் 10.30 முதல் 12 மணி வரை தரிசிக்கலாம். அமாவாசை தினங்களில் ஈஷா மையத்தைச் சுற்றியுள்ள கிராம மக்கள் திரளாக வந்து யோகேஸ்வர லிங்கத்துக்கு அற்பணிப்புகளை வழங்குவதுடன் கிராமிய இசை மற்றும் நடன அரங்கேறங்கள் நிகழ்த்துகிறார்கள். – 16

பக்தர்கள் ஆதியோகியை சுற்றியுள்ள திரிசூலத்திற்குக் கருப்புத் துணி கட்டி வேண்டிக் கொள்ளவும் செய்கிறார்கள். – 17

மாட்டுவண்டிகள் சுற்றுப்புற சூழலை மாசுபடுத்தாமல் இருக்க உதவுவதுடன் நந்திதேவன் பக்தர்களுக்கு உதவுவதையும் உணர்த்துகிறது. - 18

நந்தி, சூரிய குண்டம், நாக சந்நதி, லிங்க பைரவி, திரிமூர்த்தி சிற்பங்கள் மற்றும் தியானலிங்கத்தை தரிசனம் செய்து முடித்து வெளியே வந்தோம். ஆதியோகி ஒலி ஒளி காட்சி காண வேண்டிய ஒன்று. அது ஒரு வித்தியாசமான அனுபவம் என்றுதான் சொல்ல வேண்டும். – 19

மட்டுமல்ல சத்குருவின் திரிமூர்த்தி சங்கல்பத்தின் வழியாக மனதின் மூன்று நிலைகளை உணர்த்துவதுடன் சிக்மன்ட் ஃப்ராய்டின் இட், ஈகோ, சூப்பர் ஈகோ எனும் Psycho analytic theory யுடன் அதை இணைப்பதால், வெளிநாட்டவர்களுக்கும் இளைஞர்களுக்கும் எளிதாக அதை உட்கொள்ளவும், தியானத்தின் மூலம் நம்முள் உறையும் இறைவனை உணரும் முறையும், அதன் மூலம் மனதை எப்போதும் மகிழ்ச்சியாக வைத்துக் கொள்ள முடியும் என்பதை எளிதாகப் புரிய வைக்கிறார் சத்குரு. - 20

2018ல் வெளியிட்ட, ‘காலம் செய்த கோலமடி’ எனும் என் நாவலில், நாவலை நிகழ்காலத்துடன் இணைக்க எனக்கு உதவிய தென் அமெரிக்கர்களான அட்ரியானாவும் லியான்ட்ரோவும் போல் பேருதவியாய் இருந்த 24-02-2017 அன்று பாரத பிரதமர் மோடி அவர்களால் திறந்து வைக்கப்பட்ட 112 அடி ஆதியோகி சிலையை நன்றியுடனும் அதிசயத்துடனும் பார்த்து கண்களை மூடிப் பிரார்த்தித்த பின் மனைவி மகனுடன் காரில் நிலம்பூர் நோக்கி இரவு 8 மணிக்குப் பயணமானேன். – 21.

பதிவை வாசிப்பவர்கள், கருத்திடுபவர்கள் அனைவருக்கும் நன்றி. 

https://youtu.be/TMueKiNpK6k

நேரமிருந்தால் காணொளியைப் பாருங்கள். 11 நி 46 நொ. இதில், அங்கு எடுத்த காணொளிகளும் இடம் பெற்றிருக்கின்றன.

 

-----துளசிதரன்