எனது மூன்றாவது விழியின் பார்வையிலே - 25 - லால்பாக் மலர் கண்காட்சி - 2023 - 2

இந்த வருடத்து லால்பாக் மலர் கண்காட்சி சென்று வந்ததும் சுடச் சுடப் போட்டுவிட ஆ கீதாவான்னு!!!! எல்லாரும் மயங்கினீங்கதானே! பாருங்க அடுத்தது போடுவதற்குள் வாலு போச்சு கத்தி வந்ததுன்னு சில பணிகள் வந்துவிட அதில் ஆழ்ந்து செய்து முடித்ததும் மனமோ கெஞ்சியது ரிலாக்ஸ் ப்ளீஸ் என்று. சரி ரொம்ப நாளாச்சு, ஒரு தமிழ் கீர்த்தனை கற்றுக் கொள்ளலாம் என்று இணையத்தில் ஆராய்ச்சி. நாம ஏகலைவிதான்! அது ஒரு புறம்.

அடுத்த இரு வாரங்களில் வேறு முக்கியமான விஷயம் காரணமாகச் சில முன்னேற்பாடுகள் என்று மனம் அதற்குத் தாவியதும் – மனம் ஒரு குரங்கு என்று சும்மா சொல்லலை! - மீண்டும் பதிவு எழுதுவதில்  தேக்கம். எனவே அடுத்து எழுத வேண்டும் என்று நினைத்திருந்த சில்லு சில்லாய் (சாப்பாட்டுக் கதைதான்!!) ஒத்தி வைக்கப்பட்டது.

ஆ! இரண்டாவது பகுதிக்கு இடையில் இடைவெளி கூடிவிட்டதே எல்லாரும் மறந்திருப்பீங்களே! எனவே ஒரு சின்ன Recap! 

சென்ற பதிவான லால்பாக் மலர் கண்காட்சிபகுதி 1ல் உள்ளே நுழைந்து சென்ற போது அடுக்கி அழகு செய்யப்பட்டிருந்த மலர் காட்சிகளைப் பார்த்தோம் இல்லையா. அங்கு நெல்லையையும் அவரது மனைவியையும் சந்தித்ததையும் சொல்லியிருந்தேன். அந்த இடத்தில் இருந்த 80 வருடமான பழைய மரத்தில் செதுக்கியிருந்ததையும் அதைச் சுற்றி பலவகை மலர் தொட்டிகளை அடுக்கி அழகு செய்திருந்ததைக் காணொளியாகப் போட்டிருந்தேன். அப்பதிவில் அப்படம் கொடுக்க விட்டுப் போச்...இப்போது அந்தப் படம் இதோ….

நாங்கள் நின்றிருந்த பகுதி இடப்புறம் ஒரு அறை. அங்கு உணவாகப் பயன்படும் மலர்கள் என்று மலர்கள், உலர் மலர்கள் நாம் சாப்பிடும் வகையில் எப்படி எல்லாம் பயன்படுத்தப்படுகின்றன என்னென்ன பூ வகைகள் பயன்படுத்தப்படுகின்றன  என்பது பற்றிய ஒரு கண்காட்சி. வழக்கமாகப் பயன்படுத்தப்படும் வாழைப்பூ, காலிஃப்ளவர் எல்லாம் கிடையாதுங்க அவை எல்லாம் காய்வகையில் போய்விடும். இவை பூக்கள். நாம் கேட்டிராத பூ வகைகள் உட்பட. பல வகை மலர்கள் சாப்பிடக் கூடியவையாக இருந்தாலும் மிகக் குறைவானவையே சந்தைப்படுத்தப்படுகின்றன. அதுவும் நம்மூரில் குறைவு.

உணவில் ரோஜாவின் பயன்பாடு உங்களில் பலருக்கும் தெரிந்திருக்கும். குல்கந்து, ரோஜா எஸன்ஸ், மற்றும் உலர வைக்கப்பட்ட ரோஜா இதழ்கள் பிரியாணி, கேக் வகைகளில் பயன்படுத்தப்படுகிறது. ஓமப்பூ, வேப்பம்பூ, துளசிப்பூ, குங்குமப்பூ, பூஷணிப்பூ, முருங்கைப்பூ, சூரியகாந்தி போன்றவையும் நாம் அறிந்ததே.  அது போல பல மலர் வகைகள் – ஆவாரம்பூ, தாமரைப்பூ, பப்பாளிப்பூ,  இன்னும் பல மருந்தாக அதாவது நேரடியாகவோ அல்லது அதிலிருந்து பிரித்தெடுக்கப்படும் வேதியல் பொருட்களைக் கொண்டோ தயாரிக்கப்படுகின்றன.

சில வகைகள் மருத்துவத் துறையில் தயாரிக்கப்படும் மயக்கமருந்துகளுக்கும், மூலிகைத் தேநீராகவும் பயன்படுகின்றன - உலரவைக்கப்பட்ட க்ரிஸாந்தமம், மல்லி, கமோமைல் போன்றவை. தேயிலையுடன் கலந்தும் தயாரிக்கப்படுகின்றன.

வெளிநாடுகளில் பல வகை உலர் பூக்கள் சாலட், சாஸ், தேநீர், இனிப்புகள், சுவையூட்டிகள் என்று என்று பயன்படுகின்றன. நம் நாட்டில் வடகிழக்கு மாநிலங்களில் பலவகை மலர்களை உணவில் பயன்படுத்துகின்றனர். மக்னோலியா, மொனார்டா, லில்லி வகைகள், டெய்சி, கார்னேஷன் Cattail - கட்டெயில் (சம்பு - தாவரம் இது பற்றி பதிவு போட்டிருந்தேனே அதில் சொல்லியிருந்தேன்), டேன்டெலியன், இவான்டீ, க்ளோரல் என்று நிறைய.

இதோ மேலே வெளியில் வைத்திருந்த படங்கள். உள்ளே யானை புகுந்தாலும் தெரியாத அளவு கூட்டம். எனவே என்னால் புகைப்படங்கள் எடுக்க முடியவில்லை. ஆனால் நல்ல விழிப்புணர்வு சமையல் கலையில் தொழில் செய்பவர்கள் மற்றும் ஆராய்ச்சி செய்பவர்களுக்கான தகவல்கள் நிறைந்த சிறிய அரங்கம்.

இந்தப் படத்தில் விதானசௌதா சித்திரம் பற்றிய சிறிய விவரம் மற்றும் இந்த வருடத்து தீம் இருக்கிறது பாருங்க வாசிக்க முடியும் என்று நினைக்கிறேன். 

இந்த வருடம் விதானசௌதா மற்றும் ஸ்ரீ கெங்கல் ஹனுமந்தையா அவர்களின் உருவத்தை மலர்களால் உருவாக்கியிருந்தாங்க அதுதான் தீம். கண்ணாடி அறைக்குள். அதைக் காண கூட்டமோ கூட்டம் எனவே நாங்கள் அதைக் காண முடியவில்லை புகைப்படமும் இல்லை என்பதை போன பதிவிலேயே சொல்லியிருந்தேன். இணையத்தில் நிறைய காணொளிகள் இருக்கின்றன. தட்டினால் கொட்டும்!

அதே இடத்தில் வலப்புறம் சிறிய பூங்கா அதில் அழகான வடிவத்தில் ஒரு மரம் அதன் இரு புறமும் மரங்களில் செதுக்கப்பட்ட விலங்கு உருவங்கள். முதலில் காணொளி எடுத்துவிட்டேன் எனவே கீழே காணொளியில் மரத்தைப் பார்க்கலாம்.

படத்தில் விலங்குகள் உருவங்களும் மரத்தின் அடிப்பகுதி மட்டுமே தெரியும். மரத்தின் முழு உருவமும் எடுத்த போது ஒருவர் வந்து இடித்திட மொபைல் கீழே விழுந்திடாம இருக்க பிடிக்கவும் அப்படம் போயே போச். 

அழகான மரமும் அதன் இரு புறமும் மரத்தில் வடிவமைக்கப்பட்ட விலங்குகளும். மிக்ச் சிறிய காணொளிதான்

https://youtube.com/shorts/EyiIWlwRyKs

அப்புறம் அங்கிருந்து படத்தில் எதிரே தெரியும் கடைகள் இருக்கும் பாதை வழியே நடக்கத் தொடங்கினோம். அதைக் கடந்ததும் கொஞ்சம் பெரிய திறந்த வெளி. அங்கும் கடைகளோ கடைகள் – அலங்காரப் பொருட்கள், கைப்பைகள் என்றும் பெண்களுக்கான குழந்தைகளுக்கான பொருட்கள் என்றும் விற்பனைக் கடைகளின் இடையே பூந்தொட்டிகள் விற்கும் கடைகளும். கீழே சிறிய காணொளி.

என்றாலும் பூச்செடிகள் விற்க என்று சில பண்ணைகள் தனியாகவும் கூடாரங்கள் போட்டிருந்தன. அவை அடுத்த பகுதியில்.

அந்தக் கடைகள் ஒருபுறம் மறுபுறம் திறந்த வெளிப் பூங்காவில் இப்படி பூந்தொட்டிகளை அடுக்கி அலங்காரம் செய்திருந்தாங்க.

சிறிய காணொளிதான். இப்பதிவின் சாராம்சம் காணொளியாய்…. https://youtu.be/LxNQv8cJOPs

பதிவுகளைப் பார்ப்பவர்கள், கருத்து சொல்பவர்கள் அனைவருக்கும் நன்றி. அடுத்த பதிவில் சந்திப்போம்!

------கீதா