சில்லு சில்லாய் - 14 - இந்தியாவின் சிலிக்கன் நகரம் உணவு நகரமாய் மாறி வருகிறதா - 1

என்னைப் போல் சாப்பாட்டை விரும்பி ரசித்துச் சாப்பிடும் பிரியர்கள் அனைவருக்கும் வணக்கம்! பெங்களூருக்கு வந்ததிலிருந்து இப்பதிவை எழுதத் தொடங்கி எழுதிக் கொண்டே……..இப்போதுதான் முடிக்க முடிந்தது. எந்த ஊருக்குச் சென்றாலும் அந்த ஊரின் வாழ்க்கை, உணவு முறை, உணவகங்கள் என்று நான் கொஞ்சம் கூர்ந்து நோக்குவது வழக்கம்.

பெங்களூருக்கு வந்து தாமசிப்பது இது இரண்டாவது முறை. முதன் முறை 22 வருடங்களுக்கு முன். அப்போது பார்த்த பெங்களூருக்கும் இப்போதைய பெங்களூருக்கும் எவ்வளவு மாற்றம்! மாற்றம் ஒன்றே மாறாதது. ஏற்கத்தான் வேண்டும். மாற்றங்களில் குறிப்பாக வாழ்க்கை முறை மற்றும் உணவகங்கள். நான் இங்கு வந்த பிறகு புதியதாய் முளைத்தவை அதுவும் தற்போது வீட்டருகில் ஒரு மாதத்திலேயே 4 புது உணவகங்கள்! இனிப்புக் கடைகள். எல்லாம் ஜே! ஜே!

இந்தியாவின் சிலிக்கன் பள்ளத்தாக்கு Silicon Valley, பூங்கா நகரம் – Garden city இப்போது சாப்பாட்டு Valley/பள்ளத்தாக்கு என்று சொல்லும் அளவிற்கு மாறியிருக்கிறதோ என்று தோன்றுகிறது. சில அடிகள் நடந்து காலில் ஏதோ தட்டியதே என்று திரும்பிப் பார்த்தா ஏதேனும் ஓர் உணவகம், காஃபி கடை இருக்கும். பக்கத்திலேயே பேக்கரியையும் பார்க்கலாம். இது உறுதி. இப்போது இருக்கும் எங்கள் வீட்டருகில் சுற்றிலும் எண்ணற்ற உணவகங்கள், ஜூஸ், சாட், துரித உணவகங்கள், பேக்கரிகள், வட இந்திய உணவகங்கள். எல்லாம் எப்போதும் ஜே! ஜே!

சமூக ரீதியிலும் பொருளாதார ரீதியிலும் பன்முகத்தன்மை கொண்டதாக பெங்களூர் இருப்பதாலோ என்னவோ உணவிலும் கூட பளிச்சென்று தெரிகிறது. தென்னிந்திய, வட இந்திய, சீன அப்புறம் பல மேற்கத்திய உணவுகள், பெயரே வாயில நுழையாத பெயருடைய உணவு வகைகளுக்கான உணவகங்களோடு, சாலையோரம், தெரு ஓரக் கடைகள் கூட போட்டி போட்டுக் கொண்டு சக்கை போடு போடுகின்றன.

வித விதமான உணவுகள், சுத்தமான உணவகங்கள், நம்ம பட்ஜெட்டை பதம் பார்க்காத உணவு வகைகள். அதாவது நான் சொல்வது தினமும் சாப்பிடும் சாப்பாட்டு வகைகள்.

எனக்கு ஆச்சரியம். புதுசு புதுசா உணவகங்கள் தொடங்கினாலும் கூட்டம்தான். சில உணவங்களில் இடம் இல்லாமல், வெளியில் போடப்பட்டிருக்கும் மேசைகளில் வைத்துக் கொண்டு நின்று கொண்டே சாப்பிடுவாங்கவதைப் பார்க்கலாம். எல்லா உணவகங்களிலும் கூட்டம்தான். எப்படியும்  உணவகங்களுக்கு வருவாய் கிடைத்துவிடுகிறது என்றே தோன்றுகிறது, Thanks to Bangaloreans and Foodies!

அந்த அளவுக்கு இங்குள்ள மக்கள் உணவுக்காதலர்களாக இருக்கிறார்கள் என்று சொன்னாலும், நான் பார்த்தவரையில் எனக்குத் தோன்றிய காரணங்கள் - நோ கிச்சன் சித்தாந்தம், மத்தியதரக் குடும்பங்களின் வாழ்க்கை முறை மாற்றம், Budget Friendly – பாக்கெட்டை பதம் பார்க்காத உணவு, தொழில்நுட்பத் துறையின் ஆக்ரமிப்பு அதில் பல்வேறு மாநில இளைஞர்கள், இளைஞிகள், கணவன் மனைவி இருவருமே பணி செய்பவர்கள் என்பதால் மன அழுத்தத்தைக் கடக்க என்பதோடு செலவழிக்க நல்ல வீங்கிய பர்ஸ் என்று பல காரணங்கள்.  வார இறுதி நாட்களில், கூட்டத்தைப் பார்க்க வேண்டும்! குடும்பங்களோடு குழுமி ரசிக்கிறார்கள். 

என்னை ஆச்சரியப்படுத்தும் இன்னொரு விஷயம் – எந்தப் பெயரைச் சொல்லி என்ன உணவு கொடுத்தாலும் அந்தப் பெயருக்கான உணவுதானா என்று எதுவும் பார்க்காமல் எதைக் கொடுத்தாலும் சாப்பிடும் கூட்டம்!

பொதுவாகவே எல்லா ஊர்களிலும் இப்போது மக்கள் வெளியில் சாப்பிடுவதை விரும்புறார்கள் என்றே தோன்றுகிறது. சாப்பாட்டுக் கடைகளுக்கும் கோளுதான். குறிப்பாக மத்தியதர குடும்பங்கள். இதே நகரத்தின் மற்றொரு பக்கத்தை பற்றியும் வரும்.

ஆஹா என் பிரிய காஃபி, பாரம்பரிய முறையிலான ஃபில்டர் காபி என்பது பெங்களூரின் நாடி நரம்பு. வாழ்க்கை! சிக்கரி கலந்த காஃபி. நன்றாக இருக்கும். Not bad you know! முன்பு ரூ 10. இப்போது ரூ 12 லிருந்து 15 வரை. வீட்டில் சிக்கரி கலக்காத காஃபி. அது தனி ஃப்ளேவர்!

தெருவோர காபி/பெட்டி கடைகளில் (நவீன பெட்டிக் கடைகள்) ஒரு கையில் காபி கப்/க்ளாஸ், மற்றொரு கையில் சிகரெட் என்று ஆண்கள் பெண்கள் என்ற பேதமின்றி ஆங்கிலம் ஹிந்தி ஒலிக்க கலந்து கட்டிய கும்பல் சர்வ சகஜ காட்சி! படித்தவர்கள்!

சரி, இப்ப பெங்களூர்/கர்நாடக ஸ்பெஷல் என்று சொல்லப்படும் சில பதார்த்தங்கள், வீட்டில் செய்வதென்றாலும், ஹோட்டல்களில் அவற்றின் சுவை எப்படி இருக்கும் என்று அறிய வேண்டி சுவைத்தவை.

பென்னே தோசா/பென்னே மஸாலா தோசா – அதாங்க வெண்ணை தோசை. இதற்கான பொருட்களும் அளவும் சற்று வித்தியாசம். வெளியில் மொறு மொறு, உள்ளே மிருதுவாக வெண்ணைல???? குளிப்பாட்டி இருப்பாங்க. என்னால் ஒரு தோசை கூடச் சாப்பிட முடியாது எனவே பை டூ. ஹான் இன்னொன்று, இங்கு இந்த பை டூ ரொம்ப பிராபல்யம் ஜூஸ் கடைகளில், சாட் கடைகளில்.

வடை – இங்கு வடை நன்றாக இருக்கும். ஆனால் தொட்டுக் கொள்ளத் தரப்படும் தேங்காய் - வெள்ளைச் சட்னி பெரும்பாலான உணவகங்களில் ஸோ ஸோ தான். நான் தவிர்த்து விடுவேன். இந்த வடையைப் பற்றிச் சொல்லும் போது சென்ற திங்கள், ஸ்ரீராமின் பதிவான வடை மகாத்மியத்திற்கான பதிலாக இங்கு வீட்டில் செய்யும் முறையை படங்களோடு, வீடியோவோடு கொடுக்கலாம் என்று நினைத்தேன். ஆனா செய்யும் போது படங்கள் எடுக்கவில்லை. இப்ப பதிவு வேறு திக்கில் செல்வதால் அதை அப்புறம் சொல்கிறேன்.

இங்கு தயிர் வடையும், சாம்பார் வடையும் ரெண்டாங்கெட்டான். அதாங்க கொஞ்சம் திதிப்பாக இருக்கும்.

இங்கு வித்தியாசமான பெயரில் சுவைத்த மற்றொரு பதார்த்தம் போண்டா சூப். போண்டாவை கர்நாடக ரஸத்தில் – அதாவது ரசம் கொஞ்சம் கெட்டியாகப் பருப்பு தூக்கலாக இருக்கும் - போட்டுத் தருகிறார்கள். இதுவும் திதிப்பு காரம் என்று இருக்கும். கிட்டத்தட்ட நம்ம ஊர் ரஸ வடை. இது எனக்குப் பிடித்தது.

கர்நாடகாவின் பிராபல்ய பிசிபேளா பாத். இது இல்லாமலா! பூந்தி, ஓமப்பொடி இல்லைனா சிப்ஸ் அல்லது பொரித்த ஜவ்வரிசி வடாமுடன் தருகிறார்கள். ஜவ்வரிசி வடாம் வீட்டில் செய்யும் ருசி கிடையாது. இது பெரும்பாலான உணவகங்களில் மெனுவில் நிச்சயமாக இருக்கும். இங்குள்ளவர்களின் விருப்ப உணவு. சுவை ஒரு சில உணவகங்களில்தான் பாரம்பரிய அந்த பட்டையின் லேசான மணத்துடன் இருக்கும். பல இடங்களில் வெறும் சாம்பார் சாதம் போலதான் இருக்கிறது. காய்கள் இருக்கான்னு தேடணும்.  

பெங்களூர்க்காரர்களுக்கு பிரியாணி/புலாவ் இல்லை என்றால் சாப்பாடு முழுமை அடையாது போல! அந்த அளைவிற்குப் பிராபல்யம். இது பொதுவாகச் சொல்லப்படும் பிரியாணி இல்லை. நாட்டி தொன்னே பிரியாணி (நாட்டி - நாட்டுப்புறம்/மலயாளத்தில் நாடன்) – (தொன்னே - பப்பாளி மரத்தின் பெரிய இலை அல்லது பனை, மந்தார இலையில் செய்யப்பட்ட பெரிய தொன்னை) அதாவாது கிராமத்து ஸ்டைல். அசைவம்தான் பிராபல்யம் என்றாலும் நான் சொல்லுவது சைவ புலாவ். நிஜமாகவே நன்றாகச் செய்கிறார்கள். அல்லது நான் சுவைத்த இடங்களில். (இந்த பிரியாணி/புலாவ் கடவுளரையும் விட்டுவைக்கவில்லை கேட்டேளா! கோயில் பிரசாதங்கள் பற்றியும் வரும்.)

சுவை தொடரும்…..சாப்பாடு பத்தி சொல்லி அப்படி டக்குனு முடிக்க முடியுமா!! சொல்லுங்கள்?!

சில்லு - 2 - பொன்னாங்கண்ணிக் கீரை கடையல் 

https://www.youtube.com/shorts/LH8rGkW7h3M

ஆங்கிலத்தில்

சரி, அப்படியே போற போக்குல மேலே இருக்கற பொன்னாங்கண்ணிக் கீரை கடையல் காணொளியும் முடிஞ்சா பார்த்துடுங்க. ஒரு நிமிட ஷார்ட்ஸ்தான். இது ஆங்கிலத்தில். சும்மா குரல் சேர்த்து முயற்சி. 1 நிமிடக் காணொளியில் தனித் தனியாகச் செய்து கோர்த்ததால். நான் கொடுத்த குரல், குறிப்புகள் செய்வதுடன் சிங்க் ஆகலை. அடுத்த முறை சப்டைட்டில் எடிட்டரில் போட்டு செய்ய வேண்டும். இதே காணொலி தமிழிலும் இருக்கு. அது எழுத்தில் குறிப்புகளுடன் வரும் Reserved!

------கீதா