ஸ்ரீ வெங்கடேஸ்வரா சுவாமி கோயில்/தக்ஷின திருப்பதி - பகுதி - 1

 

ஒரு புத்தம் புது சூட்டோடு சுடா பதிவு! அதனால எல்லாரும் கை பிடிச்சிட்டு நில்லுங்க. ஆ! கீதாவான்னு வியந்து பார்க்கறப்ப தள்ளாடாம இருக்கணுமே!!!

நம்ம அனுபிரேமுக்குத்தான் நன்றி சொல்லணும். 2018ன்னு நினைக்கிறேன். அவங்க தளத்துல இந்தக் கோயில் பத்தி படங்களோடு போட்டிருந்தாங்க. சுற்றிலும் இயற்கை, குன்றுக்குக் கீழே ஆறு ஓடும் படம் எல்லாம் போட்டிருந்தாங்களா, அவ்வளவுதான் எனக்கு அங்கு போகும் ஆசை வந்துவிட்டது. வீட்டில் சொல்லி வைத்திருந்தேன். ஆனா அப்பதான் இங்கு என்ட்ரி. செட்டிலாகி முடிக்கறதுக்குள்ள அடுத்தாப்ல கொரோனா. அப்புறம் ஏதேதோ காரணங்கள் போக முடியலை.

கடந்த சனிக்கிழமை இரவு. மறு நாள் ஞாயிறு அன்று சுதந்திர தின- மலர் கண்காட்சிக்கு லால்பாக் போலாமா? தக்ஷின திருப்பதிக்குப் போலாமா? ஒத்தையா ரெட்டையா போட்டு கடைசில அடுத்த வாரம் லால்பாக் போயிக்கலாம், இந்த ஞாயிறு தக்ஷின திருப்பதின்னு முடிவாச்சு. 

ஞாயிறு அன்று காலை வீட்டில் சாப்பாட்டை முடித்துக் கொண்டு அப்பாவுக்கும் மதியம் வரை எல்லாம் தயார் செய்து வைத்துவிட்டு எங்களுக்குக் கையில் புளியோதரை, சேம்பு ரோஸ்ட், தயிர்சாதம், தண்ணீர் பாட்டில்கள் சகிதம் 7.50 மணிக்குப் புறப்பட்டு ஓசூர் சாலை வரை நடைப்பயிற்சியாக நடந்து அங்கு ஓசூர் செல்லும் பேருந்துகள் நிற்கும் நிறுத்தத்தில் கொஞ்சம் காத்திருந்து பேருந்தில் ஏறி - பயணச் சீட்டு நபர் ஒருவருக்கு ரூ 60. Push Back இருக்கை உள்ள பேருந்துகளில் ரூ 70 - ஓசூர் சென்ற போது மணி 9.30.

ஓசூர் வரை மட்டும் செல்லும் பேருந்து என்றால் பேருந்து நிலையத்திற்குள் செல்லும். கிருஷ்ணகிரி, தருமபுரி, சேலம், சென்னை வரை செல்லும் பேருந்துகள் என்றால் சில பேருந்துகள் பேருந்து நிலையத்திற்குள் செல்லாமல் எதிர்புறத்தில் 'மீனாட்சிபவன்' உணவகம் முன்னில் நிறுத்துவார்கள்.

கோயில் அருகிலும், நெடுஞ்சாலை நிறுத்தத்திலும் கழிவறைகள் எதுவும் இருக்காது என்பது ஏற்கனவே அறிந்த விஷயம் என்பதால் மீனாட்சிபவனில் காஃபி குடித்துவிட்டு, அப்படியான சமாச்சாரங்களையும் முடித்துக் கொண்டு எதிரில் இருக்கும் பேருந்து நிலையத்திற்குச் சென்றோம். மணி 10 ஆகியிருந்தது. பேருந்து வருவதற்குள் ஒரு சில தகவல்கள்.

ஓசூர் - கிருஷ்ணகிரி/சென்னை செல்லும் நெடுஞ்சாலையில் ஓசூரிலிருந்து 10 கிமீ தூரத்தில் காமன்தொட்டிக்கு அருகில் கோபசந்திரம் எனும் கிராமத்தில் ஒரு சிறிய குன்றின் உச்சியில் உள்ளது இந்த தக்ஷின திருப்பதி ஸ்ரீ வெங்கடேஸ்வரா சுவாமி கோயில்.

நம் தோழி பணியாற்றிய பொறியியல் கல்லூரிக்கு (நம்மவர் உரையாற்றிய கல்லூரிதான்) இந்த வழித்தடத்தில்தான் செல்ல வேண்டும் என்பதால் ஏற்கனவே சில முறை அந்தக் கல்லூரிக்குச் சென்ற அனுபவம் உண்டு என்பதால் அந்த வழியில் பல கிராமங்களுக்கும் செல்லும் பேருந்துகள் எல்லாம் தக்ஷின திருப்பதி நிறுத்தத்தில் நிற்கும் என்பதும் தெரியும். எதிர்புறத்தில் கோயிலுக்குச் செல்லும் பாதையில் வளைவும் பார்த்ததுண்டு. 

கூகுள் பார்த்து நெடுஞ்சாலையிலிருந்து கோயிலின் தூரம் 1 கிமீ என்றும், பேருந்தில் சென்றால் இறங்கி நடந்துதான் செல்ல வேண்டும் என்பதும் பார்த்து வைத்திருந்தேன். 

15 நிமிடங்கள் ஆகியும் நமக்கான பேருந்து வரவில்லை. நம்மவர், போறப்ப மட்டும் ஒரு ஆட்டோ பிடித்து போய்விடலாம் என்று ஆட்டோகாரர் ஒருவரிடம் கேட்டால் ரூ 400 என்றதும் கொஞ்சம் தயக்கம். அதன் பின் ரூ 380 என்றார். யோசித்த போது பேருந்து வந்திட அதிலேயே ஏறி அரை மணி நேரப் பயணத்தில் தக்ஷின திருப்பதி நிறுத்தத்தில் இறங்கிக்கொண்டோம். இனி படங்களின் வழி சுற்றுவோமா?

முதல் படம் பேருந்து நிற்கும் இடம், எதிரில் கோயிலுக்குச் செல்லும் பாதை வளைவு தெரிகிறதா?

நெடுஞ்சாலையைக் கடந்து  கோயிலுக்கான பாதையில் ஒரு கிமீ தூரம் நடந்தால் கோயிலை அடைந்துவிடலாம். இந்த தூரம் நடக்க முடியாதவர்கள் ஓசூரிலிருந்தே வண்டி அமர்த்திக் கொண்டு செல்வது நல்லது. வண்டி வைத்துக் கொண்டால் கோயிலில் இருந்து கீழே ஆற்றின் பக்கமும் செல்ல முடியும் என்பதால். நெடுஞ்சாலையில் இருந்து கோயிலுக்குச் செல்ல எந்த வண்டியும் கிடைக்காது. கோயிலில் இருந்து நெடுஞ்சாலைக்கு வரவும் அங்கு வண்டி எதுவும் கிடைக்காது. இது தற்போதைய நிலவரம். கோயில் புகழ் பெற்று வருவதால் இனி வரும் காலங்களில் விஞ்ச் கூட வைச்சிருவாங்களா இருக்கலாம்.

நாங்கள் நடந்து சென்றுவிடலாம் என்று சாலையைக் கடந்த சமயத்தில் ஏதேச்சையாக ஒரு ஆட்டோக்காரர் வந்து கோயிலுக்குச் செல்ல வேண்டுமா என்று கேட்டிட, போகும் போது மட்டும் வைத்துக் கொள்ளலாம் என்று ஏறிக் கொண்டோம். ரூ 40.   வலப்பக்கம் உள்ள இடம் கோயில் வளாகம். இதற்கும் முன்னே நுழைவுக் கம்பிகள் இருக்கும், வண்டிகள் நிறுத்தவும் நிறைய இடம் இருக்கிறது. அதெல்லாம் கீழே காணொளியில் பார்க்கலாம்.

கோயில் வளாகத்தின் நுழைவுப் பகுதியின் இடப்புறத்தில் இப்படிக் காட்சிகள். கோயில் அமைந்திருக்கும் இடம் மிக அழகு. போகும் போது குன்றிலா என்று தோன்றும். (நெடுஞ்சாலையில் கோயில் நிறுத்தம் வரும் முன்னரே கொஞ்சம் தூரத்தில் வலப்பக்கம் இக்குன்றும் கோயிலும் தெரியும்)  சுற்றிலும் பள்ளத்தாக்கு. இடம் அழகோ அழகு. அமைதியான இடத்தில் இயற்கையின் ஒலி மட்டுமே. காற்றும் ஆறும், மலைகளும் வயல்களும். சுற்றிலும் அதிகம் வீடுகள் கிடையாது. உட்புறம் தான் வீடுகள்.

இப்படி இயற்கைக் காட்சிகளைப் பார்த்துக் கொண்டே ஏறினால் மனதிற்குக் குதூகலம்....படிகள் அதிகம் இல்லை. ஏறுவதும் சிரமம் கிடையாது. Flat ஆகத்தான் படிகள்

மிகச் சிறிய கோயில். ஒரு வீட்டின் ஹால் அளவே. அதில் திருப்பதி பெருமாள் எப்படி இருப்பாரோ அப்படியே இங்கும். இப்படி ஏறி உள்ளே செல்லலாம். அல்லது ஏறிவிட்டு இடப்பக்கம் அப்படியே நடந்து சென்று எதிரில் வாயில் தெரிகிறது இல்லையா? அப்படியும் நுழையலாம். காணொளியில் தெரியும். உள்ளே புகைப்படம் எடுக்க அனுமதி இல்லை. பெருமாளின் நேரே கருடாழ்வார் மற்றும் சன்னதியின் வெளியில் இடப்புறம் உற்சவரும் தாயாரும். அருகில் அர்ச்சனைச் சீட்டு வழங்கும் நபர். மற்றும் அர்ச்சகர் மட்டுமே உள்ளில். 

படத்தில் இடப்பக்கம் உயரமாக ஒன்று தெரிகிறது இல்லையா அதுதான் கொடிமரம் (கொடிமரம் என்று சொல்லியிருந்தேன்.எனக்கு அப்படித்தான் தோன்றியது பீடம் இருந்ததால் அதில் சாதம் இருந்தது. கோமதிக்கா அது விளக்குத் தூண். கொடிமரம் இல்லை என்று கருத்தில் சொல்ல மாற்றினேன். நெல்லை விளக்குத் தூண் இல்லை என்றிட மீண்டும் கொடிமரம்னு மாற்றிவிட்டேன், அக்காவும் மாத்திடச் சொன்னாங்க. மிக்க நன்றி கோமதிக்கா. மிக்க நன்றி நெல்லை) அதன் முழு படம் கீழே இடப்பக்கம்.

கொடிமரம். அடுத்த படம் தேங்காய் உடைக்கும் இடம் தனியாகத் தொட்டி போன்று. கொடிமரத்தின் வலப்பக்கம் எதிரே, அதாவது படத்தில்,  இருக்கிறது.  

முதல் படத்தில் வாயில் வழி ஏறும் போது எதிர்ப்புறம் வாயில் தெரியுமே அதுதான் இப்பக்கம். வலப்பக்கம் கொடிமரம் இந்தப் படத்தில் தெரியவில்லை. மேலே கொடிமரம் படம் உள்ளதே. இந்த வாயிலின் எதிர்ப்புறம் ஒரு பெரிய ஹால் போன்ற அமைப்பு, கூரையுடன் சுற்றிலும் திறந்த வெளி. அங்கு மடப்பள்ளி. கீழே உள்ள படத்தில் பின்பக்கம் தெரியும்.

கோயிலைச் சுற்றி கம்பிகள் இருக்கு இல்லையா? அந்த மேடையிலும்  அப்படியே பிரதட்சிணம் செய்யலாம். அல்லது கீழே வளாகத்திலும் சுற்றி வரலாம். இப்படம் கேமராவில் எடுத்தது. இதே படம் கீழே இடப்பக்கம் உள்ளது மொபைலில் எடுத்தது. இப்படத்தில் பின் பக்கம் தெரிகிறது இல்லையா அதுதான் அந்த ஹால் மேலே கூரை மட்டுமே. பக்கவாட்டுகளில் திறந்த வெளி. (காணொளியில் தெரியும்.) அந்த ஹாலில் தான் மடப்பள்ளி. அங்கிருக்கும் ஜன்னல் வழி பிரசாதம் கொடுக்கிறார்கள். பின்பக்கம் தெரிகிறது பாருங்க. அங்கு கை கழுவ பைப்புகள் இருக்கின்றன. படத்தில் வலப்பக்கம் தெரிகிறது. கோயில் வளாகம் மிகவும் சுத்தமாக இருக்கிறது. 

இடப்பக்கம் உள்ள படம் மேலே உள்ள அதே படம்  மொபைலில் எடுத்தது. வலப்பக்கப் படம் - இதோ சுற்றி நுழைவு இடத்திற்கு வந்தாச்சு. இவ்வளவுதான் மொத்தமே கோயில். ஒரு வீடு அளவிற்குத்தான்.

கீழே உள்ள படங்கள் கோயில் வளாகத்தில் இருந்து சுற்றிலும் தெரியும் காட்சிகளின் படங்கள்

தென்பெண்ணை/பெண்ணை ஆறு. பாலம் தெரிகிறது இல்லையா அதன் வழி உட்புறம் கிராமங்களுக்குச் செல்லும் வழி மற்றும் தூரத்தில் தெரியும் மண் பாதை அடுத்துள்ள கிராமங்களுக்குச் செல்லும் பாதை, கார்கள் வண்டிகள் செல்கின்றன.

தென்பெண்ணை ஆறு/பெண்ணை ஆறு கிருஷ்ணகிரியை நோக்கி... 

https://youtu.be/_fYTXLWYFc0

காணொளி 3.41 நிமிடங்கள். முடிந்தால் பாருங்கள். 

கோயில் வளாகத்திலிருந்து இறங்கி வெளியில் செல்லும் போது வளாகத்தினுள்ளேயே இடப்பக்கம் ஒரு இடத்தில் சில படிகள் இறங்கினால் கழிவறைகள் இருக்கின்றன. ஆனால் பரமாரிப்பத்தில்லையோ என்று தெரிகிறது. காணொளியில் கடைசியில் பார்க்கலாம். குன்றிலிருந்து எடுத்த இன்னும் சில காட்சிகள் மற்றும் கீழே ஓடும் ஆற்றிற்கு எப்படிச் சென்றோம் என்பது  பற்றி அடுத்த இரண்டாவது பதிவில் படங்களுடனும் காணொளியுடனும் வரும். 

------கீதா