சில்லு சில்லாய் - 9 - ஊரைத் தெரிஞ்சுக்கிட்டேன்

 

இரு நாட்களாக ஒரு பணி செய்து கொண்டிருக்கிறேன். தமிழ்நாட்டு கிராமங்கள், பஞ்சாயத்துகள், ஊராட்சிகள், துணை மாவட்டங்கள், மாவட்டங்கள் என்று பல்வேறு பிரிவுகளில் ஆங்கிலத்தில் பதியப்பட்ட Excell கோப்பு. ஊரின் பெயர்களைத் தமிழில் பதிய வேண்டும். 

ப்பூ! இவ்வளவுதானா? இது என்ன பெரிய கஷ்டம் என்று நீங்கள் நினைக்கலாம். அடுத்து வாசியுங்கள் புரியும். 

ஊர்களின் பெயர்களை ஆவணப்படுத்துவது எவ்வளவு கடினம் என்பது தெரியவருகிறது. கூகுள், விக்கியில் நிறைய ஆவணப்படுத்தப்பட்டுள்ளன என்பதை சொல்லியே ஆக வேண்டும். என்றாலுமே பல சிறிய கிராமங்களைச் சரியாகப் பதிவது கடினமாக இருக்கும் போது இணையம் இல்லாத போது எப்படிச் செய்திருப்பார்கள்? என்ற யோசனையும் கூடவே வருகிறது. Herculean Task! எனக்கு

அதுவும் மக்கள் தொகை பெருகப் பெருக, ஊரக வளர்ச்சிகளால் ஏற்படும் மாற்றங்களினால் ஊர் பெயர்களில் சில மாற்றங்கள், மாவட்டங்கள் பிரிக்கப்படும்போது ஏற்படும் குழப்பங்கள், பல கிராமங்கள் விரிவடைவதால் ஏற்படும் சிக்கல்கள். ஏற்படும் மாற்றங்களை ஊரின் பெயர்களை ஆவணப்படுத்துதலில் உள்ள சிரமங்கள். 

சில ஊர்கள் Initial !!!!!! உடன் வரும்!!!!! உதாரணத்திற்கு ஆங்கிலத்தில் Ayanporuvai (கோப்பில் Ayamporuvai!!) இதை தமிழில் அயன்பொருவாய் என்று எழுத வேண்டும். அல்லது  அ. பொருவாய் என்று கூகுள் சொல்லும். A. Vellalapatti இதை தமிழில் ஏ வெள்ளாளப்பட்டி என்று விக்கி சொல்வதை எழுதியாச்சு. அடுத்து கோப்பில் சற்று மேலே A. Vallalapatti என்று இருக்கிறது. இதை கூகுளில் ஏ வள்ளாளப்பட்டி என்று தட்டிப்பார்த்தால் ஏ வெள்ளாளப்பட்டி என்றுதான் வருகிறது!!  ஆங்கிலத்தில் A, B  என்று ஊரின் பெயர்களின் முன் இருப்பதை அப்படியே ஏ, பி என்று எழுதச் சொல்வார் நமக்கு வேலை தருபவர். ஆனால் அ, ஆ என்று சில ஊர்களின் பெயர்களின் முன் சில இடங்களில் இருப்பதை கூகுள் சொல்லும்! அதே போன்று வடக்கு, தெற்கு என்று.  

சில ஊர்கள் Part 1 என்று இருப்பதை பார்ட் 1 என்று எழுத வேண்டும் என்பார் வேலை தருபவர். விக்கி மற்றும் செய்தித்தாள்களில் பகுதி 1 என்று இருக்கும். அவரிடம் விளக்கி அப்படித்தான் தமிழிலேயே இங்கு சொல்லப்படுகிறது என்று சொல்ல வேண்டும். 

சில ஊர்களின் பெயருடன் BIT என்று வரும். அதாவது இதுவும் பகுதி/துண்டு என்ற பொருள் என்றே நினைக்கிறேன். விக்கியிலும் அப்படித்தான் பதியப்பட்டுள்ளது. பிட் 1, பிட் 2 என்று ஊர்கள் இருக்கும். துண்டு போட்டே வாய்க்கா வரப்பு பிரச்சனை வந்துரும் போல!!! 

சில ஊர்களின் பெயரின் முன்னால் "இனாம்" என்று வரும். எ. கா. இனாம் குளத்தூர். இனாம் என்பதற்கு நமக்குப் பொருள் தெரியும் என்றாலும் ஊர் பெயரின் முன்னால் வருவதன் பொருள் என்ன? சரியான பொருள் என்ன என்று அறிய ஆர்வம்! 

அது போலவே கஸ்பா என்று ஊரின் முன்னில் வரும். உதாரணம் கஸ்பா அய்யம்பாளையம். கஸ்பா என்ற சொல் அரபு மொழியில் இருந்து வந்ததாம். Chief station or head-quarters of a district or division. கொஞ்சம் பெரிய ஊர், முதன்மையான என்றும் சொல்லலாம் போல. 

கூடவே எல்லையில் இருக்கும் ஊர்களின் பிரச்சனைகள். எந்தப் பக்கம் ஊராட்சியில் சேர்ப்பது? பாண்டிச்சேரி/தமிழ்நாட்டு எல்லையில் பல ஊர்களின் திண்ணைகளில் ஒரு திண்ணை தமிழ்நாட்டிலும் மற்றொரு திண்ணை பாண்டிச்சேரியிலுமாக இருக்கும். இதை நான் நேரில் கண்டதுண்டு!!!!! இரு ரேஷன்கார்டுகள் வைத்திருப்பார்கள்! 

சிவகங்கை மாவட்டத்தில் முடிகண்டம் ஊராட்சியில் முடிகண்டன் எனும் கிராமம். இது எனக்கு வந்த கோப்பில். கூகுளில் கிராமத்தைப் பற்றிய தகவல்களில் சரிபார்த்த போது ஆங்கிலத்தில் வந்தது. அதில் கோப்பில் உள்ளது போலவே சொல்லியிருந்தது. முடிகண்டம் ஊராட்சி – முடிகண்டன் கிராமம் என்று. ஆனால்….. 

விக்கியில், முடிகண்டம் ஊராட்சி பட்டியலில் முடிகண்டம் கிராமம் என்றே உள்ளது. தமிழில் முடிகண்டன் என்று கூகுளில் தேடினால் முடிகொண்டான் என்றே வரும். இது திருவாரூர் மாவட்டத்தில் உள்ள ஊர். அது போல கீழ்வேளூர், கீழ்வேலூர் என்று சிறிய வித்தியாசத்தில் ஊராட்சி மற்றும் தொகுதி!! ஆங்கிலத்தில் ஒரே Spelling!

பாருங்க ஒரு எழுத்து மாற்றிப் போட்டாலும் குழப்பம். பின் கோடு வைத்துக் கண்டுபிடித்துவிடலாம்…ஆனால் பின் கோடு எழுதியிருந்தாலுமே….. 

வேறு சில உதாரணங்கள்– Vengadampatti–வேங்கடம்பட்டி. வெங்கடாம்பட்டி ஊராட்சி, வெங்கட்டம்பட்டி, வெங்கடம்பட்டி என்று இருக்கும். தலைப்பில் வெங்கடம்பட்டி பஞ்சாயத்து தலைவர் என்று இருக்கும். செய்திக்குள் வெங்காடம்பட்டி ஊராட்சி என்று இருக்கும். ஆங்கிலத்தில் இரண்டிற்கும் ஒரே Spelling. இதில் சில கிராமங்களின் பெயர்கள் ஒரே போன்று ஒரே இடத்தில் பின் கோடுகள் மாறுபடும். விரிவாக்கத்தினால். 

கிராமத்தின் கீழ் MUTHANDIPURAM -  பஞ்சாயத்தின் கீழ் Muthandiyapuram. ஆனால், ஏற்கனவே பதிவு செய்தவர் முதன்டிபுரம் என்று பதிவு செய்திருப்பார். விக்கி முதண்டியாபுரம் ஊராட்சி என்றுதான் சொல்கிறது என்றாலும் அதைப் பற்றிய விரிவான விளக்கங்களில் முத்தாண்டியாபுரம் என்றும், செய்திகளில் எல்லாம் முத்தாண்டியாபுரம் என்றே வருகிறது. இதில் வட்டம், ஒன்றியம் என்று பல பிரிவுகள். ஒவ்வொன்றிலும் ஒவ்வொரு Spelling! வித்தியாசங்களுடன் பெயர்!!! 

கூகுள் வரைபடத்தில் இருக்கும் பெயருக்கும் விக்கி சொல்லும் பெயருக்கும், செய்தித்தாள்களில் வரும் பெயருக்கும் வித்தியாசங்கள் இருக்கும். இத்தனைக்கும் ஒரே ஊர் பெயர்தான். 

எனக்கு வந்த கோப்பில் ஆங்கிலத்தில் இருந்ததை, ஆங்கிலத்திலும், தமிழிலும் என்று எப்படி மாற்றி மாற்றிப் போட்டுப் பார்த்தாலும் சில கிராமங்களின் பெயர்கள் விக்கியில் ஏற்கனவே பதியப்பட்டிருக்கும் ஊராட்சி ஒன்றியங்கள், ஊராட்சிகள் பட்டியலில் இருப்பதில்லை. தமிழ் செய்திகளில் ஒரு சின்ன செய்தியிலும் கூட இருக்கவில்லை. கோப்பில் கொடுக்கப்பட்டிருக்கும் ஆங்கிலப் பெயரை கூகுளில் போட்டுப் பார்த்தால் ஊர், ஆங்கிலச் செய்திகளில் வரும். அதை வைத்து உச்சரிப்பின் அடிப்படையில் ஊகத்தின் அடிப்படையில் பதிய வேண்டியதாக இருக்கிறது. 

சிலவற்றை விக்கியில் கொடுக்கப்பட்டிருக்கும் ஊராட்சி ஒன்றியங்களின் (இந்த ஊராட்சி, ஊராட்சி ஒன்றியங்கள் குழப்பும். ஒரு ஊர் சிற்றூர்/கிராமம் பட்டியலில் இருக்கும். அதே ஊர் அடுத்து ஊராட்சி என்று வரும், ஊராட்சி ஒன்றியம் என்றும் வரும். அதன் கீழ் சில கிராமங்கள் இப்படி….) கிராமங்கள் பட்டியல் இருக்கும் அதனுள் சென்று சரி பார்த்து பதிந்துவிடலாம். கோப்பில் இருப்பவை சில அதில் இருக்காது. வேறு ஒரு ஊராட்சியில் இருக்கும். 

சிவகங்கை, மதுரை இரு மாவட்டங்களிலும் மாத்தூர் எனும் ஒரே பெயரில் ஊராட்சிகள். அதே போன்று விளாங்குடி. இதில் ஸ்பெல்லிங்க் – விளாங்குடி, விலாங்குடி, விளங்குடி, விலங்குடி!!! 

விக்கியில், கூகுளில் பார்த்த பெயரை வைத்து நீங்க கூகுள் வழிகாட்டியில் ஊர் பெயரைப் போட்டு போனீங்கன்னு வைங்க, உங்களைக் குழப்பிவிடும்! 

நமக்கு வேலை தருபவர் வட இந்தியர். அவருக்குத் தமிழ்நாட்டுப் பெயர்கள் தெரிந்திருக்க வாய்ப்பில்லை. தமிழ்நாடு என்றில்லை எந்த மாநிலத்தின் எல்லா ஊர் பெயர்களும் எல்லாருக்கும் தெரிய வாய்ப்பே இல்லை என்பதுதானே சரி! கோப்பில் ஆங்கிலப் பெயர்கள் பலவும் தவறாகப் பதியப்பட்டிருக்கும். எனவே, கூடியவரை கூகுளில் தேடி எடுக்கப் பிரயத்தனப்பட வேண்டும். 

கோப்பில் ஊத்துப்பட்டியை UTHUPPATTI - என்று ஆங்கிலத்தில் எழுதியிருப்பாங்க. தமிழில் உதுப்பட்டி, உடுப்பட்டி என்று பதிவு செய்திருப்பாங்க. 

ஆதித்தனேந்தல் ஊரின் பெயர். இதை ஆங்கிலத்தில் ATHITHNANENDAL – என்று தட்டச்சு செய்திருப்பார்கள்!! 

கோப்பில் இருப்பது VALAVANDA PURAM – விருதுநகர். கூகுள் சொல்வது ஆங்கிலத்தில் Valavandalpuram. தமிழில் ஒரே ஒரு செய்தியில் வாழவந்தால் புரம் என்று இருந்தது. அதை வைத்து கூகுளில் தேடினால் வாழவந்தாள் புரம் என்று தேடுகிறீர்களா என்கிறது!!!!!! அதை அழுத்தினா ஒரு செய்தியில் வாழவந்தாள் புரம் என்று இருக்கிறது. ல்? ள்? வினோதமான பெயர் இல்லையா?!!! 

ஊராட்சி ஒன்றியம் - நரசநாயகபுரம். அதன் கீழ் வரும் கிராமம் நரசநாயகிபுரம்!! (தஞ்சாவூர்) 

அலக்குடி என்று கூகுள்வரைபடத்தில். ஆலக்குடி, அளக்குடி – என்று கூகுள் பக்கங்களில், விக்கியில். வலையம்பட்டு, வளையம்பட்டு, வலையாம்பட்டு, வளையாம்பட்டு…….இப்படி 

Attupattukottaipunji – கோப்பில் இருக்கும் பெயர் - அட்டுபட்டுகோட்டைபுஞ்சி என்று கூகுள்மேப் காட்டுது. ஆனா கூகுள் பக்கங்களில் வேறு எங்கும் இல்லை. மாற்றி மாற்றிப் போட்டுத் தேடித் தேடி……..அப்புறம் பார்த்தா ஆட்டுபட்டிகோட்டைபுஞ்சை!!! என்று வருகிறது ஒரு செய்தியில்!!! ஓ கடவுளே!! ரட்சிப்பாய்! 

Puvani / Poovani – இரண்டும் ஒரே ஊர். புவனி என்று கூகுள் வரைபடத்தில். ஆனால் விக்கியில் பூவாணி!!! 

இப்படித்தான் வரலாறும் மறுவி மறுவி பல இடைசெருகல்களுடன் வருகின்றதோ! ஆங்கிலேயர்கள் தங்கள் வசதிக்காக வைத்த பெயர்களுடன், செவி வழி/Passing on the secret என்று விளையாடுவோமே,  அப்படியும், அந்தந்தப் பகுதிகளில் உள்ள வழக்கு மொழி என்றும் பெயர்கள் விதம் விதமாக…... (எங்க ஊர் நாரோயில், திருப்பியாரம் என்று சொல்லப்படுவது போல்) 

நான் வியந்த வினோதமான பெயர்கள் பல. அதில் சில உங்களுக்கும்: ஜோஸ்யர் ஆலங்குளம், கோமாளி ஒத்த வீடு, Highways town - ஹைவேஸ் பேரூராட்சி, பொய்க்குணம் ஊராட்சி – கள்ளக்குறிச்சி அருகில்!!!! கீழராஜகுலராமன், நல்லான்பிள்ளைபெற்றாள், ஈகை வாழவந்தாள்/ல்புரம், நெருப்பெரிச்சல், ராசாத்திவளவு, சர்க்கார், திருப்பூர் சர்க்கார், மீளவிட்டான், படர்ந்தபுளி (அப்ப படரும்புளி, படராபுளி??!!!ன்னு வருமோ? ஊர் விரிவடையும் போது?), எழுவரைமுக்கி – ஹையோ அப்புறம் என்னாச்சோ?!!! 

எனக்கு வந்த கோப்பில், தமிழ்நாட்டிலுள்ள எல்லா கிராமங்களும், பஞ்சாயத்துகளும், ஊர்களும், ஊராட்சிகளும், ஊராட்சி ஒன்றியங்களும் இல்லை. முழுமையான கோப்பு இல்லை. ஒரு வேளை வேறு கோப்பில் இருக்குமோ என்னவோ? வேறு யாரேனும் செய்வார்களோ? இப்படித் துண்டு துண்டா செய்தா எப்படி ஒருங்கிணைத்து ஒழுங்காகப் பதியப்படும்? தெரியவில்லை. சரி….போட்டும் நமக்கு வந்ததைச் சரியாகச் செய்து வைப்போம்!! அம்புட்டுத்தான். 

தமிழ்நாடு அரசின் கீழ் இதற்கென்று இருக்கும் துறையில் இதை முறையாக ஆவணப்படுத்தலாமே. ஆவணப்படுத்தி அதை மத்திய அரசிடம் சமர்ப்பிக்கலாமே. Outsourcing ஏன் வருகிறது? அதுவும் விக்கியில் நன்றாகப் பதியப்பட்டிருக்கும் போது? ஆனால் நாம் தேடும் போது தமிழில் பல வருவதில்லை. அதுவும் தமிழ்நாட்டிற்குத் தொடர்பில்லாதவர் மூலமாக வருவதால்? அங்கிருக்கும் தமிழ்நாட்டைச் சேர்ந்தவர்கள் இதை சரிபார்ப்பார்கள் என்கிறார்கள். மிகச் சிறிய கிராமங்கள், கூகுளில் இல்லாதவற்றை எப்படிச் சரிபார்ப்பார்கள்? அது அந்தந்தப் பகுதிக்குப் பொறுப்பான அதிகாரிகளால் மட்டும்தானே செய்ய முடியும்? எனக்குப் புரியவில்லை 

சரி, ஏன் இந்த ஆவணப்படுத்தல் முக்கியம்? அரசிற்கு வாக்காளர், தொகுதிகள், மக்கள் தொகை புள்ளியியல், ஊரகவளர்ச்சிப் பணித்திட்டங்கள் என்று அரசு கோப்புகளில் பதிவதற்கு எப்படி மிக மிக முக்கியமோ அது போல தனிமனிதர்கள்/குடும்பங்களுக்கும் மிக மிக முக்கியம். 

80-85 வருடங்களுக்கு முன்னர் மிகச் சிறிய கிராமத்தில் வாங்கப்பட்ட வீடு. வழி வழியாய் தலைமுறைகள் அதைப் பராமரித்து, ஆண்டு தற்போது விற்க நினைத்த போது உறவினர் ஒருவருக்கு எழுந்த சிக்கல்கள். நில ஆவண, சர்வே நம்பரில் குழப்பம். அப்போதைய சர்வேநம்பருக்கான ஆவணங்கள் பொருந்தவில்லை என்பதோடு சொற்கள் வித்தியாசம். ஊர் விரிவடைந்து ஏதேதோ விரிவாக்கங்களில், ஊரகவளர்ச்சியினால் மாற்றங்களினால், பெயர் மாற்றங்கள், எண்கள் மாற்றங்கள் என்று பல விஷயங்களை சட்டரீதியாக உறுதிப்படுத்த அவசியமாகிப் போனது. (இதில் தனிப்பட்ட பிரச்சனைகள் வேறு. முதல் மனைவி அவரது குழந்தைகள், முதல் மனைவி இறந்த பிறகு அடுத்த மனைவி, குழந்தைகள் என்று….) எனவே சொத்து இருந்தால் அதை முறையாகப் பதிவு செய்து, அப்பப்ப பேரு ஏதாச்சும் மாறுதான்னு பார்த்து சரியான ஆவணங்களை வைத்துக் கொண்டுவிடுவது நல்லது. 

வந்திருக்கும் கோப்பில் ஏற்கனவே யாரோ கொஞ்சம் நிரப்பியிருக்காங்க. அதில் பாளையங்கோட்டையை பலையங்கோட்டைன்னு போட்டு வைச்சிருக்காங்க!!! கடவுளே! பழையகோட்டைன்னு போடலை! பழையகொட்டைன்னு மாறாம இருந்தா சரி….!!! எண்டே நெல்லையப்பனே ரட்சிக்கு! 

இப்படி ஒவ்வொன்றும் தேடித் தேடி சரியாக இருக்கிறதா என்று பார்த்துப் பதிவதால் நேரம் எடுக்கிறது. கூடவே ஏற்கனவே உள்ளவற்றை சரிபார்க்க வேண்டும்! 

என் விருப்பம் : எங்கள் கிராமத்தின் பெயரும் கோப்பில் இருந்தது திருப்பதிசாரம் என்று. நான் திருவண்பரிசாரம் என்று மாற்றிவிட்டேன! தமிழ்நாட்டிலுள்ள ஒவ்வொரு கிராமத்தின் பெயரும் முறையாக அதாவது சைவத்திருமறை, பிரபந்தம், இன்னும் பல பழையவரலாறுகளில் நல்ல தமிழில் இருக்கும் பெயர்களை மாற்றாமல் அப்படியே பதிய வேண்டும் என்பது என் விருப்பம். திருவண்பரிசாரம் என்பது போல்.   

இதோடு வீட்டு வேலைகள்! எனவே வலைப்பக்கம் இடையிடையே வருகிறேன். ஸாரி நட்புகளே! 

(சிவகங்கை/மதுரை பகுதியில் ஆங்கிலத்தில் தாறுமாறாகப் பதியப்பட்டிருந்த ஒருசிலவற்றை, கூகுளில் தமிழில் சிக்காத ஊர் பெயர்களை நம்ம கில்லர்ஜியிடம் சரி பார்த்துக் கொண்டேன். நன்றி கில்லர்ஜி!)

------கீதா