பசுமை மாறா நினைவுகள் - 1

 அன்பு நட்புகள் அனைவருக்கும் இனிய தமிழ்ப் புத்தாண்டு-விஷு வாழ்த்துகள்!

********

1975 ல் வெளிவந்த “உலகம் சுற்றும் வாலிபன்” திரைப்படத்தின் பொன்விழா, ‘எம் ஜி ஆர்’ முகநூல் நண்பர்களால், 11, மே 2023 அன்று கொண்டாடப்படுகிறது.

1940, 1950, 1960 களில் தமிழகத்தில் பிறந்தவர்களில் பெரும்பான்மையானோர், பாக்கியராஜ், பயில்வான் ரங்கநாதன், மறைந்த மயில்சாமி, போன்ற எம் ஜி ஆர் ரசிகர்கள், பக்தர்கள். இனி ஒரு நடிகர் அவரைப் போல் மக்கள் திலகமாக மாறி நாடாள முடியுமா என்று சந்தேகம்.

அன்றைய காலமும் மனிதர்களும் அப்படிப்பட்டவர்கள். அரசர்கள் ஆண்ட காலம் போய் மக்களால் தேர்ந்தெடுக்கப்படும் அமைச்சர்கள் நாடாளும் காலம் வந்தது போல் மாற்றங்கள் சினிமாவிலும் ரசனையிலும் ரசிகர்களிலும் வந்திருக்கிறது. அதனால் இனி ஒரு சினிமா நடிகர் நாடாளுவது என்பது இயலாத ஒன்று. நடக்காத ஒன்று.

இருந்தாலும் பழைய காலங்கள் எப்போதும் நினைத்தாலே இனிக்கும் நாட்கள்தான். அவற்றை முழுதும் உணர்ந்தவர்களால் மட்டுமே அந்த நாட்களை மனத் திரையில் கண்டு பூரிப்படைய முடியும். அதைக் காணாத உணராதவர்களுக்குச் சொல்லிப் புரியவைக்க முடியாது. அதன் அவசியமும் இல்லை என்றே தோன்றுகிறது.

எம் ஜி ஆரின் ‘உலகம் சுற்றும் வாலிபன்’ திரைப்படத்துடன் தொடர்புடைய ஒரு நிகழ்வை இப்பொன்விழா நாளில் பகிர்வதில் மட்டற்ற மகிழ்ச்சி. அந்த நாட்களில் எம் ஜி ஆரும், எம் ஜி ஆரின் திரைப்படங்களும் மக்கள் மத்தியில் எவ்வளவு முக்கியத்துவம் பெற்றிருந்தது என்பதைப் புரிந்து கொள்ளலாம். கரும்பு தின்னக் கூலி தரும் எம் ஜி ஆர் முகநூல் நண்பர்களுக்கு நன்றி.

…………………………

போடி ZKM பள்ளியில் 7 வது படித்துக் கொண்டிருந்த காலம் (1973) சென்ட்ரலில் திரையிடப்பட்ட மக்கள் திலகத்தின் ‘உலகம் சுற்றும் வாலிபன்’ படத்தை நண்பர்களுடன் எப்படியோ பார்த்து பெருமிதப்பட்டு காட்சிகளை மனத்திரையில் எப்போதும் கண்டவனாய் பள்ளியிலிருந்து வகுப்புகள் முடிந்ததும் ராசிங்கபுரத்திற்கு டவுன் பேருந்தில் ஒரு மாலை பயணித்துக் கொண்டிருந்தேன்.

சில்லாமரத்துப்பட்டியில் வண்டி நின்றது. அங்கு எதிர்த்திசையில் போடிக்குப் போகும் டவுன் பேருந்து. ஆட்கள் ஏற சிரமப்பட்டுக் கொண்டிருக்க, அந்த வண்டியின் ஓட்டுநர் வண்டியை ஒதுக்கிக் காத்திருந்தார். தற்செயலாக அந்தப் பேருந்தில் அமர்ந்திருந்தவர்களைப் பார்த்த என் கண்ணில் என் அம்மாவும் பக்கத்து வீட்டு லட்சுமி அம்மாவும், பின் இருக்கையில் அப்பாவும் இருப்பது பட்டது. நான் உலகம் சுற்றும் வாலிபன் படத்தை முன்பே பார்த்துவிட்டதால், என்னைத் தவிர்த்து திரைப்படத்திற்குப் போய்க் கொண்டிருந்தார்கள்.

NOW OR NEVER! மீண்டும் எம் ஜி ஆரையும், "சிரித்து வாழ வேண்டும் பிறர் சிரிக்க வாழ்ந்திடாதே" பாட்டையும், வெளிநாட்டையும் பார்த்தே தீருவேன் என்ற ஆர்வமிகுதியில், “ஆள் இறங்கணும்” என்று அலறிக் கொண்டே எழுந்தேன். பழக்கமான நடத்துநர் ஆனதால் கையைப்பிடித்து வண்டி நின்ற பின் இறக்கி விட்டார். இறங்கி ஓடி இரண்டு வாசலையும் பார்த்தேன். ஒவ்வொரு வாசலிலும் 10, 15 பேர் தொற்றிக் கொண்டும், தொற்றிக் கொள்ள முடியாதவர்கள் உள்ளே நின்றவர்களிடம் “கொஞ்சம் நகந்து நில்லுங்க….எல்லாரும் எம் ஜி ஆரைப் பாக்கத்தானே….கொஞ்சம் அட்ஜஸ்ட் பண்ணுங்க” என்று கெஞ்சிக் கொண்டிருந்தார்கள்.

‘ம்.ஹூம்…என்னால் ஏறமுடியாது’. மறுபுறம் அழுது கொண்டே ஓடி, “அம்மா, அப்பா” என்று கத்த, பதறிய அம்மா “ஐயோ நீ எப்படி ஏறுவ? நீ ஏண்டா பஸ்ஸிலிருந்து இறங்கின? நேரா வீட்டுக்குப் போக வேண்டியதுதானே” என்றார்.

வண்டிக்குள் நின்றிருந்த ஒருவர், “எம் ஜி ஆர் படம் பாக்கணும்னா ஒரே வழி சைடு வழியே ஏறு” என்றார். புத்தகப் பையை அம்மாவிடம் கொடுத்து, தாவி சைடு கம்பியைப் பிடித்து தொற்றி ஏறினேன். ஒரு கை என்னைத் தூக்கி சைடு வழியாக உள்ளே என் தலை இடிக்காமல் தூக்கி அம்மாவின் மடியில் உட்கார வைத்தது. அப்படி இரண்டாவது முறையாக உலகம் சுற்றும் வாலிபன் திரைப்படத்தை சாகசம் செய்து பார்த்த நினைவு 62 வயதாகும் என் நினைவில் இப்போதும் பசுமையாக நிற்கிறது.

1960 களில் பிறந்த எனக்கு எம் ஜி ஆர், கொஞ்சம் இதயக்கனியேதான். கடமை கண்ணியம் கட்டுப்பாடு என்பதை அவரது சொல்லிலும் செயலிலும் காட்டி அன்றைய தலைமுறையினரை வழி நடத்தி, 

எதிரிகளிடமும் அன்பு காட்டி அவர்களைத் திருத்த வேண்டும் என்பதை தன் வாழ்வின் மூலம் நிரூபித்தவர் (எம் ஆர் ராதா, கலைஞர், கவிஞர் கண்ணதாசன்…). அதனால்தான் அவர் எல்லோருக்கும் வாத்தியாராக இருந்தார்.

இரண்டாயிரத்துக்குப் பின்னால் வந்த தலைமுறைக்கு அவரது சிறப்பைப் புரிய வைப்பது சிரமம். “உலகம் சுற்றும் வாலிபன்” சரித்திரம் படைத்து புதிய தமிழகம் உருவாகக் காரணமான திரைப்படம். அதன் சிறப்பை, எம் ஜி ஆரின் பெருமைகளை இது போல் பேச 40, 50, 60களில் பிறந்த நமக்கு மட்டும்தான் தகுதியும் உரிமையும் இருக்கிறது.

எனவே பேசிப் பகிர்ந்து மகிழ்வோம். இது அதற்கான நேரம்தான். NOW OR NEVER!

பின் குறிப்பு : என் அனுபவத்தைப் பகிரும் ஒரு வாய்ப்பை ஏற்படுத்தித் தந்த திரு வேலாயுதன் அவர்களுக்கும் புரட்சித் தலைவர் எம் ஜி ஆர் முகநூல் நண்பர்களுக்கும் நன்றி.

------துளசிதரன்