எனது மூன்றாவது விழியின் பார்வையில் - 19 - சாம்பல் நாரை - Grey Heron

எனது மூன்றாவது விழியின் பார்வையில் - வீட்டருகே இருக்கும் இரு ஏரிகளில் நடைப்பயிற்சி செய்யும் ஒவ்வொரு தினமும் பார்த்து ரசித்த பறவைகள் ஒவ்வொன்றைப் பற்றியும் படங்களுடன் ஒவ்வொரு பதிவில். 

ஹெரான் வகையில் பல உள்ளன. நான் பார்த்த மூன்று வகைகளில் - Purple Heron (செந்நாரை), Grey Heron (சாம்பல் நாரை), Pond Heron (குளத்துக் கொக்கு) - முன்பு செந்நாரை (Purple Heron) பற்றி நான் எடுத்த படங்களுடன் தகவலும் பகிர்ந்திருந்தேன்.  இப்போது அதே வகையைச் சேர்ந்த சாம்பல் நாரை - GREY HERON

ஏதோ என் மூன்றாவது விழிக்கு எட்டிய வரையில், எனக்குப் புகைப்படக் கலை தெரியாவிட்டாலும் புகைப்படங்கள் எடுக்கும் ஆர்வத்தில் நான் ரசித்து எடுத்தவற்றைப் பகிர்கிறேன். மகனுக்காக வாங்கியிருந்த, சலீம் அலி அவர்கள் எழுதிய "இந்தியப் பறவைகள் புத்தகம் மற்றும் இணையத்தில் வாசித்ததிலிருந்து தெரிந்து கொண்டதையும் இங்கு பகிர்கிறேன். நான் பார்த்ததில் அறிந்தவை கறுப்பு வண்ணத்தில் இருப்பவை. .....ஓவர் டு சாம்பல் நாரை

இப்படி அசையாமல் நின்று கொண்டே இருக்கும்...போரடிக்காதோ?

பாருங்க நான்தான் சாம்பல் நாரை. என் உறவுக்கார செந்நாரை தன்னைப் பத்தி ரொம்பவே சொல்லிருக்குமே. அதுக்குத் தன் குடும்பம் ரொம்ப அழகுன்னும், தன் நிறத்தைப் பத்தியும் பெருமை. நாங்களும் அழகுதான். எங்க நிறம் நல்லாதானே இருக்கு இல்லையா? 

எங்களுக்கும் நீர் நிலைகள் பக்கம்தான் வாழப் பிடிக்கும். நாங்க செந்நாரை போல எங்களை மறைச்சுக்கிட்டு வாழ மாட்டோம். எல்லாரும் எங்களைப் பார்க்கறா மாதிரிதான் இருப்போம். நாங்களும் உயரமா, ஒல்லியா, நீண்ட வளைந்த கழுத்தோடும் நீண்ட கால்களோடும் இருப்போம். பாக்கப் போனா நாங்க செந்நாரையை விடக் கொஞ்சம் பெரிய சைஸ். (ஆனால் என் கண்ணில் செந்நாரைகள் கொஞ்சம் பெரிதோ என்ற எண்ணம்)

எங்களை நதியன், நாராயணப் பட்சி, நரையான், கொய்யடி நாரை, கருநாரை, பெருங்கொக்கு, சாம்பல்கொக்கு ன்னும் சொல்றாங்க. 

நாங்க சாப்பிடுவது  மீன், தவளை, தேரை, பாம்புகள், பல்லிகள், சிறு பாலூட்டிகள், மற்றும் சிறு பறவைகள். அதுக்காக அசையாம ஆழமில்லாத தண்ணீரில் பல மணி நேரம் கூட நிற்போம். இரையை அலகில் பிடித்தவுடன் தலையினை ஆட்டி அவற்றை செயலிழக்கச் செய்தும் அப்படியேவும் முழுங்குவோம். சில சமயம் மெதுவே இரையை பின்தொடர்ந்து செல்லவும் செய்வோம். இதோ இப்படித்தான் மெதுவாக இரையின் பின் நடப்போம்..(அது கால்களை எடுத்து வைக்கும் அழகே அழகு. நாட்டியம் போன்று! தண்ணீரில் இரைக்காக நடந்து செல்லும் காணொளி. நேரமிருந்தால் பாருங்க)

https://youtu.be/nTZQZzZG0Us

எங்க இனம் அழியக் கூடாதில்லையா? இப்பதான் அதாவது ஃபெப்ருவரிலருந்து ஜூன் வரை எங்க இனப்பெருக்கக் காலம்.

நாங்க மரங்கள் மேல் குச்சி எல்லாம் பொறுக்கி அடுக்கி அல்லது காய்ந்த கோரைப் புற்கள் மேல், அல்லது மரக்கிளைகளில் கூட்டம் கூட்டமாகக் கூடு கட்டுவோம். சில சமயம் என் சொந்தக்காரங்க செந்நாரைகள் கட்டியிருக்கும் கூட்டையும் பயன்படுத்திக் கொள்வோம். இப்படிக் கூட்டம் கூட்டமாகக் கூடுகள் இருக்கும் இடம் ஹெரான்ரி காலனி. சில இடங்களில் நதி, குளம், மற்றும் கடற்கரைகளிலும் கூட்டினை கட்டுவோம்.

எங்களில் ஆண் பறவைகள் கூடு கட்டத் தேவையான குச்சிகள் பொருட்கள் எல்லாம் கொண்டு தரும், பெண் பறவைகள் அழகா அடுக்கிக் கூடு கட்டும்.

ஒரு வருஷம் கட்டின கூடு கலையாம இருந்தா அதே கூட்டுலதான் அடுத்த வருஷமும் அதைக் கூடக் கொஞ்சம் பெரிசா கட்டிக் கொண்டு குஞ்சு பொரிப்போம்.

எங்க இனப்பெருக்கக் காலம் சுவாரசியமாக இருக்கும். ஜோடிகளைத் தேர்ந்தெடுத்த பின் ஒரே ஒரு இனப்பெருக்கக் காலம் வரை ஒன்றாக இருப்போம், பெரும்பாலும் ஃபெப்ருவரி மாதம் தொடக்கம் முதல் மே, ஜூன் தொடக்கம் வரை. (நான் பார்த்த வரையில் மே மாதம் பகுதியிலேயே இவற்றைக் காண்பது அரிதாகிவிடும்) இணைதலை ஒரு சின்ன விழா போல நடத்துவோம். கூடு கட்டியதும், எந்தக் கூட்டை - சில சமயம் ஏற்கனவே கட்டின கூடுகள், மற்ற ஹெரான்கள் கட்டியிருக்கும் கூடுகள் இவற்றையும் பயன்படுத்துவோம் என்பதால் - ஆண் பறவை விரும்புகிறதோ அங்க இருந்து குரல் கொடுக்கும். பெண் பறவை வந்ததும், இறக்கையை விரித்து விரித்து அசைக்கும். (வரவேற்பாம்!)

அடுத்து ரெண்டும் எங்களின் சங்கேத பாஷையைப் பரிமாறிக் கொண்டு…..ஒரு வார்ம் அப் செய்யத் தொடங்குவோம். அதாவது கால்களை நீட்டி மடக்கி, கழுத்தை நேராக வைத்துக் கொண்டு சுருக்கி, முன்னே நீட்டி தலையை கால் பகுதி வரை கொண்டு சென்று தாடையை ஸ்னாப் செய்தல் இப்படி 20-40 முறை செய்வோம். (கிட்டத்தட்ட நடனம்னு சொல்லலாம். ஒரு சில பறவைகள் பெரும்பாலும் இனப்பெருக்க காலத்தில் இப்படி நடனம் செய்வது உண்டு)

நீட்டி மடக்கி முடித்ததும் இரண்டு பேரும் தாங்கள் ரெடி என்ற சங்கேத பாஷை பரிமாற்றம் செய்துக்குவோம். இரண்டும் ஒன்றை ஒன்று இறக்கையை வருடிக் கொண்டு அன்புப் பரிமாற்றம். அப்போது ஆண் பறவை பெண் பறவைக்கு ஒரு குச்சியை கொடுக்கும். (அன்புப் பரிசாம்!!!). பெண் பறவை அதை வாங்கிக் கூட்டில் செருகிக் கொள்ளும். இதைப் பார்த்ததும் ஆண் பறவைக்கு ஒரே குஷியாகி, இணைந்து, அடுத்து கொஞ்ச நாட்களில் பெண் பறவை முட்டை போட்டு….எங்களில் இருவருமே சேர்ந்துதான் முட்டையை 25-26 நாட்கள் அடைகாப்போம். குஞ்சுகளுக்கு இரண்டு பேருமே உணவு கொடுப்போம்.  எங்கள் இருவரில் ஒருவர், முதல் இருபது நாள் கூட்டிலேயே இருந்து கவனமாகப் பார்த்துக் கொள்வதுண்டு. குஞ்சுகள் 50 நாட்களில் பறக்கத் தொடங்கிவிடும்.

நாங்கள் பறக்கும் போது இறக்கைகளை ரொம்ப வேகமாக அடித்துக் கொள்ளாமல் மெதுவாகப் பறப்போம். ஆங்கில எழுத்தான "S" வடிவில் கழுத்தை மடித்து வைத்துக்கொண்டு பறப்போம். பறக்கும் காணொளி இதோ...

             https://youtu.be/xyV9d_KWl78                      https://youtu.be/lvLBe29iX5Y

இது குளிர்காலத்தில் பனி போர்த்தியிருக்கும் காலை வேளையில் எடுத்த படம். படத்தில் புகை போன்று படர்ந்திருப்பது தெரியும்...

இங்கு கொடுத்திருக்கும் காணொளிகள் - யுட்யூபில் நான் போட்டிருப்பவைதான் - தவிர யுட்யூபில் உண்டு. அதில் ஒன்றில் இதோ இப்படி உட்கார்ந்திருப்பவற்றை எடுத்த காணொளியில் இதன் பின்னில் இரு சாம்பல் நாரைகள் உட்காரும் இடத்திற்காகச் சின்னதாகப் போட்டியில் சத்தம் எழுப்பும். காகங்கள் கரைவது போன்றே இருக்கும்

https://youtu.be/ixWvm9phzuo

https://youtu.be/lvLBe29iX5Y
இரு சாம்பல் நாரைகள் ஒரே செடியின் மீது உட்கார நினைக்க, ஒன்று துரத்த மற்றொன்று பறந்துவிடுகிறது 

இப்படி சிறிய செடிகள், மரங்கள் மேல் ஆங்காகே அமர்ந்திருப்பதையும் பார்க்கலாம்

இப்போது நீர் நிலைகள் குறைந்து, கட்டிடங்கள் பெருகிப் போனதால் நாங்கள் அதற்கும் எங்களைப் பழக்கிக் கொண்டுவிட்டோம். நகரங்களிலும் வாழத் தொடங்கிவருகிறோம், மீன்கள் கிடைக்கும் இடங்களில். 

நான் முன்பு இருந்த வீட்டருகில் இருக்கும் ஏரியில் இவற்றை நிறையக் காணலாம். தனியாகவே இருக்கும். அந்தப் பகுதியில் அந்த இரு ஏரிகளும் சாலைகளிலிருந்து உள்ளடங்கி இருப்பதால் பல வகை நீர்ப் பறவைகளைக் காணலாம். இந்த சீசனில் ஜெ ஜெ என்று களைகட்டி இருக்கும். 

இப்போது இருக்கும் பகுதியில் நான் பார்த்த மூன்று ஏரிகளிலும் சாம்பல் நாரை ஒன்று கூடக் கண்ணில் தென்படவில்லை. செந்நாரையும். ஒரே ஒரு ஏரியில் மட்டும் நாமக்கோழிகள், குளத்துக் கொக்குகள், ஆட்காட்டி பறவைகள், நீர்க்காகங்கள், வாலாட்டிக் குருவிகளைக் காண முடிந்தது. ஆனால் பொதுவாக இந்த சீசனில் களை கட்டி இருக்க வேண்டிய ஏரிகள் களை இழந்து இருக்கின்றன என்பதுதான் வேதனையான உண்மை! புலம்பிப் பிரயோசனம் இல்லை.

அடுத்து Pond Heron குளத்துக் கொக்கு பற்றி வரும்.

பதிவுகளை வாசிப்பவர்கள், கருத்திடுபவர்கள் அனைவருக்கும் மிக்க நன்றி.

----கீதா