கடம்போடுவாழ்வு - 4

வணக்கம்! வந்தனம்! சுஸ்வாகதம்! 

இன்னும் பசுமையான வளமான படங்கள் எல்லாம் அடுத்த பதிவில் என்று சென்ற பதிவில் சொல்லி முடித்திருந்தேன்.  சென்ற பதிவைப் பார்த்த, வாசித்த, கருத்திட்ட அனைவருக்கும் நன்றி. 

இதோ 4 வது பகுதி. கடம்போடுவாழ்வின் பசுமையான படங்கள்.  கூடவே ஒரு சிறு முன்ஜாமீன்!!! எடுத்து வைத்துக் கொள்கிறேன்!!!!!!! என் மூன்றாவது விழிக்காக!  

பாருங்கள் இந்த இரு படங்களிலும் கொக்குகள் இருப்பது தெளிவாகத் தெரியவில்லை.  இத்தனைக்கும் சாலையிலிருந்து கூப்பிடு தூரம்.  கொஞ்சம் கிட்டப்பார்வையாக்கி எடுத்ததுதான்....

என் மூன்றாவது விழிக்குக் கிட்டப் பார்வை ஓகே என்றாலும், சிறிய உருவங்கள் 10 அடி தூரத்தில் இருந்தாலும், கொஞ்சம் கிட்டப்பார்வையாக்கித்தான் (ஜூம் in) எடுக்க வேண்டும். சூரியனார் சரியா லைட் அடிக்கலைனா அதுவும் போச்சு!

எங்கு திரும்பினாலும், எந்தப் பக்கம் போனாலும் ....மொட்டை மலை ஒவ்வொரு கோணத்தில்

தூரத்துப் பார்வையில் பெரிய உருவங்கள் மட்டுமே வரும். அதைக் கொஞ்சம் கிட்டப்பார்வை ஆக்கினால், சூரியனார் நன்றாக லைட்  அடித்தால் மலைகள், மரங்கள் போன்ற பெரிய உருவங்கள் கிட்டப்பார்வையில்  வந்துவிடுகின்றன.

பாருங்க இங்கும் மொட்டை மலை!!!

இந்த இரு படங்களும் நான் ஒரே இடத்தில் நின்று கொண்டு எடுத்தவை, ஆனால் வேறு வேறு கோணம். காட்சிகள், லைட்டிங்க் மாறுபடுகிறது பாருங்க.  வாத்துகள் அதிக தூரத்திலில்லை. என்றாலும் கிட்டப்பார்வையாக்கி எடுத்தவை. இவ்வளவுதான் வந்தது.  அவ்வளவா தெரியலை.  

தூரத்துப் பார்வையில் உள்ள சிறிய உருவங்கள் வருவது ரொம்ப ரொம்பச் சிரமம். கிட்டப்பார்வையாக்கினாலும் கூடச் சில சமயம் சில தெளிவாக வராது. அதுவும் கையளவே உள்ள உருவங்கள், பறவைகள் எல்லாம். என் மூன்றாவது விழிக்கு அம்புட்டுத்தான் பவர். பாவம்...

சரி.. விழிக்குக் கண்ணாடி (எஜ்ஸ்ட்ரா ஜூம் லென்ஸ்) போட்டாலோ? தேவைப்படும் போது பொருத்திக் கொள்ளலாமேன்னு ஒரு ஆர்வத்தில்  ஆராய்ச்சி செய்ததில் முடியாது என்று தெரிந்தது.  உள்ளதை வைத்துத் திருப்திப்பட்டுக்குவோம். 

புகைப்படங்கள் கூட, சூரியனார் மனம் வைத்து கரெக்ட்டா லைட் அடித்தால், ஆட்டோ மோடில் எடுத்துவிடலாம். இல்லை என்றால் நாமே செட்டிங்க்ஸ் செய்து, சூரியனாரின் உதவியுடன் ஏதோ வந்துவிடும்.

ஆனால் காணொளிகளுக்கு செட்டிங்க்ஸ் செய்ய முடியவில்லை. ஆட்டோமோட்தான். பெரிய உருவங்கள், சூரியனார் சரியா லைட் அடித்தால் கிட்டப்பார்வையாக்கினால் ஓரளவு வந்துவிடும்.  இல்லை என்றால் வராது. 

சிறிய உருவங்கள்? நோ சான்ஸ்!

இதுல வெளிச்சம் குறைந்தாலும் சரி, இரவுக் காட்சிகள், ஃப்ளாஷ் போட்டாலும் கோவிந்தா! நானும் கலைஞி இல்லையே!!

அது எப்படி வந்திருந்தாலும், கீதாவுக்கு, தான் எடுத்ததைப் போடலைனா இருப்புக் கொள்ளாதே! என்ன செய்ய! அதுக்குத்தான், அதுக்குத்தான் இந்த முன்ஜாமீன்!!!!!!!!!! அதான் சொல்லி வைத்தேன்!

ஆனால் இவை எல்லாம் ஒரு எனர்ஜி டானிக். ஊக்கம் தருபவை. நினைவுப் பொக்கிஷங்கள் சந்தோஷம் தருபவை. ரசிப்பவற்றை சேமித்து வைத்துக் கொள்ள நினைப்பவள் நான். ஒரு வேளை மூப்பாகி இருந்தேன்னு வைங்க, வெளியில் செல்ல முடியாமல் போனால், நினைவுத்திறன் ஓரளவு இருந்தால், சேமித்ததைப் பார்க்கும் போது ஒரு உற்சாகம் வரும்.  

இங்கு நம் சீனியர் மோஸ்ட் பதிவர்கள் சிறந்த உதாரணங்கள். சேமித்த படங்களைப் போட்டு நினைவு வைத்துச் சொல்லுதல், வாசித்தல், காணொளிகள் பார்த்துக் கேட்டுப் பகிர்தல், சமையல் குறிப்புகள் சொல்லுதல் இவை எல்லாமே சிறந்த பயிற்சி எனலாம். 

வயதானாலும் தங்களை உற்சாகமாக வைத்துக் கொள்ள வேண்டும் என்ற முனைப்பு!  இது இது இதுதான் மிக மிக முக்கியம்.

இந்தப் பசுமைப் படங்களும், இயற்கைப் படங்களும் எனக்கு ஒரு வேளை பின்னாளில் பார்க்கும் போது, 'அட! கீதா நீயா இதை எல்லாம் எடுத்தே!' என்று என்னை நானே உற்சாகப்படுத்திக் கொள்ளலாம். இப்போது பழைய பதிவுகளைப் பார்த்து, "அட கீதா நீயா இப்படி எழுதினே" என்று வியப்பது போல! அதனால்தான் எப்படி வந்தாலும், ரசிக்கும் ஒவ்வொரு தருணத்தையும் அனுபவித்துச் சேமித்து இங்குப் பகிர்ந்து வைத்துக் கொள்ள முயற்சி! என் மகன் பார்க்கும் போது அம்மாவின் பொக்கிஷங்கள் என்று ஒரு சந்தோஷம் வருமே! அவ்வளவே.

(இந்தக் கீதாவுக்குப் பட்டு, நகை,  இவற்றில் சுத்தமாக ஆசையே கிடையாது என்றுமே. வாங்கியதும் இல்லை. ஆனால், பிடித்தவை ரசிப்பவை நிறைய. அதில் ஒன்று பயணமும் மூன்றாவது விழியும் ரொம்பப் பிடித்த சமாச்சாரங்கள். எனவே மகனிடம் ஒரு வார்த்தை சொல்லி வைத்திருக்கிறேன். மூன்றாவது  விழிக்கும் சேர்த்து.)

ஊர் முழுவதும் வாழையும், வயலும்தான்...இடையில் பனை....செழிப்போ செழிப்பு.  விவசாயிகளின் உழைப்பு!

மரச்சீனிக் கிழங்குச் செடியும் இருக்குல்லா...நடுக்க முருங்கை தெரியியா...தின்னவேலிக்காரங்களுக்கு முருங்கக்கா இல்லாம சாம்பாரோ, கூட்டாஞ்சோறோ வைக்கமாட்டாங்க பாத்துக்கிடுங்க...

 இந்தா இருக்குல்லா களக்காடு மெயின் ரோடு போற ரோடு. இந்தால ஒரு அரைக் கிமீ போனா ரைட்டுல வடக்கு கடம்போடுவாழ்வு வந்திரும்...ஹையோ ரோடு முழுக்க ரெண்டு பக்கமும் பச்சைதான் போங்க!

உழவர் ட்ராக்டர் ஓட்டி உழுது கொண்டிருக்கிறார். அவர் ஓட்ட ஓட்ட கொக்குகள் அங்குமிங்கும் பறந்து உட்காருவது அழகு! பின்னணியில் கோயிலில் போட்ட ஏதோ பாட்டு கேட்கிறது

Heronry of Egrets https://youtu.be/ctMPDbsF1IY

பதிவில் சேர்க்காத படங்களுடன் ஒரு படத் தொகுப்பு - சுட்டிகள் 

https://youtu.be/aQ20IOwWLBc

https://youtu.be/nd2fH14oEf8

கொக்குகள், நீர்க்காகங்கள் பறக்கும் காணொளிகளின் சுட்டி இதோ நேரமிருந்தால், விருப்பமிருந்தால் பாருங்கள்

https://youtu.be/Ld7IKal_APw

https://youtu.be/6sKzG0CncH0

கடம்போடுவாழ்வின் பசுமைப் படங்கள் இன்னும் வரும். அதற்கு முன் எங்கள் பகுதி ஏரியில் எடுத்த படங்கள் வரும்!!!! அதுக்கும் சேர்த்துதான் மேல பதிவுல சொன்னது.  அடுத்த பதிவில் சந்திப்போம்!

------கீதா