கடம்போடுவாழ்வு - 3

 

//இப்பத்தானே ஊருக்குள் வந்திருக்கோம். கொஞ்சம் ஆற அமர ஊரின் வளத்தை, செழிப்பை, உழைப்பைப் பார்க்க அடுத்த பகுதியில் ஊர் சுற்றுவோம்// என்று முடித்திருந்தேன். கடம்போடுவாழ்வு 2

அப்பதிவிற்கும், எனது மூன்றாவதுவிழியின் பார்வையில் பதிவிற்கும் கருத்து சொன்ன அனைவருக்கும் மிக்க நன்றி.

வீட்டிற்குள் இருக்கும் சின்ன தோட்டத்தைப் பார்த்துவிட்டு வீதி உலா.

வீட்டில் பின்பக்கம் கதவு உண்டு. அதைத் திறந்தால் களக்காடு முக்கியச் சாலைக்குச் செல்லும் சாலை, தொடக்கப்பள்ளி, ஊருக்கான தண்ணீர்த்தொட்டி. சுற்றிலும் பசுமை.

வீட்டுத் தோட்டம் சிறியதுதான். என்றாலும் தென்னை, வாழை, மாமரம், மருதாணி, கறிவேப்பிலை, சப்போட்டா என்று அழகான தோட்டம். 

இதோ வீட்டு மருதாணி. ஒரு அத்தை பறிச்சு முற்றத்தில் போட, நாங்க இலைகளை எடுத்துக் கொடுக்க, இன்னொரு அத்தை அதை அரைக்க கை எல்லாம் சிவந்து. இது ரா பத்து பகல் பத்து மருதாணி!!! இரவு பகல்னு பத்திக்கும்னு சொல்லறத இப்படி!  நான் எல்லோருக்கும் மருதாணி வைத்துவிட, விட்டதுக்கே என் கைகள் ஒரே சிவப்புதான் போங்க.

இப்படியான மருதாணியைப் பார்த்துட்டு விடுவமா உடனே பறித்துப் போட்டதிலிருந்து விதைகளை எடுத்துக் கொண்டேன். ஆர்வமுள்ளவங்களுக்குக் கொடுக்கத்தான்.  நாங்க மூட்டை கட்டற கூட்டம். எங்க விதைச்சு…எங்க வளர்க்கறது.

முற்றத்துல மல்லி வேற. பொத்தி வைச்ச மல்லிகை மொட்டுன்னு மருதாணி விரல்களால் முகத்தை மூடிக் கொண்டு மருதாணி விரல்களின் இடுக்கு வழியே சைட்ல ஒரு பார்வை….ஹூம் அதுக்கு ஏத்த குட்டிப் பெண்கள் யாருமில்லை! இல்லேனா க்ளிக்கிருக்க மாட்டேனா!!!! 

மாலையில், சின்ன அத்தை என்னை வீதி உலாவுக்கு – இருக்கற சின்ன சின்ன 4 தெருவ காட்ட - கூட்டிக் கொண்டு சென்றார்.  தெருவைக் காட்ட என்பதை விட, ‘யென் அண்ணென் மக பாத்துக்க’ ன்னு என்னைக் காட்ட! இது தெற்கு கடம்போடுவாழ்வு. மெயின் ஊர் வடக்கு கடம்போடுவாழ்வு

ஊரின் குடிசைத் தொழில்???? பீடி சுற்றுதல். பெண்கள் பீடி கம்பெனிக்குச் செல்லாமல் வீட்டிலிருந்தபடியே பீடி சுற்றல் தொழில். கொரோனா டைம் வேற. பீடி சுற்ற தெந்து (பேச்சு வழக்கு) இலை – தெண்டு இலை பீஹார், மத்தியபிரதேசம், ஆந்திரா போன்ற மாநிலங்களில் இருந்தும் உள்ளே வைக்கப்படும் கொஞ்சம் நிக்கோட்டின் கோட் செய்த பக்குவப்படுத்தப்பட்ட புகையிலைகள் (துண்டு துண்டாக இருப்பது) கர்நாடகா, மஹாராஷ்டிரா, குஜராத் மாநிலங்களில் இருந்து வருவதை கம்பெனிகள் விநியோகிக்க அதை இவர்கள் வீட்டிலிருந்தபடியே சுற்றிக் கொடுக்கிறார்கள். 

ஒரு நாளைக்கு 1000 சுற்றினால் 150-200 ரூ க்குள் கிடைக்குமாம். கம்பெனியைப் பொருத்து.  ஏதோ, பிள்ளைளுக்குப் படிக்க கொள்ள, திங்க ஆச்சுல்லா. 

இதைப் பற்றிய மேலதிகத் தகவல்களை இங்கு தரவில்லை. எல்லாம் நம் கூகுள் கொடைவள்ளல் செல்லத்திடம் கேட்டால் வாரி வழங்கும்! 

அந்தப் பூச்சைக் குட்டி என் அத்தை கையில் 

மேலே உள்ளவர்களின் வீட்டைக் கடந்ததும் இருக்கும் சர்ச்

வீட்டின் பின்புறம் களக்காடு மெயின் ரோடு செல்லும் சாலையில் இருந்து எடுத்த படம்.  அருகில்தான் இந்த மலை. 

மேலே படத்தில் உள்ள அதே மலைதான். மறுநாள் காலையில் அதன் தோற்றம். நான் தனியாகச் சுற்றிய போது கொஞ்சம் அருகே சென்று எடுத்த படம்.

களக்காடு வனப்பகுதி - திருக்குறுங்குடி நம்பி மலை. இதைக் கும்பகர்ணன் மலை என்று நம் மக்கள் சொல்கிறார்கள். கும்பகர்ணன் படுத்திருப்பது போல் இருப்பதாலாம். படத்தில் தெரியும் வீட்டின் மாடி க்ரில் மேலே பாருங்க ஒரு வெள்ளைக் கோடு தெரிகிறதா அதுதான் நம்பி அருவி! இல்லேனா கீழே உள்ள படத்தில் பாருங்க....

சுற்றிலும் காடும், அருவியும், ஆறுமா அதுக்கு நடுவில் உக்காந்து ஊரைப் பார்த்துக் கொண்டிருக்கும் மலைமேல் நம்பி இந்தச் செழிப்பான ஊர் கட்டிடங்களாக மாறிவிடாமல் பார்த்துக் கொள்ள வேண்டும். இப்படத்திலும் நம்பி அருவியும், கோவில் வெள்ளை செவ்வகமாகவாகவும் தெரியும். பூதக்கண்ணாடி வைச்சுப் பார்த்துக்கோங்க!  

என் மனதிற்கு மிகவும் நெருக்கமான பிடித்த பகுதி நம்பி மலை, அருவி, சுனை தெள்ளத் தெளிவான (கிரிஸ்டல் க்ளியர்) ஆறு.

நாகர்கோவில் டு கடம்போடுவாழ்வு பதிவில் இதே மலை பேருந்து நெடுஞ்சாலையில் வந்த போது பேருந்திலிருந்து எடுத்த படத்தில் ஏர்வாடி அடையாளமான இந்த மொட்டை மலையின் வேறொரு பக்கம்.  இது ஊரினுள் இருந்து. சுற்றியுள்ள பகுதிகளிலும்,  இந்த ஊருக்குளும் எங்கு சென்றாலும் கண்ணில் படாமல் இருக்காது! 

கிராமத்தின் முக்கியத் தொழில் விவசாயம்தான். மக்களின் உழைப்பு வயல்களிலும், வாழைத் தோப்புகளிலும் தெரிந்தது.   

க்ளிக்ஸ் ரொம்ப பிடித்த விஷயமாச்சே. நம்முடன் வருபவர்களுக்குப் பொறுமை வேண்டும். அதனால் மறுநாள் எல்லாம் தனியே தன்னந்தனியேதான்.  சிங்கம் சிங்கிளாத்தான் போகுமாமே! ஆனால் நான் சிங்கப் பெண்ணில்லை!   

அப்படி க்ளிக்கிய இன்னும் பசுமையான வளமான படங்கள் எல்லாம் அடுத்த பதிவில். இப்பதிவே பெரிதாகிவிட்டதோ என்ற தயக்கத்தில் இத்துடன் நிறுத்திக் கொள்கிறேன்.

எனது பதிவுகளையும் பார்த்துக் கருத்து இடும் அனைவருக்கும் நன்றி!

------கீதா