கோபுர வாசலிலே - ஸ்ரீரங்கம் - 1 - பாப்பா சினிமா - துணுக்குகள் பகிர்வு

இப்படிப் போட்டால் கூட்டம் சேருமா!!!!

அனைவருக்கும் இனிய வணக்கம் + மகிழ்வான காலை வணக்கம்! ஒரு மாதம் கழித்து தளம் பக்கம் வந்தாலும், பதிவுகள் எழுதி பல மாசம் ஆகிவிட்டதே, தளத்தை எல்லோரும் மறந்தே போயிடுவாங்களே என்ற பயம் பிடித்துக் கொண்டதால் சும்மாவேனும் ஒரு பதிவு போட்டு வைப்போம். அப்புறம் தொடர்வதைப் பற்றி யோசிக்கலாம் என்று எங்க வீட்டைத் திறந்து தூசி தட்டி கழுவி, தொடங்கி இனியும் தொடர வேண்டும் என்று இப்பபடத்துடன் தொடக்கம். 

எனக்குப் பயணம் செய்வது புகைப்படங்கள் எடுப்பது மிகவும் பிடிக்கும் என்று அடிக்கடிச் செல்லுவேன். கோபுரங்களை எங்கு கண்டாலும் படம் எடுப்பதும் வழக்கம். அப்படித்தான் ஜூலையில் நெருங்கிய உறவின் திருமணத்திற்காக ஸ்ரீரங்கம் சென்றிருந்த போது (கீதாக்கா வீட்டருகில்தான் திருமணமண்டபம்) திருமணம் முடிந்த பிறகு 21 கோபுரங்களையும் ஒரு சேரக் காணலாம் என்று சென்றோம். (கீதாக்கா வீட்டிற்கு முதல் நாளும், ரோஷினிக்குட்டி பள்ளி செல்லும் முன் பார்க்க வேண்டும் என்றதும் கீதாக்கா நேரம் சொன்னார் அதை அட்ஜஸ்ட் செய்து மறுநாள் சீக்கிரம் முகூர்த்தம் என்பதால் முடிந்ததும் ஆதிவெங்கட்டையும், ரோஷினியையும் பார்த்துவிட்டு வந்தேன்.)

ராஜகோபுரம்

இந்தக் கோபுரம் எந்தக் கோயில் கோபுரம் என்று சொல்லித் தெரிய வேண்டியதில்லை. திருச்சி/ஸ்ரீரங்கத்துக்காரர்களுக்கு ஒரே குஷியாக இருக்கும். அதுவும் ஹூஸ்டனில் தற்போது இருக்கும் கீதாக்காவுக்கு (அவங்ககிட்ட இதைப் போடுகிறேன் என்று சொல்லி ரொம்ப நாளாகிவிட்டது!!) அரங்கனின் கோபுர தரிசனம்! எல்லோருக்கும் தான்.

ராஜகோபுரத்திற்கு அடுத்தாற் போல் உள்ள உள்ள கோபுரம்

மதியம் 1 மணிக்கு சென்னைக்குக் கிளம்ப வேண்டும். மணி 11.15 ஆகியிருந்த சமயம் திடீரென்று மைத்துனர் 21 கோபுரமும் சேர்ந்தாற்போல் பார்க்கப் போகலாம் என்று சொல்ல, பார்த்துவிட்டு மண்டபம் வந்து மதிய உணவு சாப்பிட்டுவிட்டுக் கிளம்பணும். அதுவும் சில உறவினர்களுக்குச் சில உதவிகள் செய்து ஒவ்வொருவரையும் தேடி தேடிச் சொல்லிக் கொண்டு புறப்பட வேண்டும். வருபவர்கள் எல்லோரையும் சேர்த்துக் கொண்டு கிளம்ப இன்னும் நேரம் குறைவானது.

ஸ்ரீரங்கா ஸ்ரீரங்கா கோபுரம் வழி கடந்து உள்ளே சென்றதும் இடதுபுறம் இருக்கும் டிக்கெட் கவுண்டரில் கோபுரம் காணவும் கேமராவுக்கும் டிக்கெட் வாங்கிக் கொண்டு இடது புறம் சென்றால் படி ஏறியதும் கதவைத் திறந்துவிடுவார்கள். நிறைய படங்கள் எடுத்திருக்கிறேன். அதில் சிலதை பகுதி பகுதியாகப் போடுகிறேன். இன்று தொடக்கம் என்பதால் வெளியிலிருந்து எடுத்த ராஜகோபுரம் அதை அடுத்துள்ள கோபுரம் படங்கள் மட்டும் இங்கு கொடுத்துள்ளேன். மற்ற படங்கள் அவ்வப்போது தொடர்ந்து வரும்.

இருந்த குறைவான நேரத்தில் வேக வேகமாக குழுவினர் நடக்க, நான் கிடைத்த நேரத்தில் க்ளிக்கிக் கொண்டே நடந்தேன். நான் சில இடங்களில் ரசித்து நின்று படம் எடுத்துக் கொண்டு திரும்பினால் அவர்கள் முன்னே சென்றிட யாரையும் காணவில்லை. அவர்கள் எங்கே நான் எப்படிச் செல்ல வேண்டும் என்று திகைக்க நல்லகாலம் முன்னே சென்றவர்களில் ஒருவர் கண்ணில் படும்படி வந்தார். சீக்கிரம் நேரமில்லை விரைவாகப் போகணும் போட்டோ எடுத்தது போதும் என்றதும் நானும் கிடைத்தவரை அவசர அவசரமாகப் படம் எடுத்துக் கொண்டேன். அதனால் முழுமையாக எல்லாம் எடுத்தேன் என்று சொல்ல முடியாது.

நாங்கள் உள்ளே எல்லாம் செல்லாமல் எந்த சன்னதியிலும் நிற்கவில்லை. ஆண்டாள் இருவரையும் பார்த்துவிட்டு சன்னதி அருகில் இருக்கும் மண்டபம் வழியே நடந்து சுற்றி, பிரசாதம் ஸ்டால் அருகே வந்து அப்படியே வாசல் வந்துவிட்டோம். செல்ல ஆண்டாள் குட்டியும் வருவாள்! மீதி படங்கள் எல்லாம் அடுத்தடுத்த பகுதிகளில் வரும் என்று......என்று...நம்பிக்கையுடன்...சரி விடுங்க வரும் போது பார்த்துக்கலாம்.

*********************

கல்கியில் அமரர் கல்கி அவர்களின் நாவல் “கள்வனின் காதலி” தொடர் 1983ல் இதே அக்டோபர் மாதத்தில்தான் தொடராக வந்திருக்கிறது. என் மாமனார் அதைச் சேர்த்து வைத்து தொடரை மட்டும் எடுத்து தைத்து வைத்திருந்தார். எனக்கு இந்த ஒரு சொத்து போதும் என்று அவர் அப்படித் திரட்டி வைத்திருந்த புத்தகங்களை எடுத்து வந்துவிட்டேன். இந்தக் கள்வனின் காதலி தொடரை ஒவ்வொரு இதழிலிருந்தும் அவர் சேகரித்ததில் அதனுடன் கூடவே வந்த பக்கங்களில் சில ஸ்வாரஸ்யமான துணுக்குகள், விளம்பரங்களை எடுத்து அவ்வப்போது இங்கு பகிரலாம் என்றிருக்கிறேன். இப்போது சில.

 இதைப் பார்க்கும் போது ஒருவர் அடிக்கடி உண்ணாவிரதம் இருப்பவர் நினைவுக்கு வந்தால் அதற்கு நான் பொறுப்பல்ல!!!!!

*******************************

                  திரு சர்மா 

“இந்தப் படம் வெளி வந்ததா? தெரியுமா?

மகாகவி பாரதியார்” என்ற பாரதியின் வரலாற்றைப் பற்றிய திரைப்படம், முழுவதும் சிறுவர்-சிறுமியராலேயே நடிக்கப்படுகிறது! தயாரிபவர் திரு சர்மா. ஒரு தேசத்தலைவரைப் பற்றிய படம் குழந்தைகளே நடித்து உருவாவது இந்தியாவிலேயே இதுதான் முதல். டி.வி.எஸ் சர்மா குழந்தைகளை வைத்துப் பாரதியார் நாடகத்தைப் பலமுறை அரங்கேற்றியுள்ளார்.

ஏன் பிரபல நடிக நடிகையரைப் போட்டுப் படம் எடுக்கக் கூடாது? என்ற கேள்விக்கு “நான் அவரைப் பற்றிக் கொண்டிருக்கிற கருத்துப்படி நடிக்கப் பிரபல நடிகர்க்ளின் அமனம் இணங்காது. ஏனெனில் அவர்கள், தங்கள் மனத்தில் பாரதியைப் பற்றிய வேறு ஒரு விதமான வடிவு கொடுத்து வைத்திருப்பார்கள் ஆனால் குழந்தைகள் நான் சொல்வது போல் நடிக்கும்” என்பது அவர் பதில்.

விஜய்-சித்தர் (ஸ்ரீராம் கேள்விப்பட்டிருக்கின்றீர்களா?) என்ற புதிய இசையமைப்பாளர்கள் அறிமுகமாகவிருக்கும் இவ்வண்ணப் படத்தில் மொத்தம் பாரதியின் நாற்பது பாட்டுக்கள் இடம் பெறுகின்றனவாம். - வி தியாகு 

பாரதியின் படம் என்று மேலே செய்தி. இது பாரதியைப் பற்றிய ஒரு சுவாரஸ்யமான தகவல் துணுக்கு. நிறைய இருக்கின்றன. ஒவ்வொன்றையும் அடுத்து வரும் பகுதிகளில் பகிர்கிறேன். ஜீவி அண்ணா பாரதியைப் பற்றி தொடரே எழுதியிருந்தார்.

*************************************

என்னை நினைவிருக்கிறதா??!!

 

இதையும் கீழ் உள்ளதையும் பார்க்கும் போது....!!!!!!!!! எனக்கு டக்கென்று நினைவுக்கு வந்தவர் உங்களுக்கும் நினைவுக்கு வருகிறாரா??!!!!!

அன்றைய க்ரான்ட் ஸ்வீட்ஸ் விளம்பரம்...

**********************************

  

-----கீதா