திருப்பத்தூர் (சிவகங்கை) மற்றும் அதன் அருகிலுள்ள சிவன் - வைரவர் தலங்கள் – ஒரே நாளில் 9 கோயில்கள் - 3

திருப்பத்தூர் மற்றும் அதைச் சுற்றியுள்ள சிவன்/பைரவர் கோயில்களுக்கு ஒரே நாளில் 9 கோயில்கள் வரிசைப்படி சென்றதைப் பற்றி இந்த இரு பகுதிகளில் ===> பகுதி 1 <===  ===>பகுதி 2 <=== 1வது கோயில் முதல் 6 வது கோயில் வரை சொல்லியிருந்தேன். அதே போன்று இப்ப இந்த மூன்றாவது பகுதியில் 7, 8, 9 வதாகச் சென்ற கோயில்கள் பற்றி. இடையில் மீண்டும் முதல் கோயில் வரும்!

வரிசையில் 7 - இலுப்பைக் குடி தான்தோன்றீஸ்வரர் கோயில் 

6 வதாகச் சென்ற காரைக்குடி சுந்தரேஸ்வரர் கோயிலில் இருந்து 5.2 கிமீ தூரத்தில் உள்ளது. இலுப்பை வனம் நடுவில் சிவன் காட்சி தந்ததால் இலுப்பைக்குடி. 18 சித்தர்களில் ஒருவரான கொங்கண சித்தர் ரசவாதக் கலையில் தேர்ச்சி பெற - மூலிகைகளைக் கொண்டு இரும்பைத் தங்கமாக மாற்றி அதை மேலும் மாற்றுப் பொன்னாக்க ஈஸ்வரனை வழிபட சிவனுக்கு, சித்தர் இப்படி உலக விஷயங்களில் ஈடுபடுவது பிடிக்கவில்லை என்றாலும் அதை அவரே உணர்ந்திடட்டும் என்று, அவர் ஆயிரம் மாற்றாக உயர்த்திட இந்த இலுப்பை வன பைரவரை வேண்டச் சொல்லி அருள் புரிந்திட, பைரவரை வழிபட்டு ஆயிரம் மாற்றுப் பொன்னாக்கினார் என்றும், அது ஜோதி ஸ்வரூபமாகிட அதை சித்தர் எடுக்க முயன்றிட, பூமிக்குள் மறைந்ததாம் அந்த ஜோதி. அதனால்.... 

இறைவன் - சுயம்பிரகாசேஸ்வரர்/தான்தோன்றீஸ்வரர்; இறைவி - சவுந்தர்ய நாயகி. வபைரவர் இங்கு சொர்ண ஆகர்ஷண பைரவர். இரட்டை நாய் வாகனமாகக் கொண்ட பைரவர் தலம். வலப்புற நாய் அமர்ந்த நிலையில் இடப்புற நாய் நின்ற நிலையில். தேய்பிறை அஷ்டமியில் விசேஷ யாகம் செய்யப்படுகிறது. 

வழிபாடுகளை முடித்துக் கொண்டு மாத்தூர் கோயில் சென்றோம்.

கோயில் கோபுரம் தாண்டி உள்ளே செல்லும் போது இரு புறமும் அழகான நந்தவனம். படங்கள் எடுத்திருந்தேன் ஆனால் எங்கு போச்சோ தெரியவில்லை!

இத்தலத்து தீர்த்தம் 

***************

8 - மாத்தூர் (முன்பு வீரபாண்டியபுரம்) ஐந்நூற்றீஸ்வரர் கோயில்

ஏழாவது கோயிலான இலுப்பைக்குடி கோயிலில் இருந்து 2.2 கிமீ தூரமே. அருகருகே இருக்கும் இந்த இரு கோயில்களுக்கும் புராணக் கதையில் தொடர்பு உண்டு. கொங்கண சித்தர், இக்கோயிலுக்கு வந்து இங்கு ரசவாதத்தால் ஐந்நூறு தங்க மாத்திரைகள் தயாரிக்கும் போது தண்ணீர் குடிப்பதற்காகத் தன் வேலையை நிறுத்தினார். சிவன் அவர் முன்னில் சாதாரண மானிட ரூபத்தில் வந்து அவரைத் தடுத்தாட்கொள்ள சித்தரும் தெளிந்தார். சிவ தியானத்தில் மூழ்கினார். தங்கத்துக்கு மாற்றுரைத்ததால் இறைவனுக்குக் காரணப் பெயர் ஐந்நூற்றீஸ்வரர்!

இறைவன் - ஐந்நூற்றீஸ்வரர்;  இறைவி - பெரியநாயகி; இங்கும் இரட்டை நாய் வாகன பைரவர்

பாண்டியர்கள் காலத்தில் எழுப்பப்பட்ட கோயிலாம். அப்போது வீரபாண்டியபுரம் இப்போது மாத்தூர். அழகான சிற்பங்களையும் தூண்களையும் கொண்ட பெரிய கோயில்.  150 வருடங்களாக நகரத்தார் இக்கோயிலைப் பராமரித்து வருகிறார்கள். இப்படத்தில் கோபுரம் தெரிகிறது இல்லையா அதுதான் கோயிலின் கோபுரம்.  நுழைவுப்பகுதியாக இருந்தது. நகரத்தார் பராமரிக்கையில் இதன் முன் பெரிய மண்டபத்தைக் கட்டியிருக்கிறார்கள் எனவே இதோ கீழே  உள்ள படத்தில் இருப்பதுதான் நுழைவு வாயில்.  இங்கு கோபுரம் இல்லை.  பிற்பகுதியில் கோயில் பராமரிப்பு நகரத்தார் கீழ் என்பதால் செட்டிநாட்டுக் கலைவடிவங்களையும் பார்க்கலாம் கோயிலினுள்.

கோயில் வாயில் இதுதான் தற்போது. பெரிய அழகான மண்டபம். 

மண்டபத்தின் மேற்கூரையில் இக்கோயிலின் புராணக் கதையின் படங்கள். கதை மேலே சொல்லியிருக்கிறேன்

இந்த புதிய மண்டபம் தாண்டினால் பண்டைய கோயில் நுழைவு வாயில்

மண்டபத்தின் வழியே செல்லும் போது இடப்புறம் வெளியே  உள்ள பெரிய பகுதியில் இப்படி ஒவ்வொரு நட்சத்திரத்திற்குமான மரம் என்று குறிப்பிட்டு வளர்த்திருக்கிறார்கள். இதெல்லாம் இப்போது செய்திருக்கிறார்கள் என்று தெரிகிறது.

மண்டபத்தின் சுவற்றில் இந்தத் தகவல். கேரள சிங்கவள நாடாகிய பிரம்பூர் நாட்டில் மாற்றூரான வீரபாண்டியபுரத்தில், உறையூர், அரும்பாக்கூர், மணலூர், மண்ணூர், கண்ணூர், கருப்பூர், குளத்தூர் - 7 பிரிவைச் சார்ந்த மாற்றூர் கோயில் நகரத்தார்களுக்கு இது மிக முக்கிய முதன்மைத் தலம். இக்கோயிலுக்கு அஷ்டபந்தன மஹாகும்பாபிஷேகம் செய்திருக்கிறார்கள்.  

கோயிலை விட்டு வெளியே வரும் போது கோயிலின் முன் பகுதி. கிழக்கு நோக்கி விநாயகரும், தெற்கு நோக்கி மாரியம்மனும். இந்த இரு கோயில்களின் முன்பகுதி எடுத்திருந்தேன். காக்கா உஷ்!

கோயிலில் இருந்து இடதுபுறம் திரும்பியதும் நம் ஆட்டோ இருந்த இடத்துக்கு வந்த போது எதிரே இப்படி அழகான செட்டிநாடு வீடு! கொட்டாரம் போன்று!! 

மாத்தூர் கோயிலிலேயே  12.30 மணிக்கு மேலாகிவிட்டது. அதன் பின் மாலை மீண்டும், காலையில் சென்ற முதல் கோயிலான திருக்கோட்டியூர் வைரவன்பட்டி திருமெய்ஞானபுரீஸ்வரர் கோயிலுக்குச் சென்று பைரவ அஷ்டமி பூஜைக்கு வழிபாடு செய்ய வேண்டும் என்று சொல்லப்பட்டிருந்ததால், ஆட்டோக்காரரிடம் திருப்பத்தூர் பேருந்துநிலையத்துக்கு அருகில், தங்கியிருந்த இடத்திற்கு அருகே செட்டிநாட்டு சைவ உணவு கிடைக்கும் ஒரு உணவகத்தில் நிறுத்தச் சொன்னாள் என் தங்கை. மதகுபட்டி ஐயர் ஹோட்டல் முன் எங்களை இறக்கிவிட்டதும், ஆட்டோ நண்பர் தன் வீட்டிற்குச் சென்று சாப்பிட்டு வருகிறேன் என்றதும் மீண்டும் மாலை 4.30 மணி அளவில் வரச் சொல்லி அனுப்பிவிட்டு நாங்கள் சாப்பிட்டுவிட்டுத் தங்கியிருந்த இடத்திற்குச் சென்றோம்.

*************

மாலை நாலரை மணிக்கு ஆட்டோக்காரர் வந்ததும், அறையை காலி செய்துவிட்டு எங்கள் உடைமைகளுடன் கிளம்பிவிட்டோம். பைரவ அஷ்டமி பூஜைக்கான பூக்கள் போன்ற சாமான்கள் வாங்க திருப்பத்தூர் பேருந்துநிலையம் அருகே உள்ள திருத்தளிநாதர் கோயில் (காலையில் 2வதாகச் சென்றது) முன் உள்ள கடையில் வாங்கிக் கொண்டு மீண்டும் திருமெய்ஞாநபுரீஸ்வரர் கோயில் (காலையில் 1வதாகச் சென்ற கோயில்) சென்று பூஜைக்கான சாமான்களைக் கொடுத்து வழிபாடு செய்து தரிசித்தோம். 

திருமெய்ஞானபுரீஸ்ஸ்வரர் கோயிலில் இருக்கும் யானை அலங்காரத்துடன்

************

கடைசி ஒன்பதாவது கோயில்

9 - பெரிச்சி கோயில் சுகந்தவனேஸ்வரர் கோயில்

தி-வைரவன்பட்டி திருமெய்ஞானபுரீஸ்வரர் கோயிலில் இருந்து 9 கிமீ தூரம். 

இறைவன் - சுகந்தவனேஸ்வரர் (மிகச் சிறிய மூர்த்தி); இறைவி - சமீபவல்லி அம்பாள்; நவபாஷாண ஸ்ரீ காசி வயிரவர்

இதுதான் நுழைவு வாயில்

திருச்சுற்றில்...தல தீர்த்தமாக அழகான கிணறு உள்ளது. படம் எடுத்திருந்தேன். பழைய ஹார்ட் டிஸ்கிலிருந்து External drive க்கு மாற்றும் போது ஒரு சில படங்கள் விட்டுப் போயிருக்கின்றன

மூலவர் சன்னதி விமானம்

ஒன்று ஒற்றை ஸ்ரீ சனைஸ்வரர் மற்றொன்று நவபாஷாண காசி வயிரவர் சன்னதி

நான் கவனித்த விஷயங்கள் - நகரத்தார் பராமரிக்கும் இக் கோயில்களில் உண்டியல்கள் இல்லை. அர்ச்சகர்கள் நம்மை ஜருகண்டி சொல்வதில்லை. நின்று நிதானமாகத் தரிசிக்க முடிகிறது. கோயில்கள் முழுவதும் சுற்றிப் பார்த்திட எங்களுக்குத்தான் நேரமில்லை என்றாலும் கிடைத்த நேரத்தில் சொல்லப்பட்ட வழிபாடுகளை நல்ல தரிசனத்துடன் செய்ய முடிந்தது.

கடைசி கோயிலைத் தரிசித்துவிட்டு, மதியம் உண்ட அதே உணவகத்தில் இரவு உணவு சாப்பிட்டுவிட்டு அன்றைய கோயில் அனுபவங்களைப் பேசிக் கொண்டே பேருந்து நிலையத்திலிருந்து நடக்கும் தூரத்தில் தனியார் பேருந்துகள் நிற்கும் இடம் வந்து நாங்கள் பதிவு செய்திருந்த பேருந்து வந்ததும் ஏறி சென்னைக்கு வந்து சேர்ந்தோம். 

ஒரு வழியாக திருப்பத்தூர் கோயில்கள் பயணத்தை முடித்துவிட்டேன்!  

வாசித்தவர்கள், வாசித்துக் கருத்து சொன்ன, சொல்லும் அனைவருக்கும் மனமார்ந்த நன்றி!

------கீதா