திருப்பத்தூர் (சிவகங்கை) மற்றும் அதன் அருகிலுள்ள சிவன் - வைரவர் தலங்கள் – ஒரே நாளில் 9 கோயில்கள் - 1

2016 ஆம் வருடம். என் தங்கை ஏதோ ஒரு ஜோசியர் அவளுடைய பிரச்சனைக்கு ஒரு பரிகாரம் சொல்லியிருக்கிறார் என்றாள்.  அந்த மாபெரும் சக்தி மீது அசைக்க முடியாத நம்பிக்கை உள்ள எனக்கு இப்படியான விஷயங்களில் நம்பிக்கை இல்லை. என்றாலும் இந்தச் சாக்கில், போயிருக்காத சில கோயில்களுக்குப் போக ஒரு வாய்ப்பு கிடைக்குதேன்ற மகிழ்ச்சியில் என் தங்கை அழைத்ததும், சொல்லணுமா?! என் ஓட்டை மூன்றாவது விழியுடன் கிளம்பிவிட்டேன்.

சென்னைக்கு வந்தார்கள். 20 ஆம் தேதி இரவு திருப்பத்தூர் வழி மதுரை செல்லும் தனியார் பேருந்தில் படுக்கை வசதி உள்ள பேருந்தில் பதிவு செய்து பயணித்தோம். திருப்பத்தூர் சென்று சேர நிறைய நேரம் இருக்கிறதே! பரிகார விஷயங்களைச் சொல்லிவிடுகிறேன்.

என் தங்கை எல்லா ஜோசியத்தையும் நம்பும் வகை. அப்படி அவள் நம்பிய அந்த ஜோசியர் சொன்ன அந்தப் பரிகாரங்களில் ஒன்று  பிரதோஷ தினங்களில் சிவன் கோயில், பைரவர் வழிபாடு என்று சென்னைக்கருகில் ஆந்திரமாநில எல்லையில் இருக்கும் வாலீஸ்வரர் கோயிலில் வைரவர் வழிபாடு மற்றும் சுருட்டப்பள்ளி பள்ளிகொண்டீஸ்வரர் கோயிலில் மாலை பிரதோஷ வழிபாடு என்று சென்று வந்தோம். கோயில்கள் பற்றி பதிவும் போட்டிருந்தேன். அப்பதிவில் திருப்பத்தூர் அருகே சென்ற கோயில்கள் படங்கள் பகிர்கிறேன் என்றும் சொல்லியிருந்தேன். அதுதான் இது.

மற்றொரு பரிகாரம், குறிப்பிட்ட தினமான பைரவ அஷ்டமி – தேய்பிறை அஷ்டமி அன்று திருப்பத்தூர் மற்றும் திருப்பத்தூர் அருகே உள்ள, ஜோஸ்யர் குறிப்பிட்ட 9 கோயில்கள். வைரவர்/பைரவர் கோயில்கள் மற்றும் சிவன் கோயில்களில் பரிகார தெய்வமாக முக்கியத்துவம் பெற்ற பைரவர் வழிபாடுகளைச் செய்யச் சொல்லியிருந்தார். அவர் குறிப்பிட்டிருந்த வரிசையில்தான் அந்தக் கோயில்களுக்குச் செல்ல வேண்டும். தரிசித்துவிட்டு திருப்பத்தூரில் தங்கக் கூடாது என்றும் சொல்லியிருந்தார். 

மறுநாள் காலை 5.30 மணி. திருப்பத்தூர் வந்தாச்சு. இறங்கினோம். சும்மா சாமான்களை வைத்துவிட்டுக் குளித்துவிட்டுக் கோயில் தரிசனம்தானே! அதனால் பேருந்து நிலையம் அருகிலேயே சாதாரண ஒரு லாட்ஜில் அறை எடுத்துக் கொண்டு குளித்துவிட்டு 7.30 மணி அளவில் இறங்கினோம். என் தங்கை கோயிலுக்குச் சென்றுவிட்டு மதியம்தான் சாப்பிடுவேன் என்று சொன்னதால் மற்றவர்கள் காலை உணவை அருகில் உள்ள உணவகத்தில் சாப்பிட்டோம்.

ஏற்கனவே கோயில்கள் ஒவ்வொன்றும் எவ்வளவு தூர இடைவெளியில் இருக்கின்றன என்று கூகுள் மேப் பார்த்துக் குறித்து வைத்திருந்தேன். மொத்தமாக முழுவதிற்கும் (உத்தேசமாக 70-80 கிமீ) ஒரு ஆட்டோவை ஏற்பாடு செய்து கொண்டுவிடலாம் என்று ஆட்டோக்காரர் ஒருவரை அமர்த்திக் கொண்டோம். 600 ரூ பேசிக் கொண்டாலும் கடைசியில் 700ரூ கொடுத்தோம். 

ஒரே நாளில் இத்தனைக் கோயில்களை மாரத்தான் ஓட்டம் போன்று கவர் செய்ய வேண்டும். எந்தக் கோயிலையும் நின்று நிதானமாகத் தரிசித்து, பழமை வாய்ந்த கோயில்களில் சிற்பங்களும் தூண்களும் கலைவடிவங்களும் அத்தனை அழகாக இருந்தும் படம் எடுக்க முடியாமல் கோயில் பற்றி தகவல்களும் திரட்ட முடியாமல்......இப்படியான பயணங்கள் எனக்குச் சரிப்பட்டு வராது.

எனவே, பார்த்த கோயில்கள், பெயர்கள், நான் எடுத்த சில படங்கள் மற்றும் நான் அறிந்த சிறு குறிப்புகள் கொடுத்து ஒரு அறிமுகம் போன்று கொடுத்துவிடுகிறேன். கோயில்களைப் பற்றி கூகுளில் அறிந்து கொள்ளலாம். உங்களுக்கு வாய்ப்பு கிடைக்கும் போது சென்று வரலாம். இதோ வரிசையாக...

1. திருமெய்ஞானபுரி/T.வைரவன்பட்டி T- என்பது திருக்கோஷ்டியூர்  வைரவன்பட்டி) ஸ்ரீ காலபாலபைரவர். திருப்பத்தூர் பேருந்து நிலையத்திலிருந்து உத்தேசமாக 7.5 கிமீ. அங்கிருந்து திருக்கோட்டியூர் சௌம்யநாராயணப் பெருமாள் கோயில் 1 கிமீ தூரம்தான். (நாங்கள் செல்ல முடியவில்லை என்பது என் குறை)

அப்பன் திருமெய்ஞானபுரீஸ்வரர் - அம்மை ஸ்ரீ பாகம்பிரியாள். 1500 வருட பழமை வாய்ந்த கோயில். சோழர்கள் காலத்தில் கட்டப்பட்டு சோழர்களின் கட்டுமானக் கலையும், பாண்டியர்களின் கலைவடிவங்களும் கொண்ட கோயில். 

ஸ்ரீ காலபாலபைரவர்

2. திருப்பத்தூர் திருத்தளிநாதர் கோயில் - யோகபைரவர். பேருந்து நிலையத்திலிருந்து வெகு அருகில்.  நடக்கும் தூரம்.  முதல் கோயில் தி.வைரவன்பட்டி காலபாலபைரவர் கோயிலில் தரிசனம் முடித்து  இங்கு வந்ததால் 7.8 கிமீ. 

இறைவன் - மூலவர் - திருத்தளிநாதர். உற்சவர் - சோமஸ்கந்தர். இறைவி - சிவகாமி. தீர்த்தம் - ஸ்ரீதளிதீர்த்தம்

திருத்தளிநாதர் கோயில் பற்றிய விவரங்கள் இதோ படங்களாக. பெரிதாக்கிப் படிக்கலாம் 

கூட ஒரு கோயில் அறிமுகம் கொடுக்கலாமோன்னு Preview பார்த்தா இதுவே பெரிது என்று சொல்லிடுவீங்க!!!!!! என்ற பயம். இத்துடன் இதில் முடிக்கிறேன். மீதி 7 கோயில்கள் அடுத்தடுத்து...

-------கீதா