திருப்பத்தூர் (சிவகங்கை) மற்றும் அதன் அருகிலுள்ள சிவன் - வைரவர் தலங்கள் – ஒரே நாளில் 9 கோயில்கள் - 2

என் தங்கைக்குப் பரிகாரம் என்று சொல்லப்பட்ட, திருப்பத்தூர் மற்றும் சுற்றியுள்ள சில சிவன் கோயில்கள் / பைரவ வழிபாடு என்று சென்றதைப் பற்றி சென்ற பதிவில் (====>பகுதி 1<====)  ஒரே நாளில் 9 கோயில்கள் அவர் சொன்ன வரிசையில் செல்லச் சொல்லியிருந்தார் என்றும் சொல்லியிருந்தேன். அந்த 9 கோயில்களில் முதல் இரு கோயில்கள் ( 1. திருமெய்ஞானபுரி/ தி-வைரவன்பட்டி - காலபாலபைரவர், 2. திருத்தளிநாதர் கோயில் - யோகபைரவர்) பற்றி முதல் பகுதியில் சொல்லியாச்சு. தொடர்ச்சி இதோ. நாங்கள் சென்ற கோயில்கள் நாட்டுக்கோட்டை நகரத்தார்களின் அம்சமான பராமரிப்பில் இருப்பவை. 

சிறு குறிப்பு வரைக என்று தேர்வில் வருமே அது போன்றுதான் ஓவ்வொரு கோயில் பற்றியும் சொல்லியிருக்கிறேன்!!!

எல்லாக் கோயில்களுக்கும் எங்களை நல்லபடியாக அழைத்துச் சென்ற நல்ல உள்ளம் கொண்ட ஆட்டோக்காரர் இவர்தான். 

***************

வரிசையில் மூன்றாவது கோயில்

3 - வைரவன்பட்டி - ஓம் ஸ்ரீ வயிரவர் கோயில். 

இரண்டாவதாகச் சென்ற திருத்தளிநாதர் கோயிலில் இருந்து அதே சாலையில் 7.1 கிமீ தூரம்.

இறைவன் - வளர் ஒளிநாதர்; இறைவி - வடிவுடை அம்பாள்.  இக்கோயில் பைரவர்/வைரவர் வழிபாட்டிற்கான முக்கியத்தலமாகக் கருதப்படுகிறது. இங்கு பைரவர் - வயிரவர் என்றும் வைரவர் என்றும் அழைக்கப்படுகிறார். இங்கு வழிபாடுகளை முடித்துக் கொண்டு 4 வது கோயில் பிள்ளையார்பட்டிக்குச் சென்றோம்.  

*******************

4 - பிள்ளையார்பட்டி 

மூன்றாவதாகச் சென்ற ஓம் ஸ்ரீ வைரவர் கோயிலில் இருந்து மிக அருகில் 2.1 கிமீ தூரம்தான்.

குடைவரைக் கோயில். வடதிசை நோக்கிய கற்பகவிநாயகர். மற்றொரு பெயர் தேசி விநாயகர்.  வைரவர் ஈடுபட்ட போரில் அவருக்கு விநாயகர் உதவியதால் வைரவன்பட்டி கோயிலுக்கு அருகிலேயே பிள்ளையார்பட்டி அமைந்ததாகவும் சொல்லப்படுகிறது. நாட்டுக்கோட்டை நகரத்தார்களின் மேற்பார்வையில் ஆகம முறை தவறாமல் வழிபாடு நடைபெறுகிறது.

பிள்ளையார்பட்டி கோயில் திருக்குளம் படங்கள்

கோயில் உள்ளே செல்லும் பாதை - பக்கவாட்டில்தான் திருக்குளம்

******************

5. நேமம் ஜயங்கொண்ட சோழீ/ளீஸ்வரர் கோயில். 

நான்காவதாகச் சென்ற  பிள்ளையர்பட்டி கோயிலில் இருந்து 6.7 கிமீ தூரம் 

இறைவன் - ஜயங்கொண்ட சோளீஸ்வரர்; இறைவி - சௌந்தரநாயகி: மேற்கு நோக்கிய பைரவர்; தீர்த்தம் சோழ தீர்த்தம் அது சைடில் இருக்கிறது. ஆட்டோகாரர் இந்த வாயிலில் நிறுத்தியதால் அதை படம் எடுக்க முடியவில்லை.  சிவன் மன்மதனை வெற்றி கொண்ட ஸ்தலம். அழகான சிற்பங்கள் உடைய பெரிய கோயில். ஆனால் சிற்பங்கள் படங்கள் எடுக்க முடியவில்லை என்பதை ஏற்கனவே சொல்லிவிட்டேன். 

பைரவர் சன்னதி மட்டுமே தொழுததால் சுற்றி மற்ற சன்னதிகள் பார்க்க முடியலை

இச்சன்னதியின் பக்கவாட்டில் இப்படிச் சிலர் பெரிய குடுவை போன்று செய்து கொண்டிருந்ததைப் பார்த்ததும்  ஆவல்.  நான் வேறு சொல்லியிருந்தேன். இடிக்கப்படுவது அஷ்டபந்தனம் என்று ஜெ கே அண்ணா சொன்னார். தகவலுக்கு மிக்க நன்றி ஜெ கே அண்ணா.  மண், பல மூலிகைகள் எல்லாம் போட்டு இடித்து எண்ணை எல்லாம் கலந்து கலசம் வடிவில் பிடிக்கிறார்கள். படங்களைப் பார்த்தாலே தெரியும். எனக்கு இன்னும் விளக்கமாகத் தெளிவாகத் தெரிந்து கொள்ளும் ஆவல். ஆனால், நேரமின்மை மட்டுமின்றி மூன்றாவது காது வேற உண்டே!  பழகிய குரல்களில் பிரச்சனை இல்லை ஆனால் பழகாத குரல்களில் வட்டார மொழிப் பேச்சு Clarity of the speech சிரமம் எனக்கு!  என்ன ஒரு சங்கடம் பாருங்க!

 இடப்பக்கம் உள்ளவர் தராசு வைச்சிருக்கார் தெரிகிறதா? அதில் இடித்ததில் இருந்து அளந்து கொடுக்க  வலப்பக்கம் உள்ளவர் அதை உருட்டி வடிவம் செய்கிறார். செய்யப்பட்ட அஷ்டபந்தனம் மூலையில். 

நடுவில்  உள்ள பெரியவர் உருண்டை மேலே நடுவில் ஒரு அச்சு இடுகிறார் தெரிகிறதா? அது எதற்கு என்று தெரியலை.

சரி, அடுத்த கோயிலுக்குப் போகலாம் வாங்க...

**********************

6. காரைக்குடி (மீனாட்சி) சுந்தரேஸ்ஸ்வரர் கோயில் - ஐந்தாவதாகச் சென்ற நேமம் கோயிலில் இருந்து 13.4 கிமீ தூரம்

இறைவன் - சுந்தரேஸ்வரர்; இறைவி - மீனாட்சி; ஊர்த்வ தாண்டவத்தில் பைரவரும் சிவனும்.  உள்ளூரில் நகரத்தார் சிவன் கோயில் என்றே சொல்லப்படுகிறது. கலைநயம் எல்லாம் செட்டிநாட்டுக் கலை வடிவங்கள். 

என்ன அழகான கோபுரம் வாயில் பாருங்க!! உள்ளே நேரே சென்றால் மகா மண்டபம். படத்தில் தெரிகிறது இல்லையா. மண்டபத்தில் மிக அழகான தூண்கள் உண்டு...

கீழே உள்ள படங்கள் - திருச்சுற்றில் க்ளிக்கியவை - சன்னதிகளின் கோபுரத்துடன் மூலவர் சன்னதி கோபுரம்

கோயிலை விட்டு வெளியே வரும் போது வலப்புறம் - கோயிலை நோக்கி என்றால் இடப்புறம் இருக்கிறது இதோ கீழே உள்ள 108 பிள்ளையார் சன்னதி. இதன் பின்னில், கோயிலின் பக்கவாட்டில் சுந்தரேஸ்வரர் கோயிலின் திருக்குளம்.   

அழிக்கம்பிகள் ஊடே கேமராவின் விழியை மட்டும் மெதுவாக வைத்து  இடப்புறம் நடுப்புறம் வலப்புறம் என்று எடுத்த படங்கள் கீழே

இக்கோயில்கள் வரிசையில் அடுத்ததாகச் சென்ற  7, 8, 9 வது கோயில்கள் பற்றிய சிறு குறிப்புகளுடன் அடுத்த பதிவில் நிறைவு பெறும்.

----கீதா