போக்குவரத்துக் கழகப் பேருந்து சுற்றுலா – மூணார் – 2

 

இந்த இடங்கள் நாங்கள் செல்லவில்லை. ஆனால் இவை எல்லாம் இங்கு எல்லோரும் பார்க்க வேண்டிய இடங்கள் என்று வாசிப்பவர்களுக்கான குறிப்புகள் படங்களாய்

அடுத்த நாள் காலை 8 மணிக்கு எல்லோரும் கிளம்பி தயாராக இருக்க வேண்டும் என்று நடத்துனர் சொன்னதால் தயாரானோம். மூணாறில் பார்த்தே தீர வேண்டும் என்று எல்லோரும் பார்க்க நினைக்கும் இடங்களான மாட்டுபெட்டி அணை, இரவிகுளம் தேசியப் பூங்கா, ஆனைமுடி, குண்டலா, ஆட்டுக்கல் நீர்வீழ்ச்சி, Echo Point – எதிரொலி முனை, டாப் ஸ்டேஷன் – Top Station, டாட்டா தேயிலை அருங்காட்சியகம், சுப்பிரமணியர் கோயில் என்று பல உள்ளன. ஆனால், நாங்கள் வேறு சில அருமையான இடங்களுக்குத்தான் போனோம்.

கே எஸ் ஆர் டி சி பேருந்து நிலையத்திற்கு முன் விளையாட்டு கவுன்சிலின் கட்டிடமும் மைதானமும். (காணொளியில்) அங்கு ஓடும் பயிற்சி செய்யும் பலர். இப்படி, ஒரு மைதானத்தை அங்கு உருவாக்கியிருப்பது மனதிற்கு இனிமையாய் இருந்தது. இல்லையேல் அங்கும் கான்க்ரீட் காடுகள் நிறைந்திருக்கும்.

கொச்சி - தனுஷ் கோடி நெடுஞ்சாலையில் அருமையான  காட்சிகள்

மலையின் பாதியிலிருந்து அடிவாரம் வரை பச்சைக் கம்பளம் விரித்தாற் போல்

சமீபத்தில் இடப்பட்ட கொச்சி – தனுஷ்கோடி நெடுஞ்சாலையில் அருமையான காட்சிகளைக் காணும் இடங்கள் - View Points – உள்ளன. அங்கிருந்து பார்க்கையில் மலையின் பாதியிலிருந்து அடிவாரம் வரை பச்சைக் கம்பளம் விரித்தாற் போல் அருமையான காட்சிகளைக் கண்டோம்.

தங்கையன் குகை/மலையில் கள்ளன் குகை

அதன் பின் பயணமான வண்டி தங்கையன் குகைக்கு (மலையில் கள்ளன் குகை)  அருகில் நின்றது. 70 ஆண்டுகளுக்கு முன் மூணாறில் வாழ்ந்திருந்த தங்கையன் வாழ்ந்த குகை. கள்வனாக்கப்பட்டுச் சுட்டுக் கொல்லப்பட்டத் தங்கையன். வீரப்பன், மலையூர் மம்பட்டியான் போல், தங்கையனுக்கும் ஒரு கதை இருந்திருக்கலாம். தங்கையனைத் தொட்டறிந்த இந்தக் குகைக்குத் தெரியும், தங்கையனின் உண்மையான வாழ்க்கை வரலாறு.

குகைக்கு அருகே கொச்சி – தனுஷ்கோடி நெடுஞ்சாலை பணியின் போது ஒரு நிலச்சரிவு நிகழ்ந்து பலரது உயிரும் பலியானது. எப்படியோ அதனருகே இருந்த தங்கையன் குகைக்குச் சேதமேதும் ஏற்படவில்லை. அதனருகே ஒரு டீக்கடை. ரதீஷ் சங்கர் எனும் பெயருடைய ஒரு இளைஞரின் டீக்கடை. மூணாறுக்குக் குடியேறிய தமிழினத்தின் மூன்றாவது தலைமுறை. அருமையாக மலையாளமும் தமிழும் பேசினார். அவரது தாய் பிறந்ததே மூணாறில்தானாம்.

நான் படித்த பள்ளி - இப்போதைய படம் - நன்றி ஃபேஸ்புக்

நான் 70 களில் போடியில் ZKM பள்ளியில் பயின்ற போது, துரை விடுதி (முன்பு வெள்ளைக்காரர் ஒருவர் நடத்திவந்த ஒரு விடுதி) அரசு விடுதியில் தங்கி என்னுடன் படித்த சண்முகய்யா, முருகேசன் போன்றவர்கள் மனத்திரையில் தோன்றினார்கள். திருநெல்வேலி வட்டார வழக்குத் தமிழில் பேசும் நல்ல நண்பர்கள். அவர்களது பெற்றோர்கள் மூணாறு எஸ்டேட்களில் பணிபுரிந்தவர்கள். அப்படிப்பட்டவர்கள் எல்லோரும் இங்கேயே தங்கியிருந்திருக்க வேண்டும். இப்போது அதன் விளைவாகத்தான் பதினாயிரக் கணக்கான தமிழ்க்குடிகள் இன்று மூணாறில் இருக்கிறார்கள். அதனால்தான் அங்கிருந்து தமிழினத்தைச் சேர்ந்த ஒரு எம் எல் ஏ நிரந்தரமாகத் தேர்ந்தெடுக்கப்படுகிறார்.

பெரியகானல் நீர்வீழ்ச்சி இடப்புறம் உள்ள படத்தில் அது விழும் பாறை சற்றே தெரிகிறதா? படத்தைப் பெரிது பண்ணிப் பார்த்தால் தெரியும். தள்ளி ஒரு கார் நிற்கிறதே அந்த இடத்தில்......வலப்புறம் இடத்தில் தண்ணீர் கொஞ்சமாக வீழ்வது படத்தின் இடப்புறம் கோடாகத் தெரியும்

தங்கையன் குகையைக் கண்டபின் பெரியகானல் நீர்வீழ்ச்சியைக் கண்டு களித்தோம். கோடையானதால் நீர்வீழ்ச்சியில் தூர நின்று காணுமளவு நீரில்லை. ஆனால், அதன் இடப்புறம் தெளிந்த நீரோடை. சுத்தமான அந்நீர் குடிநீராகப் பயன்படுத்தப்படுகிறது. நாங்களும் அதைக் குப்பிகளில் நிரப்பி எடுத்துக் கொண்டோம்.

ஆனையிரங்கல் அணை

அதன்பின் ஆனையிரங்கல் எனும் பெயருடைய அணையை சென்றடைந்தோம். பார்க்கும் போது கைவிடப்பட்ட ஒரு அணை போல் காட்சியளித்தது. நீரைத் தேக்கி வைத்து படகோட்டும் வசதிகள், மற்றும் பூங்காக்களை அமைத்தால் நல்ல சுற்றுலா மையமாக்க முடிகின்ற இடம்.

சிறிது தூர பயணத்திற்குப் பின் Chirackal Spices எனும் ஒரு நிறுவனத்தின் முன் நின்றது. Spices – மசாலா நறுமணப் பொருட்கள் (ஏலக்காய், கிராம்பு முதலியன) வாங்கலாம் என்று நடத்துனர் சொன்னார். 

அருகே இருந்த ஏலக்காய்த் தோட்டம் என்னை ஈர்த்தது. ஏலச் செடி, பூக்கள், காய்களைக் கண்டிராத நம் நட்புகளுக்குக் காண்பிக்க பல நாட்களாக ஆவலாய், அதற்கான நேரம் வாய்க்காமல் இருந்த எனக்குப் பழம் நழுவி பாலில் விழுந்தது போல் இருந்தது. அதிகம் வீடுகள் இல்லாத நெடுஞ்சாலை என்பதால், ஏலக்காய்களை யாரும் பறிக்காமல் பாதுகாக்க வேலி அமைத்திருந்தார்கள்.

ஏலத்தோட்டம் இப்படித்தான் பெரிய மரங்களை நிழலுக்காகத் தன்னுடன் வளர அனுமதிக்கும்

ஏலத்தோட்டத்தை களை எடுத்து சுத்தமாக வைத்துக் கொள்ள வேண்டும். 

ஏலம் பூக்கும் போது எப்போதும் பூச்சரம் வேருக்கு அருகிலிருந்து மேல் நோக்கி நீண்டு வரும்

ஏலத்தோட்டம் இப்படித்தான் பெரிய மரங்களை நிழலுக்காகத் தன்னுடன் வளர அனுமதிக்கும், ஏலத்தோட்டத்தை களை எடுத்து சுத்தமாக வைத்துக் கொள்ள வேண்டும். (காணொளியில் நன்றாகத் தெரியும்) ஏலம் பூக்கும் போது எப்போதும் பூச்சரம் வேருக்கு அருகிலிருந்து மேல் நோக்கி நீண்டு வரும். அதிலுள்ள பூக்கள் காயாகி மாறுவதைப் பார்க்கிறீர்கள், இங்கு படத்தில், காணொளியிலும் தெரியும். காயின் நுனியில் பூவின் பாகம் தெரிகிறதா? முதிர்ந்த காயைப் பறித்து வெயிலிலும் அதன் பின் பரண் கட்டி அடியில் தீமூட்டிக் காய வைத்தும் நாம் உபயோகிக்கும் ஏலக்காய் வடிவில் ஆக்கித்தான் ஏல விவசாயிகள் விற்பார்கள்.

 

காற்றாலைகள் - சதுரங்கப்பாறை

அதன் பின் பூப்பாறை வழியாக சாந்தாம்பாறையை அடைந்து அங்கு மதிய உணவு உண்டோம். அதன் பின் வண்டி சதுரங்கப்பாறை எனும் இடத்தை அடைந்தது. காற்றாலைகள் நிறைந்த ஓரிடம். 

சதுரங்கப்பாறை  இடத்திலிருந்து பார்த்தால் கீழே தேவாரம் எனுமிடம்

தூரத்தில் நான் பிறந்த ராசிங்கபுரத்திற்குக் கிழக்கே உள்ள மல்லிங்கேஸ்வரர் குன்று. 

நான் அங்கேயே நின்று நான் பிறந்த மண்ணை ஏக்கத்துடன் பார்த்துப் பூரிப்படைந்து கொண்டிருந்தேன்.

அங்கிருந்து பார்த்தால் கீழே தேவாரம் எனுமிடம். மதிகெட்டான்மலை. தூரத்தில் நான் பிறந்த ராசிங்கபுரத்திற்குக் கிழக்கே உள்ள மல்லிங்கேஸ்வரர் குன்று. அருமையான காட்சி. அதுதான் சதுரங்கப்பாறை View Point. அங்கிருந்து உயர்ந்த ஒரு இடத்திற்குச் செல்ல ஜீப் இருக்கிறது. ஒருவருக்கு ரூ 200. சிலர் அங்கு போனார்கள். நான் அங்கேயே நின்று நான் பிறந்த மண்ணை ஏக்கத்துடன் பார்த்துப் பூரிப்படைந்து கொண்டிருந்தேன்.

பிறகு வண்டி சாந்தாம்பாறையிலிருந்து சேனாபதி, ராஜகுமாரி, ராஜாக்காடு வழியாகப் பயணமானது. அந்தப் பெயர்களைப் பாருங்கள்! அரசர், அரசி, தளபதி போன்றோர்களின் பெயரைக் குறிக்கும் இடங்கள். அதற்கும் வரலாறு இருக்க வேண்டும்.

பொன்முடி தொங்கு பாலம்

தொங்கு பாலத்தின் கீழே பாறைகள் நிறைந்த இடங்கள். தூரத்தில் தெரியும் பொன்முடி அணையிலிருந்து கசியும் நீர்

பின், வண்டி பொன்முடி தொங்கு பாலத்தின் அருகே நின்றது. பாலத்தில் வாகனங்களுக்கு அனுமதியில்லை. 50 பேருக்கு மேல் பாலத்தில் நடக்கவும் அனுமதி இல்லை. தொங்கு பாலத்தின் கீழே பாறைகள் நிறைந்த இடங்கள். தூரத்தில் தெரியும் பொன்முடி அணையிலிருந்து கசியும் நீர். காண்பதற்கரிய காட்சி.

அணையை ஒட்டி செங்குத்தான, ஆபத்தான சரிவு

அதன் பின் பொன்முடி அணையை அடைந்தோம். மூணாறிலிருந்து 25 கிமீ தூரத்தில் இருக்கிறது. அணையை ஒட்டி செங்குத்தான, ஆபத்தான சரிவு. பொன்முடி அணை, 1963ஆம் ஆண்டில், கேரளாவின் மிக நீளமான ஆறாக விளங்கும் பெரியார் ஆற்றின் துணை ஆறான பன்னியார் ஆற்றின் குறுக்கே கட்டப்பட்ட ஒரு நீர்மின் திட்டம். பெரியார் ஆற்று பள்ளத்தாக்கில் மூணாறு அருகே உள்ளது. படகுச் சவாரி செய்வதற்கான இடம் கொஞ்சம் தள்ளி இருப்பதால் அதற்குத் தனியாக ஜீப்பில் தான் செல்ல வேண்டும். நாங்கள் சென்ற சமயம் கோடைகாலம் என்பதால் அணையில் தண்ணீர் வரத்தும் குறைவாக இருந்ததால் சுற்றுலா பயணிகளைக் கவரும் படகுச் சவாரி நிறுத்திவைக்கப்பட்டிருந்தது.

மூடுபனி அந்த மலைகளையும் அடிவாரத்தையும் மெதுவாக மூடுவது கண்கொள்ளாக் காட்சி

அணைக்குக் கீழே இரு புறமும் அடுக்கிய கற்களுக்கு இடையே முளைத்த செடிகளைப் பார்த்த போது இதுவரை கண்டிராத ஓர் அழகு. 

அருமையான காட்சிகள். இயற்கை அன்னை நமக்குக் காண்பிக்கும் அதிசயங்கள் என்றுதான் சொல்ல வேண்டும். தூரத்திலிருந்து அணைக்குக் கீழே இரு புறமும் அடுக்கிய கற்களுக்கு இடையே முளைத்த செடிகளைப் பார்த்த போது இதுவரை கண்டிராத ஓர் அழகு. மூடுபனி அந்த மலைகளையும் அடிவாரத்தையும் மெதுவாக மூடுவது கண்கொள்ளாக் காட்சி. (இப்பகுதியை காணொளியில் முழுவதும் நன்றாகப் பார்க்கலாம்)

சுற்றுலா முடிந்து நிலம்பூர் நோக்கிப் பயணம் - நடுவில் நடத்துனர்

பொன்முடி அணையையுடன் எங்கள் சுற்றுலா இனிதே நிறைவுற்றது. இந்த மலைகளின் மீது படர்ந்திருந்த பசுமையைப் போன்று பசுமை மாறா நினைவுகளைச் சுமந்து கொண்டு, ஆடிப்பாடி நாங்களும், எங்களைச் சுமந்து கொண்டு KSRTC பேருந்தும் நிலம்பூர் நோக்கிப் பயணமானது. அதிகாலை 3 மணிக்கு அதே நிலம்பூர் பேருந்து நிலையத்தை அடைந்து வீடு நோக்கிப் பயணமானோம். நன்றி! வணக்கம்!

https://youtu.be/zI1pFGcP1ps
நேரம் இருந்தால், முடிந்தால் பாருங்கள். 13:36 நிமிடங்கள். பதிவில் சொல்லப்பட்டிருக்கும் இடங்களின் காட்சிகள் காணொளிகளாக

------துளசிதரன்