சில்லு சில்லாய் – 12 - செயற்கை நாணல் படுகை – லால்குடி/திருத்தவத்துறை – ஞானப்பழத்தைப் பிழிந்து

சில்லு – 1 – கட்டப்பட்ட ஈரநிலம், செயற்கை நாணல் படுகை

(என் ஆர்வ மிகுதியில் எழுதியிருக்கும் சில்லு 1 பகுதி கொஞ்சம் பாடம் போன்று இருக்கலாம். வாசிக்கப் பிடிக்காதவர்கள் தவிர்த்துவிடலாம்.)

செயற்கை நாணல்படுகை பற்றி அடுத்த பதிவில் சொல்கிறேன் என்று முந்தைய பதிவுகளில் சொல்லியிருந்தேன். ஸ்ரீராமும் அது எப்படி இருக்கும் என்று அறிய ஆவல் என்று சொல்லியிருந்தார். செயற்கை நாணல்படுகை பற்றிச் சொல்லும் முன் ஈரநிலங்களின் அவசியம் பற்றி சில குறிப்புகள்.

ஈரநிலம் என்றால் உங்களுக்குத் தெரிந்திருக்கும்தான். நீர் நிலைகள் இயற்கையாக அல்லது செயற்கையாக நன்னீரைக் கொண்டிருக்கும் ஆற்றின் அருகில் இருக்கும் நிலங்கள் அல்லது உப்பு நீரைக் கொண்டிருக்கும் கடலுக்கு அருகில் இருக்கும் இடங்கள், கடல் நீரும் நன்னீர் கொண்ட ஆறுகள் கலக்கும் இடங்களான முகத்துவாரங்கள், சதுப்பு நிலங்கள், ஏரிப்படுகைகள், எல்லாமே ஈரநிலங்கள் (Wet lands) என்று சுற்றுச் சூழலியலில் சொல்லப்படுகிறது. இவற்றின் கரையோரங்களில் அல்லது நடுவில் திட்டுகளில் நாணல்கள், நீர்த்தாவரங்கள் வளர்கின்றன.

இவை தற்காலிகமாகவும் இருக்கலாம் அல்லது நிரந்தரமாகவும் நீரால் மூடப்பட்டிருக்கலாம். பெரும்பாலும் இந்த ஈரநிலங்களில் ஆழம் குறைவாகத்தான் இருக்குமாம். கடல் நீர் நிலத்தில் உட்புகுந்து 6 மீட்டர் அளவு ஆழம் இருப்பவையும் உவர்ப்பு நீர் ஈரநிலங்கள் என்று வரையறுக்கப்படுகின்றன. 

பல சதுப்புநிலங்கள், ஈரநிலங்கள் குப்பைக்கிடங்குகளாக மாறி வருவது வேதனை. சென்னையில், நான் இருந்தவரை குப்பைக் கிடங்காக இருந்த பல பறவைகளுக்கு வாழ்வாதாரமாகப் பல்லுயிர் ஓம்பும், பள்ளிக்கரணை நன்னீர் சதுப்புநிலம் தற்போது ராம்சர் சாசனம் (ராம்சர் சாசனம்-Ramsar Convention - என்பது, ஈரநிலங்களின் பாதுகாப்பு தொடர்பான ஒரு பன்னாட்டு ஒப்பந்தம்) கீழ் வந்துள்ளதால் மினி சொர்கமாகப் பூங்காவுடன் நடைபாதையுடன் மிளிர்கிறதாமே! பறவைகள் சீசனில் சென்னை விசிட். கேமாராவும் கையுமாக உள்ள புகுந்துர வேண்டியதுதான்!

இந்த ஈரநிலங்கள்/சதுப்புநிலங்கள் ஏன் அவசியம்? அதிக மழை பெய்யறப்ப வெள்ளப் பெருக்கு ஏற்படாமல் பெருகி ஓடும் நீரைத் தடுத்து குளங்கள், வயல்வெளிகள், பிற நீர் நிலைகளில் கொண்டு சென்று தேக்குவது முதல் சதுப்பு நிலங்களில் வடியவைப்பது வரை பல நன்மைகள். 

சுனாமி வந்தப்ப சிதம்பரம் பக்கம் இருக்கும் பிச்சாவரம் சதுப்பு நிலக்காடுகள் – அலையாத்திக் காடுகள் (Mangrove forest - உலகிலேயே இரண்டாவது பெரிய சதுப்புநிலக்காடு. முதலாவது கங்கைக்கரை சுந்தரவனக்காடு - கோடியக்கரை அருகில் இருக்கும் சதுப்புநிலக் காடுகள் அலைகளைத் தடுத்து ஊருக்குள் அதிக பாதிப்பு இல்லாமல் செய்தவை.

ஈரநிலங்கள் நீர்த்தாவரங்களுடன் இருப்பதால் அவை மண்ணில் இருக்கும் இரசாயனங்கள் உலோகங்களைப் பிரிக்கும் வேலையும் செய்கின்றன. சின்ன சின்ன ஈரநிலங்கள் நீர்த்தாவரங்கள் கூட பல உயிர்களுக்கு வாழ்விடமாகவும், உணவு உற்பத்திக்கும் உதவியாக இருப்பதோடு கழிவு நீரையும் சுத்தப்படுத்துகின்றன என்பதால்தான் ஈர நிலங்களும் அதைச் சுற்றி வளரும் நீர்த்தாவரங்களும் மிக முக்கியம். ஆனால் வேதனையான விஷயம், இந்த ஈரநிலங்கள் தொழிற்சாலைக் கழிவுகளாலும், ஆக்ரமிக்கப்பட்டு வீடுகள் கட்டப்படுவதாலும் பேரழிவைச் சந்தித்து அழிந்து வருகின்றன. (மாசடைவதற்குச் சிறந்த? உதாரணம் தமிழ்நாட்டு நொய்யல் ஆறு. கோயம்புத்தூரையே தாண்டுவதில்லை!) 

இயற்கையாக இருக்கும் நீர் நிலைகளை இப்படிக் கூடக்கொஞ்சம் வெட்டி விட்டு சீர்படுத்தி நீர்த்தாவரங்களை வளர்க்கிறார்கள் - வெளிநாடுகளில். பூஸார், அவர் பகுதியில் இருக்கும் பூங்கா பற்றிப் போட்டிருந்த பதிவில் இப்படியான ஒன்று என்பது என் அனுமானம்

கட்டப்பட்ட ஈரநிலங்கள்/கட்டப்பட்ட சதுப்பு நிலங்கள் என்பவை தாவரங்கள், மண் மற்றும் உயிரினங்களின் இயற்கையான செயல்பாடுகளைப் பயன்படுத்தி செயற்கையாக நீர்நிலைகள் – அதாவது குட்டைகள், குளங்கள், ஏரிகள் போன்று மழை நீர் வெள்ள நீரைச் சேகரித்து அவற்றை வெட்டி விட்டு நீரோடைகள் அமைத்தல், போன்ற செயல்பாடுகள். கட்டப்பட்ட ஈரநிலங்கள் என்றாலே செயற்கை நாணல்படுகைகளையும் உள்ளடக்கியவைதான். இவை நாணல்வயல்கள் என்றும் சொல்லப்படுவதுண்டு.

விவசாய நிலங்களுக்குச் செல்லும் நீர், தேக்கப்படும் மழைநீர், புயலினால் ஏற்படும் வெள்ள நீர், வீடுகளின் கழிவுநீர், தொழிற்சாலைக் கழிவுநீர் இவற்றை இரண்டாம் நிலையாகச் சுத்திகரிப்பு செய்ய பயன்படுகின்றன இந்தக் கட்டப்படும் ஈரநிலங்கள்.

சமீப வருடங்களில், சுற்றுச் சூழலுக்கு உகந்த நீர் சுத்திகரிப்பு முறை என்று செயற்கை நாணல் படுகைகளை நிறுவுவதைக் குறிப்பிடுகின்றனர் சுற்றுச்சூழலியலாளர்கள்.

இயற்கை சதுப்பு நிலங்கள், ஈரநிலங்களைப் போலவே, இந்தக் கட்டப்பட்ட ஈரநிலங்களும் ஒரு Biological வடிகட்டிகளாகச் செயல்படுகின்றன மற்றும் நீரிலிருந்து பலவிதமான மாசுபடுத்திகளை - கரிமப் பொருட்கள், நோய்க்கிருமிகளான பாக்டீரியா வைரஸ்களை ஓரளவு அகற்றவும் பயன்படுகின்றன என்றும், நோய்க்கிருமிகளை நீக்குவதில் மேற்பரப்பு ஈரநிலங்களை விட நிலத்தடி ஈரநிலங்களின் பங்கு அதிகம் என்றும் சுற்றுச்சூழலியல் ஆய்வுகள் சொல்கின்றன.

மற்றொரு புதியதொரு கோணமும் சொல்லப்படுகிறது. நகரங்களின் பெருக்கத்தை ஒழுங்குபடுத்த கட்டுப்படுத்த பரிந்துரைக்கப்படும் "சிறந்த மேலாண்மை நடைமுறைகளில்" ஒன்றாகக் கட்டப்படும் சுத்திகரிப்பு ஈரநிலங்களைச் சொல்கின்றனர். இது வேலைக்காவுமா? அழகான இயற்கை ஈரநிலங்கள் அத்தனையும் இப்ப கட்டிடமாக இருக்கே. அதான் வெள்ளம் புகுது!

பல நீர்நிலைகளை, மரங்களை அழித்துக் கட்டப்பட்ட வீடுகள், குளங்களில் ஆறுகளில் கட்டப்பட்ட பேருந்து நிலையங்கள், சென்னை நகருக்குள் ஓடும்? ஒரு காலத்தில் அழகாக இருந்த பக்கிங்க்ஹாம் வாய்க்கால் மேல் கட்டப்பட்ட பறக்கும் ரயில் பாலம், பங்களூரில் ஏரிகளைச் சுற்றி இருக்கும் அடுக்குமாடிகள் மற்றும் அவற்றின் கழிவு நீர் ஏரிகளில் கலப்பது என்று பலவற்றைச் சொல்லலாம். சென்னை வெள்ளம் நினைவில் இருக்க வேண்டும். விடுங்க…நாம சொல்லி என்னத்த ஆகப் போகுது? இதை எழுதும் நேரத்தில் ஏதேனும் ஒரு ஈரநிலம் துண்டு போடப்படாமல் இருந்தால் சரி. 

சரி செயற்கை நாணல் படுகை எப்படி உருவாக்கப்படுகின்றது?

கட்டப்பட்ட ஈரநிலங்கள்

கட்டப்பட்ட ஈரநிலங்களில் இரண்டு முக்கிய வகைகள் உள்ளன: நிலத்தடி நீர் ஓட்டம் மற்றும் மேற்பரப்பு நீர் ஓட்டம். நாணல் படுகைகள் என்பது நீண்ட மெல்லிய நாணல், நீர்த்தாவரப் படுகைகள், (Phragmites, Astralis, Typha Latifolia-Cattails சம்பு நீர்த்தாவரம் true Bulrush/Scirpus Lacustris, மூங்கில், ஆகாயத்தாமரை, வெர்மிகுலைட்) மண்ணிலோ அல்லது சரளைக்கற்கள் பாத்தியிலோ நடப்படும் இத்தாவரங்கள் (இங்கிலாந்தில் அவை பொதுவாக 'ரீட் படுகைகள்' (Reed Beds) என்று குறிப்பிடப்படுகின்றன) - அசுத்தங்களை அகற்றுவதில் முக்கிய பங்கு வகிக்கின்றன. அதனால் மணல் மற்றும் சரளைக் கற்களைக் கொண்ட வடிகட்டி படுகைக்கு முக்கியப் பங்கு உண்டு. India's first constructed wetland was installed at Sainik School, Bhubaneshwar in the State of Orissa; planted with two types of macrophytes, viz. Typha latifolia (சம்பு வகை) and Phragmites karka.

சில கட்டப்பட்ட ஈரநிலங்கள் அந்தந்த ஊரின் அல்லது வலசைப் பறவைகள், விலங்குகளின் வாழ்விடமாகவும் இருக்க வாய்ப்புண்டு.

                                        செங்குத்து                              குறுக்குவாட்டில்

நிலத்தடி ஓட்டம் இருக்கும்படியாகக் கட்டப்பட்ட ஈரநிலங்கள் சரளை மற்றும் மணல் படுகையின் வழியாகக் குறுக்காக அல்லது செங்குத்தாக நீர் ஓட்டம் கொண்டதாக வடிவமைக்கப்படுகின்றன. குறுக்கே ஓட்டம் கொண்ட அமைப்புகளை விட செங்குத்து ஓட்ட அமைப்புகளுக்கு சிறிய இடமே தேவை.

இப்படியும் கட்டப்பட்ட ஈரநிலங்கள் 

படுகையில் பொதுவாக திறந்த நீர்மேற்பரப்பு இருக்கும், இது கொசுக்களின் இனப்பெருக்கத்தை விளைவிக்கும் என்பதால் நேரடியான மண் நாணல் படுகைகள் பொதுவாக விரும்பப்படுவதில்லை. மண் சரளைக்கற்கள் படுகையே விரும்பப்படுகிறது இவை மேற்புறத்தில் இருப்பதால். நடப்பட்ட செடிகளின் வேர்கள் நீரைத் தேடி சரளைக்கற்களின் ஊடே சென்று நீரை அடைகின்றன.

நன்கு திட்டமிடப்பட்டால், நாணல், நீர்த்தாவரப் படுகைகள் பல்லுயிர் பெருக்கத்தை ஆதரிப்பது மட்டுமல்லாமல், மாசு பிரச்சினைகளைத் தீர்க்கவும், கழிவுநீர் அமைப்பிற்கும் உறுதுணையாக இருக்கும். மேலை நாடுகளில் இவை அதிகமாகப் பயன்படுத்தப்படுகின்றன. 

நம் நாட்டிலும் CSIR ன் NEERI தொழில்நுட்பம் இவற்றை உருவாக்குகிறது என்பது எனக்கு மகிழ்ச்சியைக் கொடுக்கிறது.

                                                           courtesy - Saleem India blog

Constructed Wetlands for Treating Wastewater in cities

The technology named ‘Constructed Wetlands for Treating Wastewater’ is ideal for the treatment of domestic and municipal wastewater in cities. It is an organic wastewater treatment system that mimics and improves the effectiveness of the processes that help to purify water similar to naturally occurring wetlands.

பெப்ரவரி 2ஆம் திகதி சர்வதேச ஈரநிலங்கள் தினம் கொண்டாடப்படுகின்றது. சுருக்கமா சொல்லணும்னா, ஈரநிலங்கள், காடுகள், மரங்கள் செடிகளைப் பாதுகாக்க வேண்டும் என்பதுதான். 

சில்லு 2 - திருத்தவத்துறை – லால்குடியானது எப்படி?

தமிழ்நாட்டுக் கிராமங்களின் பெயர்களைத் தமிழில் எழுதிய வேலை குறித்து எழுதிய பதிவில், பண்டைய தமிழ் வரலாறு மற்றும் தேவாரம், திருவாசகம், பிரபந்தம், போன்றவற்றில் சொல்லப்படும் அழகான தமிழ்ப்பெயர்களை அப்படியே இப்போதும் வைக்கலாமே என்ற என் ஆவலையும் சொல்லியிருந்தேன். அப்படி அறிந்து கொண்ட ஒரு விஷயம். அப்பர் சுவாமிகள் அருளிய பண்டெழுவர் “தவத்துறை” என்ற சொற்றொடரில் உள்ள ‘தவத்துறை’ அதன் பின் வந்த சான்றோர்களால் ‘திரு’ சேர்க்கப்பட்டு திருத்தவத்துறை என்றே பல்லாண்டுகளாகச் சொல்லப்பட்டு வந்த அழகான பெயர்.

தமிழகத்தில் நிகழ்ந்த படையெடுப்புகளின் போது திருத்தவத்துறையை நெருங்கிய நேரத்தில் தூரத்தே இருந்து ஒரு கோபுரத்தைக் கண்ட படைத்தலைவனின் கண்களுக்கு அச்சமயம் சப்தரீஷீஸ்வரர் திருக்கோவில் கோபுரத்தில் சிவப்பு வண்ணம் பூசப்பட்டு வேலைகள் நடைபெற்றுக் கொண்டிருந்திருந்ததால், சிவப்பு கோபுரமாகத் தெரிந்திருக்கிறது.

அது என்ன லால்குடி – ‘லால்’ என்றால் சிவப்பு ‘குடி’ என்றால் கோபுரம் என்று பொருளாம் என்று கேட்டிருக்கிறான். அப்படி அவன் கேட்டதால் திருத்தவத்துறை மறைந்து “லால்குடி” எனும் சொல்லே இன்றளவும் நிலைத்துவிட்டதாம். இப்போது தெரிந்த பெயர் லால்குடி!

ஆனால் தமிழக அறநிலையத்துறை ஆவணங்களில் ‘திருத்தவத்துறை’ என்று இன்றளவும் இடம் பெற்று வருகிறதாம். ஆவணங்களில் இருக்கறப்ப, எத்தனையோ தெருப் பெயர்களை அவ்வப்போது மாற்றும் போது, திருத்தவத்துறை என்று ஏன் மாற்றிடக் கூடாது? என்று தோன்றியது. திருத்தவத்துறை ஜெயராமன், திருத்தவத்துறை பாலமுரளிக்கிருஷ்ணா என்றால் டக்கென்று புரிபடுமா?

சில்லு - 3 - ஞானப்பழைத்தைப் பிழிந்து... வகுப்பு முடிந்து Entertainment! 

ஞானப்பழத்தை இந்தக் குட்டிப் பெண் பிழிவதைக் கேட்டுப்பாருங்க. கடினமான பாட்டு! எவ்வளவு அருமையாகப் பாடுகிறாள் இக்குட்டிப் பெண் அவனி! நான் ரசித்துக் கேட்டேன். நீங்களும் ரசிப்பீங்க என்று நினைக்கிறேன். ஒரு வேளை நீங்கள் முன்பே கேட்டிருக்கலாம். கொசுறுச் செய்தி – இக்குட்டிப் பெண் புற்று நோயுடன் போராடிக் கொண்டிருக்கிறாள். விரைவில் கீமோதெராப்பி முடியப் போகிறதாம். பாட்டின் சுட்டி கீழே. 

https://www.facebook.com/ZeeKeralam/videos/saregamapa-keralam-lil-champs-avani-fri-sun-9-pm-zee-keralam/441324770703106/

காணொளி முகநூலில் இருந்து 

சில்லு 1 ல் உள்ள பல தகவல்கள் இணையத்தில் கட்டுரைகளில் இருந்து எடுக்கப்பட்டவை. சில்லு 2 ன் தகவலும் இணையத்திலிருந்து.

படங்கள் - இணையத்திலிருந்து எடுக்கப்பட்டவை

-------கீதா