நான் அவளில்லை......?!

 

"நான் அவனில்லை" திரைப்படத்தில் வரும் ஹீரோ போல் பல பெண்களை மணம் புரிந்து அவர்களிடமிருந்து பணம், நகை எல்லாம் கொள்ளையடித்த பிறகு, அவர்களை விடுத்து வேறு பெண்கள் சிக்குவார்களா என்று, பல ஆண் ஹீரோக்கள் நம் சமுதாயத்தில் நம்மிடையே உலவி வருவதை நாம் செய்திகளில் பார்க்கின்றோம். என்ன..."நான் அவனில்லை" படத்தில் ஹீரோ போலீசிடம் சிக்கி, கோர்ட்டுக்குப் போனாலும் "நான் அவனில்லை" என்றுத் தப்பிக்க முடிந்தது!  சினிமா என்பதால்...ஆனால் நிஜத்தில் இப்படி ஏமாற்றும் ஆண்கள் போலீசில் சிக்கினால் முட்டிக்கு முட்டிதான்! தப்பித்தும் இருக்கலாம்தான்! யாரறிவர்? ஆண்களைப் போன்று பெண்களும், இது போன்று, "நான் அவளில்லை" (?!) என்று பல ஆண்களை  மணம் புரிந்து அவர்களிடமிருந்து நகை, பணம் எல்லாம் கொள்ளையடிப்பதை வாசிக்கும் போது மிகவும் ஆச்சரியமாக இருக்கின்றது! பெண்களுமா?! என்று. இப்படிப் பல பெண்கள் இருப்பதாகத் தெரிகின்றது! அதில் ஒன்றுதான் இங்கே!

கடந்த மாதம் கேரளா, கோட்டயம் அருகே சிங்கவனம் வெள்ளுத்துருத்தியைச் சேர்ந்த 40 வயதைக் கடந்த சசிதரன் என்பவர் தனக்கு ஏற்ற மணமகள் தேவை என்று செய்தித்தாளில் விளம்பரம் கொடுத்திருந்திருக்கின்றார்.  தன் வாழ்கைத் துணையாக வரவிருக்கும் முகம் தெரியாத அந்த அழகியைப் பற்றிச் சிந்தனையில் எப்போதும் மிதந்த ஆட்டோ ஓட்டுனரான அவருக்கு, நல்ல காலம் விபத்து எதுவும் ஏற்படவில்லை!  சில நாட்களுக்குப் பிறகு எர்ணாகுளத்திலிருந்து ஒருவர், கணவரை இழந்த தனது தங்கைக்காகத், தான் தொடர்பு கொள்வதாகச் சொல்லி, விவரங்களைக் கேட்டறிந்துவிட்டு, "உங்களைப் பற்றி விசாரித்து அறிந்த பின் உங்களை மீண்டும் தொடர்பு கொள்கின்றேன்" என்றும் சொல்லி இருக்கிறார்.  அதன் பின் சசிதரனுடன் பேசியதெல்லாம், மணப்பெண்ணான சாலினிதான். சசிதரனின் ஊரருகே இருக்கும் தனது உறவினர்கள் அவரைப் பற்றி நல்ல அபிப்பிராயம் சொன்னதாகவும், தனக்கும் சசிதரனின் குணம் (பேசிக் கேட்டதால்??!!) பிடித்து விட்டதாகவும், நேரில் சந்தித்து, பின்னர் இறுதி முடிவு எடுக்கலாம் என்றும் சொல்லியிருக்கிறார். "நல்லவனான என்னைச் சந்தேகித்து விசாரித்தது போல், நற்குணம் (?) படைத்த உங்களை சந்தேகித்து நான் விசாரிக்கப் போவதில்லை" என முடிவு செய்திருப்பாரோ என்னவோ, சசிதரன் அந்தப் பெண்ணைக் குறித்து எதுவும் விசாரிகவில்லை போலும்!

அதன் பின் சசிதரனை ஃபோனில் அழைத்து, "ஆட்டோ ஓட்டுநரான உங்களுக்கு, வக்கீலான என்னை மணமுடிக்க என் அண்ணனுக்கு விருப்பமில்ல.  அதனால், நீங்கள் என்னை பெண் பார்க்க வீட்டுக்கு வர வேண்டாம்.  ஆனால், நான் சங்கனாச்சேரி வருகின்றேன். அங்கு நாம் இருவரும் நேரில் சந்திக்கலாம்" என்று சொல்லியிருக்கின்றார் சாலினி. இருவரும் சந்தித்து தங்கள் விருப்பத்தை தெரிவித்ததோடு மட்டுமல்லாமல், ஃபோனிலும் பேசி தங்கள் உறவை உறுதிப்படுத்தியிருக்கின்றார்கள்! இன்றைய காலகட்டத்தில் பட்டிதொட்டி எல்லாம் அலைபேசிகள் கிடைக்கும் போது....அலைபேசி இருக்கையில் காதல் வளர்க்க உதவியதோ இல்லையோ,  இதில் சம்பந்தப்பட்ட ஆண்களுக்கு இந்த அலைபேசிகள் எதிரிகளாகிப் போயின!

இப்படி செல்ஃபோன் வழியாக உறவு வளர்ந்து வந்த வேளையில், ஒரு நாள், சாலினி, சசிதரனுக்குப் ஃபோன் செய்து, "என் அண்ணியின் உறவினரான ஒருவரை மறுமணம் செய்ய என்னை, என் அண்ணன் ரொம்ப வறுபுறுத்துகின்றார்.  அதனால், நீங்கள் என் வீட்டுக்குத் தெரியாமல் உடனே என்னை மணம் செய்ய வேண்டும்." என்று சொல்ல, சசிதரன், "அப்படியென்றால் நமது திருமணத்தை உடனேயே பதிவு செய்ய வேண்டும்" என்று சொல்ல அதற்கு சாலினி, முதலில் ஏதேனும் ஒரு கோயிலில் தாலி கட்டியபின், திருமணத்தைப் பதிவு செய்து கொள்ளலாம் என்று சொல்லியிருக்கின்றார்.  சசிதரனுக்குச் சந்தேகம் வராதது ஆச்சரியமே! 

ஜீன் 5ஆம் தேதி வெள்ளுத்துருத்தி கோயிலில் திருமணம் என்று முடிவு செய்து, முந்தைய தினம், கல்யாணச் சேலை, மற்றும் தாலிச் செயின் எடுக்க சாலினி, சசிதரனின் உறவினர்களுடன் சென்றிருக்கின்றார்.  தனியேவந்த சாலினியிடம் "திருமணத்திற்காவது தோழிகள் சிலரையேனும் அழைத்துவரவேண்டும்" என்று சசிதரன் சொல்ல, அதற்கு, "தோழிகளை நம்பமுடியாது (?!). அவர்களில் யாரேனும் அண்ணனிடம் நம் திருமணத்தைப் பற்றிச் சொன்னால் பிரச்சினையாகிவிடும்" என்று சொல்லியிருக்கின்றார்.  இப்போதாவது சசிதரனுக்குச் சந்தேகம் வந்திருக்கலாம்!  இல்லை! என்பது ஆச்சரியம்தான்!

கல்யாண நாளான ஜீன் 5 ஆம் தேதி, சாலினி வந்திறங்க, சசிதரனின் நண்பர்கள் அவரைக் கோயிலுக்கு அழைத்துவந்து திருமணமும் நடந்திருக்கின்றது!  அதற்குப் பிறகு இருவரும், பீச்சுக்குச் சென்றிருக்கின்றார்கள். அப்போது சாலினிக்கு அலைபேசியில் அழைப்புவர, "என்னை என் சீனியர் வக்கீல் ஒரு கேஸ் விஷயமாகப் பார்க்கவேண்டுமாம்.  நான் அவரைப் பார்த்துவிட்டு உடனே திரும்புகின்றேன்."  என்று சொல்ல, சசிதரன் தானும் கூட வருவதாகச் சொல்லவும், "வக்கீலுடன் என் அண்ணனும் இருக்கிறார்.  அதனால் நாம் இருவரும் போவது ஆபத்து" என்று சொல்லி, தான் 1/2 மணி நேரத்தில் திரும்பி வருவதாகச் சொல்லிப் போனவர்தான்.  1 மணி நேரம் ஆகியும் வராததால், சாலினியை அலை பேசியில் அழைக்க "ஸ்விட்ச் ஆஃப்" என வரவே, சசிதரன் காவல் நிலையத்தில் புகார் கொடுத்திருக்கின்றார்.  தன் திருமணச் செலவிற்காக சசிதரன் கூட்டுறவு வங்கியிலிருந்து 2 லட்சம் ரூபாய் கடனாகப் பெற்று அதில் 5 பவுன் தங்கச் சங்கிலி வாங்கி சாலினிக்குக் கொடுத்ததுடன், தன் கையிலிருந்த மீதி 50,000 ரூபாயையும் சாலினியிடம் இருப்பதாகவும் புகாரில் குறிப்பிட்டிருக்கின்றார்.

காவல்துறையினர் ஒரே வாரத்தில், பழனியில் தலைமறைவாய் வாழ்ந்த (ஆண்டியப்பன், ஆண்களை ஆண்டியாக்கும் தன்னைக் காப்பான் என்று சாலினி நினைத்திருக்கலாம்!!!) சாலினியைக் கைது செய்த போதுதான் சாலினி என்னும் கல்யாண வீராங்கனை பல காரணங்களால், இது போன்று தாமதமாகத் திருமணம் செய்ய விரும்புபவர்களைத் தேடிக் கண்டுபிடித்து மணம் செய்து, மண நாளிலேயே நகை மற்றும் பணத்துடன் ஓடும் பழக்கமுடையவர் என்று தெரிய வந்திருக்கின்றது! இது போல பலதரப்பட்ட, நல்ல வேலையிலிருக்கும் ஆண்களை மணந்து, அவர்களிடமிருந்து, நகைகள், பணம், செக்குகள் என்று பலதும் கவர்ந்து சென்றிருந்திருக்கின்றார். வக்கீல் ஒருவரும், வக்கீல் என்று சொல்லிய இவரால் ஏமாற்றப்பட்டிருக்கின்றார் என்பது இன்னும் ஆச்சரியம்!  பெண் என்றால் பேயும் இரங்கும் என்பது இதுதானோ?!  ஏமாற்றப்பட்டவர்கள் வெளியில் சொல்ல வெட்கப்பட்டு போலீசில் புகார் செய்யாததால், தனிக்காட்டு ராணியாய் "நான் அவளில்லை" என்று திரிந்த சாலினியைப் பற்றியச் செய்தி வெளி வந்ததும், பலரும் அவரைப் பற்றிப் புகார் செய்யத் தொடங்கியிருக்கின்றார்கள். ஆனால், பாதிக்கப்பட்டவர்கள் ஆண்கள் ஆனதால், அவர்கள் பரிதாபத்திற்குரிவர்கள் அல்ல என்று ஆகிவிடுவதில்லையே!......  

குற்றம்புரிந்தவர் ஆணோ, பெண்ணோ, யாராக இருந்தாலும் அவர் செய்த குற்றத்திற்குத் தண்டனை தரத்தானே வேண்டும்?  ஏமாறுபவர்கள் இருக்கும்வரை ஏமாற்றுபவர்கள் இருக்கத்தான் செய்வார்கள்!  எனவே, இது போன்ற திருமண விளம்பரங்களில் எப்போதும், எல்லோரும் விழிப்புணர்வோடு இருக்க வேண்டியது மிக மிக அவசியம்!

எப்பொருள் யார்யார்வாய்க் கேட்பினும் அப்பொருள்

மெய்ப்பொருள் காண்பது அறிவு.