தென்னகத்தின் முதல் டெஸ்ட் ட்யூப் பேபிக்கு ஒரு பேபி

அம்மா என்பது தமிழ் வார்த்தை

அதுதான் குழந்தையின் முதல் வார்த்தை

அம்மா இல்லாத குழந்தைகட்கும்

ஆண்டவன் வழங்கும் அருள் வார்த்தை

– கவிஞர் கண்ணதாசன்

எந்தப் பெண்ணுமே தன்னை அம்மா என்று அழைக்க ஒரு குழந்தை வராதா என்ற ஏக்கம் உடையவளாகவும், தான் தாய்மை அடைவதைப் பெருமையாகவும் எண்ணுபவள். ஒரு பெண் இந்த உலகத்தில் மிகப் பெரிய அளவில் மகிழ்ச்சி கொள்ளும் தருணம் என்றால், அது அவள் தாய் எனும் நிலையை அடையும் பொழுதுதான்.  தாய்மை என்பது பெண்களுக்குக் கடவுள்/இயற்கை கொடுத்த ஒரு வரப்பிரசாதம்.  சுமைகளைத் தாங்க சக்தி இல்லாதவர்கள், பலவீனமானவர்கள் என்று சொல்லப்பட்டாலும், ஒரு பெண்தான், ஒரு உயிரையே மிகவும் பாதுகாப்பானத் தனது கருவறைப் பையில், ஒரு மாதமல்ல, 10 மாதங்கள் சுமந்து, வலியையும் பொறுத்து, பட்ட கஷ்டங்கள் எல்லாம் “குவா” (அவள் காதில் மட்டும் அம்மா என்ற சப்தம் தான் கேட்கும்) என்ற சத்தத்துடன் வெளி வரும் அந்த மென்மையான மலர் போன்ற அந்த பிஞ்சின் ஸ்பரிசத்தில் இந்த உலகையும், தன்னையுமே மறப்பவள். 

ஆண்கள் எத்தனைதான் தங்களை உயர்வாகக் கருதிக் கொண்டாலும், ஒரு உயிரை சுமந்து பரிசாகத் தருபவள் பெண்தான். மிகவும் உயர்வான, உயரமான பரிமாணத்திற்குச் உவகையுடன் அழைத்துச் செல்லும் தருணம் அது. அந்தத் தருணத்தை நமது பதிவர் ராஜி அவர்கள் தனது வலைத்தளத்தில், தன் முதல் பெண்ணின் சமீபத்த பிறந்தநாள் அன்று “முதன் முதலாய் அன்னை என்னும் பட்டம் தந்தவளின் பிறந்த நாள்” என்றுத் தலைப்பிட்டு, எப்படி அழகான புதுக்கவிதையாய் வடித்திருக்கின்றார் பாருங்கள்!  தாய்மை பெருமையுடன் மிளிர்கின்றது! “இன்று என் மகளாய் பிறந்தாய்  முதன் முதலாய் “அம்மா” என்னும் பட்டம் பெற்றேன் உன்னால்...”

கீழே உள்ள சுட்டியைக் கொஞ்சம் சொடுக்கித்தான்  பாருங்களேன்!!

http://rajiyinkanavugal.blogspot.in/2014/07/blog-post_19.html

பெண்கள் உலகமே பெருமிதம் கொள்வது

தாய் எனும் பெயரைத் தாங்கும் போதல்லவா?

அன்பே என்கிற அழைப்பை விடவும்

ஒரு பெண் அதிகம் எதிர்பார்ப்பது

அம்மா என்கிற அழைப்பை அல்லவா? - கவிஞர் மு. மேத்தா

            தாய்மை பற்றிய இந்த அழகான வரிகள் கவிஞர் மு. மேத்தாவினுடையது! (சங்க இலக்கியங்களில் “தாய்மை” பாடல்களைச் சுமந்து வந்து அவை என்ன சொல்லுகின்றன என்று சொல்ல, விஜு ஐயா அவர்களும், சகோதரி தேன்மதுரத்தமிழ்க்ரேஸ் அவர்களும், “தாய்மை” கவி சுமந்து வந்து, சகோதரி இளமதியும், ஃப்ரான்ஸ் கம்பன் கழகத் தலைவர் கவிஞர் அவர்களும், நம்மைத் தாலாட்டுவார்கள் என்று நம்புகின்றோம்!)

                  "குழந்தை மொழி"யைக் கேட்க சகோதரி அருணா செல்வம் அவர்களின் இந்தச் சுட்டியைச் சொடுக்குங்கள்.  http://arouna-selvame.blogspot.com/2014/07/blog-post_28.html

            இப்படிப் பார் போற்றும் தாய்மையை அடைய முடியாத நிலையில், 24 வருடங்களுக்கு முன்பு, அன்று திருமதி ராமமூர்த்தியும், 45 வயதான வி.ராமமூர்த்தியும், ஆஸ்திரேலியாவிலிருந்து உயர்கல்வி கற்றுத் திரும்பிய டாக்டர் கமலா செல்வராஜை அணுகி குழந்தையில்லாக் குறையைச் சொல்ல, அவர்களைப் பரிசோதித்த டாக்டர், உலகெங்கும், பல இடங்களிலும் வெற்றிகரமாக நடந்து வந்த/ வரும் டெஸ்ட் ட்யூப் பேபிகளைப் பற்றியும், அதன் மூலம்தான் அவர்களுக்குக் குழந்தை கிடைக்க வாய்ப்பு என்றும் சொல்லி இருக்கிறார்.

திருமதி/திரு. ராமமூர்த்தி, தங்களுக்கும் அப்படியேனும் ஒரு குழந்தை வேண்டுமெனச் சொல்ல, தென்னகத்திலேயே முதல் “டெஸ்ட் ட்யூப்” குழந்தை அப்படியாகச் சென்னை ஜி.ஜி. மருத்துவமனையில் பிறந்தது. திருமதி ராமமூர்த்திக்கு அன்றைய மனநிலை எப்படி இருந்திருக்கும்?! அதுவரை, தன்னை அம்மா என்று அழைக்க ஒரு குழந்தை இல்லையே என்று, பல வேண்டுதல்களுக்கும், வார்த்தைகளுக்கும், மன வேதனைகளுக்கும் உட்பட்டு இருந்தவருக்கு, மகத்தான மருத்துவ வளர்ச்சியால், தன்னை அம்மா என்றழைக்க ஒரு மழலைச் செல்வம் பிறந்ததே என்று அளவற்றப் பூரிப்படைந்திருப்பார்! ஆனந்தக் கண்ணீர் சொரிந்திருப்பார்! இறுதியில், மகள், மனைவி என்ற ஸ்தானத்திற்கெல்லாம் மேம்பட்ட “அம்மா” என்ற அந்த ஸ்தானத்தை அடைந்த சந்தோஷத்தில் மிதந்திருப்பார்.  அதுவும் பல வருடத் தவத்திற்குப் பின்! இதுவும் தாய்மைப் பேறுதான்!

 திரு. ராமமூர்த்தி, டாக்டரின் உதவியால் கிடைக்கப் பெற்ற அக் குழந்தைக்குத் தன் நன்றியைத் தெரிவிக்கும் விதத்தில், டாக்டரின் பெயரையும் சேர்த்து “கமலரத்னா” என்று பெயரும் சூட்டினார்.  அந்தக் கமலரத்னா 24 ஆண்டுகளுக்குப் பிறகு அதே மருத்துவமனையில், அதே டாக்டரின் உதவியால் சில தினங்களுக்கு முன் அறுவை சிகிச்சை மூலம் ஒரு குழந்தைக்கு உயிர் கொடுத்து தாயாகி இருக்கின்றார். 

தனக்கு மகளைத் தந்த டாக்டர் கமலா செல்வராஜ் கையால், தன் பேரக் குழந்தையை கையில் வாங்கிய அந்தத் தாத்தாவின் மகிழ்ச்சிக்கு எல்லையே இல்லை. அவருக்கு ஒரே ஒரு வருத்தம்.  இவ்வினிய வேளையில் தன் மனைவி தன்னுடன் இல்லையே என்பதுதான்.  டாக்டர் கமலா செல்வராஜ் பிரபலமான ஒரு மருத்துவர் மட்டுமல்ல. பிரபலமான ஒரு திரைப்பட நடிகரின் மகளும் கூட.  “காதல் மன்னன்”  என்று அழைக்கப்பட்ட, எப்போதும் வஞ்சிக்கோட்டை வாலிபனாக வலம் வந்த, மறைந்த நம் நடிகர் ஜெமினி கணேசன் அவர்கள் தான் அவரது தந்தை.

நீங்களும் இந்தச் செய்தியைத் செய்தித் தாள்களில் படித்திருப்பீர்கள்தான்! தாயும், சேயும், தாத்தாவுடன் நலமாய் வாழ நாமெல்லாம் வாழ்த்துவோம்.  கூடவே இது போன்ற வியக்கத்தக்க மருத்துவச் சேவைகள் செய்து, நீண்ட காலம் ஆயுளும், உடல் நலமும் பெற்று வாழ, டாக்டர் திருமதி கமலா செல்வராஜையும் உளமார வாழ்த்துவோம்!

இந்தப் பதிவை எழுதிவிட்டுக் கோயிலுக்குச் சென்ற போது சில காட்சிகள் கண்களில் பட, இப்படி எழுதத் தோன்றியது.

தாய்மை வேண்டி

தகிக்கும் வெயிலிலும்

அரசமரம் சுற்றுவோர் கண்ணில்

‘அம்மா’ என்றழைக்க

அழைத்திடாரோ எம்மை என

அதே வெயிலில்

அனாதைகளாய் ஏங்கி நிற்கும்

அக்குழந்தைகள் படாதது ஏனோ?!

படங்கள் : இணையத்திலிருந்து.